Кореяи Шимолӣ хабар дод, ки силоҳи зериобиеро озмоиш кардааст, ки заряди ҳастаӣ дошт.

Расонаҳои Кореёи Ҷанубӣ иттилоъ доданд, ки дар маросими озмоиш роҳбари Кореяи Шимолӣ Ким Чен Ин ширкат кард. Озмоиш рӯзҳои 21 ва 23-юми март анҷом шудааст.

Дар Кореяи Шимолӣ ин аслиҳаро "бесарнишини ҳастаии зериобӣ" унвон кардаанд.

Ба иттилои расонаҳои Кореяи Ҷанубӣ, ин аслиҳа қодир аст, дар сурати ҷанг "ба таври пинҳонӣ аз зери об ба минтақаи душман расида, сунамии радиоактивии пурқудрате ба вуҷуд орад ва киштиҳои душманро вайрон кунад".

Пештар низомиёни Амрико ва Кореяи Ҷанубӣ размоишҳои Freedom Shield-ро шуруъ карданд.

Сеул гуфт, ин размоишҳо хосияти дифоӣ доранд. Дар ин размоиш нақшаи ҳимоят аз хушунати Кореяи Шимолӣ коркард шудааст.

Рӯзи 15 март бо нашри изҳороте ҳукумати Толибон, ки худро “Аморати исломии Афғонистон” меномад, аз қарордоди имзошудаи миёни Тоҷикистон ва Қирғизистон истиқбол кардааст.

Вазорати корҳои хориҷии Толибон, аз ҷумла, навиштааст: “Аморати исломии Афғонистон дастёбӣ ба хатми баҳси дарозмуддати миёни ду кишвари бародарро аз роҳи ҳамдигарфаҳмӣ қадами мусбате ба самти суботи минтақавӣ, рушди иқтисодӣ ва тақвияти эътимоди байниҳамдигарӣ арзёбӣ мекунад”.

Дар изҳорот гуфта шудааст, ки “Афғонистон ҳамеша пуштибони сулҳ, ҳамдигарфаҳмӣ ва тавсеаи ҳамкориҳои минтақавӣ аст ва бовар дорад, ки ин созишнома саҳифаи навро дар сулҳи давомдор дар Осиёи Марказӣ боз хоҳад кард”.

Ҳукумати Толибон, ки соли 2021 дар Афғонистон сари қудрат баргаштааст, ҳанӯз аз ҷониби ҳукумати Тоҷикистон ба расмият шинохта нашудааст, вале ҳамкориҳои энержӣ ва тиҷоратӣ миёни ин кишварҳо вуҷуд доранд.

Созиши марзии миёни Душанбе ва Бишкек рӯзи 13 март имзо шуд ва то ҳол бисёр давлату созмонҳои шарики ин кишварҳо, аз ҷумла, СММ, Иттиҳоди Аврупо, кишварҳои ИМА, Русия, Чин ва дигарҳо аз имзои ин санад истиқбол кардаанд.

ИМА қоидаҳои вуруд ба ин кишвар барои шаҳрвандони 43 кишварро шадидтар мекунанд ва дар ин феҳрист аз миёни давлатҳои собиқ шӯравӣ инчунин Русия, Беларус, Туркманистон ёд мешаванд. Дар ин бора рӯзи 15 март нашрияи The New York Times хабар додааст.

Бино ба навиштаи ин расонаи амрикоӣ, феҳристи кишварҳо ба се гурӯҳ – “сурх”, “норанҷӣ” ва “зард” тақсим шудааст.

Шаҳрвандони кишварҳое, ки ба гурӯҳи “сурх” ворид карда шудаанд, ҳақи ворид шудан ба хоки ИМА-ро надоранд. Ин кишварҳо: Афғонистон, Бутан, Венесуэла, Эрон, Куба, Кореяи Шимолӣ, Либия, Сомалӣ, Судон, Сурия, Яман мебошанд.

Русия, Беларус, Туркманистон ва Покистон ба гурӯҳи “норанҷӣ” ворид шудаанд ва додани виза ба шаҳрвандони ин кишварҳо метавонад маҳдуд шавад. Барои шаҳрвандони ин кишварҳо танҳо дар сурати “сайёҳони бисёр сарватманду соҳиби кор” буданашон додани виза иҷоза дода мешавад.

Ба кишварҳое аз рӯйхати “зард” 60 рӯз фурсат дода мешавад, ки нигарониҳои мавриди ИМА-ро ислоҳ кунанд. Ба ин гурӯҳ исми 22 давлат, аз ҷумла Зимбабве, Чад, Сент-Китс и Невис, Вануату ва дигарҳо ворид карда шудаанд.

Нашрия навиштааст, ки феҳристи ниҳоии кишварҳо метавонад тағйир ёбад.

Трамп аз аввалин рӯзи раёсатҷумҳуриаш мубориза бо муҳоҷирати ғайриқонуниро аз ҳадафҳои муҳими худ эълон карда дар сарҳад бо Мексика ҳолати фавқулодда ҷорӣ кард.

Як гузориши СММ мегӯяд, мақомот дар Эрон барои назорат аз қонуни пӯшидани ҳиҷоб аз фанновариҳои пешрафтаи мисли паҳподу дастгоҳҳои шинохти чеҳра ва замимаҳои гузоришдиҳии шаҳрвандон истифода мекунанд. Муҳимтарин дастгоҳи назорат аз болои занон дар ҷомеаи Эрон замимаи ҳукуматии бо номи “Назорат” мебошад.

Ин замима ба полис имконият медиҳад, ки аз мавридҳои эҳтимолии вайрон кардани қонуни ҳиҷоб дар дохили мошинҳо, аз ҷумла, мошини ёрии таъҷилӣ, мусофирбарҳо ваё таксиҳо назорат кунанд.

Замима ба корбарон имкон медиҳад, ки маълумот дар бораи шаҳодатномаи мошин, маҳалли ҳаракати он ваё замони нақзи муқаррарот хабар диҳанд.

