Дар чанд ҷумла
"Ба онҳо дар ҷойи дигар хона месозем." Изҳороти нави Ҷабборов дар бораи марз
Мақомоти Қирғизистон ва Тоҷикистон ҳангоми нишонагузории сарҳад эҳтимол баъзе аз шаҳрвандони худро мекӯчонанд. Дар ин бора президенти Қирғизистон Содир Ҷабборов (Жапаров) дар мусоҳиба бо хабаргузории давлатии "Кабар" иттилоъ дод.
Ҷабборов дар шарҳи созиши ҳосилшуда бо Тоҷикистон гуфтааст, "мо деҳаҳои наздимарзие дорем, ки мисли тахтаи шоҳмот ҷойгир шудаанд ва хонаҳои мардум дар дохили ҳамдигар қарор доранд."
"Агар дар тарафи мо хонаҳое бошанд, ки ба шаҳрвандони Тоҷикистон тааллуқ доранд, пас, ҷониби Тоҷикистон сокинонро мекӯчонад. Агар хонаи шаҳрвандони мо дар тарафи онҳо бошад, мо онҳоро кӯч медиҳем. Ба онҳо дар ҷойи дигар хона месозем," -- афзуд Содир Ҷабборов (Жапаров).
Ба гуфтаи раисҷумҳури Қирғизистон, агар кӯчондани сокинони минтақаҳои марзӣ анҷом нашавад, муҳофизати сарҳад мушкил хоҳад шуд.
"Мо тақрибан ҳазор километр хати марз дорем. Дар бисёре аз минтақаҳо қитъаҳои баҳсбарангез буданд. Дар баъзе ҳолат ин қитъаҳо баробар тақсим шуданд," -- гуфт раисҷумҳури Қирғизистон.
Шарҳи ҷониби Тоҷикистон дар ин замина дастрас нест.
Тоҷикистон ва Қирғизистон тақрибан ҳазор километр марз доранд. Номуайянӣ дар сарҳад дар солҳои 2021 ва 2022 сабаби муноқишаи хунин шуд ва аз ҳарду ҷониб даҳҳо куштаву захмӣ бар ҷой гузошт.
Мақомоти Тоҷикистону Қирғизистон дар моҳи декабри соли 2024 хабар доданд, ки марзнигориро ба поён расонданд. Қадами баъдӣ имзои ҳуҷҷатҳои байнидавлатӣ дар бораи хати марзи муштарак мебошад. Содир Ҷабборов дар мусоҳибааш гуфтааст, феълан раванди ҳуҷҷатнигорӣ идома дорад.
Ҳамаи давраҳои гуфтушуниди топографҳо ва ҳайатҳои давлатӣ паси дарҳои баста ҷараён гирифта, ҳеч гуна тафсилоте дар бораи минтақаҳои баҳснок расонаӣ нашудааст. Тарафҳо дар бораи он ки хати нави марз кадом қаламравҳоро ба кадом кишвар вогузор мекунад, низ ҷузъиёте надоданд.
Ҳамаи хабарҳои имрӯзро дар инҷо бихонед
Трамп ва Зеленский "мулоқоти созанда" доштаанд
Доналд Трамп, раисҷумҳури Амрико ва Владимир Зеленский, президенти Украина рӯзи 26 апрел дар ҳошияи маросими ҷанозаи поп Франсис, дар Рим, пойтахти Италия, мулоқот карданд.
Ба гузориши хабаргузории "Франс-пресс", ёварони Трамп ва Зеленский аз дидори онҳо хабар доданд.
Кохи Сафед ва дафтари раисҷумҳури Украина тасдиқ карданд, ки Доналд Трамп Владимир Зеленский пеш аз маросими ба хоксупории поп, ба таври кутоҳ дар Рим мулоқот карданд.
Ба иттилои Кохи Сафед, "онҳо имруз ба таври хусусӣ мулоқот карда ва гуфтугӯе бисёр созанда доштанд" ва тафсилоти бештар, дертар нашр хоҳад шуд.
Ин нахустин мулоқоти онҳо пас таниши лафзӣ дар Кохи Сафед буд. Президенти Амрико талош дорад, то украиниҳоро ба созиши сулҳ бо Русия водор кунад.
Вазирони хориҷии Тоҷикистону Чин дар Алмато мулоқот карданд
Вазирони корҳои хориҷии Тоҷикистон ва Чин дар ҳошияи нишасти шашуми вазирони корҳои хориҷии қолаби "Осиёи Марказӣ-Чин", мулоқот карданд. Ин нишаст рӯзи 25 апрел дар шаҳри Алматои Қазоқистон доир шуд.
Дафтаи матбуоти Вазорати корҳои хориҷии Тоҷикистон мегӯяд, ки дар ин мулоқот Сироҷиддин Муҳридди ва Ван И дурнамои робитаҳои Тоҷикистону Чин ва рушди робитаҳо миёни ду кишвар дар арсаҳои мухталифро баррасӣ кардаанд.
