Қирғизистон тасмим гирифтааст, тамрини низомии Созмони Паймони Амнияти Дастҷамъиро дар қаламраваш бекор кунад. Дар ин бора бахши қирғизии Радиои Озодӣ рӯзи 9-уми октябр бо такя ба дафтари матбуоти Вазорати мудофиаи Қирғизистон хабар дод.
Нақша буд, ки тамрини нерӯҳои посдори сулҳи СПАД моҳи октябри имсол дар ҳудуди Қирғизистон гузарад. Ба созмон Арманистону Беларус, Қазоқистон, Қирғизистон, Русия ва Тоҷикистон шомиланд.
Тасмими Бишкек пас аз он эълон шуд, ки дар задухӯрди 14-17-уми сентябр дар марзи Тоҷикистону Қирғизистон, ду кишвари узви СПАД, аз ду тараф даҳҳо кушта кас кушта шуданд. Ду ҷониб якдигарро ба таҷовузи низомӣ муттаҳам карданд.
СПАД ҳамеша барои нотавонии пешгирӣ аз муноқиша байни аъзои худ ва ҳимояти манофеи онҳо мавриди танқид қарор мегирад. Мавҷи танқидҳо бахусус замони даргирӣ байни Тоҷикистону Қирғизистон ва муноқишаҳои байни Озарбойҷону Арманистон мушоҳида мешаванд.
Нахустин ва то ҳол ягона мавриди истифода аз нерӯҳои сулҳхоҳи СПАД моҳи январи соли 2022 дар Қазоқистон анҷом шуд; замоне ки Қосимҷомарт Тоқаев дар пайи эътирозҳои зиддиҳукуматӣ ва бетартибиҳо аз СПАД кумак хост.
Дар натиҷаи ин дархост 2030 сарбоз ва 250 таҷҳизоти низомӣ ба Қазоқистон фиристода шуд, ки аз сохтмонҳои стратегӣ ҳифозат карданд.
Гуфтугӯ