Маълумот рост ба полис меравад. Бар асоси ин шикоят, полис метавонад ба соҳиби мошин паёмак ё СМС фиристода ҳушдор диҳад, ки онҳо ҳолати вайрон кардани қоидаи пӯшидани ҳиҷобро сабт кардаанд ва дар сурати нодида гирифтани ҳушдорҳо, мошин мусодира мешавад.

Гузориши СММ мегӯяд, мақомот дар Теҳрон ва минтақаҳои ҷанубии кишвар бо истифода аз паҳпод ё дрон пӯшидани ҳиҷобро аз ҷониби занҳо назорат мекунанд. Илова ба ин, дар даромадгоҳи донишгоҳи Амиркабири Теҳрон як нармафзоре насб шудааст, ки вазифааш чеҳрашиносӣ ва сабти симои духтарони беҳиҷоб мебошад. Қарор аст ин гузориш рӯзи сешанбе дар ихтиёри Шӯрои ҳуқуқи башари СММ вогузор шавад.

Нахуствазири Бритониё Кейр Стармер дар як мулоқот бо сарони кишварҳои аврупоӣ гуфт, президенти Русия Владимир Путин бояд ҳамлаҳо ба Украинаро хотима дода созиши оташбаси пешниҳодии ИМА-ро бипазирад. Стармер, ки 15 март дар як ҷаласаи маҷозие бо иштироки 25 раҳбари аврупоӣ сӯҳбат мекард, аз ҳамкорони аврупоиаш даъват намуд, ки фишорро болои Маскав афзоиш дода ҳама гуна созиши сулҳро дифоъ кунанд.

Ӯ гуфт, “агар Путин дар робита бо сулҳ нияти ҷиддӣ дорад, дигар кор осон аст: ӯ бояд ҳамлаҳои барбариаш ба Украинаро хотима дода бо оташбас розӣ шавад”. Дар ҷаласа инчунин раҳбарони Канада, Австралия ва Зеландияи Нав иштирок карданд, намояндаи ИМА дар нишаст ҳузур надошт.

Ӯ афзуд, “мо бояд ба пешрафт дар ин масъала, барои сулҳ ва сулҳи давомдор пойфишорӣ кунем”.

Дар ҳоле, ки Русия, ИМА ва Украина дар атрофи пешниҳоди Доналд Трамп, президенти ИМА оид ба оташбаси 30-рӯза баҳс мекунанд, Стармер хостори кӯмакҳои амалии молию ҳарбӣ ва таъминотӣ ба Киев мебошад.

Бритониё, Фаронса ва давлатҳои дигар гуфтаанд, ки дар доираи созиши оташбас омода ҳастанд ба Украина нирӯҳои посдори сулҳи худро фиристанд. Стармер аз Вашингтон даъват намуд, ки ба хотири пешгирӣ аз ҳамлаҳои бештари Русия ба ин нирӯҳо кӯмаку пуштибонии худро фароҳам кунад. Ӯ гуфт, дар сурати сари мизи гуфтушунид нишастани Русия мо бояд ҷараёни оташбасро назорат кунем, то ки оташбаси ҷиддӣ ва сулҳи давомдор таъмин шавад”. Ӯ гуфт, дар сурати ғайр, фишори иқтисодӣ болои Русия бояд афзоиш дода шавад.

Рӯзи 14 март баъди сӯҳбат бо Стармер, президенти Фаронса Эммануэл Макрон ҳам гуфт, Русия бояд пешниҳоди оташбасро бипазирад.

Президенти Украина Владимир Зеленский гуфт, нирӯҳои кишвараш вазифаи худро дар вилояти Курски Русия иҷро карданд, ки ба гуфтаи ӯ, ҳадаф аз хатҳои дигари ҷабҳа ба ин сӯ кашидани нирӯҳои русӣ буд.

Дар ин бора нашрияҳои "Суспільне" ва "Укринформ" хабар медиҳанд. Ӯ гуфт, ки дар ин қитъаи ҷабҳа вазифаи нирӯҳои украинӣ ин буд, ки сарбозони русро аз самтҳои Покровск, Харков ва Суми ба ин сӯ ҷалб кунанд.

Зеленский, ки сарбозони украиниро ҳамчун қаҳрамонон ситоиш кард, гуфт, «аввал шуда фишор дар самти Харков кам карда шуд. Онҳо шумори зиёди сарбозонро ба самти Куршина равона карданд. Баъди ин аз самти шарқӣ сарбозонро ин сӯ кашиданд, вале ҳадафи асосии худ Покровскро аз даст надоданд. Мо инро дарк мекардем.

Одамон қавиирода ҳастанд ва дарк мекарданд, ки шонсе даст медиҳаду русҳо дар самти Покровск бозмеистанд. Ҳамин тавр ҳам шуд». Зеленский гуфт, ки дар натиҷа, вазъ дар самти Покровску Харков «мӯътадил шуд».

Зеленский гуфт, бовар дорад, амалиёт дар вилояти Курск ба анҷом расид ва дар самти Покровск вазъ ҳоло мӯътадил аст ва «барои аз нав ишғол кардани Покровск осон нахоҳад шуд».

Артиши Украина августи соли 2024 амалиёти худро дар вилояти Курск шурӯъ карда, чанд маҳалли истиқоматиро ба даст даровард. Он вақт Зеленский гуфт, ки бо ин кор аз муҳосираи як қисми вилояти Суми пешгирӣ мешавад, мавқеи нирӯҳои украинӣ ба ҳангоми музокироти эҳтимолӣ бо Русия қавитар хоҳад шуд ва ҳам ба сокинони Русия «воқеиятро» нишон медиҳад.

Пажӯҳишгоҳи омӯзиши низоъҳо мегӯяд, амалиёти низомӣ дар масоҳати 1160 километри мураббаъ қаламрави вилояти Курск идома дошт. Сентябри соли гузашта 907 км мураббаъ ва оғози моҳи март 407 км мураббаъ қаламрави вилояти Курск зери назорати артиши Украина қарор дошт.