Ба иттилои расонаҳои давлатӣ, Сироҷиддин Муҳриддин зимни суханронӣ дар ин ҳамоиш мавқеи Тоҷикистонро оид ба тақвияти ҳамкориҳо дар чаҳорчӯб ё қолаби "Осиёи Марказӣ-Чин", баён кардааст.
Дар ҳоли ҳозир Чин яке аз сармоягузорони асосӣ дар иқтисоди Тоҷикистон ба шумор меравад.
Ин кишвар то оғози солҳои 1990-ум қариб ҳеҷ гуна иртиботе бо Тоҷикистон надошт, аммо дар солҳои соҳибистиқлолии кишвар ба бузургтарин сармоягузор ва шарики тиҷорӣ бадал шуд. Давоми даҳ соли ахир Чин ба иқтисоди Тоҷикистон 2,6 миллиард доллар сармоягузорӣ кардааст.
Аммо нигарониҳо аз шаффоф набудани қарзу сармояҳои Чин дар Тоҷикистон зиёд аст ва таҳлилгарон тақвияти нуфузи ҳамсоякишвари азим барои Тоҷикистонро хатарнок медонанд.
Маросими видоъ бо поп Франсис бо ҳузури раҳбарони ҷаҳон
Маросими видоъ бо Поп Франсис, раҳбари 266-уми католикҳои ҷаҳон, имруз, 26 апрел, дар Ватикан баргузор шуд. Раҳбари калисои румии католикҳо, рӯзи 21-уми апрел дар 88-солагӣ даргузашт.
Дар Ватикан ва Рим чораҳои сахти амниятӣ рӯи даст гирифта шудааст. Ба гуфтаи Ватикан, 200 ҳазор нафар дар маросими хоксупории Поп Франсис ҳузур доштанд.
Раисҷумҳури Амрико ва ҳамчунин даҳҳо тан аз раҳбарон ва мақомҳои баландпояи кишварҳои ҷаҳон барои ширкат дар ин маросим ба Ватикан рафтаанд. Ин нахустин сафари байналмилалии Трамп дар давраи дувуми президентиаш ба шумор меравад.
Бинобар эълони Ватикан, ҳудуди 50 раиси кишвар, аз ҷумла, президентҳои Аргентина, Фаронса, Олмон, Италия, Филиппин, Лаҳистон ва нахуствазирҳои Бритониё, Зеландияи Нав, ва ҳамчунин бисёре аз аъзои хонаводаҳои подшоҳии Аврупо, барои ширкат дар ин маросим ба Рум рафтаанд.
Ин зодаи Аргентина аз соли 2013 ва пас аз истеъфои Бенедикти шонздаҳум калисои румии католикро роҳбарӣ мекард ва бо рафтори хоксорона, дифоъ аз адолати иҷтимоӣ ва талошҳояш барои густариши мудоро машҳур буд.
Ӯ, дар давраи раҳбарияш бар калисои румии католикӣ зиёда аз 60 давлатро зиёрат кардааст ва сафари охирини худро дар теппаҳои канори пойтахти Италия ба поён мерасонад.
Одатан раҳбарони калисои румии католикӣ дар Ватикан ба хок супурда мешаванд, аммо Франсис хилофи анъана амал кард. Вай дар соли 2023 ҳангоми суҳбат бо телевизиони Мексика дархост намуд, ки хоксорона дар канори як калисои наздикиҳои шаҳри Рум дафн карда шавад.
Муҳоҷирони афғон мегӯянд, ки бо хатари ихроҷ аз Тоҷикистон рӯбарӯ ҳастанд
Шуморе аз муҳоҷирони афғон мегӯянд, ки Тоҷикистон ахиран теъдоде аз афғонҳоро, ки дар Комиссариати олии Созмони Милали Муттаҳид барои паноҳандагон, низ сабт буданд, аз ин кишвар берун кардааст.
Онҳо бо нигаронӣ аз ин вазъият, аз ҳукумати Тоҷикистон мехоҳанд, ки бинобар ҳолати феълӣ ва вазъи бади ҳуқуқи башар дар Афғонистон, тасмимҳои худ роҷеъ ба ихроҷи паноҳандагони афғонро бозбинӣ кунанд.
Мақомоти тоҷик то кунун ба таври расмӣ дар робита ба гузоришҳо оид ба ихроҷи ахири паноҳандагони афғон, ибрози назар накардаанд.
Яке аз паноҳандагони афғон, ки ба далели ҳассосияти мавзӯъ нахост аз ӯ ном бурда шавад, ба шарти тағйири садо ба Радиои Озодӣ гуфт, "шуморе аз афғонҳоеро, ки дар UNHCR сабт буданд, ихроҷ карданд. Яке аз дӯстҳои мо буд, ки инҷо ронандаи таксӣ буд. Ӯ бечораро ҳам ихроҷ карданд. То кунун аз ӯ хабаре надорем. Дар Афғонистон ҳам вазъият бисёр бад аст. Агарчӣ инҷо низ бо мушкили зиёде рӯбарӯ ҳастем, вале боз ҳам Тоҷикистон набояд моро ба Афғонистон ихроҷ кунад. Хеле нигарон ҳастем".
