Дар чанд ҷумла
"Боздошти Таҳмина Самадова воқеаи ҷудогона нест"
Як созмони мухолифи ҳукумати Тоҷикистон боздошти Таҳмина Самадова, модари ҳафт фарзандро дар Русия танқид кард.
Самадова зодаи Тоҷикистон ва шаҳрванди Русия аст. Ӯро баъд аз дарёфти “хонаи давлатӣ” дар Русия ба қаллобӣ гумонзад медонанд. Мавқеи худаш, наздикон ва ё вакили мудофеъ маълум нест.
Ҷунбиши ислоҳот ва рушди Тоҷикистон, қароргоҳаш дар Ҳолланд, рӯзи 27-уми январ дар эъломияе ин қазияро “як намунаи рӯшани таъқиби доимии ақаллиятҳои миллӣ” дар Русия донист.
Шарофиддин Гадоев, раҳбари созмон, гуфт, “шаҳрвандони Тоҷикистон танҳо барои мансубияти миллиашон дар Русия бо таҳқир ва таҳдиди доимӣ рӯбарӯ мешаванд.”
“Боздошти Таҳмина Самадова ва фишорҳои минбаъда нисбат ба ӯ танҳо як воқеаи ҷудогона нест, балки як қисми маъракаи густурдаи давлатӣ барои барангехтани нафрати қавмӣ ва парешон кардани диққати мардум аз мушкилоти дохилии Русия мебошад,” – афзуд ӯ.
Ин созмон аз мақомоти Тоҷикистон хостааст, барои ҳифзи ҳуқуқи зодагони ин кишвар, аз ҷумла Таҳмина Самадова, “чораи фаврӣ ва қатъӣ андешанд”.
Таҳмина Самадова, ки бо ҳамсараш Рамазон Раҳимов 17 сол боз дар Русия кору зиндагӣ доранд, рӯзи 24-уми январ бо қарори Кумитаи тафтишотии вилояти Маскав дастгир шуд.
Моҷаро рӯзи 13-уми январ сар зад. Пас аз он ки раиси шаҳри Митиши Юлия Купетская дар Телеграм навишт, ба оилаи серфарзанди Самадова бар асоси Барномаи давлатӣ “шаҳодатномаи хариди манзил” доданд ва он 24 миллион рубл аст.
Ин хабар дар матбуот ва шабакаҳои иҷтимоӣ дар Русия бо вокунишҳои манфӣ дучор шуд. Ҳарчанд ҳукумати Митиши аз Самадова ва хонаводааш ҳимоят кард, раиси Кумитаи тафтишотии Русия, Александр Бастрикин, хоҳони таҳқиқ шуд.
Бархӯрди мақомоти Русия бо зодагони Тоҷикистон дар як соли охир сахттар шудааст. Баъди он ки ба толори “Крокус” дар вилояти Маскав ҳамлаи маргбор сурат гирифт ва бо гумони нақшарезӣ ва иҷрои он асосан шаҳрвандони Тоҷикистон боздошт шуданд.
Ҳамаи хабарҳои имрӯзро дар инҷо бихонед
Шумораи қурбониёни ҳамлаи Русия ба Киев ба 12 кас расид
Шумораи қурбониёни ҳамлаи Русия ба пойтахти Украина ба 12 кас расид.
Намояндагони шаҳрдории Киев хабар доданд, ки маъмурони наҷот ду ҷасади дигарро аз зери вайронаҳо пайдо карданд.
Ба иттилои Хадамоти давлатии ҳолатҳои фавқулодаи Украина, дар пайи ҳамлаи ҳавоии неруҳои Русия ба шаҳри Киев 90 каси дигар маҷруҳ шудааст.
Артиши Русия шаби 24-уми апрел бо мушак ба пойтахти Украина ҳамла кард.
Рӯзи 25-уми апрел дар Киев мотам эълон шудааст.
Нерӯҳои ҳавоии Украина рӯзи 24-уми апрел эълон карданд, ки Русия шаби гузашта ба минтақаҳои гуногуни ин кишвар 215 паҳпод ва мушак партоб кард, ки шуморе аз онҳо раҳгирӣ ва сарнагун карда шуданд.
Бархӯрди шадиди се мошин дар шаҳри Кӯлоб
Дар як тасодуфи роҳ дар шаҳри Кӯлоб се мошин бо ҳам бархӯрдаанд.
Ҳодиса баъд аз зуҳри 24-уми апрел дар маҳаллаи Хирман рух дод.
