Дастаи мунтахаби наврасони то 17-солаи футболи Тоҷикистон бо роҳбарии сармураббӣ Раҳматулло Фузайлов, ки дар мусобиқоти интихобии Ҷоми Осиё-2023 дар гурӯҳи «Н» бо касби шаш имтиёз ғолиб шуд, ба марҳилаи ниҳоии қаҳрамонии қора роҳ ёфт.
Мусобиқоти интихобии Ҷоми Осиё-2023 дар гурӯҳи «Н» бо иштироки дастаҳои мунтахаби наврасони то 17-солаи Афғонистон, Муғулистон ва Тоҷикистон рӯзҳои 5-9 октябр дар Варзишгоҳи марказии шаҳри Душанбе доир гардид.
Бозии охирин дар гурӯҳи «Н» рӯзи якшанбе, 9-уми октябр, миёни дастаҳои мунтахаби наврасони Тоҷикистон (U-17) ва Афғонистон (U-17) баргузор шуд.
Дар ин бозии ҳалкунанда ба мунтахаби наврасони Тоҷикистон барои ғолиби гурӯҳ шудан танҳо пирӯзӣ зарур буд, тими Афғонистонро бошад, натиҷаи мусовӣ қаноатманд мекард.
Футболбозони навраси тоҷик бар ҳамсолонашон аз Афғонистон бо ҳисоби 2:0 ғалаба карданд. Голҳоро Беҳрӯз Хуҷаев (дақиқаи 21-ум) ва Диловари Ҷамшедзода (80) ба самар расонданд.
Дастаи мунтахаби наврасони Тоҷикистон (U-17) дар аввалин бозии ин гурӯҳ тими Муғулистонро бо ҳисоби 3:0 мағлуб карда буд. Футболбозони навраси Афғонистон бошанд, дар аввалин бозиашон тими Муғулистонро бо ҳисоби 5:0 шикаст доданд.
Ҳамин тариқ, дастаи мунтахаби наврасони Тоҷикистон (U-17), ки дар ҷадвали мусобиқоти гурӯҳи “Н” бо шаш имтиёз мақоми аввалро касб кард, ба марҳилаи ниҳоии Ҷоми Осиё-2023 роҳхат гирифт.
Зимнан, ба марҳилаи ниҳоии Ҷоми Осиё-2023 миёни наврасони то 17-сола, ки моҳи майи соли оянда доир мегардад, ғолибони даҳ гурӯҳи интихобӣ ва панҷ дастаи беҳтарини ҷойҳои дувум роҳ пайдо карданд.
Тими мунтахаби наврасони Афғонистон, ки бо касби се имтиёз дар гурӯҳи “Н” мақоми дувумро соҳиб шуд, дар қатори панҷ дастаи беҳтарини ҷойҳои дувуми гурӯҳҳо ба ҳаққи ширкат дар марҳилаи ниҳоии мусобиқот мушарраф шуд.
Мунтахаби наврасони Муғулистон, ки дар ҳарду бозиаш шикаст хӯрд, дар гурӯҳи “Н” бидуни имтиёз дар ҷойи охирин қарор гирифт ва аз ҳаққи иштирок дар марҳилаи ниҳоии мусобиқот маҳрум гашт.
Мусобиқоти интихобии Ҷоми Осиё-2023 миёни дастаҳои мунтахаби наврасони то 17-сола
Гурӯҳи «Н»: Тоҷикистон (мизбон), Афғонистон, Муғулистон.
Даври 1-ум
Муғулистон – Тоҷикистон – 0:3
Голҳо: Итгел Балчиндороҷ, 28 – ба дарвозаи худ (0:1), Абубакр Сулаймонов, 45 (0:2), Шеравган Саидов, 48 (0:3).
Беҳтарин бозигари дидор: Абубакр Сулаймонов (Тоҷикистон).
5 октябр. Душанбе, Варзишгоҳи марказии ҷумҳуриявӣ. 1200 тамошобин.
Даври 2-юм
Афғонистон – Муғулистон – 5:0
Голҳо: Ҳакимхон Ниёзӣ, 21 (1:0), Ҳакимхон Ниёзӣ, 33 (2:0), Ҳакимхон Ниёзӣ, 39 (3:0), Алӣ Рамазонӣ, 74 (4:0), Алиризо Раҳимӣ, 89 (5:0).
Беҳтарин бозигари дидор: Ҳакимхон Ниёзӣ (Афғонистон).
7 октябр. Душанбе, Варзишгоҳи марказии ҷумҳуриявӣ
Даври 3-юм
Тоҷикистон – Афғонистон – 2:0
Голҳо: Беҳрӯз Хуҷаев, 21 (1:0). Диловари Ҷамшедзода, 80 (2:0).
Беҳтарин бозигари дидор: Шаҳбон Наимов (Тоҷикистон).
9 октябр. Душанбе. Варзишгоҳи марказии ҷумҳуриявӣ, 3500 тамошобин.
Мавқеи дастаҳо дар ҷадвали ҷамъбастии мусобиқот
|
Ҷ |
ДАСТАҲО |
Б |
Ғ |
М |
Б |
Т/Т |
И |
|
1 |
Тоҷикистон |
2 |
2 |
0 |
0 |
5-0 |
6 |
|
2 |
Афғонистон |
2 |
1 |
0 |
1 |
5-2 |
3 |
|
3 |
Муғулистон |
2 |
0 |
0 |
2 |
0-8 |
0 |
Ҳамин тариқ, ба ғайр аз тимҳои Тоҷикистон ва Афғонистон (гурӯҳи “Н”), инчунин дастаҳои мунтахаби наврасони Ҷопон (гурӯҳи “А”), Малайзия (гурӯҳи “В”), Қатар (гурӯҳи “С”), Арабистони Саудӣ, Ҳиндустон (гурӯҳи “D”), Яман (гурӯҳи “Е”), Ветнам, Тайланд (гурӯҳи “F”), Австралия, Чин (гурӯҳи “G”), Эрон, Лаос (гурӯҳи “I”) ва Узбекистон, Кореяи Ҷанубӣ (гурӯҳи “J”) ҳуқуқи иштирок дар марҳилаи финалии Ҷоми Осиё-2023-ро пайдо карданд.
Гуфтугӯ