Дар чанд ҷумла
Дар Тоҷикистон 5 мардро барои таҷовуз ва озори ҷинсӣ ҷазо додаанд
Вазорати адлияи Тоҷикистон мегӯяд, танҳо дар нимаи аввали соли 2023 дар кишвар 5 нафарро барои таҷовуз ва ё озори ҷинсӣ ба зиндон маҳкум кардаанд.
Дар омори тозаи вазорат, ки ба дасти Радиои Озодӣ расид, омадааст, ки дар ин муддат фақат як нафар барои таҷовуз ва бақия барои озори ҷинсӣ ва ё маҷбур кардан барои алоқаи ҷинсӣ ва ё бачабозӣ ҷазо гирифтаанд.
Дар Тоҷикистон бо вуҷуди қабули барномаҳои зиёде барои маҳви хушунати хонаводагӣ, ҳануз бадрафториву озору азияти занон аз ҷумла озори ҷинсӣ зиёд мушоҳида мешавад.
Як пажӯҳиши Барномаи Рушди Созмони Милал дар гузашта нишон додааст, ки 67 дарсад дар Тоҷикистон ба ин боваранд, ки зӯроварӣ ба зан дар оила як кори маъмулист ва бисёре аз мардон ва худи занон ҳам гуфтаанд, ки “латукӯби зан ҷоиз аст”.
Ҳамаи хабарҳои имрӯзро дар инҷо бихонед
Иморот се шаҳрванди Узбекистонро ба қатл маҳкум кард
Имороти Муттаҳидаи Араб се шаҳрванди Узбекистонро, ки дар куштори рӯҳонии исроилӣ Тсви Коган муттаҳам мешаванд, ҳукми қатл дод.
Дар ин бора рӯзноманигорони “Шабакаи 7” ба нақл аз манбаъҳояшон дар роҳбарияти Исроил хабар додаанд.
Назари маҳкумшудагон, наздикон ё вакилони дифои онҳо дастрас нашудааст.
Ба навиштаи хабарнигорон, суҳбати яке аз қотилон бо модараш дар шабакаи иҷтимоии "X" нашр гардидааст, ки дар он аз ҳукми эъдоми зудрас ёдоварӣ мешавад.
Шаҳрванди Исроил Тсви Коган 21-уми ноябри соли 2024 дар Дубай нопадид шуд.
Баъди се рӯз ҷасади ӯро дар шаҳри Ал-Айн, ки дар марзи Умон қарор дорад, пайдо намуданд.
Нерӯҳои амниятӣ бо гумони даст доштан дар ин куштор се узбекистониро боздошт карданд. Хабаргузории давлатии Иморот бо такя ба изҳороти Вазорати корҳои дохилии ин кишвар акси гумонбаронро нашр кард.
Расонаҳои Узбекистон номи муттаҳамонро эълон намуданд, ки инҳо Олимбой Давлатёров, Маҳмудҷон Кенҷабоев ва Азизбек Исмоилов мебошанд. Дар бораи онҳо тафсилоти бештар дода нашудааст.
Тсви Коган, ки шаҳрванди Исроил ва Молдова буд, аз соли 2020-ум дар Имороти Муттаҳидаи Араб зиндагӣ ва дар он ҷо аз як ҷунбиши динии яҳудии ортодоксӣ ё худ суннатгаро намояндагӣ мекард.
Коган ҳамчунин соҳиби мағозаи хӯрокҳои кошерӣ буд.
Исроил куштори рӯҳониро "амали нафратангези терроризми зиддисомӣ" номид.
Ҳайати нави ҳукумат дар Сурия: Як зан вазир шуд
Аҳмад Шаръ (Абумуҳаммади Ҷӯлонӣ), раисҷумҳури муваққати Сурия, ҳайати нави ҳукуматро эълон кард.
Маросими муаррифӣ рӯзи 30-юми март дар шаҳри Димишқ гузашт.
Ба ин тартиб, 23 кас вориди ҳукумат шуд, ки дар миёни онҳо намояндагони ақаллият ё камшуморони алавӣ ва курдҳо ҳам ҳастанд.
Ҳинд Кабават, зани насронӣ, вазири корҳои иҷтимоӣ ва меҳнат таъйин шуд. Вай ягона зан дар ин ҳукумат аст.
Бори аввал дар Сурия Вазорати варзиш ва ҳолатҳои фавқулода таъсис ёфт.
Вазифаи сарвазирро худи Аҳмад Шаръ иҷро мекунад. Қонунгузорӣ мувофиқ ба меъёрҳои ҳуқуқи исломӣ амал хоҳад кард.
Ҳукумати нави Сурия 5 сол ҳақ дорад, ки сари қудрат бошад. Интизор меравад, дар ин муддат дар кишвар Қонуни асосии нав қабул шуда, интихобот баргузор гардад.
Аз ҳукумати Узбекистон хостанд, Валиҷон Калоновро озод кунад
Анҷумани ҳуқуқи башари Узбекистон ва Human Rights Watch аз ҳукумати Узбекистон хостаанд, ки блогер ва фаъоли иҷтимоӣ Валиҷон Калоновро аз боздошт раҳо карда, ба ӯ ҷуброн бипардозад. Изҳороти созмонҳо рӯзи 30-юми март нашр шуд.
Мақомоти Узбекистон Калонови 55-соларо ба "таҳқири президент" ва "ҷиноятҳои дигаре, ки ба ҷомеа хатар дорад" гунаҳкор дониста, дар моҳи декабри соли 2021 маҷбурӣ дар бемористони касалиҳои рӯҳӣ бистарӣ карданд.
Валиҷон Калонов пеш аз боздошт шуданаш ҳукумати Узбекистонро танқид ва ба бойкот ё таҳрими интихобот дар ин кишвар даъват карда буд.
Вай ҳамчунин ба зидди табъизи уйғурҳо дар Чин сухан мегуфт.
Гурӯҳи кории Созмони Милал дар мавриди боздоштҳои худсарона рӯзи 28-уми феврали имсол гуфт, Калонов "худсарона дастгир шудааст" ва аз ҳукумат хост, "ӯро зуд озода карда, барояш ҷуброн пардозад".
Дар солҳои охир даҳҳо блогеру фаъоли иҷтимоӣ дар Узбекистон дастгир ва бо иттиҳомҳои гуногун ҷарима ва ё зиндонӣ карда шудаанд.
Теъдоди қурбониён дар заминларзаи Мянмар ба 1700 кас расид
Шумораи қурбониёни заминларза дар Мянмар ба 1700 кас расидааст.
Ҳодиса рӯзи 28-уми март рӯй дод.
Ҳукумати низомии Мянмар гуфт, 3400 тани дигар маҷрӯҳ ва зиёда аз 300 нафар бедарак ҳастанд.
Дар шаш минтақаи ин кишвар вазъи изтирорӣ ҷорӣ шудааст.