Аз аввали моҳи март артиши Русия беш аз 20 маҳалли истиқоматӣ дар Курскро зери назорати худ дароварда рӯзи 13 март дар бораи ба даст даровардани шаҳри Суҷа хабар дод.

Сардори ситоди кулли Русия Валерий Герасимов гуфт, ки беш аз 400 низомӣ асир гирифта шуданд. Путин бори аввал аз замони шурӯи ҷанг дар вилояти Курск бо либоси ҳарбӣ дида шуд ва ваъда дод, ки ба низомиёни украинӣ ҳамчун «террорист» муносибат хоҳад кард.

Вале баъди сӯҳбат бо президенти ИМА Доналд Трамп гуфт, ки «ҳазорҳо» сарбози дар вилояти Курск асирафтода «агар силоҳро замин гузошта таслим шаванд», зинда хоҳанд монд. Дар Ситоди кулли Украина ба муҳосираи сарбозони русӣ афтодани низомиёни украиниро рад карданд.

Иттиҳоди Аврупо барои гузариш ба энергияи сабз ва ба вуҷуд овардани занҷираи маҳаллии арзиши пахта дар Тоҷикистон 40 миллион евро ҷудо мекунад.

22 мииллион еврои ин ёрии молии Иттиҳоди Аврупо, ки барои кам кардани талафоти неруи барқ дар низоми энергетикии Тоҷикистон равона мешавад, аз тариқи Бонки аврупоии таҷдид ва рушд татбиқ хоҳад шуд.

Бахши дигари ин ёрии молӣ, ки беш аз 18 миллион евро аст аз сӯйи Агентии рушди Олмон барои ба вуҷуд овардани занҷираи маҳаллии арзиши пахта равона мешавад.

Ба гуфтаи Йозеф Сикела, Комиссари Иттиҳоди Аврупо оид ба шарикии байналмилалӣ, ин ёрии молиявӣ устуворӣ, гузариш ба иқтисоди сабз ва суботи иқтисодии Тоҷикистонро тақвият хоҳанд дод.

Тафсилоти бештар аз тарҳи нави ҳамкориҳои ИА ва Тоҷикистон дар рӯзҳои наздик дар Радиои Озодӣ нашр мешавад.

Раҳбари Ҳизби "Справедливая Россия" Сергей Миронов аз Додситонии кулл дархост кардааст, ки фаъолияти клубҳои варзишии муҳорибаҳоии бидуни қоида ва ё MMA-ро ҳамаҷониба тафтиш кунад.

Ба бовари вакили муҳоҷирситези рус, чунин клубҳо ба ифротӣ намудани муҳоҷирон машғуланд ва бидуни назорат гузоштани онҳо ба амнияти кишвар хатарбор аст.

Ба гуфтаи вай, танҳо дар Маскав ҳудуди 500 клуби ММА вуҷуд дорад.

Миронов мисли раҳбари қаблии Ҳизби либерал-демократи Владимир Жириновский, бо изҳороти таҳқиромезаш нисбати муҳоҷирон маъруф аст.

Дар гузашта ӯ тарафдори манъи тақдими шаҳрвандии Русия ба тоҷикистониҳо шуда буд ва ҳоло пешниҳод кард, ки додани шаҳрвандӣ ба тамоми муҳоҷирон аз Осиёи Марказӣ муваққатан манъ шавад.

Муҳаммад Шиа ас-Судонӣ, нахуствазири Ироқ рӯзи 14 март гуфт, раҳбари гурӯҳи “Давлати исломӣ дар Ироқ ва Сурия” кушта шуд. Судонӣ гуфт, ӯ “яке аз хатарноктарин террористон дар Ироқ ва ҷаҳон дониста мешуд”. Дар ин бора хабаргузории Рейтерс иттило додааст.

Судонӣ афзуд, ки дар амалиёти муштараки нирӯҳои амниятии Ироқ ва сарбозони эътилофии муборизи зидди гурӯҳи ҷангӣ Абдулло Мокӣ Муслиҳ ар-Рифоӣ, маъруф бо лақаби Абу Хадичаро куштанд.

Иёлоти Муттаҳидаи Амрико мақомоти Тоҷикистон ва Қирғизистонро бо имзои "санади таърихӣ – Шартнома оид ба сарҳади давлатӣ" табрик кардааст. Тэмми Брюс, сухангӯи Департаменти Давлатии ИМА бо нашри изҳороте рӯзи 14 март гуфт, "Ин дастовард нишондиҳандаи тааҳҳуди ду давлат барои дипломатия ва суботи минтақавӣ мебошад".

Аз ин пеш имзои созишномаи байни ду кишвари ҳамсояро мақомоти СММ, Иттиҳоди Аврупо, кишварҳои Чину Русия ва дигар ҷонибҳо ҳам истиқбол карданд.

Брюс навиштааст, ҳалли масоили марзӣ "яке аз душвортарин вазифаҳои дипломатӣ аст, ки як ҳукумат метавонад анҷом диҳад". Иёлоти Муттаҳида изҳори умедворӣ кардааст, ки ин тавофуқи муҳими таърихӣ роҳро барои рушди равобити тиҷоратӣ ва иртибототи миёни сокинони наздимарзӣ боз ва барои пойдории сулҳ дар минтақа мусоидат мекунад.

Созишномаи марзи байни Тоҷикистону Қирғизистон рӯзи 13 март дар маросиме дар шаҳри Бишкек миёни президентон Эмомалӣ Раҳмон ва Содир Ҷабборов имзо шуд.

Рӯзи 15 март қарор аст президенти Тоҷикистон Эмомалӣ Раҳмон бо як сафари расмӣ ба Русия парвоз кунад. Дар ин бора сомонаи вазорати корҳои хориҷии Тоҷикистон хабар дода гуфтааст, ки сафари президент рӯзҳои 15-17 март сурат мегирад.

