Дар ин бора Виталий Ким, раиси маъмурияти низомии вилоят, дар Телеграм хабар дод.

Ӯ гуфт, ки ҳавопаймоҳои бесарнишин асосан зербунёдҳои энержиро ҳадаф дода буданд.

Мақомоти Русия ҳамлаи ҳадафмандона ба зербиноҳои иҷтимоиро дар шаҳру ноҳияҳои Украина пайваста рад мекунанд.

Дар натиҷаи афтодани боқимондаи ҳавопаймоҳо дар ҳудуди як корхона дар вилояти Николаев сӯхтор сар зада, як кас маҷруҳ шудааст.

Русия дар моҳи феврали соли 2022 бедалел ба хоки Украина ҳамла кард ва даргирии ду тараф аз он замон идома дорад.

Толиб Бегимқулов 52-сола аст ва аз деҳаи Шӯрноваи шаҳри Панҷакент.

Акбар Шарифӣ, подполковник (сарҳангёр)-и милиса, мегӯяд, Бегимқулов соли 2003 дар роҳ ба Русия, дар ҳудуди Қазоқистон, бар асари тасодуфи нақлиётӣ “осеби майнаи сар бардошта, ба бемории фаромӯшхотирӣ гирифтор шудааст”.

Вай рӯзи 28-уми декабр дар гузорише дар торнамои Вазорати корҳои дохилии Тоҷикистон навишт: “Толиб Бегимқулов маълумот дар бораи худ, наздикону пайвандон ва ҷойи зистро пурра аз хотир бароварда, то ин дам дар ҳавлии шаҳрванди Қазоқистон дар шаҳри Чимкент мезист.”

Ҷузъиёт маълум нест. Вазорати корҳои дохилӣ "истифода аз барномаҳои интернетӣ", ҳамкорӣ бо консулгарии Тоҷикистон дар Алмато ва мақомоти ҳифзи ҳуқуқи Қазоқистонро аз омилҳои ёфтани Толиб Бегимқулов номбар кардааст.

Мақомот мегӯянд, кофтукоби Толиб Бегимқулов бо дархости падараш аз соли 2014 расман идома дошт, вале ӯ замоне пайдо ва ба ватан оварда шуд, ки волидонаш дигар барҳаёт нестанд. “Пайдо шудани ӯ барои ҳамсару фарзандон ва дигар аъзои оила хурсандибахш гардид,” – гуфтааст Акбар Шарифӣ.

Омори пурра дар бораи чӣ қадар бедарак будани шаҳрвандони Тоҷикистон дар дохил ва беруни ҷумҳурӣ нашр намешавад.

Ба иттилои Вазорати корҳои дохилии Тоҷикистон, танҳо дар нуҳ моҳи соли 2020 зиёда аз 700 нафар бедарак шуда буданд. Маълум нест чӣ қадаре аз онҳо ёфт шуда, чанд нафар бедарак мондаанд.

Ин маросим рӯзи 29-уми декабр, дар пасманзари буҳрони сиёсии чандмоҳа дар Гурҷистон, баргузор шуд.

Ваколати президенти ғарбгаро, Саломе Зурабишвили, рӯзи 29-уми декабр ба поён расид.

Ӯ кохи раёсати ҷумҳуриро тарк кард, вале гуфт, ҳамчунон раҳбари қонунӣ мемонад.

Зурабишвилӣ маросими савгандёдкунии Кавелашвилиро "масхараомез" номид. Чандсад эътирозгар дар назди бинои порлумони Гурҷистон гирди ҳам омаданд.

Саломе Зурабишвилӣ ва намояндагони мухолифон қаблан натиҷаҳои интихоботи порлумониро напазируфта, хоҳони овоздиҳии такрорӣ дар Гурҷистон ҳастанд.

Дар ин интихобот, ки рӯзи 26-уми октябри соли 2024 баргузор шуд, "Орзуи гурҷӣ", ҳизби ҳоким ва аз “дӯстон”-и Русия, иддаои пирӯзӣ кард. Намояндагони мухолифон гуфтанд, маърака бо тақаллуб ва хушунату таҳдид гузашт.

Аз он замон эътирозҳои зиддиҳукуматӣ дар Гурҷистон ҷараён дорад. Қатъи музокирот барои пайвастани Тбилиси ба Иттиҳоди Аврупо ин эътирозҳоро бештар кард.

Михеил Кавелашвилӣ 53-сола аст ва аз соли 2016 вакили порлумони Гурҷистон. Вай дар соли 1995 дар ҳайати дастаи "Спартак-Алания"-и Владикавказ унвони қаҳрамони Русияро соҳиб шудааст.