Созмонҳои имдодрасони байнулмилалӣ аз буҳрони башарӣ ҳушдор доданд.
Заминларзаи 7,7-дараҷаӣ Тайландро низ такон дод ва дар он ҷо ҳам хисороту талафоти ҷонӣ ба бор овард.
Имзои созишнома миёни Тоҷикистон, Қирғизистон ва Узбекистон
Раҳбарони Тоҷикистон, Узбекистон ва Қирғизистон созишномаро дар бораи нуқтаи пайванди марзҳои се кишвар имзо карданд. Маросим рӯзи 31-уми март дар вилояти Суғд баргузор шуд.
Эмомалӣ Раҳмон, раисҷумҳури Тоҷикистон, ин рӯйдодро “бисёр муҳим” хонд. Ӯ гуфт, “мо дар Тоҷикистон ба муносибат бо Қирғизистон ва Узбекистон, ки бар пояи накӯҳамсоягӣ, баробарҳуқуқӣ, эҳтиром ва бо назардошти манфиатҳои ҳамдигар асос ёфтаанд, баҳои баланд медиҳем.”
Содир Ҷабборов, раисҷумҳури Қирғизистон ва Шавкат Мирзиёев, раисҷумҳури Узбекистон бо сафари корӣ дар шаҳри Хуҷанд ҳастанд.
Дар ин рӯз Тоҷикистон бо Узбекистон созишномаро "Дар бораи муносибатҳои ҳампаймонӣ" имзо кард.
Тоҷикистон ва Қирғизистон бар иловаи табодули санад дар бораи созиши марзӣ хати интиқоли барқи 500 кВ “Датка – Суғд”-ро ба истифода доданд.
Ин хат дар доираи татбиқи тарҳи CASA-1000 сохта шудааст, ки содироти барқи Тоҷикистону Қирғизистонро ба Афғонистон ва Покистон дар назар дорад.
Ҳар се кишвари Осиёи Марказӣ дар гузашта бар сари таъйини марз ва убуру мурур аз қаламравҳои якдигар мушкил доштанд. Ин номуайянӣ дар чор соли пеш дар сарҳади Тоҷикистон ва Қирғизистон сабаби задухӯрдҳои мусаллаҳона гашт ва аз ду тараф даҳҳо кушта ва захмӣ барҷой гузошт.
Имзои созишномаи марзӣ дар аввали моҳи марти имсол имконпазир шуд. Ҳарчанд ҷониби Қирғизистон баъзе ҷузъиёти шартномаро расонаӣ кард, Тоҷикистон дар ин бора ҳарфе нагуфтааст.
Крис Риклтон, рӯзноманигор ва таҳлилгари Радиои Аврупои Озод/Радиои Озодӣ, чанде пеш дар як матлаби муфассал навишт: "Дар Тоҷикистон ибрози норизоиятӣ ва ба чолиш кашидани созишномаи марзӣ тақрибан номумкин аст. Дар даҳаи гузашта мухолифони сиёсӣ дар кишвар ба тамом аз байн рафтанд. Дар ҳоле ки худкомагӣ дар Осиёи Марказӣ дар ҳоли афзоиш аст, таъкиди бештар ба ҳамкорӣ миёни кишварҳои минтақа раванди мусбате аст, ки маъмулан бидуни ёрии хориҷӣ сурат гирифтааст."
Тоҷикистон ва Қирғизистон беш аз ҳазор километр сарҳад доранд. Зиёда аз 519 километри он то соли 2011 мувофиқа ва беш аз 486 километри боқимонда дар се соли охир мушаххас шудааст.
Тӯли марзи давлатии Тоҷикистон ва Узбекистон 1332 километр аст, вале дар беш аз 25 соли раҳбарии президенти собиқ, Ислом Каримов, Тошканд омодаи баррасиву имзои созишномаи марзӣ набуд. Қарордод соли 2018 ва баъди ба сари қудрат омадани Шавкат Мирзиёв тасвиб шуд.
Нуқтаи марзии се кишвар. Содир Ҷабборов ба Тоҷикистон омад
"Имрӯз таърихӣ аст. Мо таъйин ва нишонагузории марзи кишварҳоямонро ба охир мерасонем. Худро шукр, ки ҳамааш сулҳомез гузашт. Ин муҳимтар аст."
Содир Ҷабборов, раисҷумҳури Қирғизистон, сафари корияшро ба Тоҷикистон рӯзи 31-уми март бо ин ҷумлаҳо оғоз кард. Эмомалӣ Раҳмон, президенти Тоҷикистон, ӯро дар фурудгоҳи шаҳри Хуҷанд пешвоз гирифт ва бо Наврӯз табрик гуфт.
Чор сол пеш тарафҳо якдигарро ба ҳамла ба минтақаҳои наздисарҳадӣ ва поймоли созишҳои пешина гунаҳкор карда, марзро ба рӯйи ҳамдигар бастанд.
Созишнома дар бораи таъйину аломатгузории марзи давлатии Тоҷикистон ва Қирғизистон рӯзи 13-уми марти имсол дар шаҳри Бишкек имзо шуд. Сипас порлумонҳои ду кишвар онро пазируфтанд. Ҳоло се гузаргоҳ барои убуру мурури одамон ва нақлиёт боз аст.
Тоҷикистон ва Қирғизистон беш аз ҳазор километр сарҳад доранд ва то имзои созиш, беш аз нисфи онҳо мақоми баҳсӣ доштанд. Номуайянии сарҳад солҳо сабаби ҷангу хунрезӣ буд ва дар муноқишаи солҳои 2021-2022 аз ду тараф даҳҳо нафар кушта ва захмӣ шуданд.
Қарор аст, рӯзи 31-уми март раҳбарони Тоҷикистон, Қирғизистон ва Узбекистон дар шаҳри Хуҷанд мулоқоти сеҷониба анҷом диҳанд. Имзои созишнома дар бораи нуқтаи марзии се кишвар яке аз мавзуъҳои асосӣ гуфта мешавад.
Ҳамчунин, онҳо дар ҷашни расмии Наврӯз ва маъракаҳои дигар дар маркази вилояти Суғд иштирок хоҳанд кард. Аз ин рӯ, дар се шаҳри вилояти Суғд – Бӯстону Гулистон ва Хуҷанд – роҳҳои марказӣ баста шуда, таҳти чораҳои шадиди амниятӣ қарор дорад ва ҳаракати мардумро мушкил гардондааст.
"Агар ба созиш нарасем..." Таҳдиди Трамп ба раисҷумҳури Русия
Раисҷумҳури Амрико гуфт, агар бинад, ки Маскав монеи талошҳои ӯ барои хатми ҷанг дар Украина мегардад, ба тамоми нафти содиротии Русия таърифаи дубора ҷорӣ хоҳад кард.