Дар навори дурбинҳои сари роҳ дида мешавад, ки як мошин бо суръати баланд ба самти муқобили роҳ баромада, бо мошини "Тангем" ва як "Опел" бархӯрдааст.
Аксу наворҳои зиёде низ дар шабакаҳои иҷтимоӣ нашр шуд. Дар онҳо дида мешавад, ки ба ҳарсе мошин зарари ҷиддӣ расидааст, вале маълум нест дар ин тасодуф чанд нафар осеб диданд.
Мақомот дар ин бора то ҳол хабаре пахш накардаанд.
Садама ё тасодуфҳои нақлиётӣ дар Тоҷикистон дар соли 2024 сабаби марги 552 кас шудааст.
Вазорати корҳои дохилии Тоҷикистон хабар дод, ки дар ин сол ҷамъан зиёда аз 1200 садама рух дод.
Беш аз 1350 каси дигар маҷруҳ гаштаанд.
Суръати баланд, дар ҳолати мастӣ рондани мошин ва беэътиноӣ ба қоидаву қонуни ҳаракат дар роҳҳо сабаби маргумири зиёд гуфта мешавад.
Мақомоти Суғд чанд касро барои нақзи қонуни танзим ҷазо доданд
Кормандони пулиси вилояти Суғд мегӯянд, бо назорат аз болои шабакаҳои иҷтимоӣ, чанд нафарро барои вайрон кардани қонуни танзим, ҷазо додаанд.
Акбар Шарифӣ, сухангӯи Раёсати корҳои дохилии Суғд дар наворе чанд намунаро шарҳ додааст.
Дар гузориши мақомот Ганҷина Бобоева, сокини ноҳияи Ашт нишон дода шудааст, ки зодрӯзашро дар як маркази хизматрасонӣ таҷлил кардааст. Навори оростани дастархон ва туҳфагирӣ ба Инстаграм роҳ ёфта, мақомот аз рӯи он Бобоеваро ҷарима кардаанд. Назари ин ҷавондухтар ба ҷарима шуданаш маълум нест.
Дар як ҳолати дигар, Фарангис Маҳмудова, молики мағозае дар шаҳри Хуҷанд ҳам барои гузоштани навори "ҳоҷиошӣ" ҷазо гирифтааст. Дар ҳоле, ки назари Маҳмудова ба қазия маълум нест, мақомот мегӯянд, ӯ баъди сафари ҳаҷ зиёфат ороста, ин ҳолатро дар шабакаҳо гузоштааст ва қонуни танзимро нақз кардааст.
Неъматулло Муминов, сокини шаҳри Истаравшан ҳам барои онки дар вақти тӯйи арусӣ ба сари домоду арӯс пул пошидааст, ҷазо додаанд. Ин лаҳза аз сӯи меҳмоне сабт шуда, дар Инстаграм гузошта шудааст.
Мақомот мегӯянд, ҳамаи ин афродро барои нақзи қонуни танзими ҷашну маросим ҷарима карданд, аммо ҳаҷми онро нагуфтанд.
Қонуни баҳсбарангези танзим, ки мақомот аз он зиёд тавсиф мекунанд, барои маҳдудиятҳои зиёдаш танқидҳоро ба миён овардааст.
Тоҷикистон ва Эрон ният доранд, виза аз масирҳои заминиро ҳам бекор кунанд
Тоҷикистон ва Эрон ният доранд раводид ё виза тариқи роҳҳои заминиро ҳам бекор мекунанд. Ин нукта дар вохӯрии Искандар Муъминӣ, вазири корҳои дохилии Эрон бо раиси ҷумҳури Тоҷикистон Эмомалӣ Раҳмон садо додааст.
Ба гузориши хабаргузории ИРНА, Эмомалӣ Раҳмон гуфтааст, барои рушди муносибатҳои Душанбе ва Теҳрон дар бахшҳои сиёсӣ, мудофиа, фарҳангӣ, иҷтимоӣ ва гардишгарӣ, ҳеч монеа вуҷуд надорад.
Дафтари матбуоти президенти Тоҷикистон ҳам дар бораи дидори Эмомалӣ Раҳмон бо Искандар Муъминӣ хабар дода, аммо ба мавзӯи бекор шудани раводид тариқи роҳҳои заминӣ, ишора накардааст.
Ҳанӯз маълум нест, ки ду ҷониб дар ин бора ба кадом созиш даст ёфтаанд.
Тоҷикистон ва Эрон моҳи феврали имсол раводид барои шаҳрвандони ҳамдигарро бекор карданд.
