Дар Русия тарҳи қонунеро қабул карданд, ки бар асоси он маҳбусон ба хидмат дар артиш ё ҷанг даъват хоҳанд шуд. Аммо қонун нисбат ба маҳкумшудагоне, ки ҷиноятҳои ҷинсӣ, терроризм, ифрогароӣ ва хиёнат ба давлат кардаанд, татбиқ намегардад. Тарҳро рӯзи 20-уми июн вакилони Думаи давлатии Русия пазируфтанд.
То ҳоло аз маҳбасҳои Русия ҳазорон нафар, аз ҷумла шаҳрвандони Тоҷикистонро ба майдонҳои ҷанг дар Украина бурдаанд.
Аз ин имтиёз ширкати хусусии ҳарбии "Вагнер" истифода мекард ва зиндониёнро бар асоси қарордод ва бо ваъдаи афв ба ҷанг дар Украина мебурд. Молики ширкат, Евгений Пригожин, яке аз шахсони сарватманд ва наздик ба раиси ҷумҳурии Русия Владимир Путин аст.
Акнун ин имконият ба мақомоти давлатии Русия, аз ҷумла Вазорати дифои ин кишвар, дода мешавад.
Радиои Озодӣ то ин дам дар бораи кушта шудани камаш бист зиндонии тоҷик дар ҷанги Русия дар Украина хабару гузориш додааст. Ҷасади аксари онҳоро дар Тоҷикистон дафн карданд.
Теъдоди умумии шаҳрвандони кушташудаи Тоҷикистон дар ҷанги Русия дар Украина дақиқ нест.
Бино ба таҳқиқоти ахири Би-би-сӣ, на камтар аз 93 зодаи давлатҳои Осиёи Марказӣ, ки аз тарафи Русия меҷангиданд, дар Украина ба ҳалокат расидаанд. Баъзе аз онҳо зиндонӣ буданд.
Думаи Давлатии Русия рӯзи 20-уми июн бо қабули тарҳи дигар ҳамчунин иҷоза дод, низомиёне, ки ҷинояти "сабуку миёна" кардаанд, аз ҷавобгарӣ озод гарданд.
Бино ба қонуни нав ғоратгарӣ, тамаъҷӯӣ ва куштор дар ҳолати бехудӣ начандон вазнин арзёбӣ шуда, шахсе, ки чунин ҷиноят кардааст, метавонад аз ҷавобгарӣ озод шавад.
Ин гурӯҳ бояд бо Вазорати мудофиаи Русия қарордод дошта, дар давраи мобилизатсия ё сафарбарӣ ба хидмати ҳарбӣ ё ҷанг ҷалб шуда бошанд.
Тарҳи ҳар ду қонун дар аввали имсол ба порлумони Русия пешниҳод шуда буд.
Гуфтугӯ