Доналд Трамп дар ин бора рӯзи 30-юми март дар суҳбат бо телевизиони NBC сухан гуфт. Изҳороти ӯ баёнгари як навъ дигаргунӣ дар бархӯрди нармтари Кохи Сафед нисбат ба Русия аст.
Вай афзуд, вақте президенти Русия Владимир Путин хоҳони ташкили ҳукумати муваққатӣ дар Украина шуд, ки амалан ба маънои рондани раисҷумҳур Владимир Зеленский аст, "бисёр хашмгин" ва "дилсард" гашт. Худи Трамп қаблан Зеленскийро "диктатори бидуни интихобот" номида буд.
"Агар бо Русия барои қатъи хунрезӣ дар Украина ба тавофуқ нарасем ва агар фикр кунам, ки ин гуноҳи Русия аст... он вақт ба ҳама нафти содиротии Русия таърифаи дубора ҷорӣ хоҳам кард," – гуфт Доналд Трамп.
Президенти Амрико дар шарҳи таърифаи дубора гуфт, ин ба он маъност, ки агар кишваре аз Русия нафт бихарад, имкони кору тиҷоратро дар Иёлоти Муттаҳида аз даст хоҳад дод. Ӯ афзуд, дар сурати ҳосил нашудани созиши оташбас чораҳои тиҷоратӣ дар муддати як моҳ ҷорӣ хоҳанд шуд.
Ин изҳорот баъди он садо дод, ки Кохи Сафед рӯзи 25-уми март гуфт, ҳам Русия ва ҳам Украина ба оташбас дар Баҳри Сиёҳ ва зарба назадан ба иншооти энергетикии ҳамдигар розӣ шудаанд. Бо вуҷуди ин, мушкилот боқӣ монд.
Киев мегӯяд, ба иҷрои созиш омода аст, аммо Маскав дар иваз лағви баъзе аз таҳримҳои вобаста ба ширкату бонкҳои русиро талаб дорад.
Раисҷумҳури Амрико поён додан ба ҷанг дар Украинаро дар авлавияти сиёсати хориҷияш ҷой додааст. Трамп дар суҳбат бо телевизиони NBC гуфт, дар давоми ин ҳафта бо Путин суҳбат хоҳад кард.
Дар пасманзари талошҳои дипломатии Амрико барои расидан ба созиши оташбас, Киев рӯзи 30-юми март ва пас аз ҳамлаи ҳавопаймоҳои бесарнишини Русия ба як бемористони низомӣ Маскавро ба "ҷинояти ҷангӣ" муттаҳам кард.
Паҳподҳои Русия шаби 29 ба 30-юми март ба бемористони низомии Харков ҳамла карда, ба як маркази тиҷоратӣ, биноҳои истиқоматӣ ва ҳадафҳои дигар низ зарба заданду камаш ду нафарро куштанд. Ситоди кулли артиши Украина ҳамлаи Русияро "барқасдона" номид.
Раисҷумҳури Украина Владимир Зеленский гуфт, Киев мунтазири посухи шадиди кишварҳои ғарбӣ ба ҳамлаҳои ҳавопаймоҳои бесарнишини Русия ба қаламраваш аст.
Зеленский шаби 29-уми март гуфт: “Шарикони мо бояд ба таври возеҳ дарк кунанд, ки ин зарбаҳо на фақат ба шаҳрвандони Украина, балки ба тамоми талошҳои байнулмилалӣ ва маҳз дипломатияест, ки мо барои поён додан ба ҷанг истифода мекунем.”
Мақомоти Украина гуфтанд, дар ҳамлаҳои шаби 29-уми март дар саросари ин кишвар дар маҷмуъ ду кас кушта ва 26 тани дигар захмӣ шуданд.
Украина Русияро бори дигар ба "ҷинояти ҷангӣ" муттаҳам кард
Украина рӯзи 30-юми март Русияро бори дигар ба "ҷинояти ҷангӣ" муттаҳам кард.
Ин изҳорот пас аз он садо дод, ки ҳавопаймоҳои бесарнишини Русия шаби 29-уми март ба бемористони низомии Харков ҳамла карда, ба як маркази тиҷоратӣ, биноҳои истиқоматӣ ва ҳадафҳои дигар низ зарба заданду камаш ду нафарро куштанд.
Ситоди кулли артиши Украина ҳамлаи Русияро "барқасдона" номид.
Як соат пеш аз ҳамла ба Харков, раисҷумҳури Украина Владимир Зеленский гуфт, Киев мунтазири посухи шадиди кишварҳои ғарбӣ ба ҳамлаҳои ҳавопаймоҳои бесарнишини Русия ба қаламраваш аст.
Зеленский шаби 29-уми март гуфт: "Шарикони мо бояд ба таври возеҳ дарк кунанд, ки ин зарбаҳо на фақат ҳамла ба шаҳрвандони Украина, балки ба тамоми талошҳои байнулмилалӣ ва маҳз дипломатияест, ки мо барои поён додан ба ҷанг истифода мекунем."
Дар маҷмуъ, мақомоти Украина гуфтанд, дар ҳамлаҳои шаби 29-уми март дар саросари ин кишвар ду кас кушта ва 26 тани дигар захмӣ шуданд.
Сарнавишти садҳо ҳазор афғонистонӣ дар Покистон чӣ хоҳад шуд?
Зиёда аз 800 ҳазор афғон, ки баъд аз бозгашти дубораи "Толибон" ба қудрат дар Афғонистон фирор кардаанд, аз соли 2021 дар Покистон бе ҳуҷҷат қарор доранд.
Онҳо бояд то 31-уми март ин кишварро тарк кунанд.
1,4 миллион тани дигар, ки расман дар Покистон сабти ном шуда, корти Оҷонси паноҳҷӯёни Созмони Милали Муттаҳид ё UNHCR-ро доранд, бояд то 30-юми июн ба ватанашон баргарданд.
Бисёре аз онҳо даҳсолаҳо боз дар Покистон кору зиндагӣ мекунанд.
Сарнавишти 40 ҳазор афғонистонии дигар, ки мунтазири кӯчидан ба кишварҳои сеюм, аз ҷумла Амрико ҳастанд, рӯшан нест.
Ҳина, зани 25-солаи афғонистонӣ, бо оилааш дар шаҳри Пешовар дар шимолу ғарби Покистон зиндагӣ мекунад.
Ӯ мегӯяд, хонаводааш барои кӯчидан ба Иёлоти Муттаҳида иҷозат дошт ва ҳатто билети парвозро аз Исломобод фармоиш дода буд, вале ҳоло дар вазъияти ногувор мондааст.
"Орзуҳои мо барои ояндаи амн дар Иёлоти Муттаҳида шикаста шуданд. Мо наметавонем ба Афғонистон баргардем, чун ҷонамон зери хатар аст. Ҳамчунин, наметавонем, ки дар Покистон зиндагии босуботу устувор бунёд кунем," – изҳор дошт ӯ.