Дар хабар омадааст, ки дар Маскав президенти Тоҷикистон бо раиси ҷумҳурии Русия Владимир Путин дидору гуфтугӯ мекунад. Баррасии масоили ҳамкориҳои дуҷониба "дар бахшҳои сиёсӣ, иқтисодию тиҷоратӣ, фарҳангию гуманитарӣ, амниятӣ, инчунин мавзӯъҳои минтақавию байналмилалӣ" дар назар аст.

Инчунин имзои як қатор санадҳо ҳам пешбинӣ шудааст.

Бори охир ду раҳбар декабри соли 2024 дар ҷаласаи ғайрирасмии сарони кишварҳои ИДМ дар вилояти Ленинград мулоқот карда буданд.

Ҷузъиёти аз ин беш дода намешавад.

Мулоқоти Раҳмон ва Путин дар шароите барпо мешавад, ки баъди ҳамлаи террористӣ ба толори "Крокус сити ҳол" дар вилояти Маскав 22 марти соли 2024, фишор болои муҳоҷирон, бахусус шаҳрвандони Тоҷикистон дар Русия фавқулодда зиёд шуд. Ҳарчанд мақомоти ду кишвар аз хуб будани робитаҳо мегӯянд, муносибат ба шаҳрвандони Тоҷикистон баъди он ҳамла ба самти манфӣ дигар шуд.

Сафари Раҳмон ба Маскав ду рӯз баъди имзои созишномаи деринтизори марзӣ миёни Тоҷикистон ва Қирғизистн сурат мегирад, ки аз ҷумла, мавриди истиқболи Русия ҳам қарор гирифтааст. Душанбе ва Бишкек аз шарикони Маскав дар Осиёи Марказӣ ба шумор мераванд.

Антонио Гутерриш, дабири кулли Созмони Милали Муттаҳид аз имзои созишномаи марзӣ байни Тоҷикистону Қирғизистон изҳори хушнудӣ ва аз он истиқбол кардааст. Стефан Дуярич, сухангӯи Антонио Гутерриш, рӯзи 13-уми март дар як баёнияи расмӣ гуфт:

“Ӯ ҳарду кишварро барои ин дастоварди таърихӣ табрик мегӯяд ва раҳбаронро барои азму иродаи сиёсиашон дар поён додан ба раванди музокироте, ки даҳсолаҳо идома кард, ситоиш мекунад.”

Дар баёния ҳамчунин омадааст, дабири кулли Созмони Милали Муттаҳид интизор дорад, ки Тоҷикистону Қирғизистон барои ҳамкориҳои созанда, тақвияти боварӣ ба ҳамдигар ва ояндаи амн барои мардумони худ ва минтақа саъй хоҳанд кард.

Чанде аз кишварҳои дигари ҷаҳон аз ҷумла, Чину Русия, Арабистони Саудӣ, Туркия ва Кувайт ҳам бо нашри баёнияҳои расмӣ аз имзои созишнома байни Тоҷикистону Қирғизистон дар бораи таъйин ва аломатгузории марзи ду кишвар истиқбол кардаанд.

Вазорати умури хориҷии Русия гуфтааст, ки “имзои созишнома ба тақвияти амнияту субот дар тамоми Осиёи Марказӣ мусоидат мекунад.”

Ҳукумати Чин Тоҷикистону Қирғизистонро барои имзои созишнома табрик гуфта, афзудааст, ки аҳди ду тараф ба тақвияти амният, рушд ва шукуфоӣ дар минтақа кӯмак мекунад. Дар баёниҳои расмии вазоратҳои хориҷии Туркия, Арабистони Саудӣ ва Кувайт ҳам айни гуфтаҳо ҳаст.

Муовини раиси Комиссиюни Аврупо Кайя Каллас ҳам рӯзи 14 март имзои созишномаи байни ду кишвари ҳамсояро истиқбол намуд. Бо нашри изҳороте ӯ ин санадро "қадами бузург ба пеш" номид, ки ба гуфтааш, "устуворӣ ва суботи Осиёи Марказиро тақвият хоҳад дод".

Созишномае, ки онро бархе муомилаи таърихӣ ҳам номиданд, 13 март дар шаҳри Бишкек имзо шуд.

Эмомалӣ Раҳмон, раиси ҷумҳури Тоҷикистон ва Содир Ҷабборов, ҳамтои қирғизи ӯ дар паи музокираҳои муттасили солҳои охир рӯзи панҷшанбе дар зери созишнома дар бораи таъйин ва аломатгузории сарҳади ду кишвар имзои худро гузоштанд.

Муҳокимаҳои атрофи таъину аломатгузории сарҳади давлатии тақрибан 1000-километрӣ даҳсолаҳо идома дошт ва дар ин муддат сокинони деҳоти марзии ду тараф ва марзбонон борҳо бо ҳам ҷангу муноқиша ва хунрезӣ кардаанд.

Танҳо дар солҳои 2021 ва 2022 дар ҷангу муноқишаҳо аз байни ду тараф даҳҳо нафар куштаву маҷрӯҳ шуданд ва аз тирамоҳи соли 2021 ба ин тараф сарҳади Тоҷикистону Қирғизистон ба рӯи сокинони ҳамдигар баста буд.

Дар як зиндони Русия нисбати раҳбари ҷамъияти узбекҳои “Ватандош” Усмон Баротов парвандаи нави ҷиноятӣ боз карданд. Нашрияи Sota.Vision гуфт, Баротовро ин навбат дар баҳам задани кори муассисаи ислоҳӣ гунаҳгор мекунанд.

Худи Баротов аз дохили зиндон навиштааст, ки ҳодиса як тӯҳмати навбатӣ аст. Ба нақли ӯ, дар аризаи шикоятии раҳбари гурӯҳи зиндон дар шаҳри Валдай, ки Баротов он ҷо нигаҳдорӣ мешавад, навиштааст, ки гӯё ӯ ба сӯи корманди зиндон дастгоҳи видеорегистраторро ҳаво додааст. Худи ӯ ин иттиҳомро беасос номидааст.