Яке дигар аз муҳоҷирони афғон, ки ӯ низ нахост номаш дар гузориш гирифта шавад, дар суҳбат бо Радиои Озодӣ гуфт, "боздошт мекунанд ва ба он тарафи марз мефиристанд. Ҳамин дирӯз ё як рӯз қабл аз он, афғонҳоро аз шаҳри Ваҳдат гирифтанд ва ба он тарафи марз фиристоданд. Садои касеро намешунаванд. Маълум нест, ки сарнавишти ин муҳоҷирон чӣ мешавад?"
Радиои Озодӣ дар миёнаҳои ҳафтаи ҷорӣ хабар дода буд, ки нерӯҳои амниятии Тоҷикистон 47 паноҳҷӯйи афғонро аз кишвар берун карда, ба Афғонистон баргардондаанд.
Ба қавли як манбаи Радиои Озодӣ, аксари паноҳҷӯёни ихроҷшуда дар шаҳри Ваҳдат зиндагӣ мекарданд ва асосан ба таксиронӣ машғул буданд.
Ин паноҳандагон аз гузаргоҳи марзии Панҷи Поён-Бандари Шерхон, ба Афғонистон ихроҷ шуданд.
Ба иттилои расонаҳо, дар миёни ихроҷшудаҳо, ба ҷуз ронандагони таксӣ, касоне, ки барои харид ба бозор рафта буданд, низ боздошт ва ихроҷ шудаанд.
На масъулини сафорати ҳукумати пешини Афғонистон дар Душанбе ва на консулгарии таҳти контроли Толибон дар Тоҷикистон, ба пурсишҳои Радиои Озодӣ дар мавриди ихроҷҳо посух надоданд.
Мақомоти Тоҷикистон ҳам дар ин бора расман шарҳе надодаанд.
Абдумусаввир Баҳодурӣ, мудири намояндагии муҳоҷирони афғонистонии "Ориёно" дар Тоҷикистон боздошти муҳоҷирони афғонро рад ваё тасдиқ накард, вале дар суҳбат ба Радиои Озодӣ гуфт, "мақомоти Тоҷикистон бадрафторӣ намекунанд, дар сурати нақзи қонун, муҳоҷирро даъват мекунанд ва масъалаи ихроҷашро баррасӣ мекунанд".
Ҳазорон паноҳҷӯи афғон аз чанд даҳсола ба ин тараф, ба вижа пас аз бозгашти Толибон ба қудрат дар Афғонистон, ба Тоҷикистон паноҳ овардаанд. Ҳукумати Тоҷикистон пеш аз ин низ даҳҳо муҳоҷири афғонро аз ин кишвар берун карда буд.
Ба иттилои Комиссариати олии Созмони Милал дар умури паноҳандаон, танҳо дар моҳи декабри соли 2024-ум 80 афғонистонӣ аз Тоҷикистон ба ватанашон фиристода шуданд. Ба иттилои ин ниҳод, бисёре аз ин афрод, санад ва корти паноҳандагӣ доштанд.
Мақомоти Тоҷикистон дар ин бора на омор ва на шарҳе намедиҳанд. Комиссариати олии Созмони Милал дар умури паноҳандаҳо борҳо аз ихроҷи гурезаҳои афғонистонӣ нигаронӣ карда, аз мақомоти Тоҷикистон хоста буд, ин корро бас кунанд.
Шойгу: Афғонистон мавзуи меҳварии нишасти Маскав хоҳад буд
Cергей Шойгу, раиси Шӯрои амнияти миллии Русия мегӯяд, ки масъалаи Афғонистон яке аз мавзуъҳои муҳим дар барномаи нишасти байналмилалии Маскав хоҳад буд.
Қарор аст ин нишасти серӯза 27 май дар Маскав оғоз шавад ва намояндагони ҳудуди 150 кишвар дар он иштирок кунанд.
Хабаргузории русии ТАСС ба нақл аз Шойгу гузориш додааст, ки мавзуи Афғонистон дар баробари масъалаҳои дигар, дар сиёсати хориҷии Русия аз авлавият бархӯрдор аст.
Русия робитаҳои наздике бо ҳукумати Толибон дар Афғонистон дорад. Маскав ҳафтаи гузашта номи Толибонро аз феҳристи гурӯҳҳои террористӣ берун кард ва эълон намуд, ки сафири ин гурӯҳро дар Маскав хоҳад пазируфт.
Бо ин ҳол, монанди бисёре аз кишварҳои дигар, Русия низ режими Толибонро ба таври расмӣ ба расмият нашнохтааст.
Даргирӣ миёни марзбонони Ҳинд ва Покистон
Мақомҳои покистонӣ рузи 25 апрел эълон карданд, ки нерӯҳои Ҳинд ва Покистон, дар марзи Кашмир ба сӯи якдигар тирандозӣ карданд.
Ин табодули оташ ҳамзамон бо афзоиши танишҳо миёни ин ду қудрати ҳастаии рақиб пас аз ҳамлаи маргбор дар минтақа, сурат мегирад.
Ба гуфтаи ниҳодҳои истихборотӣ, нерӯҳои ҳиндӣ шабона ба яке аз постгоҳҳои марзии Покистон тирандозӣ карданд.