Идомаи эътирозҳо ба ҳимоят аз Акрам Имомоғлу дар Туркия
Дар ҳоле ки ҳукумати Раҷаб Тайиб Эрдуғон дар Туркия барои саркӯби эътирозгарон талош дорад, мардум рӯзи 29-уми март низ бо пуштибонӣ аз Акрам Имомоғлу, шаҳрдори боздоштшудаи Истанбул, ба кӯчаҳо баромаданд.
Ба гузориши хабаргузории "Reuters", аз оғози эътирозҳо дар Туркия тақрибан ду ҳазор кас дастгир шудаанд.
Акрам Имомоғлу, шаҳрдори 54-солаи Истанбул, ду ҳафта қабл боздошт шуд. Мақомоти Туркия ӯро ба "ташкил ва мудирияти созмони ҷиноӣ, гирифтани ришва ва тамаъҷӯӣ" гумонзад медонанд, аммо худаш ҳамаи иттиҳомҳоро рад кардааст.
Дар гирдиҳамоии рӯзи шанбе номаи Акрам Имомоғлу ба эътирозгарон хонда шуд, ки дар он гуфтааст, "онҳо метавонанд маро дар зиндон нигоҳ доранд ва ба додгоҳ кашанд, аммо миллат нишон дод, ки ҳамаи домҳо ва тавтеаҳоро аз байн мебарад."
Боздошти Акрам Имомоғлу як иқдоми сиёсӣ барои берун кардани ӯ аз сабқати интихоботи президентӣ арзёбӣ мешавад. Ҳукумат исрор дорад, ки додгоҳҳои Туркия мустақил ҳастанд.
Баъзе аз назарсанҷиҳо нишон медиҳанд, ки Имомоғлу аз Эрдуғон маъруфтар аст.
Раҷаб Тайиб Эрдуғон ду дафъа президенти Туркия интихоб шудааст ва пеш аз он сарвазири ин кишвар буд. Агар ӯ мехоҳад, ки дигарбора дар интихоботи президентӣ номзад шавад, ё бояд интихоботи пеш аз муҳлат гузаронад ва ё Қонуни асосиро тағйир диҳад.
Гурӯҳи "Толибон" як шаҳрванди дигари Амрикоро раҳо кард
Гурӯҳи "Толибон", ки қариб чор сол боз зимоми қудратро дар Афғонистон ба даст дорад, як зани амрикоиро аз боздошт раҳо кардааст.
Фей Ҳолл дар моҳи феврал дар Афғонистон дастгир шуда буд.
Ҳолл дар наворе гуфт, "ҳеч гоҳ ин қадар аз амрикоӣ буданам ифтихор накардаам. Сипос, ҷаноби президент..."
Дар бораи раҳоии Фей Ҳолл бори аввал рӯзи 27-уми март фиристодаи собиқи Амрико дар Афғонистон Залмай Халилзод хабар дод.
Ин ҳодиса баъд аз раҳоии Ҷорҷ Глезмани 66-сола аз боздошт дар Кобул сурат гирифт.
Дархости Владимир Зеленский аз шарикони ғарбии Украина
Ҳамлаҳои Русия ба Украина афзудааст. Владимир Зеленский, раисҷумҳури Украина, рӯзи 29-уми март аз шарикони ғарбии кишвар хост, ба Маскав посухи "сахт" диҳанд.
Зеленский дар паёми видеоӣ гуфт, шарикони Украина бояд бидонанд, ки ин ҳамлаҳо на фақат ба шаҳрвандони Украина, балки алайҳи ҳама талошҳои байнулмилалӣ ва дипломатӣ барои поён додан ба ҷанг аст.
Раисҷумҳури Украина бо баёни онки мунтазири вокуниши ҷиддист, гуфт, Русия бояд ба сулҳ маҷбур карда шавад ва ин кор танҳо ба воситаи фишор имконпазир аст.
Мақомоти Украина аз ҳамлаҳои ҳавопаймоҳои бесарнишин ва мушакии Русия ба як бемористони низомии Харков ва шаҳри Кривой Рог хабар доданд.
Шаҳрдори Харков аз марги камаш ду нафар гузориш дод ва мақомот гуфтанд, ки дар ҳамлаҳои Русия дар шаҳри Кривой Рог дасти кам ҳафт нафар захмӣ шудаанд.
Марде, ки дар Амстердам панҷ касро захмӣ кард, аз Донетск будааст
Шахсе, ки рӯзи 27-уми март дар шаҳри Амстердам, маркази Ҳолланд, бо корд панҷ касро захмӣ кард, шаҳрванди Украина будааст ва аз вилояти шарқии Донетск.
Пулиси Ҳолланд рӯзи 29-уми март гуфт, ин марди 30-сола рӯзи якуми апрел дар додгоҳ ҳозир хоҳад шуд.
Ангезаи ҳамла рӯшан нест ва тафтиши қазия идома дорад.
Ба иттилои пулис, дар ин ҳодиса ду шаҳрванди Амрико, як марди лаҳистонӣ, як зан аз Белгия ва як духтар аз Амстердам осеб дидаанд.
Марди лаҳистонӣ аз бемористон ҷавоб шудааст. Захмиёни дигар ҳанӯз бистарӣ ҳастанд.
Георгий Тихий, сухангӯйи Вазорати корҳои хориҷии Украина, гуфт, сафорати кишвараш дар Амстердам "бо мақомоти ҳифзи ҳуқуқи Ҳолланд робитаи наздик дорад" ва дар ҷустуҷӯйи маълумоти изофист.
Ӯ афзуд, "мо ба зарардидагон шифои ҳарчи зудтар орзу дорем. Гунаҳкор бояд ба ҷавобгарӣ кашида шавад."
Дар пайи ҳамлаи мусаллаҳонаи Кремлин ба шарқи Украина дар соли 2014 ва сипас ҳамлаи густурдаи Маскав дар соли 2022 бахши зиёде аз вилояти Донетски Украина аз ҷониби Русия ишғол карда шудааст.
"Фишори низомӣ". Ҳушдор аз ҳамлаҳои "густурда"-и Русия ба Украина
Таҳлилгарони низомӣ ва мансабдорони Украина ҳушдор додаанд, ки нерӯҳои Русия дар ҳоли омодагӣ ба оғози як ҳуҷуми густурда дар ҳафтаҳои оянда ҳастанд. Дар ин бора "Associated Press" рӯзи 29-уми март гузориш дод.
Ҳадафи ҳамла фишори низомӣ ба Украина ва тақвияти ҷойгоҳи Кремлин дар музокирот барои оташбас хонда шудааст.