“Ман умед доштам, ки ба муносибати 80-солагии ғалаба дар Ҷанги Дуюми Ҷаҳон афв шуда ба озодӣ мебароям, вале муфаттиши парвандаҳои махсусан вазнин умедҳои маро барбод дод ва қарори боз шудани парвандаи нав алайҳи маро ба дастам супурд”, навишт аз зиндон Баротов рӯзи 11 март.

Баротов августи порсол барои нашри як расми мурғҳо ва навиштаҷоти “Тухм намедиҳем! Хурӯсҳоро аз ҷанг баргардонед!” ба чор соли ҳабс маҳкум шуд.

Дастаи мунтахаби футболи наврасони Тоҷикистон (U-17) бозии дуюми санҷиширо бо тими наврасони Қатар, ки 13-уми март дар шаҳри Давҳа доир гардид, бо ҳисоби мусовии 2:2 анҷом дод.

Ба иттилои Федератсияи футболи Тоҷикистон, бозии дуюми санҷишии футболбозони навраси тоҷик бо ҳамсолонашон аз Қатар дар Давҳа рӯзи панҷшанбеи 13-уми март дар варзишгоҳи Абдулло Бин Халифа доир гардид. Голҳои мунтахаби наврасони Тоҷикистонро Муҳаммад Назриев ва Назрулло Ашурализода ба самар расонданд.

Қаблан бозии аввали санҷишӣ миёни дастаҳои мунтахаби наврасони Қатару Тоҷикистон дар Давҳа бо ҳисоби мусовии 3:3 хотима ёфта буд. Ду голи мунтахаби наврасони Тоҷикистонро Муҳаммад Назриев ва як голи дигарро Назрулло Ашурализода ба дарвозаи мизбонон заданд.

Дастаи мунтахаби наврасони Тоҷикистон (U-17) зери раҳбарии сармураббӣ Марко Раҷини, мутахассиси итолиёӣ, дар ҳамин ҳол дар шаҳри Давҳа ба марҳилаи ниҳоии Ҷоми Осиё-2025 омодагӣ мебинад. Ба ҷамъомади таълимиву тамринии даста 24 бозигар даъват шудааст.

Бояд гуфт, ки марҳилаи ниҳоии Ҷоми Осиё миёни дастаҳои мунтахаби наврасони то 17-сола аз 3-юм то 20-уми апрели имсол дар Арабистони Саудӣ баргузор мешавад. Мунтахаби Тоҷикистон дар гурӯҳи «D» бо дастаҳои Уммон (5-уми апрел), Кореяи Шимолӣ (8-уми апрел) ва Эрон (11-уми апрел) рақобат мекунад.

Бар асоси натиҷаи марҳилаи гурӯҳӣ аз ҳар гурӯҳ ду тими беҳтарин ба даври чаҳорякниҳоии Ҷоми Осиё-2025 роҳ меёбанд. Ҳамаи иштироккунандагони даври чаҳорякниҳоӣ ба ҳаққи ширкат дар қаҳрамонии ҷаҳон-2025, ки аз 5-ум то 27-уми ноябр дар Қатар барпо мегардад, мушарраф мешаванд.

Дар ин бора намояндаи расмии Вазорати корҳои дохилии Русия Ирина Волк дар шабакаи Telegram хабар додааст.

Ба навиштаи ӯ, соли 2024 муҳоҷирон ба буҷаи ин кишвар зиёда аз 123 миллирд рубл ворид кардаанд.

Ин мақомдори рус ҳамчунин хабар додааст, ки соли гузашта шумори санадҳои қонунии шаҳрвандони хориҷӣ оид ба дарёфти ҳуқуқи фаъолияти кории расмӣ дар Русия ба зиёда аз 2 млн адад расидааст.

Дар Русия шаҳрвандони хориҷӣ ҳақ надоранд, ки бе патент кор кунанд. Парвонаи кор бояд мунтазам дароз ва пули ҳармоҳаи он пардохт карда шавад, вагарна, шаҳрванди хориҷӣ ҳаққи дарёфти даромади расмиро аз даст медиҳад.

Аксарияти муҳоҷирони тоҷик дар Русия тариқи патент фаъолият доранд ва пайваста аз нархи баланди он шикоят мекунанд. Бидуни патент дар Русия кор кардан манъ аст ва садҳо муҳоҷирро бо ҳамин далел ихроҷ кардаанд.

Ёвари президенти Русия гуфт, Маскав хостори оташбаси муваққатӣ не, балки манфиатдори ҳалли дароздмуддати низоъ аст.

Юрий Ушаков рӯзи 13-уми март дар телевизиони давлатии “Россия-1” гуфт: “Ҳадафи мо сулҳи дарозмуддат аст, ки манфиатҳои қонунии кишварҳои моро ба инобат бигирад.”

Ӯ дертар ба хабарнигорон гуфт, пешниҳоди оташбаси якмоҳа бо Украина ба Русия чизе намедиҳад. Ин замонест, ки ба бовари Ушаков, ба Украина фурсат медиҳад, то мавқеи воҳидҳояшро тағйир диҳад.

Президенти Амрико рӯзи 12-уми март аз Русия тақозо кард, ки ба оташбаси 30-рӯза розӣ шавад.

Доналд Трамп таҳдид намуд, ки дар сурати рад шудани ин пешниҳод Маскав бо таҳримҳои изофӣ рӯбарӯ хоҳад шуд. Ин ҳушдор дар ҳоле садо дод, ки Русия дар ҷабҳаи ҷанг ба пешрафте даст меёбад.

Трамп дар баробари хабарнигорон дар Кохи Сафед гуфт: “Русия роҳи дигаре ба ҷуз оташбас надорад. Агар зарур шуд, таҳримаш мекунем, вале бовар дорам, ки кор ба он ҷо намерасад."

Украина рӯзи 11-уми март дар поёни гуфтушунид бо намояндагони Амрико дар Арабистони Саудӣ пешниҳоди Иёлоти Муттаҳидаро дар бораи оташбаси 30-рӯза пазируфт.

