Ҳоҷӣ Барот, яке аз тоҷирон гуфт, ангишти қирғизӣ барои он гарон шудааст, ки аз тариқи Узбекистон ба Тоҷикистон ворид мешавад. "Ин ангиштро аввал тоҷирони узбек аз Қирғизистон мехаранд ва баъд ҳаққи худашонро монда, ба мо мефурӯшанд. Дар ин ҳолат, албатта нарх боло меравад,"-афзуд ин тоҷир.
Соли 2021 баъди як муноқиша дар марз, Қирғизистон сарҳадҳои худро ба рӯи Тоҷикистон баст ва додугирифти ду кишвар якбора кам шуд.
Тоҷирон ва ҳам сокинон дар Тоҷикистон мегӯянд, сифати ангишти қирғизӣ дар қиёс ба ангишти Тоҷикистон беҳтар аст ва барои ҳамин талабгори он зиёд аст. Феълан як кг ангишти маҳаллӣ дар бозорҳои Тоҷикистон то 1,30 сомонӣ аст.
Ҳамасола дар фасли сармо бо ҷорӣ шудани лимит ё маҳдудияти нерӯи барқ, талаботи сокинон ба ангишт бештар мешавад.
Моҳи августи имсол Вазорати саноати Тоҷикистон хабар дод, ки дар нимаи аввали соли равон дар кишвар беш аз 940 ҳазор тонна ангишт истихроҷ шудааст, ки нисбат ба ҳамин давраи соли гузашта 195 ҳазор тонна бештар аст.