Мансабдорони Украина гуфтаанд, ин иқдом метавонад ба Владимир Путин, раисҷумҳури Русия, ангеза бидиҳад, то гуфтушунидҳои сулҳро ба таъхир андозад ва барои тасарруфи минтақаҳои бештар талош кунад.
Бар асоси гузориши истихборотӣ, Русия бахусус ба минтақаи Суми, Харков ва Запорожйе тамаркуз кардааст.
Владимир Зеленский, раисҷумҳури Украина, рӯзи 27-уми март дар сафар ба Порис гуфт, мақомҳои Русия музокиротро кашол медиҳанд, то Амрикоро дар гуфтушунидҳои, ба қавли ӯ, "бепоён" гирифтор кунанд.
Ин дар ҳолест, ки дар пайи ҳамлаи ҳавопаймоҳои бесарнишини Русия рӯзи 29-уми март дар шаҳри Днепри Украина чаҳор кас кушта ва 21 тан захмӣ шуданд. Ҳамла сабаби сӯхтори калон дар як меҳмонхона, тарабхона ва манзилҳои истиқоматӣ гашт. Зеленский гуфт, яке аз захмиён зани ҳомила аст.
Нерӯҳои ҳавоии Украина дар посух ба як постгоҳи марзӣ дар минтақаи Брянски Русия зарба зада, зерсохтҳои низомӣ, иртиботӣ ва назоратии онро аз байн бурданд.
Созиши оташбасе, ки Амрико ба муддати 30 рӯз пешниҳод кард, бо мухолифати Русия рӯ ба рӯ шуда, музокирот дар мавриди оташбаси маҳдуд дар Баҳри Сиёҳ низ ба бунбаст расидааст.
Русия мехоҳад, бонки давлатии ин кишвар ба низоми байнулмилалии SWIFT дубора пайваст шавад, вале Украина ва Иттиҳоди Аврупо дархости Маскавро напазируфтаанд.
"Ҷаҳон бо мушкилот рӯ ба рӯст." Таҷлили иди Фитр дар Тоҷикистон
Иди Рамазон ё Фитр дар Тоҷикистон, ки тибқи омор беш аз навад дарсади аҳолияш пайрави дини ислом ҳастанд, субҳи 30-юми март бо баргузории намози дастҷамъӣ шуруъ шуд.
Шӯрои уламои Маркази исломӣ, ягона ниҳоди содиркунандаи фатво дар кишвар, дар паёме аз мардум хост, ки дасти ёриро ба дармондагон дароз карда, аз низоъву тафриқа ва ихтилофҳо парҳез намоянд.
Як рӯз пеш аз он раисҷумҳур Эмомалӣ Раҳмон аз шароити ба гуфтааш “бесуботу буҳронии ҷаҳони муосир” ёд овард, ки “истиқлолу озодӣ, сулҳу оромӣ ва суботи сиёсии сайёра таҳти хатари ҷиддӣ қарор гирифтааст”.
Ӯ ҳамчунин гуфт: “Дар ҳоле ки ҷаҳон бо мушкилоти гуногуни иқтисодӣ, буҳронҳои молиявӣ, тағйирёбии иқлим ва оқибатҳои ногувори он, аз ҷумла камобиву хушксолии пайиҳам ва болоравии нархи маводи ғизоӣ рӯбарӯ гардидааст, мо бояд ба масъалаи истифодаи оқилонаи имкониятҳои моддиву молиявии худ муносибати ҷиддӣ дошта бошем.”
Ишораи Раҳмон бештар ба риояи қонун дар бораи танзими ҷашну маросим аст, ки солҳо пеш дар Тоҷикистон қабул шуда, чанд дафъа ба он ислоҳҳо ворид кардаанд.
Мақомот ҳамвора мардумро ба исрофкорӣ дар замони таҷлили ҷашну маросим танқид мекунанд. Баъзе аз сокинон инро дахолат ба зиндагии шахсӣ медонанд ва баръакс аз он норозиянд, ки худи мансабдорон ҳангоми таҷлили ҷашнҳои расмӣ харҷи зиёд мекунанд.
Аз соли 1991 ба ин тараф ҷашнҳои мазҳабие чун иди Фитр ва иди Қурбон дар Тоҷикистон расман таҷлил мешавад ва бар асоси тақвим рӯзи таътил аст.
Азбаски имсол иди Фитр ба якшанбе рост омад, рӯзи душанбеи 31-уми март дар Тоҷикистон рӯзи ғайрикорист.
Дар Днепри Украина чор нафар кушта шудааст
Шоми 28-уми март бар асари ҳамлаҳои Русия ба шаҳри Днепри Украина чор сокини маҳаллӣ кушта ва 24 нафар захмӣ шудааст.
Мақомоти маҳаллӣ эълон карданд, ки чанд хона, меҳмонхона ва ошхонаҳо низ оташ гирифтанд.
Ба гуфтаи мақомоти украинӣ, Русия бо 20 дрон ба ин шаҳр ҳамла кардааст.
Андрей Сибиҳа, вазири умури хориҷии Украина гуфт, Русия сулҳ карданӣ нест.
Беш аз се сол боз ҳамлаҳои Русия ба Украина идома доранд. Доналд Трамп, президенти ИМА ваъда кардааст, ки ба ҷанг дар Украина поён медиҳад.
Ҳанӯз ҳеч нишонае аз поёни ҷанг дида намешавад.
Муовини Трамп гуфт, Гренландия бояд ихтиёран ба Амрико ҳамроҳ шавад
Ҷей Ди Вэнс, муовини Доналд Трамп, президенти ИМА рӯзи ҷумъа ба Гренландия сафар кард.
Дар Питуффик, пойгоҳи низомии Амрико дар Гренландия ӯ бо ҳамсараш Уша ва сарбозону афсарон хуроки нисфирӯзӣ хурданд.
Ӯ дар суҳбаташ бо расонаҳо гуфт, ки Гренландия барои амнияти ИМА ва минтақа хеле муҳим аст.
Вэнс гуфт, ки Дания тавоноии таъмини амният дар Арктикаро надорад, ончуноне, ки чунин имконро ИМА дорад.
Ӯ гуфт, ки агар Амрико Гринландияро бигирад, шод хоҳад шуд.
Рӯзноманигорон аз ӯ пурсиданд, ки оё барои гирифтани Гринландия аз нерӯи низомӣ истифода мешавад, Вэнс гуфт, фикр намекунад, ки кор то инҷо расад.
Ӯ гуфт, ки Гренландия аз Дания ҷудо шавад ва онгоҳ барои ихтиёран пайвастани он ба ИМА музокира хоҳанд кард.
Доналд Трамп, президенти ИМА борҳо таъкид кардааст, ки Гренландия бояд ба Амрико бипайвандад. Ӯ гуфт, соҳиб шудан ба Гренландия на танҳо барои амнияти Амрико, балки ба амнияти тамоми дунё рабт дорад.