Аммо сафар бидуни виза бо Эрон танҳо аз тариқи роҳи ҳавоӣ миёни ду кишвар имконпазир аст.
Миёни Тоҷикистон ва Эрон феълан ҳафтае се парвоз ҳаст.
Ҳалокати 9 кас дар ҳамлаҳои густурдаи Русия ба Украина
Мақомоти Украина аз ҳамлаҳои густурдаи мушакӣ ва паҳподии шабонаи Русия ба минтақаи гуногуни ин кишвар хабар доданд. Ба гуфтаи онҳо, дастикам 9 нафар дар Киев кушта ва беш аз 70 тан, аз ҷумла шаш кӯдак дар ин шаҳр ва минтақаҳои дигар захмӣ шуданд.
Масъулони шаҳрдории Киев гуфтанд, шуморе аз сокинон дар зери вайронаҳои як бино банд мондаанд. Хадамоти изтирории давлатии Украина дар "Телеграм" эълон кард, ки ҷустуҷӯи афрод аз зери ин бино идома дорад.
Шаҳрдори Харков, дувумин шаҳри калони Украина, низ аз ҳамлаҳои мушакӣ ва паҳподии шабона ба ин шаҳр гузориш дод. Игор Терехов ибтидо аз бархӯрди ҳафт мушак сухан гуфт ва чанд соат баъд эълон кард, ки ҳамлаҳои густурдаи паҳподҳои "Шоҳид" ба Харков идома дорад.
Нерӯҳои ҳавоии Украина рӯзи 24 апрел эълон карданд, ки Русия шаби гузашта ба минтақаҳои гуногуни ин кишвар 215 паҳпод ва мушак партоб кард, ки шуморе аз онҳо раҳгирӣ ва сарнагун карда шуданд.
Андрей Сибиҳа, вазири корҳои хориҷии Украина, бо ишора ба ҳамлаҳои густурдаи Русия алайҳи ғайринизомиён дар Киев ва минтақаҳои дигар, дар шабакаи иҷтимоии Х навишт, ки Владимир Путин, раисҷумҳури Русия, бо ин амали худ "нишон медиҳад, ки ба ҳеч талоше барои сулҳ эҳтиром намегузорад ва фақат мехоҳад ҷангро идома диҳад".
Ҳамлаҳои шаби гузашта ба минтақаҳои гуногуни Украина чанд соат пас аз изҳороти Доналд Трамп, раисҷумҳури Амрико, рух дод.
Трамп дар Кохи Сафед ба хабарнигорон гуфт, "фикр мекунам, Русия омодааст ва хелеҳо гуфтанд, ки Русия мехоҳад тамоми корро анҷом диҳад". Ӯ дар идома афзуд, ки кор бо Владимир Зеленский, раисҷумҳури Украина аз ончӣ интизор мерафт барояш сахттар будааст.
Раисҷумҳури Амрико ҳамчунин дар посух ба суоле дар бораи гузоришҳо дар мавриди пешниҳоди ИМА барои ба расмият шинохта шудани ҳокимияти Русия дар нимҷазираи ишғолии Қрим гуфт, дар ин масъала аз ҳеч тараф ҷонибдорӣ намекунад ва фақат мехоҳад, ки ҷанг поён ёбад.
Владимир Зеленский, раисҷумҳури Украина, ки тарҳи пешниҳодӣ дар мавриди нимҷазираи Қримро рад кард, шоми чаҳоршанбе гуфт, "музокироти Лондон "пурҳарорат" буд, аммо хуб шуд, ки намояндагони панҷ кишвар бо якдигар мулоқот карданд".
Ӯ дар шабакаи иҷтимоии Х навишт, "тарафи амрикоӣ дидгоҳи худро бо мо дар миён гузошт. Украина ва дигар аврупоиҳо ҳам назарҳои худро пешниҳод карданд. Умедворем, ки дақиқан чунин коре муштарак боиси сулҳи пойдор шавад".
Зеленский дар "Твиттер" ҳамчунин тасвире аз баёнияи Майк Помпео, собиқи вазири корҳои хориҷии Амрико дар соли 2018-ро нашр кард, ки аз Русия хоста буд, ба ишғоли Қрим поён диҳад.