Дмитрий Медведев дар ин бора рӯзи 26-уми декабр дар ҷаласае сухан ронд.

"Шумори онҳо зиёд аст, беш аз 200 ҳазор нафар. Мутаассифона, қисми зиёди онҳо – беш аз 40 дарсад барои азхудкунии барномаи таълимии ибтидоӣ забони русиро намедонанд," – гуфт ӯ.

Ин омор бар пояи маълумоти Вазорати маорифи Русия ба даст омадааст.

Медведев афзуд, фарзандони муҳоҷирон бо сабаби кору зиндагии волидонашон дар Русия ба мактабҳои маҳаллӣ мераванд.

Думаи Давлатии Русия дар моҳи декабри соли 2024 қонунеро қабул кард, ки бар асоси он, фарзандони муҳоҷирон бе донистани забони русӣ ба мактабҳо пазируфта намешаванд.

Иҷрои қонуни нав аз аввали моҳи апрел дар назар аст.

Русия мизбони бештар аз 1 миллион муҳоҷири кории тоҷик аст ва қонуни нав зиндагии ҳазорон нафари онҳоро, ки мехоҳанд фарзандонашонро аз худ дур накунанд, сахттар хоҳад кард.

Сиёсати зидди муҳоҷирон дар Русия дар баҳори соли 2024, пас аз ҳамлаи маргбор ба толори “Крокус Сити Ҳолл”, шиддат гирифт. Аксари гумонзадҳо, ба иттилои мақомоти Русия, зодагони Тоҷикистон ҳастанд.

Ҳодиса рӯзи 29-уми декабр дар шаҳри Муан рӯй дод.

Хабаргузории “Рейтерс” навишт, ки ҳавопаймо ҳангоми фурудоӣ аз хати парвоз берун шуда, ба девори бетонии фурудгоҳ бархӯрд.

“Франс Пресс” мегӯяд, ҳавопаймои ширкати “Jeju Air” ҳангоми нишастан бидуни чарх ба замин зад.

Тибқи иттилои муқаддамотӣ чархи ҳавопаймо ба мушкил дучор шудааст. Масъулони ҳолатҳои изтирории шаҳри Муан гуфтаанд, ки сабабҳои садамаро таҳқиқ мекунанд.

Ҳавопаймо бо 175 мусофир ва 6 сарнишин аз Бангкок, пойтахти Тайланд, парвоз карда буд.

Хабаргузории “Yonhap” аз қавли як мақоми оташнишонии Куриёи Ҷанубӣ гуфтааст, ду сарнишин наҷот дода шуда, эҳтимол боқимондаҳо ҷон бохтаанд.

Мақомот то кунун марги беш аз 120 нафарро тасдиқ карданд.

Дафтари матбуоти раёсати ҷумҳурии Русия рӯзи 28-уми декабр дар як баёнияи расмӣ гуфт, ки Владимир Путин бо Илҳом Алиев суҳбати телефонӣ дошт. Дар баёния омадааст: “Владимир Путин аз он узрҳоҳӣ кард, ки ҳодисаи фоҷиабор дар қаламрави ҳавоии Русия рух додааст ва бори дигар ба хонаводаҳои қурбониён изҳори тассалият кард ва ба маҷруҳо шифои зудрас хост.”

Ҳавопаймои ширкати Озарбойҷон Эйрланз, ки рӯзи 25-уми декабр аз шаҳри Боку ба Грозний парвоз дошт, дар наздикии шаҳри Оқтау дар Қазоқистон суқут кард. 38 нафар ҷон бохта, 29 тани дигар маҷрӯҳ шуданд. Владимир Путин ошкоро нагуфтааст, ки системаи дифои мушакии Русия ҳавопаймои мусофирбари Эмбраер-190-ро задааст, аммо гуфтааст, вақти талоши ҳавопаймо барои фуруд дар фурудгоҳи Грозний “паҳподҳои ҷангии Украина, ба шаҳри Грозний, Моздок ва Владикавказ ҳамла мекарданд ва системи дифои мушакии Русия ин ҳамлаҳоро рафъ мекард.”

Дафтари матбуоти раиси ҷумҳури Озарбойҷон гуфтааст, ки ҳавопаймо бар асари таъсири физикӣ ва фаннӣ аз берун дар фазои Русия батамом аз идора берун шуда ва самти шаҳри Оқтау дар Қазоқистон ҳаракат кардааст. Пештар ҳам гуфта мешуд, ки мумкин аст, ҳавопаймои ширкати озариро нерӯҳои ҳавоии Русия иштибоҳан зада бошанд ва ба сабаби аз кор афтодани системаи идора, ҳавопаймо дар наздикии Ақтау суқут кардааст.