Йенс-Фредерик Нилсен, ки рӯзи 28-уми март ҳамчун сарвазири Гренландия ба кор оғоз кард, аз сокинон даъват кард, ки ба фишорҳои беруна муқобилият кунанд. Ӯ тарафдори мустақил шудани Гренландия аз Дания ҳаст, вале мегӯяд, ин минтақа иқтисодашро ба танҳоӣ мечархонад.
Гренландия, бузургтарин ҷазира дар дунё дар шимолу шарқи қораи Амрико ҷойгир аст ва он аз ҷониби Дания, як кишвари аврупоӣ идора мешавад.
Шумораи қурбониён дар Мянмар ба беш аз ҳазор нафар расидааст
Шумораи қурбониёни заминларза дар Мянмар ба беш аз ҳазор нафар расидааст.
Дар ин бораи ҳукумати низомие, ки ин кишварро идора мекунад, ба хабаргузории “France 24" хабар додааст.
Хабаргузории Ройтерз хабар додааст, ки ҳудуди 30 нафар нопадид шудаанд.
Заминларзаи сахт садҳо манзилу пул ва роҳҳоро хароб кардааст.
Дар минтақаҳои харобшуда амалиёт барои ҷустуҷӯи афрод идома дорад.
Рӯзи 28-уми март дар Мянмар замин бо дараҷаи 7,7 дараҷа бо ҳисоби ҷадвали Рихтер ҷумбид.
Дар Тайланд, Ветнам ва Чин низ замин ларзидааст. Дар Бангкок бинои навсохте хароб ва даҳ нафар дар зери он ҳалок шудаанд.
Рақибони занони футболбози тоҷик дар Ҷоми Осиё-2026 муайян шуданд
Дастаи мунтахаби занонаи футболи Тоҷикистон дар марҳилаи интихобии Ҷоми Осиё-2026 дар гурӯҳи «Н» бо тимҳои миллии Кореяи Шимолӣ, Малайзия ва Фаластин рақобат мекунад. Бозиҳои интихобӣ дар ин гурӯҳ аз 29-уми июн то 5-уми июл дар Душанбе баргузор мешаванд.
Дар марҳилаи интихобии Ҷоми Осиё-2026 дар маҷмуъ 34 тими миллии занона ширкат меварзад. Дар натиҷаи қуръакашии марҳилаи интихобӣ, ки рӯзи 27-уми март дар қароргоҳи AFC (Конфедератсияи футболи Осиё) – шаҳри Куала-Лумпури Малайзия - доир гардид, ҳашт гурӯҳ ташкил шуд: ду гурӯҳ аз панҷтимӣ ва шаш гурӯҳи дигар аз чаҳордастаӣ иборатанд.
Бозиҳои марҳилаи интихобии Ҷоми Осиё-2026 дар ҳашт кишвар: Урдун, Тайланд, Мянмар, Индонезия, Ветнам, Узбекистон, Камбоҷа ва Тоҷикистон доир мешаванд.
Танҳо ғолибони гурӯҳҳо ба марҳилаи ниҳоии Ҷоми Осиё-2026, ки аз 1-ум то 26-уми март дар Австралия барпо мегардад, роҳ меёбанд.
Ба ғайр аз дастаи мизбон – Австралия – ба қисми ниҳоии Ҷоми Осиё-2026 тимҳои миллии Чин, Кореяи Ҷанубӣ ва Ҷопон пешакӣ роҳхат гирифтаанд.
Конфедератсияи футболи Осиё (AFC) ҷадвали бозиҳои марҳилаи интихобии Ҷоми Осиё-2026 миёни дастаҳои мунтахаби занонаро тасдиқ кард.
Занони футболбози тоҷик дар гурӯҳи «H» бо дастаҳои Кореяи Шимолӣ (29-уми июн), Малайзия (2-юми июл) ва Фаластин (5-уми июл) бозӣ мекунанд. Ҳамаи бозиҳои интихобӣ дар ин гурӯҳ дар Варзишгоҳи марказии Душанбе баргузор мешаванд.
Марҳилаи интихобии Ҷоми Осиё-2026 миёни дастаҳои мунтахаби занона:
Гурӯҳи «Н»
Кореяи Шимолӣ
Малайзия
Фаластин
Тоҷикистон
Даври якум
29-уми июн (якшанбе)
Кореяи Шимолӣ - Тоҷикистон
Малайзия – Фаластин
Даври дуюм
2-юми июл (чоршанбе)
Тоҷикистон - Малайзия
Фаластин – Кореяи Шимолӣ
Даври сеюм
5-уми июл (шанбе)
Кореяи Шимолӣ - Малайзия
Фаластин - Тоҷикистон
Ёдовар мешавем, дастаи мунтахаби занонаи футболи Тоҷикистон ба марҳилаи интихобии Ҷоми Осиё-2026 дар шаҳри Ҷиддаи Арабистони Саудӣ омодагӣ дидааст.
Занони футболбози тоҷик дар доираи ҷамъомади таълимиву тамринӣ дар Ҷидда бо тими миллии Арабистони Саудӣ ду бозии дӯстона анҷом доданд. Ҳарду бозӣ рӯзҳои 23-юм ва 26-уми феврал дар варзишгоҳи «Шоҳ Абдуллоҳ Спортс Сити» доир гардид. Дар бозии аввал мизбонон бо ҳисоби 4:0 пирӯз шуданд. Бозии дуюм низ бо ғалабаи занони футболбози Саудӣ бо ҳисоби 3:0 хотима ёфт.
Рубио гуфт, визаи 300 донишҷӯи ширкатдори эътирозҳои зидди Исроил бекор шуд
ИМА беш аз 300 раводид ё визаи донишҷӯёни хориҷиро, ки дар эътирозҳои зидди Исроил ширкат доштанд, бекор кард. Марко Рубио, вазири умури хориҷии Амрико гуфтааст, ин лағви визаи донишомӯзон идома дорад. “Мумкин аст, ин танҳо ҳоло беш аз 300 нафар аст. Мо ин корро ҳар рӯз хоҳем кард. Ҳар бор бо ошкор шудани як чунин девонае, ман ӯро аз раводид маҳрум мекунам.”
Вай дар муроҷиат ба ин донишҷӯён таъкид кардааст, ки “мо ба ту барои таҳсил ва гирифтани дараҷаи илмӣ виза додем. На барои он, ки ту фаъоли ҷамъиятӣ шуда, кампус ё донишгоҳҳои моро расво кунӣ. Ва агар мо ба ту виза додему ту тасмим гирифтӣ, ки ба ин корҳо даст занӣ, мо онро бегуфтугӯ мегирем,”- афзуд котиби давлатии Амрико.
Ин изҳороти Рубио дар посух ба суолҳо оид ба сабабҳои лағви виза ва боздошту ихроҷи донишҷӯи турк, Румайсо Озтурк садо дод. Румайсо дар бахши докторантураи донишгоҳи Тафтс таҳсил мекард.
