Корхонаи алюминии “Талко” дар шаҳри Турсунзода беш аз 297 миллион сомонӣ аз истифодаи пули барқ қарздор будааст.
Муҳаммад Қурбонов, раҳбари Шабакаҳои барқи шаҳри Турсунзода ба нашрияи расмии “Ҷумҳурият” гуфтааст, ки то чанде пеш ин ширкат 320 миллион сомонӣ аз пули барқ қарздор буд, вале “Талко” каме қарзашро пардохт кард.
Дар Тоҷикистон, ки ҳоло дар аксар ноҳияҳо барқ тариқи лимит ё маҳдуд ба сокинон дода мешавад, дар сурати қарздории сокинон интиқоли барқ пурра ба хонаҳояшон қатъ мешавад.
“Сареҳ аст, ки “Ширкати алюминийи тоҷик” аҳамияти стратегӣ дорад ва мо ҳуқуқи аз қувваи барқ маҳрум намудани онро надорем. Бинобар ин, танҳо бо василаи корбариву ҳамдигарфаҳмӣ роҳи пардохти қарзро пайдо мекунем,” –гуфтааст Муҳаммад Қурбонов.
Напардохтани пули барқ аз ҷониби корхонаи “Талко” дар ҳолест, ки ин ширкат аз имтиёз бархурдор аст.
Соли гузашта мақомот эълон карданд, ки нархи барқро ба истиснои корхонаи “Талко” барои дигар корхонаҳову сокинон боло мебаранд. Нарх барои ҳар киловат соат нирӯи барқро соли гузашта барои сокинон аз 22,66 (2,3 сент) ба 26,51 дирам (2,5 сент) боло бурда буданд.
“Талко”, яке аз бузургтарин корхонаҳои Тоҷикистон аст, ки ба хориҷ аз кишвар маҳсулоти алюминӣ содир мекунад.