Доналд Трамп чанд соат пеш аз гуфтугӯ бо хабарнигорон дар Кохи Сафед, дар шабакаи иҷтимоии худ ба Украина ҳушдор дода буд, ки бояд барои поён додан ба ҷанг ба созиш бирасад. Ӯ ҳамчунин аз изҳороти Зеленский, ки ба расмият шинохтани ҳокимияти Русияро бар Қрим "хатти сурх"-и Киев хондааст, ба шиддат танқид кард.
Трамп дар шабакаи иҷтимоии Truth навишт, "изҳороти таҳрикомез изҳороти Зеленский аст, ки ҳаллу фасли ин ҷангро бисёр душвор мекунад". Вай таъкид кард, ки касе аз Украина нахостааст, ки Қримро ҳамчун қаламрави Русия ба расмият бишносад.
Дар ҳамин ҳол, вазири молияи Амрико шаби гузашта гуфт, дар Вашингтон бо нахуствазир ва вазири молияи Украина дидор кардааст. Вай ба зарурати имзои созишномаи ҳамкориҳои иқтисодӣ байни ду кишвар таъкид кард ва ёдовар шуд, ки "музокироти фаннии бисёр созанда байни ду тараф идома дорад".
Боздошти як афсари пешини милиса дар робита ба марги Толибҷон Дӯстов
Як афсари пешини милисаро дар Тоҷикистон баъд аз ҳафт соли ҷустуҷӯ пайдо ва боздошт кардаанд. Маҳмадулло Идиев ба марги Толибҷон Дӯстов, сокини ноҳияи Шаҳритуси вилояти Хатлон, гумонзад аст ва аз соли 2018 дар кофтукоби байнулмилалӣ қарор дошт.
Эътилофи зидди шиканҷа дар Тоҷикистон рӯзи 23-юми апрел хабар дод, ки Идиев ду ҳафта пеш ҳангоми бозгашт аз Русия дар Фурудгоҳи байнулмилалии Душанбе дастгир шуда, дар боздоштгоҳ қарор дорад. Парвандаи ӯ бо айбномаи "баромадан аз ҳадди ваколати мансабӣ" таҳқиқ мешавад.
Толибҷон Дӯстов дар моҳи июли соли 2017, баъди боздошташ бо гумони қочоқи маводи мухаддир ҷон бохт. Пайвандонаш даъво доштанд, ки Дӯстов дар пайи латукӯби корманди милиса даргузашт. Ду нафаре, ки ҷасади ӯро шустаанд, низ шоҳидӣ доданд, ки дар бари рӯй ва назди гӯши чапаш доғҳои сиёҳро диданд.
Он замон мақомот сабаби марги Толибҷон Дӯстовро сактаи қалбӣ гуфта, аммо дертар алайҳи афсари милиса парванда боз карданд. Муҳокимаи Маҳмадулло Идиев дар моҳи январи соли 2018 шуруъ шуда, додситон дар моҳи июни ҳамон сол ба ӯ нуҳ сол зиндон хост, вале баъди ҳамин муҳокима афсари милисаро дигар наёфтанд. Идиев то он вақт бо шарти берун нарафтан аз ҷойи зист дар озодӣ буд.
Эътилофи зидди шиканҷа дар баёнияе рӯзи 23-юми апрел гуфт, бо вуҷуди он ки дар боздошт ва марги Толибҷон Дӯстов камаш се каси дигар даст доранд, мақомот танҳо алайҳи Маҳмадулло Идиев айбнома эълон карданд.
"Шоҳидон ҳамаи онҳоро шинохтанд, аммо додситонӣ аз боз кардани парвандаи ҷиноӣ алайҳи дигарон, аз ҷумла тибқи моддаи "шиканҷа" худдорӣ кард. Хешовандони Дӯстов ва ҳомиёни ҳуқуқ солҳо боз ба мақомоти ноҳия, вилоят ва ҷумҳурӣ шикояту дархост фиристода, хоҳони ба ҷавобгарӣ кашидани ҳамаи онҳо буданд," – гуфта шудааст дар баёния.
Тоҷикистон ба сабаби бадрафторӣ ва шиканҷаи гумонбарон ҳамеша танқид мешавад. Созмони Милали Муттаҳид дар гузашта гуфтааст, ки дар Тоҷикистон маъмурони интизомӣ барои гирифтани эътирофи гуноҳ боздоштшудагонро азоб медиҳанд ва додгоҳҳо низ эътирофи онҳоро ба инобат мегиранд, ки мухолифи қонунҳои худи кишвар ва аҳдномаҳои байнулмилалист.