Рубио нагуфт, ки Озтурк ба чӣ гунаҳкор шудааст. Вай танҳо гуфт, рафтори донишҷӯдухтар ба меъёрҳои лағви раводид мувофиқат мекунад. Озтурк дар эътирозҳо бо пуштибонӣ аз Фаластин ширкат карда, аз донишгоҳ даъват карда буд, ки бо ҳама ширкатҳое, ки бо Исроил робита доранд, ҳамкориро қатъ кунанд ва “наслкушии фаластиниён”-ро эътироф кунанд. Ин донишомӯз ҳоло дар ҳабс аст ва ҳанӯз аз ИМА берун карда нашудааст.
Яке аз аввалин фармонҳои Доналд Трамп баъди шурӯи кораш ҳамчун президенти ИМА мубориза бо яҳудиситезӣ буд. Ба гуфтаи вай, толибилмоне, ки бо ҳимоят аз Фаластин дар донишгоҳҳо эътироз кардаанд, ба ҳамин гурӯҳ шомил мешаванд.
Ба навиштаи Бахши русии Би-би-си, бекор кардани виза ва боздошти эътирозгарон ҳам дар асоси ҳамин фармони Трамп сурат мегирад.
Аз ин пеш ҳукумати Трамп ҳаҷми маблағгузории Донишгоҳи давлатии Колумбияро ба андозаи 400 миллион доллар коҳиш дод. Ин муассиса ба он айбдор шуд, ки намехоҳад дар шаҳраки худ зидди яҳудиситезӣ мубориза барад.
Зилзилаи пурқудрате Мянмарро такон дод
Дар Мянмар рӯзи 28 март зилзилаи пурқудрати 7,7-дараҷаӣ рух дод ва пасларзаи 12 дақиқа баъдаш 6,4 дараҷа ҳисоб шуд. Маркази зилзила дар қисмати шимолу ғарби шаҳри Сикайн буда, сокинони шаҳри Рангони Мянмар гуфтанд, ки мардуми зиёд аз хонаҳои худ берун шуданд. Дар ин бора CNN хабар додааст.
Матбуот мегӯяд, ки дар қаламрави Мянмар бисёр биноҳо осеб дидаанд. Пули муҳиме, ки аз дарёи Иравадии пайвандгари миёни шаҳрҳои Сикайн ва Ава мегузарад, ба об афтодааст. Эҳтимолан даҳҳо ё садҳо хона вайрон шудааст.
Хабарҳое мерасад, ки дар 1400 км аз маркази зилзила дар шаҳри Тайланди Бангкок ҳам зилзила эҳсос шудааст. Бархе хабаргузориҳо мегӯянд, таконхӯрии заминро сокинони Бангладеш, Ҳинд, Лаос ва Чин ҳам эҳсос кардаанд. Феълан маълумоти дақиқ дар бораи шумори талафот дар миёни мардум нашр намешавад.
Ғолибони мусобиқоти гуштигирӣ бо мошинҳои сабукрав мукофотонида шуданд
Бахшида ба Ҷашни байнулмилалалии Наврӯз дар Қалъаи Муғтеппаи шаҳри Истаравшан мусобиқаи гуштигирӣ баргузор шуд.
Дар ин мусобиқаи байнулмилалӣ паҳлавонон аз Тоҷикистон, Узбекистон, Қирғизистон, Эрон ва Русия иштирок карданд. Мардон дар чаҳор вазн ва занон дар як вазн қувва озмуданд.
Дар сабқати занон дар вазни 57 кило гуштигири тоҷик Аҳлия Муъминова, ки дар финал ба Ирена Хубуловаи русиягӣ пирӯз шуд, бо медали тилло ва ҷоизаи молӣ сарфароз гашт.
Дар мусобиқаи мардон паҳлавонони тоҷик дар се вазн ғолиб омаданд. Искандар Маҳмадхоҷазода дар вазни 60 кило, Наврӯзи Каримзод дар вазни 71 кило ва Ҳамроз Раҷабов дар вазни 86 кило ба гирифтани медали тилло ва ҷоизаҳои молӣ мушарраф шуданд.
Дар вазни беш аз 86 кило паҳлавон аз Узбекистон Бекмурод Олтибоев, ки дар финал гуштигири тоҷик Шарифҷон Назриевро мағлуб кард, соҳиби шоҳҷоиза – мошини сабукрав – гардид.
Ғолибону ҷоизадорони мусобиқаи гуштигирӣ дар Истаравшан:
Вазни 57 кг
1. Аҳлия Муъминова (Тоҷикистон)
2. Ирена Хубулова (Русия)
3. Рӯзигули Ҳасан (Тоҷикистон)
4. Ситора Элмуродова (Узбекистон)
Вазни 60 кг
1. Искандар Маҳмадхоҷазода (Тоҷикистон)
2. Муҳаммадҷон Салимов (Тоҷикистон)
3. Меҳрзод Сӯфиев (Тоҷикистон)
4. Ҷӯрахон Амрохонзода (Тоҷикистон)
Вазни 71 кг
1. Наврӯзи Каримзод (Тоҷикистон)
2. Муҳаммадисо Раҷабов (Тоҷикистон)
3. Дилшод Мисаков (Тоҷикистон)
4. Алӣ Боқиев ( Тоҷикистон)
Вазни 86 кг
1. Ҳамроз Раҷабов (Тоҷикистон)
2. Сайфиддин Сайфиддинзода (Тоҷикистон)
3. Умед Эсанов (Узбекистон)
4. Раҳматулло Фарҳодов (Тоҷикистон)
Вазни +86 кг
1. Бекмурод Олтибоев (Узбекистон)
2. Шарифҷон Назриев (Тоҷикистон)
3. Муҳсин Исомиддинов (Узбекистон)
3. Шералӣ Ҷӯраев (Узбекистон)
Бахшида ба Ҷашни байнулмилалалии Наврӯз дар шаҳри Хоруғ мусобиқаи гуштигирӣ доир гардид. Паҳлавони маъруфи тоҷик Шакармамад Мирмамадов, ки дар вазни беш аз 86 кило дар финал ба Шарифҷон Назриев дастболо шуд,
барандаи шоҳҷоизаи ин мусобиқа - мошини сабукрави электромобил гардид.
Гуштигирони тоҷик Идибеки Амиршо, Қоим Шукронов, Муҳаммадисо Раҷабов ва Ҳақназар Назаров дар финал рақибонашонро мағлуб карда, соҳиби Ҷоми раиси Вилояти Мухтори Кӯҳистони Бадахшон гардиданд.