Яке аз мақомҳо ба хабаргузории Олмон гуфтааст, "нерӯҳои мо бо силоҳи сабук оташро посух доданд. Дар ҳоли ҳозир табодули оташ қатъ шудааст".
Ӯ афзуд, ки то кунун гузорише аз талафоти ду тараф дарёф нашудааст.
Ин даргирӣ дар ҳоле рух дод, ки таниш миёни ин ду кишвар пас аз ҳамлаи рӯзи 22 апрел ба гардишгарон дар бахши ҳиндии Кашмир, боло рафтааст. Дар ин ҳамла 26 нафар кушта шуданд. Ҳинд ҷониби Покистонро ба даст доштан дар ин ҳамла муттаҳам кард. Покистон рад кардааст.
Дар пайи ин ҳамла, Ҳмнд ва Покистон якгона гузаргоҳи фаъоли заминии худро бастанд, мубодилаи тиҷорат қатъ шуд ва дастури ихроҷи шаҳрвандони якдигарро содир карданд.
"Дар ҳолати вазнин ҳастанд." Бархӯрди шадиди се мошин дар Кӯлоб
Дар як тасодуфи роҳ дар шаҳри Кӯлоб се мошин бо ҳам бархӯрда, ду кас осеби сахт дидаанд.
Ҳодиса баъд аз зуҳри 24-уми апрел дар маҳаллаи Саидалӣ Вализода, ки бо номи ба номи Хирмано маъруф, рӯй дод.
Муҳиддин Олимови 30-сола ва Амирҷон Давлатови 29-сола дар шуъбаи эҳё бистарӣ ҳастанд.
Дар бемористони ба номи Ҳақназарови шаҳри Кӯлоб ба Радиои Озодӣ гуфтанд, ки "ҳарду дар ҳолати вазнин ҳастанд. Аз мағзи сар то шикастани дасту пой ҳаст."
Дар навори дурбинҳои сари роҳ дида мешавад, ки як мошин бо суръати баланд ба самти муқобили роҳ баромада, бо як "Тангем" ва як "Опел" бархӯрдааст. Аксу наворҳои зиёде низ дар шабакаҳои иҷтимоӣ нашр шуд.
Садама ё тасодуфҳои нақлиётӣ дар Тоҷикистон дар соли 2024 сабаби марги 552 кас шудааст.
Вазорати корҳои дохилии Тоҷикистон хабар дод, ки дар ин сол ҷамъан зиёда аз 1200 садама рух дод.
Беш аз 1350 каси дигар маҷруҳ гаштаанд. Аз ин шумора дар соли 2024 122 ҳолати он ба вилояти Хатлон рост меомадааст, ки 67 нафар ҷони худро аз даст дода, 134 нафари дигар ҷароҳат бардоштаанд.
Суръати баланд, дар ҳолати мастӣ рондани мошин ва беэътиноӣ ба қоидаву қонуни ҳаракат сабаби маргумир дар роҳҳо гуфта мешавад.
Путин бо фиристодаи вижаи Трамп дар Маскав мулоқот кардааст
Президенти Русия Владимир Путин рӯзи 25-уми апрел бо Стивен Уиткофф, фиристодаи вижаи Доналд Трамп, раисҷумҳури Амрико мулоқот дошт.
Аз моҳи феврал ба ин сӯ бори чорум аст, ки онҳо якдигарро мебинанд.
Хадамоти матбуотии президенти Русия суҳбати Путинро ва Уиткофф тасдиқ кард.
Стивен Уиткофф рӯзи ҷумъа ба Маскав расид ва пеш аз мулоқот бо раҳбари Бунёди сармоягузории мустақими Русия, Кирилл Дмитриев, дар майдони Арбат сайругашт кард.
Президенти Амрико Доналд Трамп эълон карда буд, ки маъмурияти вай ба қатъи ҳарчи зудтари ҷанг дар Украина ва бастани созиши сулҳ аст.
Генерали рус Ярослав Москалик дар наздикии Маскав кушта шуд
Генерал Ярослав Москалик, низомии баландпояи Русия, дар таркиши мошин дар наздикии шаҳри Маскав кушта шудааст. Ҳодиса рӯзи 25-уми апрел рӯй дод.
Ба иттилои Кумитаи тафтишоти Русия, дар чор моҳи охир ин мансабдори дувуми рус аст, ки дар масофаи наздик ба хонааш кушта мешавад.
Дар робита ба ин ҳодиса парвандаи ҷиноӣ боз ва таҳқиқот шуруъ шудааст. Кумитаи тафтишот хабар дод, ки Москалик рӯзи 25-уми апрел, ҳангоме мехост ба мошинаш наздик шавад, кушта шуд.
Тарҳи "Система"-и Радиои Озодӣ ҳам маълум кард, ки маҳалли таркиш, хиёбони Нестерова, наздик ба бинои зисти низомии рус аст.
