Футболбози маъруфи фаронсавӣ Давид Трезеге, қаҳрамони ҷаҳон ва Аврупо, аз Академияи бошгоҳи “Ювентус”, ки ахиран дар Душанбе ифтитоҳ ёфт, дидан кард. Ҳамлагари машҳур на танҳо машғулиятҳои футболбозони наврасро тамошо намуд, инчунин барои онҳо дарси маҳорат гузаронд.
Ба иттилои Федератсияи футболи Тоҷикистон, Академияи «Ювентус» чанде пеш дар Душанбе ифтитоҳ ёфт ва собиқ ҳамлагари бошгоҳи Турини Италия тасмим гирифт, ки ба инҷо ташриф орад.
“Ман бори аввал дар Тоҷикистон ҳастам ва аз ин хеле шодам. Барои ман муҳим аст бубинам, ки кӯдакон дар ин ҷо чӣ гуна футболро дӯст медоранд. Дар ин академия кӯдакон бо хоҳиши зиёд бозӣ мекунанд, онҳо мехоҳанд аз рӯи усули «Ювентус» таҳсил намоянд. Дар ин ҷо тамоми шароит фароҳам оварда шудааст, то бачаҳо омӯзанду инкишоф ёбанд”, - гуфтааст Давид Трезеге, собиқ бозигари бошгоҳи футболи “Ювентус” ва тими миллии Фаронса.
Трезеге дар ҳайати «сиёҳу сафедҳо» дар 245 бозӣ 138 тӯб задааст ва албатта, футболбозони наврас фурсатро аз даст надоданд, ки бо ин ситораи футболи ҷаҳонӣ бозӣ карда, акси хотирмон ва соядаст бигиранд.
Академияи Ювентус дар Душанбе ягона мактаби футболи бошгоҳҳои пешрафтаи Аврупост. Дар ин ҷо бачаҳо аз рӯи системи махсуси футбол, ки итолиёвиҳо тартиб додаанд, машқ мекунанд. Машғулиятҳоро мутахассисоне, ки аз Апеннини Италия даъват шудаанд, мегузаронанд. Ҳоло дар академия зиёда аз 100 нафар бачагони синну соли гуногун таҳсил менамоянд.
Ҳамасола дар шаҳри Турини Италия Ҷоми ҷаҳон байни академияҳо доир мегардад, ки беҳтарин шогирдони Академияи “Ювентус” дар Душанбе низ метавонанд дар ин мусобиқа ширкат варзида, маҳорати худро нишон диҳанд.
Бояд гуфт, ки “Ювентус” яке аз қадимтарин ва маъруфтарин бошгоҳҳои футболи касбӣ дар ҷаҳон ба ҳисоб меравад ва дар Аврупо 15 миллион мухлис дорад. “Ювентус” серҷоизатарин бошгоҳи Италия буда, дар мусобиқаҳои аврупоӣ ҳам ҷоизаҳои зиёд ба даст овардааст.
Бошгоҳи “Ювентус” академияи кӯдаконаи футболи худро дошта, бо барномаҳои махсуси тамриниаш аз дигар академияҳои футбол фарқ мекунад. Маҳз бо тарҳрезии барномаҳои омӯзишӣ аз ҷониби мутахассисони итолиёвӣ академияи “Ювентус” дар зиёда аз 50 кишвари дунё 65 намояндагӣ дорад.
Гуфтугӯ