Сомон дар вазни то 81 кило дар даври аввал бар Муаяд Звайб аз Фаластин пирӯз шуда, ба даври чаҳорякниҳоӣ роҳ ёфт. Дар чорякфинал ӯ Асад Масобирови қирғизро шикаст дода, ба даври ниманиҳоӣ баромад. Дар нимфинал Сомон Абулайхан Жубаназари қазоқро мағлуб карда, ба финал роҳ пайдо кард. Сомон дар финал Ли Ҷунванро аз Кореяи Ҷанубӣ шикаст дод ва ғолиби мусобиқот шуд.
Ёдовар мешавем, Беҳрӯзи Хоҷазода, паҳлавони маъруфи тоҷик, дар Бозиҳои 19-уми тобистонаи осиёӣ дар риштаи ҷудо медали биринҷӣ ба даст овард. Ин аввалин медали Тоҷикистон дар ин бозиҳо ба шумор мерафт.
Беҳрӯз дар вазни то 73 кило дар даври аввал бар ҷудокори Филиппин Накано Кейсей дастболо шуда, ба чорякфинал баромад. Дар даври чаҳорякниҳоӣ бар Дониёр Шамшаеви қазоқ ғолиб омад. Вале Хоыазода дар даври ниманиҳоӣ аз Соичи Ҳашимотои ҷопонӣ мағлуб шуд. Беҳрӯз барои нишони биринҷӣ бар Қингдага аз Чин ғалаба кард.
Дар рӯзи аввали мусобиқот ду паҳлавони тоҷик - Меҳрзод Сӯфиев (-60 кг) ва Обид Ҷебов (-66 кг) - дар рақобатҳо байни мардон барои медали биринҷӣ мубориза бурда, ноком шуданд ва дар натиҷа ҳарду мақоми панҷумро соҳиб шуданд.
Дар мусобиқаи занон варзишгарони тоҷик дар даврҳои муқаддамотӣ шикаст хӯрданд.
Дар рӯзи минбаъдаи мусобиқот Комроншоҳ Устопириён (-90 кг), Исроил Раҳимов (-100 кг) ва Темур Раҳимов (+100 кг) миёни мардон ба рақобат мепардозанд.
Ба иттилои Кумитаи миллии олимпии Тоҷикистон, дар Бозиҳои 19-уми тобистонаи осиёӣ, ки дар шаҳри Ҳангжоуи Чин то рӯзи 8-уми октябр идома меёбад, Тоҷикистонро беш аз 100 варзишгар намояндагӣ мекунад.
Ба барномаи бозиҳо 40 навъи варзиш (28 намуди олимпӣ ва 12 намуди ғайриолимпӣ) дохил аст. Варзишгарони тоҷик ба ҷуз аз ҷудо, дар риштаҳои бокс, варзиши сабук, куштии озод ва юнонию румӣ, вазнабардорӣ, ҷиу- ҷитсу, шиноварӣ, камонварӣ, тирандозӣ, таэквондо, каратэ, кураш ва ғайра ҳунарнамоӣ хоҳанд кард.
Ба варзишгарони тоҷик, ки дар Бозиҳои 19-уми тобистонаи осиёӣ дар Ҳангжоу нишони тилло мегиранд, ҷоизаи президенти Тоҷикистон ба маблағи 150 000 сомонӣ, барандагони нишони нуқра 100 000 сомонӣ ва соҳибони нишони биринҷӣ 50 000 сомонӣ супурда мешавад.
Инчунин бо қарори раиси шаҳри Душанбе ба онҳое, ки дар ин бозиҳо барандагони медали тилло мешаванд, хонаи сеҳуҷрагӣ, медали нуқра дуҳуҷрагӣ ва медали биринҷӣ манзили якҳуҷрагӣ тақдим мегардад.
Бояд тазаккур дод, Бозиҳои тобистонаи осиёӣ шурӯъ аз соли 1951 дар ҳар чаҳор сол таҳти сарпарастии Шӯрои олимпии Осиё баргузор мешаванд.
Дастаи мунтахаби Тоҷикистон аз соли 1994 дар ин бозиҳо ширкат варзида, то ин дам 29 медал гирифтааст, ки 5-тоаш нишони тилло, 6-тоаш нуқра ва 18-тоаш биринҷӣ мебошад. Се медали тиллоро гурзандози машҳур Дилшод Назаров ва яктоӣ нишони тиллоро муштзани маъруф Ҷаҳон Қурбонов ва паҳлавони шинохта Сомон Маҳмадбеков ба даст овардаанд.
Гуфтугӯ