"Тибқи иттилои ибтидоӣ, дар натиҷаи таркиш Ярослав Москалик, муовини сардори сарраёсати Ситоди кулли нерӯҳои мусаллаҳи Русия ба ҳалокат расидааст," -- гуфтанд дар Кумитаи тафтишоти Русия.
Навори дурбинҳои назоратӣ лаҳзаи таркишро сабт кардаанд. Бино ба гузориши Baza дар Телеграм, дастгоҳи тарканда замоне ба кор даромад, ки Москалик ба мошинаш наздик шуд.
Вай дар солҳои 2015 ва 2019 дар музокироти “шакли Нормандӣ” дар бораи Украина нақши калидӣ дошт ва соли 2018 дар музокирот бо президенти вақти Сурия, Башор Асад дар ҳайати Русия шомил буд.
Иштироки эҳтимолии ӯ дар ҷанги давомдор дар Украина ба таври ошкоро тасдиқ нашудааст.
Дар моҳи декабри соли 2024 дар пайи таркиши бомбе дар Маскав генерал-лейтенанти рус Икор Кириллов кушта шуда буд. Масъулияти ин ҳодисаро хадамоти иктишофии Украина ба дӯш гирифт.
Боздоштҳо барои ҷалби шаҳрвандони Қирғизистон ба ҷанги Русия дар Украина
Дар Қирғизистон як каси дигарро бо гумони ҷалби шаҳрвандони ин кишвар барои ҷангидан аз ҷониби Русия алайҳи Украина дастгир кардаанд.
Расонаҳои Русия рӯзи 24-уми апрел аз ӯ Виктор Василев ном бурданд.
Хабарнигорони таҳқиқотгар навиштаанд, ки саҳифаи Василев дар Телеграм бахше аз "шабакаҳо"-и Евгений Пригожин, муассиси ширкати муздурони "Вагнер" аст ва эҳтимол худи ӯ бо хадамоти ҷосусии Русия пайванд дорад.
Аз ин пеш бо гумони ҷалби зархаридон дар Қирғизистон чаҳор нафар боздошт шуданд. Рӯзноманигорони бахши қирғизии Радиои Аврупои Озод/Радиои Озодӣ 23-юми апрел ду нафари онҳоро маълум карданд: Наталя Секерина, корманди "Русский дом" ва Сергей Лапушкин, корманди ҳукумати Уш. Додгоҳе дар шаҳри Бишкек қарори ҳабси чор нафарро содир кардааст.
Мақомоти Қирғизистон ҳанӯз нагуфтанд, ки ин афрод чанд касро барои пайвастан ба сафи артиши Русия ҷалб кардаанд. Ин ҳам зикр нашудааст, ки онҳо аз кай ба ин кор машғул буданд.
Наталя Секерина аслан рӯзноманигор аст ва дар Уш, бузургтарин шаҳри ҷануби Қирғизистон, зиндагӣ мекунад. Ӯ дар солҳои охир дар хадамоти матбуотии "Русский дом" дар Уш кор мекард.
Маркази "Россотрудничество" дар Қирғизистон аз боздошти Наталя нигаронӣ кардааст. Дар баёнияи созмон гуфта шудааст, ки ӯ шаҳрванди Қирғизистон аст. "Бовар дорем, ки ҳуқуқи корманди мо ҳифз ва амнияташ кафолат дода мешавад. Умедворем, ки тафтишот мӯйро аз хамир ҷудо мекунад. Пешопеш хотирнишон мекунем, ки Маркази фарҳангии Русия дар доираи созишномаи миёни Русия ва Қирғизистон тибқи қонун амал мекунад," – гуфта шудааст дар баёния.
Дар аксҳо дида мешавад, ки Сергей Лапушкин, корманди ҳукумати Уш, низ дар чорабиниҳои "Русский дом" фаъолона ширкат мекардааст.
Видео дар инҷост:
Сиёсатшинос Эмил Ҷӯраев мегӯяд, "пас аз боздошти Лапушкин суоле пайдо шуд, ки чӣ тавр як корманди ҳукумат ба чунин кор ҷалб шудааст? Ин ҳушдори ҷиддист, ки сохторҳои давлатӣ дар баробари нуфузи кишварҳои дигар осебпазиранд. Уш, бузургтарин шаҳри Қирғизистон, як минтақаи муҳими стратегӣ аст ва ҳар гуна таъсири беруна дар ин ҷо ҳамчун таҳдид ба амнияти миллӣ арзёбӣ мешавад.”
Ин сиёсатшинос афзуд, мақомоти Қирғизистон аз ибтидо ширкати шаҳрвандони ин кишварро дар ҷанги зидди Украина ҷиддӣ гирифтаанд, ҳарчанд Бишкек дар аксар масоил ба Маскав садоқат нишон медиҳад.
"Барои кишвари мо ин як масъалаи муҳими сиёсӣ аст. Агар ба Маскав ҳам хуш наояд, бояд дарк кунад, ки мо чунин беадолатиро қабул надорем, ки дар кишвари мо одамони марбут ба маркази "Русский дом" шаҳрвандонро ба ҷанг ҷалб мекунанд," – шарҳ дод ӯ.