Саймуъмин Ятимов, раиси Кумитаи давлатии амнияти миллии Тоҷикистон, гуфтааст, дар Тоҷикистон ҳам шахсоне ҳастанд, ки аз имзои созиши марзӣ бо Қирғизистон розӣ нестанд.

Вай ин ҳарфҳоро рӯзи 13-уми март дар Бишкек ва дар посух ба суоли АКИpress баён доштааст.

Ба навиштаи расона, Ятимов созиши марзиро бо Қирғизистон “ба манфиати ҳарду мардум” ва танқиди ин қарорро “як ҳолати одӣ” донист.

Ӯ гуфтааст: “Дар Тоҷикистон ҳам норозиҳо ҳастанд, вале ин муҳим нест. Муҳим ин ки манфиатҳои ҳарду давлат ҳал шуд. Ҳоло муносибатҳо бародарона, таърихӣ, мисли бародарони хунӣ хоҳанд шуд. Масъалаи бозкушоии ҳамаи гузаргоҳҳои марзӣ усулан ҳал шудааст.”

Маълум нест манзури Ятимов аз норозӣ будани бархе аз созиши марзӣ чист. То ҳол ҳеч кас, аз ҷумла сокинон ва намояндагони ҷомеаи шаҳрвандӣ дар Тоҷикистон ба таври ошкор мавқеи худро дар бораи шеваи марзнигорӣ марз баён накардаанд.

Дар Қирғизистон ҳадди ақал як вакили порлумон, ки ба дурустии созиш шубҳа кард, мавриди сарзаниши президенти ин кишвар Содир Ҷабборов қарор гирифт.

Саймуъмин Ятимов ҳамроҳи ҳамтояш аз Қирғизистон Қамчибек Тошиев раҳбарии Кумисюни таъйину аломатгузории марзро бар уҳда доранд.

Созишнома дар бораи марзи давлатии Тоҷикистон ва Қирғизистон рӯзи 13-уми март аз тарафи президентон Эмомалӣ Раҳмон ва Содир Ҷабборов дар шаҳри Бишкек имзо шуд. Дар ҳамин рӯз ду гузаргоҳи марзиро низ ба таври тантанавӣ боз карданд.

Ҳайати ҳукумати Амрико рӯзи 13 март ба Маскав рафт. Ин хабарро ҳарду ҷониб тасдиқ карданд. Як рӯз пеш аз ин дар Кохи Сафед президенти ИМА Доналд Трамп аз Кремлин тақозо кард, ки барои оташбаси 30-рӯза розӣ шавад, вагарна бо таҳримҳои нав рӯбарӯ хоҳад шуд.

Рӯзи панҷшанбе сухангӯи Кремлин Дмитрий Песков тасдиқ кард, ки ҳайати амрикоӣ бо раҳбарии Стив Виткофф, фиристодаи вижаи Трамп ба Маскав парвоз намуд.

Мавқеи Маскав ба даъвати оташбаси якмоҳаи муваққатӣ маълум нест. Интизор меравад, ки президенти Русия Владимир Путин 13 март баъди музокира бо раҳбари Беларус Александр Лукашенка дар бораи Украина назарашро баён мекунад.

Президенти Амрико Доналд Трамп аз Русия тақозо кард, ки ба оташбаси 30-рӯза розӣ шавад ва таҳдид намуд, ки дар сурати рад шудани ин пешниҳод бо таҳримҳои иловагӣ рӯбарӯ мешавад. Ин ҳушдор дар ҳоле садо дод, ки Маскав дар ҷабҳа ба пешрафте даст меёбад.

Трамп дар баробари хабарнигорон дар Кохи Сафед рӯзи 12-уми март гуфт: "Русия роҳи дигаре ба ҷуз оташбас надорад. Агар зарур шуд, таҳримаш мекунем, вале бовар дорам, ки кор ба он ҷо намерасад".

Ӯ афзуд: "Аз лиҳози молӣ мо қодирем даст ба амали бисёр нороҳаткунандае занем, ки барои Русия харобиовар хоҳад буд, вале ман инро намехоҳам."

Як рӯз пеш аз ин мақомоти Киев баъд аз музокираи нӯҳсоата бо мақомоти Амрико дар Арабистони Саудӣ ба оташбаси муваққатӣ розӣ шуданд.

Баъди ба сари қудрат омаданаш дар моҳи январи имсол, Доналд Трамп дастёбӣ ба сулҳ дар ҷанги Украинаро як ҳадафи муҳими худ номид ва ҳоло бо суръати зуд талош дорад мақомоти Маскаву Киевро сари мизи гуфтушунид нишонад.

Трамп аз нуфузи барҷастаи Вашингтон болои Киев дар масъалаи таъмини ёриҳои ҳарбию иттилоотӣ истифода карда, Украинаро барои қабули пешинҳоди оташбас розӣ кунонид. Дар сурати иҷрои ин тақозо, тахминан 20 дарсади қаламрави Украина ҳадди ақал барои як муддати муваққат дар ихтиёри Русия мемонад.

Вале Трамп нисбат ба Русия аз чунин шеваи муомила кор бурда наметавонад ва бо вуҷуди пешбиниҳои бисёр коршиносон, Русия дар шароити таҳримҳои афзуни Амрикову Иттиҳоди Аврупо ҳам тавонист ба сар барад.

Embed ба дигарон фиристед

Трамп гуфт, агар Маскав ба оташбас розӣ нашуд, таҳрим мешавад

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

• Auto
• 240p
• 360p
• 480p
• 720p
• 1080p

Феълан кор намекунад

0:00 1:11 0:00

• Auto
• 240p
• 360p
• 480p
• 720p
• 1080p

Путин метавонад аз музокираҳо бо Амрико берун шавад, чун вазъаш дар майдони муҳориба беҳбуд меёбад ва дар сурати шурӯи музокираҳо бо Киев ҳам фишанги фишораш дар муқобили Украина бештар аст.