Мақомоти Тоҷикистон онро “худиқрорӣ” меноманд, ҳарчанд марги мармузи баъзе аз боздоштшудаҳо гуфтаҳои онҳоро зери суол мебарад. Дар баъзе маврид кормандони ниҳодҳои қудратӣ барои шиканҷа ҷазо мегиранд, аммо дар ҳолатҳои дигар касе муҷозот намешавад.
Яке аз намунаҳо қазияи Абдуқаҳҳор Розиқов, сокини шаҳри Кӯлоб, аст, ки моҳи январи соли 2023 баъди чанд соати дастгир шудан аз сӯи кормандони милиса даргузашт. Се афсари милиса барои шиканҷаи Розиқов 14-солӣ аз озодӣ маҳрум шуданд.
Дар марги Меҳроҷиддин Гадозода, сокини шаҳри Ваҳдат, касе ҷазо нагирифт. Гадозодаи 33-сола моҳи апрели соли 2021, баъд аз чанд соати боздошт аз сӯи маъмурони милисаи шаҳри Ваҳдат, дар шароити мармуз ҷон бохт. Дар оғоз нисбат ба як корманди милиса барои хунукназарӣ парванда кушоданд, аммо бар асоси қонуни афв ӯро аз ҷавобгарӣ озод карданд.
47 паноҳҷӯи дигари афғонистониро аз Тоҷикистон берун кардаанд
Нерӯҳои амниятии Тоҷикистон 47 паноҳҷӯйи дигари афғонро аз кишвар берун карда, ба Афғонистон баргардондаанд.
Дар ин бора “Бошгоҳи хабарнигорони ҷавон” рӯзи 23-юми апрел хабар дод. Манбаъҳои Радиои Озодӣ низ ин хабарро тасдиқ карданд.
Ба қавли манбаъ, паноҳҷӯёни ихроҷшуда дар шаҳри Ваҳдат зиндагӣ мекарданд ва асосан ба таксиронӣ машғул буданд.
“Бошгоҳи хабарнигорони ҷавон” навиштааст, 47 шаҳрванди ихроҷшудаи Афғонистон соҳиби корти гурезагии Созмони Милал буданд.
“Ба гуфтаи манобеи маҳаллӣ, баъзе аз ин паноҳҷӯён ба идораи амнияти шаҳри Ваҳдат даъват шуда, теъдоди дигар дар маконҳои серодам боздошт ва ба Афғоонистон бозгардонда шудаанд,” -- навиштааст “Бошгоҳи хабарнигорони ҷавон”.
Мақомоти Тоҷикистон дар ин бора расман шарҳе надодаанд. Баъд аз соли 2022 даҳҳо паноҳҷӯи афғонистонӣ аз Тоҷикистон ихроҷ шуданд.
Ба иттилои Комиссариати олии Созмони Милал дар умури гурезаҳо, танҳо дар моҳи декабри соли 2024-ум 80 афғонистонӣ аз Тоҷикистон ба ватанашон фиристода шуданд.
Мақомоти Тоҷикистон дар ин бора на омор ва на шарҳе намедиҳанд. Комиссариати олии Созмони Милал дар умури паноҳандаҳо борҳо аз ихроҷи гурезаҳои афғонистонӣ нигаронӣ карда, аз мақомоти Тоҷикистон хоста буд, ин корро бас кунанд.
Ҳалокати ду нафар дар ҳамлаи мушакии Русия ба Киев
Дастикам ду нафар дар Киев, пойтахти Украина дар натиҷаи ҳамлаҳои мушакии шабонаи Русия кушта шуданд.
Виталий Кличко, шаҳрдори Киев субҳи панҷшанбе, 24 апрел дар шабакаи "Телеграм" гуфт, ки илова бар ду кушта, дар ин ҳамлаҳо 52 каси дигар захмӣ шудаанд.
Кличко ҳамчунин гуфтааст, ки сокинони як бинои истиқоматӣ зери вайронаҳо мондаанд ва бино оташ гирифтааст.
Рӯзи гузашта ҳам мақомоти Украина гуфтанд, ки як ҳавопаймои бесарнишини Русия ба мусофирбаре дар вилояти Днепропетровск бархӯрд ва камаш 9 касро кушт ва даҳҳо тани дигарро захмӣ кард. Ин автобус коргаронро мебурд.
Боздошти боз як нозири барқ дар Хатлон
Вазорати корҳои дохилии Тоҷикистон аз боздошти як нозири барқ дар ноҳияи Ҷалолиддини Балхӣ хабар додааст.
