Як дипломати бритониёӣ ҳодисаҳои як ҳафтаи охирро дар Хоруғу Рӯшон, ки даҳҳо кушта ва захмӣ ба ҷой гузошт, ба Созмони Амният ва Ҳамкорӣ дар Аврупо (ОБСЕ) кашонд.
Дар ҳоле ки худи созмон ҳеч вокунише накард, Дейрдре Браун, муовини раиси ҳайати Бритониё дар САҲА, рӯзи 26-уми май дар ҷаласае гуфт, аз талафоти бештари мардум дар Бадахшон нигаронанд.
"Мо таҳаввулотро дар Вилояти Мухтори Кӯҳистони Бадахшон бодиққат пайгирӣ мекунем ва аз гузоришҳо дар бораи боздоштҳо ва ҳамла ба хабарнигорон нигарон ҳастем," – гуфт ӯ.
Браун афзуд, изҳороти намояндаи САҲА-ро дар умури озодии расонаҳо такрор мекунанд, ки 18-уми май ба қатъи озору азияти хабарнигорон ва фароҳам овардани шароит барои гузоришдиҳии озодона дар бораи масъалаҳои муҳими ҷомеа даъват карда буд.
"Мо дар баробари дигарон ба ҳукумати Тоҷикистон гӯшзад мекунем, ки вазифаҳои худро дар мавриди риояи ҳуқуқи одамон иҷро кунад," – афзуд Дейрдре Браун.
Ӯ, ки дар ҷаласаи САҲА сухан меронд, гуфт, "гузоришҳо дар бораи тарсондан ва таъқиби шаҳрвандону журналистон суръати одӣ шудани авзоъ ва бозгашт ба ҳаёти муқаррариро суст мекунад."
Дейрдре Браун ҳамзамон аз набудани Интернет дар Вилояти Мухтори Кӯҳистони Бадахшон гуфт ва аз мақомоти Тоҷикистон хост, ҳарчи зуд дастрасиро ба шабакаи ҷаҳонӣ дар минтақа таъмин кунад.
Ин намояндаи Бритониё мегӯяд, кишвараш аз таҳқиқи ҳамаҷониба ва шаффофи рӯйдодҳои Бадахшон ва пешниҳоди натиҷаҳои он ба ҷомеаи ҷаҳонӣ истиқбол хоҳад кард. "Мо аз ҳамаи тарафҳо мехоҳем, ки зудтар барои поин овардани шиддати авзоъ кӯшиш кунанд ва аҳдҳои додаи худро ба Созмони Амният ва Ҳамкорӣ дар Аврупо ҳамаҷониба иҷро намоянд," – хулоса кард ӯ.