Замоне, ки Трамп сӯҳбат мекард, президенти Русия Владимир Путин бори аввал баъди ишғоли он аз ҷониби Украина аз вилояти Курск дидан кард. Раҳбари Кремлин аз артиш талаб кард, ки ҳарчи зудтар назорати пурраро бар Курск барқарор кунанд.

Фармондеҳи аршади украинӣ генерал Олександр Сирский гуфт, ки муҳорибаҳо дар дохил ва атрофи шаҳри Суджа идома доранд. Ин шаҳри калонтарин дар минтақаи аз ҷониби украиниҳо ишғолшуда мебошад. Вале гузоришиҳои тасдиқношуда рӯзи 12-уми март ба он ишора мекунанд, ки Украина воҳидҳои низомиашро қафо мекашад ва мақомоти рус иддао карданд, ки қаламравҳои бештар, аз ҷумла Суджаро зери назорати худ дароварданд.

Сирский дар саҳифааш дар Телеграм навишт: "Бо вуҷуди фишори афзоянда аз ҷониби нерӯҳои Русия ва Кореяи Шимолӣ, мо ҳимояти Курскро ҳар қадар зарур бошад, идома медиҳем."

Ҳавопаймоҳои бесарнишин шаби 13-уми март чанд корхонаи саноатиро дар вилоятҳои Саратов, Тамбов, Калуга, Ростов ва Воронежи Русия ҳадаф қарор доданд.

Дар вилояти Калуга баъд аз афтодани бесарнишине як корхонаи саноатии воқеъ дар ноҳияи Дзержинск оташ гирифт. "Як нафар ҷароҳат бардошт," -- навишт раиси вилоят Владислав Шапша.

Дар ноҳияи Хвастовичкий дар ҷойи суқути паҳпод хати барқ аз кор монд. Дар вилояти Ростов дар пайи афтодани паҳпод дар кадом як корхонаи саноатии воқеъ дар ноҳияи Шолохов оташ сар зад, вале мақомот таъкид мекунанд, ки касе осеб надид.

Вазорати дифои Русия гуфт, дар давоми шаби чоршанбе ба панҷшанбе низомҳои дифои ҳавоии онҳо 77 бесарнишини украиниро безарар гардониданд. Фурудгоҳҳои Калуга, Волгоград, Саратов ва Пенза дар парвози ҳавопаймоҳо маҳдудият ҷорӣ кардаанд.

Дар айни замон, дар пайи ҳамлаи бесарнишинҳо ба вилояти Днепропетровски Украина чанд нафар маҷрӯҳ шуда, биноҳо осеб дидаанд. Сергей Лисак, раиси маъмурияти низомии вилоят, гуфт, ки дар пайи зарбаҳо болои Днепр се зан захмӣ шуда, ба як корхонаи саноатӣ ва чанд бинои истиқоматӣ зарар расид.

Матбуоти украинӣ хабар дод, ки яке аз ҳадафҳои ҳамлаҳои артиши Русия роҳи оҳан ҳам буд. Дар вилояти Запорожйеи Украина дар пайи ҳамла як сокини ноҳияи Василйевский маҷрӯҳ шудааст. Ин ҷо низ чанд муассисаи маъмурӣ ва биноҳои истиқоматӣ осеб дидаанд.

Созмони Паймони Амнияти Дастаҷамъӣ (ОДКБ) имзои созишномаи марзиро миёни Душанбе ва Бишкек чун баёни “иродаи сиёсии раҳбарони ду кишвар” истиқбол кардааст.

Созишномаи таъйини сарҳад байни Тоҷикистон ва Қирғизистон рӯзи 13-уми март аз тарафи президентон Эмомалӣ Раҳмон ва Содир Ҷабборов дар шаҳри Бишкек ба имзо расид.

Созише, ки баъди ду моҷарои пурқурбонӣ дар марз (2021 ва 2022) ҳосил шуд, дар пайи музокираҳои тӯлонӣ ба даст додааст.

СПАД, як созмони низомии минтақаист, ки ба он дар баробари Тоҷикистону Қирғизистон инчунин Қазоқистон, Русия, Беларус, Арманистон ва Узбекистон дохил мешаванд ва ҳадафаш ёрии ҳарбӣ ба кишварҳои узв мебошад.

Раҳбарияти ин созмон изҳори умед кардааст, ки ҳалли масоили сарҳадӣ барои рушди ботадриҷи ҳамкориҳои минтақаӣ мусоидат мекунад.

Ду гузаргоҳро дар сарҳади Тоҷикистон ва Қирғизистон боз карданд. "Гулистон" (Қизилбел) ва "Маданият" (Қайрағоч) аз соли 2021, пас аз задухӯрди мусаллаҳона байни ду кишвар, баста буд.

Ифтитоҳи гузаргоҳҳо рӯзи 13-уми март баргузор шуд. Ҷараёни онро Эмомалӣ Раҳмон, раисҷумҳури Тоҷикистон ва Содир Ҷабборов, раисҷумҳури Қирғизистон ба таври маҷозӣ ё онлайн мушоҳида карданд.

Дар умум дар сарҳади Тоҷикистон ва Қирғизистон панҷ гузаргоҳ воқеъ аст. "Овчӣ-Қалъача" (Кулунду), "Қарамиқ" ва "Бор-Добо" ("Қизил-Арт") феълан баста ҳастанд.

Дар ҳамин ҳол, ҷониби Тоҷикистон хабар дод, ки аз 14-уми март парвози ҳавопаймоҳо миёни ду кишвар аз сар гирифта мешавад.

Дафтари матбуоти президенти Тоҷикистон навишт, ширкати “Сомон Эйр” нахустин парвози худро дар масири Душанбе-Бишкек-Душанбе рӯзи ҷумъа анҷом медиҳад.

Сарҳади Тоҷикистон ва Қирғизистон тақрибан чор сол боз баста буд.

Оҷонси мубориза бо фасод аз ин мансабдор Холов, А ном бурд, ки дар корхонаи “Бақайдгирии молу мулки ғайриманқул”-и ин ноҳия ба ҳайси мутахассис кор мекардааст.