Ба иттилои ВКД, ин нозири 53-сола аз 24 сокини ноҳия қариб 31 ҳазор сомонӣ пули истифодаи барқро гирифта, танҳо 6,5 ҳазорашро ба давлат супоридааст.
Дар ҳоле, ки назари ин мард ба қазия маълум нест, мақомот мегӯянд, нозири барқ 24 ҳазор сомонии пули истифодаи барқро азхуд кардааст.
Дар як ҳафтаи ахир ин бори дуюм аст, ки мақомот аз боздошти нозирон барои дуздии пули барқ хабар медиҳанд.
Пеш аз ин Вазорати корҳои дохилӣ гуфт, се нозири барқро дар ноҳияҳои Ҷалолиддини Балхӣ ва Абдураҳмони Ҷомӣ дастгир кардааст.
Ҳамаи онҳо ба он муттаҳам мешаванд, ки пули истифодаи барқро аз мардум ҷамъ карда, вале ба давлат насупоридаанд.
Боздошти ин масъулин дар пайи сахтар шудани ҷазо барои дуздии барқ анҷом мешавад.
Эмомалӣ Раҳмон, раисҷумҳури Тоҷикистон, рӯзи 15-уми апрел иловаҳоро ба Кодекси ҷиноӣ имзо кард, ки барои дуздӣ ё истифодаи ғайриқонунии нерӯи барқ аз 27 ҳазор сомонӣ ҷарима то 10 сол зиндонро пешбинӣ кардааст.
Ду рӯз пас аз имзои ин фармон, барои назорати бахши энергетика дар Тоҷикистон ниҳоди нав таъсис дода шуд.
Гуфтугӯ бобати хатми ҷанг дар Украина дар Лондон баргузор нашуд
Гуфтугӯи мақомоти аврупоӣ ва украин бобати хатми ҷанг дар Украина, ки қарор буд 23-юми апрел дар Лондон баргузор шавад, бекор шудааст.
Ҳанӯз далели лағви ин нишаст маълум нест, вале рӯзи 21-уми апрел бори аввал аз оғози ҷанг Владимир Путин, президенти Русия гуфт, омодаи музокираи рӯ ба рӯ бо Украина аст.
Ин ҳарф замоне садо дод, ки Амрико фишорашро барои расидан ба сулҳ бештар кард ва мақомоти ин кишвар ҳушдор доданд, ки агар ду ҷониб ба сулҳ розӣ нашаванд, дигар миёнаравӣ намекунанд.
Путин дар суҳбат бо телевизиони давлатӣ гуфт, ба ҳамагуна музокира, аз ҷумла тамдиди оташбас омода аст ва аз Киев низ инро интизор аст.
Вашингтон гуфт, аз тамдиди оташбас истиқбол хоҳад кард.
Русия ва Украина бо пешниҳоди Иёлоти Муттаҳида эълон карда буданд, ки сӣ рӯз ба иншооти барқрасонӣ ва корхонаҳои тавлиди нафт ҳамла намекунанд. Ҳарду кишвар ҳамдигарро ба поймоли пешниҳоди Амрико айбдор карданд. Владимир Зеленский, президенти Украина гуфт, ки Путин нияти ҷиддии расидан ба сулҳро надорад ва ҷангро идома медиҳад.
Русия ва Украина расман дар моҳҳои аввали ҷанг бо ҳам гуфтушунид карданд, вале он бенатиҷа анҷом ёфт. Дигар мақомоти ду кишвар ҳеч гоҳ бо ҳам дидори мустақим надоштанд.
Доналд Трамп, президенти Амрико ва Марко Рубио, вазири корҳои хориҷии ин кишвар ҳафтаи гузашта эълон карданд, ки агар ду кишвар ба сулҳ розӣ нашаванд, Амрико дигар миёнравӣ нахоҳад кард.
Ноиб-президенти Амрико Вэнс гуфт, кишвараш ба ҳарду тараф пешниҳоди дақиқ кардааст ва агар он қабул нашавад, Амрико аз бозӣ мебарояд.
Трамп рӯзи якшанбе гуфт, умедвор аст, ки ин ҳафта Русия ва Украина ба созише даст меёбанд.
Ҳамлаи маргбори як паҳподи Русия ба мусофирбаре дар Украина
Мақомоти Украина гуфтанд, ки як ҳавопаймои бесарнишини Русия ба мусофирбаре дар вилояти Днепропетровск бархӯрд ва камаш 9 касро кушт ва даҳҳо тани дигарро захмӣ кард. Ин автобус коргаронро мебурд.
