Қосим Роҳбар (Қосим Қосимов) 60-сола аст ва ҳамагӣ ду сол пеш раиси шаҳри Ҳисор таъйин шуд. Аз он қабл раиси Кумитаи рушди маҳал, вазири кишоварзӣ ва раиси ҳукумати вилояти Суғд буд.
Ду сол пеш муҳаққиқони OCCRP, Маркази пажӯҳиши фасод ва ҷиноятҳои созмонёфта, ҳисоби бонкии ӯро дар Швейтсария ёфтанд. Муҳаққиқон гуфтанд, ин ҳисоб соли 2004 боз шуда, то соли 2011 фаъол буд ва дар он зиёда аз 9 миллион долларро нигоҳ доштаанд. Сарчашмаи чӣ гуна ба даст омадани ин миқдор пул маълум нест.
Дертар Қосим Раҳбар дар суҳбат бо нашрияи “СССР” ҳисоби бонкиро дар Швейтсария тасдиқ кард, аммо гуфт, ки онро нохудогоҳ ва бо миёнаравии як соҳибкор боз кардааст. Ва бахши зиёди маблағҳои ин ҳисоб аз они ӯ нестанд. Маълум нест, мақомоти Тоҷикистон ин қазияро таҳқиқ карданд ё не.
Пажӯҳишгарони OCCRP Қосим Роҳбарро ҳампаймони президент Эмомалӣ Раҳмон тавсиф кардаанд, ки як муддат тиҷорати пахта, яке аз маҳсулоти содиротии Тоҷикистон ва манбаи асосии асъори хориҷиро зери назорат доштааст.
Муҳаққиқон навиштаанд, дар як паёми дипломатии Амрико дар соли 2008 ӯ "шахсе бо гузаштаи шубҳаовар" номбар шудааст, вале дар замина шарҳи кофӣ дар даст нест.
Рӯзи 15-уми апрел дар ҳукумати ноҳияи Шоҳмансури шаҳри Душанбе низ тағйирот сурат гирифт. Билол Иброҳим ба сабаби “гузаштан ба кори дигар” аз мақоми раиси ноҳия озод шуда, ба ҷояш Сафар Олимзода омад.