Ба иттилои манбаъ, ӯ ба яке аз сокинон 15 сотих заминро бар ивази 166 ҳазор сомонӣ фурӯхта, ваъда додааст, ки заминро ба номи хешовандони ӯ ҳуҷҷатгузорӣ мекунад, вале баъди пурра гирифтани пул, дигар кореро анҷом надодааст.

Назари худи Холов.А ба ин иттиҳом маълум нест

Ба иттилои Оҷонсӣ, нисбат ба ин мансабдор парвандаи ҷиноятӣ оғоз шудааст.

Дар Тоҷикистон ҳамасола чандин мансабдор барои тақсими ноодилона ё фурӯши ғайриқонунии замин боздошту зиндонӣ мешаванд.

Фурӯш ва истифодаи ғайриқонунии заминро дар Тоҷикистон як “дарди бедаво” меноманд.

Хабаргузории "Рейтерз" шаби гузашта ин хабарро ба нақл аз Аҳмад Шариф Чударӣ, сухангӯи артиши Покистон нашр кард ва навишт, ки амалиёти наҷоти гаравгонҳо бо эҳтиёти зиёд анҷом шуд.

Сухангӯи артиши Покистон гуфтааст, ки дар ҷараёни ин амалиёт 21 гаравгон ва 4 тан аз нерӯҳои интизомии он кишвар кушта шудаанд.

Аммо гурӯҳи ҷудоиталаби "Артиши озодибахши Балучистон" иддао кардааст, ки даргирӣ бо низомиёни Покистон идома дорад ва гаравгонҳо, ҳанӯз озод нашудаанд.

Ин гурӯҳ, ки аз сӯи Амрико ва СММ як созмони террористӣ хонда мешавад, масъулияти ин ҳамларо ба ӯҳда гирифтааст. Онҳо дар ивази раҳоии гаравгонҳо, хостори озодии бархе аз аъзои ин гурӯҳ аз зиндонҳои Покистон шуданд.

Ҳодиса рӯзи 11-уми март иттифоқ уфтод. "Артиши озодибахши Балучистон" дар ин руз дар Кветта, маркази вилояти Балуҷистони Покистон, ба ин қатор ҳамла карда, зиёда аз 450 мусофирро гаравгон гирифт. Қатор аз шаҳри Кветта ба Пешовар, маркази вилояти Хайбар-Пахтунхоҳ мерафт.

Чанд соат баъд аз ризоияти Украина ба созиши оташбаси якмоҳа бо Русия, ду тараф ҳамчунон ҳамлаҳои ҳавоиро ба якдигар идома доданд.

Дар натиҷаи ҳамлаҳои мушакии Русия ба шаҳри Кривой Рог ва Одесса дар Украина дар рӯзи 12-уми март камаш 5 нафар кушта шуд. Як кас дар Кривой Рог ва чаҳор узви як киштии борбар дар наздикии шаҳри бандарии Одесса.

Пеш аз ин Русия ба шаҳри Киев низ ҳамлаи васеъ анҷом дод. Дар бораи зарбаҳои ҳавоӣ ба Харков низ гузориш расид.

Ҳамлаҳо чанд соат баъд аз он сурат гирифтанд, ки мақомоти Украина ва Амрико рӯзи 11-уми март ба мулоқоти муҳиме дар шаҳри Ҷиддаи Арабистони Саудӣ поён доданд.

ИНЧУНИН, БИХОНЕД:

Тарҳи оташбаси 30-рӯза. Украина пазируфт, Русия чӣ хоҳад гуфт?

Вазорати дифои Русия рӯзи 12-уми март гуфт, шаби гузашта шаш ҳавопаймои бесарнишинро маҳв кард. Якеро дар Қрими ишғолшуда ва панҷ паҳподи дигарро бар фарози баҳри Сиёҳ.

Дар ҳамин ҳол, Русия иддао кард, ки дар минтақаи ғарбии Курск пирӯзиҳои бештар ба даст овардааст. Маскав мехоҳад нерӯҳои Украинаро, ки аз моҳи августи соли гузашта бахше аз қаламрави Русияро ишғол кардаанд, берун кунад.

Эмомалӣ Раҳмон, раисҷумҳури Тоҷикистон, рӯзи 12-уми март бо гурӯҳе аз вазирону раҳбарони идораҳо вориди Қирғизистон шуд.

Ин сафари нахустини давлатии ӯ ба Бишкек пас аз задухӯрдҳои хунини марзӣ (2021 ва 2022) ва бад шудани муносибатҳои ду кишвар аст.

Тибқи иттилои дарёфтии Радиои Аврупои Озодӣ/Радиои Озодӣ, дар назар аст, Эмомалӣ Раҳмон ва Содир Ҷабборов, раисҷумҳури Қирғизистон, созишномаро дар бораи сарҳади ду кишвар имзо кунанд.

Вазорати корҳои хориҷии Тоҷикистон рӯзи 11-уми март танҳо дар бораи имзои чанд санад хабар дода, ҷузъиётро ошкор накард.

Тоҷикистон ва Қирғизистон рӯзи 21-уми феврали имсол санад ё протоколи ниҳоии таъйини марзи ду кишварро имзо карданд.

Порлумони Қирғизистон 27-уми феврал ин созишномаро баррасӣ карду пазируфт. Дар мавриди баррасӣ шудани созишнома дар порлумони Тоҷикистон маълумоте дар даст нест.

Мақомоти Тоҷикистон бархилофи мансабдорони Қирғизистон ҷузъиёти созишномаро эълон накарданд.

Тоҷикистон ва Қирғизистон ҳазор километр марз доранд. Номуайянӣ дар сарҳад дар солҳои 2021 ва 2022 сабаби даргириҳои хунин шуд ва аз ҳарду ҷониб даҳҳо куштаву захмӣ бар ҷой гузошт. Аз он вақт то кунун марзи ду кишвар баста аст.