Сергей Лисак, волии Днепротпетровск, рӯзи 23-юми апрел гуфт, "теъдоди қурбониён дар ҳоли афзоиш аст".
Ӯ илова кард, ки "кишвари таҷовузкор бо як ҳавопаймои бесарнишин автобуси коргаронро зад."
Нерӯҳои Русия дар ин рӯз зерсохти ғайринизомӣ дар гӯшаҳои дигари Украинаро низ ҳадаф қарор додаанд.
Бино ба гузоришҳо, дар шаҳрҳои Полтава ва Одессаи Украина дастикам панҷ кас захмӣ шуд.
Масъулони Хадамоти изтирорӣ ё ҳолатҳои фавқулодаи Украина гуфтанд, ки “биноҳои истиқоматӣ, фурӯшгоҳу анборҳо ва гаражҳо зарар диданд.”
Дар Харков, дувумин шаҳри бузурги Украина, низ сӯхторҳои густурда сар задааст.
Рухшона Ҳакимоваро аз Боздоштгоҳи Душанбе ба зиндони Норак бурдаанд
Рӯзноманигор Рухшона Ҳакимоваро, ки дар доираи парвандаи маъруф ба “кӯшиши табаддулот” ба 8 сол зиндон маҳкум шуда буд, рӯзи 22-юми апрел ба зиндони занонаи шаҳри Норак бурдаанд. То ин муддат ӯ дар Боздоштгоҳи муваққатии шаҳри Душанбе нигаҳдорӣ мешуд.
Мақомот то кунун дар бораи ба зиндони Норак интиқол додани Рухшона Ҳакимова изҳори назар накардаанд. Наздиконаш ба Радиои Озодӣ гуфтанд, ки рӯзи 22-юми апрел аз манбаъҳои худ дар ин бора огоҳ шуданд.
Пас аз он ки Додгоҳи олӣ ҳукми Рухшона Ҳакимоваро бетағйир гузошт, вакили мудофеи рӯзноманигор гуфта буд, ки пас аз панҷ рӯзи эътибори қонунӣ пайдо кардани ҳукм ӯро ба маҳбас интиқол хоҳанд дод.
Рухшона Ҳакимова ду фарзанди хурдсол дорад ва аз замони эълони ҳукм дар моҳи феврал, ки аз толори додгоҳ ба ҳабс гирифта шуд, онҳоро надидааст.
Ду рӯз пештар, хабаргузории "Азия-Плюс" бо такя ба наздикони ин рӯзноманигор хабар дод, ки мақомот наздик ба 230 ҳазор сомонии Рухшона Ҳакимоваро мусодира кардаанд.
Ба гуфтаи манбаъ, Рухшона Ҳакимова солҳо ин маблағро барои хариди хона дар Душанбе ҷамъ карда буд ва дар ҳисоби бонкияш нигаҳ медошт ва баъди оғози парвандаи ҷиноӣ алайҳи ӯ ба ҳабс гирифта шуда буд.
Ба ҷуз Рухшона Ҳакимова, ҳамчунин намояндагони Хадамоти иҷро пас аз 16-уми апрел ба мусодираи амволи чеҳраҳои дигари шинохта оғоз карданд, ки дар доираи парвандаи “кӯшиши табаддулот” ба зиндон маҳкум шудаанд.
То ин дам намояндагони Хадамоти иҷро барои мусодираи хонаҳо ва дороиҳои дигари Саидҷаъфар Усмонзода, раиси пешини Ҳизби демократ ва вакили собиқи порлумон, Ҳамроҳхон Зарифӣ, собиқ вазири корҳои хориҷӣ, Абдулфайз Атоӣ, сардори пешини Раёсати иттилоот ва матбуоти Вазорати корҳои хориҷӣ, Акбаршоҳ Искандаров, собиқ раиси Шӯрои олӣ ва Аҳмадшоҳ Комилзода, муовини пешини раиси Ҳизби демократ омадаанд.
Аммо наздикони ин афрод мегӯянд то кунун бастагонашон дар боздоштгоҳи муваққат ҳастанд ва ҳамарӯза барои онҳо хӯрок мебаранд. Мақомот дар бораи кай ба маҳбасҳо интиқол додани онҳо чизе намегӯянд.
Ҳукумати Тоҷикистон нақшаи хароҷоти 183 миллион сомониро эълон кард
Ҳукумати Тоҷикистон нақшаи хароҷоти 183 миллион сомонӣ (17 миллион доллар)-ро эълон кардааст.