Бахшида ба Наврӯз дар деҳаи Пушинги ноҳияи Данғара мусобиқаи гуштии миллӣ сурат гирифт. Дар ин мусобиқа паҳлавонони тоҷик Ғазалшои Давлатшоҳ, Бобоҷон Бобоҷонов, Мизроб Лоиқов ва Шарифҷон Назриев ғолиб омада, ҳар кадом бо мошини сабукрав қадрдонӣ шуданд.
Иттиҳоди Аврупо алайҳи Белорус таҳримҳои нав ҷорӣ кард
Иттиҳоди Аврупо барои таъқибҳои сиёсӣ ва дастгирӣ аз ҳамлаи Русия ба Украина, алайҳи Белорус таҳримҳои нав ҷорӣ кардааст.
Дар рӯйхати нави таҳримҳо, 25 шаҳрванди Белорус ва 7 ширкат шомил шудаанд.
Аъзои Комиссияи марказии интихоботи Белорус, мақомдорони баландпоя, додрасҳо ва тоҷирони наздик ба ҳукумат, аз ҷумла шахсоне ҳастанд, ки аз сӯи Иттиҳоди Аврупо таҳрим шуданд.
Чанд ширкати вобаста ба парвариши пиёз барои он ба рӯйхати сиёҳ афтодаанд, ки аз меҳнати маҳбусони сиёсӣ дар шароити вазнин истифода мебаранд.
Таҳримҳои нави Иттиҳоди Аврупо дар ҳоле алайҳи Белорус таҳримҳои нав ҷорӣ мекунад, ки раисҷумҳури худкомаи ин кишвар Александр Лукашенко 25 март савганд ёд кард.
Ӯ 26-уми январи имсол дар интихоботе, ки бе рақиби ҷиддӣ баргузор шуд, ғолиб эълон шуд. Иттиҳоди Аврупо натиҷаҳои интихоботро эътироф накард.
Лукашенкои 70-сола аз соли 1994 Белорусро идора мекунад ва барои нақзи озодиҳои асосӣ интиқод мешавад.
Боздошти 7 милисаи қалбакӣ дар Душанбе дар як ҳафта
Пулиси Душанбе давоми се рӯзи ахир 7 нафарро боздошт кардааст, ки худро корманди мақомоти қудратӣ муаррифӣ карда, аз шаҳрвандон пул талаб кардаанд. Назари ин афрод ва наздиконашон ба иттиҳом маълум нест.
Дар хабарномаи Раёсати корҳои дохилии Душанбе омадааст, Саидшоҳ Сафоев, Сафо Ризоев, Умед Султонов ва Азиз Юсупов "худро ҳамчун корманди мақомоти ҳифзи ҳуқуқ муаррифӣ карда, бо далелҳои сохта шаҳрвандонро дастгир ва барои паҳн насохтани маълумоти беобрӯкунанда" аз онҳо пул талаб кардаанд.
Дар ҳоле, ки назари гумонбарон ба иттиҳом маълум нест, пулиси Душанбе мегӯяд, то кунан 3 ҳолати пулталабии ин афродро сабт кардааст.
Аввали ҳафтаи равон пулиси Душанбе Умарҷон Зарифӣ, Ёқуб Аброров ва Маҳлаиллоҳ Маҷидзода ҳам бо айни ҳамин иттиҳом боздошт карда буд. Ба гуфтаи мақомот, ин афрод аз ду нафар дар умум 3200 сомонӣ гирифта, онҳоро латукӯб кардаанд.
Радиои Озодӣ мустақилона ин далелҳоро тасдиқ карда наметавонад ва дар сурати муроҷиати наздикони ин афрод, омода аст, ки назари онҳоро ҳам пахш кунад.
Алайҳи ин афрод бо иттиҳоми ғоратгарӣ парванда кушодаанд, ки аз се то панҷ сол зиндонро пешбинӣ мекунад.
Боздошти 7 нафар ин баҳсро дар шабакаҳои иҷтимоӣ ба миён овард, ки чаро онҳо худро корманди мақомоти қудратӣ муаррифӣ карда, ғоратгарӣ кардаанд?
Ҳомиёни ҳуқуқ борҳо аз шиканҷаву бадрафторӣ бо дастгиршудаҳо дар мақомотҳои қудратӣ ва фасод дар ин ниҳодҳо нигаронӣ кардаанд.
Пешниҳоди ҷазо барои напардохтани пули барқ дар Тоҷикистон
Эмомалӣ Раҳмон, раисҷумҳури Тоҷикистон, хостааст, барои истифодаи ба гуфтааш "ғайриқонунии нерӯи барқ" ва "напардохтани пули он" ҷавобгарии ҷиноӣ таъйин карда шавад.
Пешниҳод рӯзи 27-уми март дар маҷлиси ҳукумат садо додааст. Ҷаласа паси дарҳои баста ва бе ҳузури хабарнигорони мустақил гузашт ва ҷузъиёташ маълум нест.
Дафтари матбуоти президент танҳо навишт, ки "Эмомалӣ Раҳмон аз истифодаи ғайрисамараноки нерӯи барқ ва талафоти аз меъёр зиёди он дар тирамоҳу зимистони 2024-2025 изҳори нигаронӣ кард."
Мақомоти Тоҷикистон чанд сол боз мардумро гунаҳкор мекунанд, ки ҳаққи истифодаи нерӯи барқро намедиҳанд ва ё онро бидуни ҳисобкунак истифода мебаранд. Сокинон, баръакс, даъво доранд, ки ҳар моҳ нозирон пули барқро аз онҳо меситонанд, вагарна бе гармиву рӯшноӣ хоҳанд монд.
Ширкати "Барқи Тоҷик" қарзи аҳолиро аз нерӯи барқ то моҳи январи соли 2025 як миллиарду ҳафтсад миллион сомонӣ ҳисоб кардааст. Коршиносон борҳо омори қарздории аҳолиро аз барқ зери шубҳа гузошта, сабабҳои ин мушкилро бештар ба мудирияти нодуруст пайванд додаанд.
Дар айни замон баъзе аз нозирони барқ бе зикри номи худ мегӯянд, қарзҳои зиёд умдатан аз корхонаву шахсонест, ки ба хешовандони мансабдорони баландпоя тааллуқ доранд.
Ҳар киловат соат нерӯи барқ барои аҳолии Тоҷикистон ба 30,37 дирам фурӯхта мешавад. Бо қарори ҳукумат, аз якуми апрели имсол ин рақам ба 35,36 дирам хоҳад расид. Дар ҳоле ки ширкате азиме чун "Талко" (корхонаи алюминиюми тоҷик) онро ба 20,77 дирам мегирад.
Тоҷикистон дар соли 2024 зиёда аз 22 миллиард киловат соат нерӯи барқ истеҳсол кардааст. Талаботи солонаи кишвар дар умум 19 миллиард киловат соат гуфта мешавад. Дар соли 2024 ба зиёда аз 906 миллион сомонӣ ба хориҷа барқ фурӯхта шудааст.
Гуфтугӯ