Додгоҳ қарор кард, ки гумонбарон то 17-уми июн дар ҳабс мемонанд. Агар гуноҳашон собит шавад, бо иттиҳоми ҷалб ба ҷанг онҳоро аз 7 то 17 сол зиндон интизор аст.
Дар Қирғизистон то кунун се касро барои ширкат дар ҷанги Украина ба ҷавобгарӣ кашидаанд. Пурсарусадотарин парванда боздошти Аскар Кубаничбек буд, ки додгоҳи Бишкек ӯро ба даҳ сол маҳкум кард ва баъдан бо шарти берун нашудан аз кишвар раҳо намуд. Сипас, ӯ аз Қирғизистон фирор кард ва дар Русия шаҳрвандӣ гирифт ва эълон кард, ки боз ба ҷанг меравад.
Шумораи ҷонбохтагони ҳамлаи Русия ба Киев ба 12 кас расид
Шумораи қурбониёни ҳамлаи Русия ба пойтахти Украина ба 12 кас расид.
Намояндагони шаҳрдории Киев хабар доданд, ки маъмурони наҷот ду ҷасади дигарро аз зери вайронаҳо пайдо карданд.
Ба иттилои Хадамоти давлатии ҳолатҳои фавқулодаи Украина, дар пайи ҳамлаи ҳавоии неруҳои Русия ба шаҳри Киев 90 каси дигар маҷруҳ шудааст.
Артиши Русия шаби 24-уми апрел бо мушак ба пойтахти Украина ҳамла кард.
Рӯзи 25-уми апрел дар Киев мотам эълон шудааст.
Нерӯҳои ҳавоии Украина рӯзи 24-уми апрел эълон карданд, ки Русия шаби гузашта ба минтақаҳои гуногуни ин кишвар 215 паҳпод ва мушак партоб кард, ки шуморе аз онҳо раҳгирӣ ва сарнагун карда шуданд.
Мақомоти Суғд чанд касро барои нақзи қонуни танзим ҷазо доданд
Кормандони пулиси вилояти Суғд мегӯянд, бо назорат аз болои шабакаҳои иҷтимоӣ, чанд нафарро барои вайрон кардани қонуни танзим, ҷазо додаанд.
Акбар Шарифӣ, сухангӯи Раёсати корҳои дохилии Суғд дар наворе чанд намунаро шарҳ додааст.
Дар гузориши мақомот Ганҷина Бобоева, сокини ноҳияи Ашт нишон дода шудааст, ки зодрӯзашро дар як маркази хизматрасонӣ таҷлил кардааст. Навори оростани дастархон ва туҳфагирӣ ба Инстаграм роҳ ёфта, мақомот аз рӯи он Бобоеваро ҷарима кардаанд. Назари ин ҷавондухтар ба ҷарима шуданаш маълум нест.
Дар як ҳолати дигар, Фарангис Маҳмудова, молики мағозае дар шаҳри Хуҷанд ҳам барои гузоштани навори "ҳоҷиошӣ" ҷазо гирифтааст. Дар ҳоле, ки назари Маҳмудова ба қазия маълум нест, мақомот мегӯянд, ӯ баъди сафари ҳаҷ зиёфат ороста, ин ҳолатро дар шабакаҳо гузоштааст ва қонуни танзимро нақз кардааст.
Неъматулло Муминов, сокини шаҳри Истаравшан ҳам барои онки дар вақти тӯйи арусӣ ба сари домоду арӯс пул пошидааст, ҷазо додаанд. Ин лаҳза аз сӯи меҳмоне сабт шуда, дар Инстаграм гузошта шудааст.
Мақомот мегӯянд, ҳамаи ин афродро барои нақзи қонуни танзими ҷашну маросим ҷарима карданд, аммо ҳаҷми онро нагуфтанд.
Қонуни баҳсбарангези танзим, ки мақомот аз он зиёд тавсиф мекунанд, барои маҳдудиятҳои зиёдаш танқидҳоро ба миён овардааст.
Тоҷикистон ва Эрон ният доранд, виза аз масирҳои заминиро ҳам бекор кунанд
Тоҷикистон ва Эрон ният доранд раводид ё виза тариқи роҳҳои заминиро ҳам бекор мекунанд. Ин нукта дар вохӯрии Искандар Муъминӣ, вазири корҳои дохилии Эрон бо раиси ҷумҳури Тоҷикистон Эмомалӣ Раҳмон садо додааст.
Ба гузориши хабаргузории ИРНА, Эмомалӣ Раҳмон гуфтааст, барои рушди муносибатҳои Душанбе ва Теҳрон дар бахшҳои сиёсӣ, мудофиа, фарҳангӣ, иҷтимоӣ ва гардишгарӣ, ҳеч монеа вуҷуд надорад.
Дафтари матбуоти президенти Тоҷикистон ҳам дар бораи дидори Эмомалӣ Раҳмон бо Искандар Муъминӣ хабар дода, аммо ба мавзӯи бекор шудани раводид тариқи роҳҳои заминӣ, ишора накардааст.
Ҳанӯз маълум нест, ки ду ҷониб дар ин бора ба кадом созиш даст ёфтаанд.
