Паҳлавонони тоҷик дар мусобиқаи байналмилалии ҷудо “Tashkent Grand Slam 2023”, ки рӯзҳои 3-5-уми март дар шаҳри Тошканди Узбекистон баргузор шуд, ду медал (як нишони тило ва як биринҷӣ) ба даст оварданд.
Дар рӯзи аввали ин мусобиқаи байналмилалӣ паҳлавони 20-солаи тоҷик Эмомалӣ Нуралӣ медали тило гирифт. Ин аввалинм медали ӯ дар мусобиқоти силсилаи ҷаҳонии ҷудо "Grand Slam" ба шумор меравад. Дар таърихи ҷудои тоҷик бошад, ин дувумин медали тило дар чунин мусобиқот аст. Аввалин медали тилоро паҳлавони шинохтаи тоҷик Темур Раҳимов соли гузашта дар «Baku Grand Slam 2022»,дар вазни беш аз 100 кило ба даст оварда буд.
Эмомалӣ Нуралӣ дар “Tashkent Grand Slam 2023” дар вазни то 66 кило баъдӣ се пирӯзӣ ба рақибонаш аз Туркманистон, Узбекистон ва Фаронса ба даври ниманиҳоӣ роҳ ёфт. Ӯ дар нимфинал ба гуштигири Узбекистон Муҳриддин Тилавов дастболо шуда, ба финал баромад. Эмомалӣ дар қувваозмоии ниҳоӣ барои медали тило ба намояндаи Узбекистон – Сардор Нуриллоеви 28-сола ғалаба кард. Ба Эмомалӣ Нуралӣ ба ҷуз аз медали тило ва имтиёзҳои олимпӣ, инчунин ҷоизаи молӣ ба маблағи 5000 доллари ИМА супурда шуд.
Паҳлавони дигари тоҷик Сомон Маҳмадбеков дар мусобиқаи байналмилалии ҷудо “Tashkent Grand Slam 2023” дар вазни то 81 кило барандаи медали биринҷӣ гардид. Вай дар рӯзи дуюми мусобиқа дар даври аввал Абдулраҳмон Абдулғаниро аз Миср шикаст дода, баъдан Сергий Кривчачро аз Украина мағлуб кард. Дар даври чорякниҳоӣ ба Шарофиддин Болтабоев аз Узбекистон ғолиб омада, ба нимфинал баромад. Вале Сомон дар даври ниманиҳоӣ аз намояндаи Австрия Шамил Борчашвили шикаст хӯрд. Маҳмадбеков барои ба даст овардани медали биринҷӣ ба бародари Шамил - Вачид Борчашвилии австриягӣ пирӯз шуд.
Дарвоқеъ, ин дуюмин медали биринҷии Сомон Маҳмадбеков дар мусобиқоти силсилаи ҷаҳонии ҷудо «Grand Slam” ба шумор меравад. Вай ба ҷуз аз медал ва имтиёзҳои олимпӣ, инчунин бо ҷоизаи молӣ ба маблағи 1500 доллари ИМА мукофотонида шуд.
Дар рӯзи охирини мусобиқа дар сабқати мардон Темур Раҳимов дар вазни +100 кило мақоми панҷум ва Комроншоҳи Устопириён дар вазни то 90 кило мақоми ҳафтумро соҳиб шуданд.
Ба ҳайати дастаи мунтахаби Тоҷикистон 13 варзишгар (11 мард ва 2 зан) дохил буд. Намояндагони дигари Тоҷикистон - Муҳаммадсолеҳ Қувватов (-60 кг), Шаҳбоз Саидаброров (-66 кг), Маҳмадшариф Наҷмиддинов (-73 кг), Беҳрӯзи Хоҷазода (-73 кг) , Муҳаммадҷон Абдуҷалилзода (-81 кг), Ҷаҳонгир Маҷидов (-90 кг) ва Иброҳимҷон Элмуродов (+100 кг), инчунин дар сабқати занон Шукрона Қарчиева (-48 кг) ва Шоҳида Қаландарова (-57 кг) дар даврҳои интихобӣ ноком шуда, аз ҳаққи идомаи мубориза маҳрум гаштанд.
Ба иттилои сомонаи расмии Федератсияи байналмилалии ҷудо (IJF), дар мусобиқаи “Tashkent Grand Slam 2023” 364 варзишгар (191 мард ва 173 зан) аз 49 кишвари панҷ қораи ҷаҳон иштирок дошт.
Варзишгарон дар ин мусобиқаи байналмилалӣ ба ҷуз аз медал соҳиби имтиёзҳои олимпӣ шуданд. Инчунин ба беҳтаринҳо ҷоизаҳои молӣ тақдим гардид. Дар ҳар як вазн ба ғолиб 5000 доллари ИМА, барои ҷойи дуюм 3000 доллар ва барои ҷойҳои сеюм 1500-долларӣ супурда шуд.
Баъди натиҷагирии се рӯзи мусобиқа дар Тошканд мунтахаби Ҷопон дар ҳисоби умумидастаӣ бо касби 9 медал (4 тило, 3 нуқра ва 2 биринҷӣ) ҷойи аввалро соҳиб шуд. Мунтахаби Узбекистон бо касби 8 медал (3 тило, 1 нуқра ва 4 биринҷӣ) дар ҷойи дуюм ва мунтахаби Австрия бо касби 2 медал (1 тило ва 1 нуқра) дар ҷойи сеюм қарор гирифтанд. Мунтахаби Тоҷикистон бо касби як медали тило ва як биринҷӣ, инчунин як мақоми панҷум ва як мақоми ҳафтум дар байни 49 даста ҷойи ҳафтумро азони худ кард.
Зимнан, “Tashkent Grand Slam 2023” чаҳорумин мусобиқа аз силсилаи чорабиниҳои Федератсияи байналмилалии ҷудо дар соли равон маҳсуб мешуд.
Дар аввалин мусобиқаи имсолаи байналмилалии "фаслҳои ҷудои ҷаҳонӣ" – «Grand Prix Portugal 2023», ки рӯзҳои 27-29-уми январ дар шаҳри Алмадаи Португалия баргузор шуд, Тоҷикистонро дар рақобатҳо миёни мардон ҳафт варзишгар намояндагӣ кард. Аз байни онҳо танҳо Ҷаҳонгир Маҷидов натиҷаи хубтар нишон дода, дар вазни то 90 кило мақоми ҳафтумро касб намуд.
Вале дар ду мусобиқаи дигари байналмилалии мавсими ҷорӣ – “Paris Grand Slam 2023» (4-5-уми феврал) ва “Tel Aviv Grand Slam 2023” (16-18-уми феврал) ягон варзишгар аз Тоҷикистон иштирок надошт.
Гуфтугӯ