Ин пуле аст, ки ба гуфтаи мақомот, "аз ҳисоби иҷрои барзиёди нақшаи даромади буҷа дар соли 2025" ба даст меояд.
Қарори ҳукумат 16-уми апрел содир шуда, Радиои Озодӣ 23-юми апрел бо муҳтавои он шинос шуд.
Дар санад омадааст, аз 183 миллион сомонӣ 90 миллионаш барои идомаи сохтмони нерӯгоҳи "Роғун" сарф мешавад.
Боқимонда 93 миллион сомонии дигар барои бунёди иншооти давлатӣ, аз ҷумла Донишгоҳи тиббии Хатлон дар ноҳияи Данғара, меҳмонхона дар маркази ноҳияи Данғара, бинои сафорати Тоҷикистон дар Узбекистон, бинои маъмурии Вазорати маориф ва илм, бинои маъмурии Вазорати фарҳанг ва бинои нави Вазорати адлия сарф мешудааст.
Имсол даромади буҷаи Тоҷикистон 49,6 миллиард сомонӣ (4,5 миллиард доллар) муқаррар шудааст. Буҷаи Тоҷикистон асосан аз ҳисоби пардохти молиёт (андоз) ва боҷҳои гумрукӣ пур мешавад.
Соҳибкорон борҳо аз гаронии молиёт шикоят карда буданд.
Зеленский: Киев ҳокимияти Русия бар Қримро эътироф намекунад
Киев ҳокимияти Русия бар нимҷазираи Қримро эътироф намекунад, чун ин хилофи Конститутсияи Украина аст. Дар ин бора президенти Украина Владимир Зеленский изҳори назар кард.
Зеленский дар нишасти хабарие, ки пеш аз мулоқот бо намояндагони Амрико ва Аврупо суҳбат мекард, гуфт, "ин ҳудуди мо, хоки мардуми Украина аст".
Ба гуфтаи раисҷумҳури Украина, баҳси мақоми Қрим ва минтақаҳои дигари ишғолшудаи Украина танҳо ҷангро ба дарозо мекашад.
Пештар манобеи The Washington Post хабар доданд, ки дар музокироти 23-юми апрел дар Лондон намояндагони Амрико ба Украина пешниҳод мекунанд, ки Қримро ҳамчун ҳудуди Русия эътироф карда, амалиёти ҷангиро поён диҳанд.
Пештар айни ин хабарро бунгоҳи Bloomberg ва нашрияи The Wall Street Journal нашр карда буданд. Қарор аст дар музокироти Лондон, намояндагони Украина, Амрико, Бритониё, Олмон ва Фаронса ширкат кунанд.
Президенти Амрико Доналд Трамп изҳори умед кардааст, ки Русия ва Украина дар муҳлатҳои наздик ба созиш мерасанд.
Муҳлати қонунӣ кардани санадҳо барои муҳоҷирон тамдид мешавад
Муҳлати қонунигардонии будубош дар Русия барои муҳоҷирон, ки то 30-юми апрел пешбинӣ шуда буд, метавонад то моҳи сентябр дароз шавад.
Дар ин бора Вазорати корҳои хориҷии Қирғизистон баъд аз вохӯрии сафири ин кишвар бо намояндагони ҳукумати Русия хабар додааст.
Ба қавли манбаъ, Игор Маслов, сардори яке аз раёсатҳои дастгоҳи президенти Русия ба сафири Қирғизистон гуфтааст, муҳлати қонунигардонии санадҳо дар ин кишвар то 10-уми сентябри соли 2025 тамдид карда хоҳад шуд.
Бар асоси фармони президент Владимир Путин, хориҷиёне, ки дар Русия ғайриқонунӣ кору зиндагӣ доранд, фурсат доштанд то 30-юми апрел санадҳои худро дуруст кунанд ва ё аз ин кишвар берун шаванд.
Сабтином дар идораи муҳоҷират, пешниҳоди маълумоти биометрӣ ва пизишкӣ, шаҳодатномаи донистани забони русӣ ва иҷозаи иқомат аз шартҳои асосист.
Ҳамчунин, муҳоҷирон набояд аз пули телефону пардохти ҷарима ва хадамоти дигари давлатӣ қарздор бошанд.
Муҳоҷирон баъди ҳамла ба "Крокус" дар моҳи марти соли гузашта аз зиёд шудани рейди пулис ва сахтар шудани қонунҳои муҳоҷират шикоят доранд.