Тоҷикистон ва Эрон моҳи феврали имсол раводид барои шаҳрвандони ҳамдигарро бекор карданд.
Аммо сафар бидуни виза бо Эрон танҳо аз тариқи роҳи ҳавоӣ миёни ду кишвар имконпазир аст.
Миёни Тоҷикистон ва Эрон феълан ҳафтае се парвоз ҳаст.
Ҳалокати 9 кас дар ҳамлаҳои густурдаи Русия ба Украина
Мақомоти Украина аз ҳамлаҳои густурдаи мушакӣ ва паҳподии шабонаи Русия ба минтақаи гуногуни ин кишвар хабар доданд. Ба гуфтаи онҳо, дастикам 9 нафар дар Киев кушта ва беш аз 70 тан, аз ҷумла шаш кӯдак дар ин шаҳр ва минтақаҳои дигар захмӣ шуданд.
Масъулони шаҳрдории Киев гуфтанд, шуморе аз сокинон дар зери вайронаҳои як бино банд мондаанд. Хадамоти изтирории давлатии Украина дар "Телеграм" эълон кард, ки ҷустуҷӯи афрод аз зери ин бино идома дорад.
Шаҳрдори Харков, дувумин шаҳри калони Украина, низ аз ҳамлаҳои мушакӣ ва паҳподии шабона ба ин шаҳр гузориш дод. Игор Терехов ибтидо аз бархӯрди ҳафт мушак сухан гуфт ва чанд соат баъд эълон кард, ки ҳамлаҳои густурдаи паҳподҳои "Шоҳид" ба Харков идома дорад.
Нерӯҳои ҳавоии Украина рӯзи 24 апрел эълон карданд, ки Русия шаби гузашта ба минтақаҳои гуногуни ин кишвар 215 паҳпод ва мушак партоб кард, ки шуморе аз онҳо раҳгирӣ ва сарнагун карда шуданд.
Андрей Сибиҳа, вазири корҳои хориҷии Украина, бо ишора ба ҳамлаҳои густурдаи Русия алайҳи ғайринизомиён дар Киев ва минтақаҳои дигар, дар шабакаи иҷтимоии Х навишт, ки Владимир Путин, раисҷумҳури Русия, бо ин амали худ "нишон медиҳад, ки ба ҳеч талоше барои сулҳ эҳтиром намегузорад ва фақат мехоҳад ҷангро идома диҳад".
Ҳамлаҳои шаби гузашта ба минтақаҳои гуногуни Украина чанд соат пас аз изҳороти Доналд Трамп, раисҷумҳури Амрико, рух дод.
Трамп дар Кохи Сафед ба хабарнигорон гуфт, "фикр мекунам, Русия омодааст ва хелеҳо гуфтанд, ки Русия мехоҳад тамоми корро анҷом диҳад". Ӯ дар идома афзуд, ки кор бо Владимир Зеленский, раисҷумҳури Украина аз ончӣ интизор мерафт барояш сахттар будааст.
Раисҷумҳури Амрико ҳамчунин дар посух ба суоле дар бораи гузоришҳо дар мавриди пешниҳоди ИМА барои ба расмият шинохта шудани ҳокимияти Русия дар нимҷазираи ишғолии Қрим гуфт, дар ин масъала аз ҳеч тараф ҷонибдорӣ намекунад ва фақат мехоҳад, ки ҷанг поён ёбад.
Владимир Зеленский, раисҷумҳури Украина, ки тарҳи пешниҳодӣ дар мавриди нимҷазираи Қримро рад кард, шоми чаҳоршанбе гуфт, "музокироти Лондон "пурҳарорат" буд, аммо хуб шуд, ки намояндагони панҷ кишвар бо якдигар мулоқот карданд".
Ӯ дар шабакаи иҷтимоии Х навишт, "тарафи амрикоӣ дидгоҳи худро бо мо дар миён гузошт. Украина ва дигар аврупоиҳо ҳам назарҳои худро пешниҳод карданд. Умедворем, ки дақиқан чунин коре муштарак боиси сулҳи пойдор шавад".
Зеленский дар "Твиттер" ҳамчунин тасвире аз баёнияи Майк Помпео, собиқи вазири корҳои хориҷии Амрико дар соли 2018-ро нашр кард, ки аз Русия хоста буд, ба ишғоли Қрим поён диҳад.
Доналд Трамп чанд соат пеш аз гуфтугӯ бо хабарнигорон дар Кохи Сафед, дар шабакаи иҷтимоии худ ба Украина ҳушдор дода буд, ки бояд барои поён додан ба ҷанг ба созиш бирасад. Ӯ ҳамчунин аз изҳороти Зеленский, ки ба расмият шинохтани ҳокимияти Русияро бар Қрим "хатти сурх"-и Киев хондааст, ба шиддат танқид кард.
Трамп дар шабакаи иҷтимоии Truth навишт, "изҳороти таҳрикомез изҳороти Зеленский аст, ки ҳаллу фасли ин ҷангро бисёр душвор мекунад". Вай таъкид кард, ки касе аз Украина нахостааст, ки Қримро ҳамчун қаламрави Русия ба расмият бишносад.
Дар ҳамин ҳол, вазири молияи Амрико шаби гузашта гуфт, дар Вашингтон бо нахуствазир ва вазири молияи Украина дидор кардааст. Вай ба зарурати имзои созишномаи ҳамкориҳои иқтисодӣ байни ду кишвар таъкид кард ва ёдовар шуд, ки "музокироти фаннии бисёр созанда байни ду тараф идома дорад".
Боздошти як афсари пешини милиса дар робита ба марги Толибҷон Дӯстов
Як афсари пешини милисаро дар Тоҷикистон баъд аз ҳафт соли ҷустуҷӯ пайдо ва боздошт кардаанд. Маҳмадулло Идиев ба марги Толибҷон Дӯстов, сокини ноҳияи Шаҳритуси вилояти Хатлон, гумонзад аст ва аз соли 2018 дар кофтукоби байнулмилалӣ қарор дошт.
Эътилофи зидди шиканҷа дар Тоҷикистон рӯзи 23-юми апрел хабар дод, ки Идиев ду ҳафта пеш ҳангоми бозгашт аз Русия дар Фурудгоҳи байнулмилалии Душанбе дастгир шуда, дар боздоштгоҳ қарор дорад. Парвандаи ӯ бо айбномаи "баромадан аз ҳадди ваколати мансабӣ" таҳқиқ мешавад.
Толибҷон Дӯстов дар моҳи июли соли 2017, баъди боздошташ бо гумони қочоқи маводи мухаддир ҷон бохт. Пайвандонаш даъво доштанд, ки Дӯстов дар пайи латукӯби корманди милиса даргузашт. Ду нафаре, ки ҷасади ӯро шустаанд, низ шоҳидӣ доданд, ки дар бари рӯй ва назди гӯши чапаш доғҳои сиёҳро диданд.
Он замон мақомот сабаби марги Толибҷон Дӯстовро сактаи қалбӣ гуфта, аммо дертар алайҳи афсари милиса парванда боз карданд. Муҳокимаи Маҳмадулло Идиев дар моҳи январи соли 2018 шуруъ шуда, додситон дар моҳи июни ҳамон сол ба ӯ нуҳ сол зиндон хост, вале баъди ҳамин муҳокима афсари милисаро дигар наёфтанд. Идиев то он вақт бо шарти берун нарафтан аз ҷойи зист дар озодӣ буд.
Эътилофи зидди шиканҷа дар баёнияе рӯзи 23-юми апрел гуфт, бо вуҷуди он ки дар боздошт ва марги Толибҷон Дӯстов камаш се каси дигар даст доранд, мақомот танҳо алайҳи Маҳмадулло Идиев айбнома эълон карданд.
"Шоҳидон ҳамаи онҳоро шинохтанд, аммо додситонӣ аз боз кардани парвандаи ҷиноӣ алайҳи дигарон, аз ҷумла тибқи моддаи "шиканҷа" худдорӣ кард. Хешовандони Дӯстов ва ҳомиёни ҳуқуқ солҳо боз ба мақомоти ноҳия, вилоят ва ҷумҳурӣ шикояту дархост фиристода, хоҳони ба ҷавобгарӣ кашидани ҳамаи онҳо буданд," – гуфта шудааст дар баёния.
Тоҷикистон ба сабаби бадрафторӣ ва шиканҷаи гумонбарон ҳамеша танқид мешавад. Созмони Милали Муттаҳид дар гузашта гуфтааст, ки дар Тоҷикистон маъмурони интизомӣ барои гирифтани эътирофи гуноҳ боздоштшудагонро азоб медиҳанд ва додгоҳҳо низ эътирофи онҳоро ба инобат мегиранд, ки мухолифи қонунҳои худи кишвар ва аҳдномаҳои байнулмилалист.
Мақомоти Тоҷикистон онро “худиқрорӣ” меноманд, ҳарчанд марги мармузи баъзе аз боздоштшудаҳо гуфтаҳои онҳоро зери суол мебарад. Дар баъзе маврид кормандони ниҳодҳои қудратӣ барои шиканҷа ҷазо мегиранд, аммо дар ҳолатҳои дигар касе муҷозот намешавад.
Яке аз намунаҳо қазияи Абдуқаҳҳор Розиқов, сокини шаҳри Кӯлоб, аст, ки моҳи январи соли 2023 баъди чанд соати дастгир шудан аз сӯи кормандони милиса даргузашт. Се афсари милиса барои шиканҷаи Розиқов 14-солӣ аз озодӣ маҳрум шуданд.
Дар марги Меҳроҷиддин Гадозода, сокини шаҳри Ваҳдат, касе ҷазо нагирифт. Гадозодаи 33-сола моҳи апрели соли 2021, баъд аз чанд соати боздошт аз сӯи маъмурони милисаи шаҳри Ваҳдат, дар шароити мармуз ҷон бохт. Дар оғоз нисбат ба як корманди милиса барои хунукназарӣ парванда кушоданд, аммо бар асоси қонуни афв ӯро аз ҷавобгарӣ озод карданд.
Гуфтугӯ