Ҳисомиддин Розиқов дар суҳбат бо Радиои Озодӣ гуфт: «Асрориддин тақрибан як соли мӯҳлати ҳабсро дар боздоштгоҳ сипарӣ кард ва пас аз адои чаҳор соли боқимонда дар зиндони Хуҷанд озод шуд. Ин бисёр хабари хуш барои хонаводаи мост, вале афсӯс падарам дар зиндон ҳастанд ва модарам даргузаштанд.

Асрориддин Розиқов, писари Зубайдуллои Розиқ, узви собиқи раёсти ҳизби фаъолияташ дар Тоҷикистон мамнӯи наҳзати исломӣ аст, ки худи ӯ соли 2016 бо гуноҳҳои вазнин, аз ҷумла терроризм ба 25 соли зиндон маҳкум шуд. Худаш гуфтааст, ки гуноҳе надорад.

Додгоҳи ноҳияи Исмоили Сомонӣ дар Душанбе моҳи декабри соли 2020 Асрориддинро бо гуноҳи иштирок дар фаъолияти ҳизбҳои сиёсӣ, иттиҳодияҳои ҷамъиятӣ, фаъолияташон мамнуъ дар Тоҷикистон ба 5 соли зиндон маҳкум кард. Он замон созмонҳои ҳомии ҳуқуқ аз ҳукумати Тоҷикистон хоста буданд, ки “Асрориддин Розиқовро фавран озод кунад".

Дар қонуни ислоҳшудае, ки ба сармоягузории терроризм ва феҳрасти созмонҳои террористӣ дахл дорад, акнун дар Русия метавонанд, созмонеро, ки тарғибу ташвиқ ва ҳимоят аз терроризмро бас кардааст, аз феҳрасти созмонҳои мамнӯъ дар Русия берун кунанд.

Матни қонун дар вебсайтҳои расмии Русия нашр шудааст. Думаи давлатии Русия ин қонунро 17-уми декабр қабул кард ва Леонид Слутский, раиси Кумитаи робитаҳои байналмилалӣ гуфтааст, ки ислоҳи қонун аз ҷумла барои фароҳам кардани шароити қонунӣ барои ҳамкории Русия бо Толибон пешбинӣ шудааст.

Фаъолияти Толибон, ки як гурӯҳи ифротӣ ба ҳисоб меравад ва се сол боз Афғонистонро идора мекунад, аз моҳи феврали соли 2003 дар Русия манъ аст. Бо вуҷуди бозгашти Толибон ба қудрат дар соли 2021 ба Афғонистон ҳеч яке аз кишварҳои дунё ҳукумати онро ба расмият нашинохтаанд. Ҳоло маълум нест, ки мақомоти Русия кай Толибонро аз феҳрасти созмонҳои террористӣ хориҷ мекунанд.

Энтони Блинкен, вазири умури хориҷии Амрико рӯзи 27-уми декабр дар як баёнияи расмӣ гуфт: “Рӯъёи Гурҷистон, таҳти раҳбарии Иванишвилӣ манофеи Кремлро пеш бурд, самтгирии Гурҷистон ба Аврупову Атлантикро аз роҳаш хориҷ кард, ки дар таззод бо пешбиниҳои мардуми Гурҷистон ва Қонуни асосии Гурҷистон аст.”

Ба қавли Блинкен, амалкардҳои Иванишвилӣ ва Рӯъёи Гурҷистон, сабаби таназзули институтҳои демократӣ, нақзи ҳуқуқи инсон ва маҳдудияти баҳбарардорӣ аз озодиҳои бунёдӣ дар Гурҷистон шудааст. Бар асоси таҳримоти нави Амрико, муомила бо муассисаҳое, ки Иванишвилӣ молики он аст, манъ карда мешавад.

Бино ба гузориши Блумберг, сарвати Бидзина Иванишвилӣ тахминан 7. 5 миллиард долларро ташкил медиҳад, ки аз ҳисоби фурӯши фулуззот, бонкдорӣ ва ширкатҳои мухобиротӣ дар Русия ба даст омадааст. Иракли Кобахидзе, нахуствазири Гурҷистон таҳримоти Амрикоро “таҳдид” номида гуфт, ки амалкарди Амрико “подоше” барои ҳимояти манофеи миллии Гурҷистон аст.

Аввали моҳи декабр ҳукумати Амрико амр дод, ба онҳое, ки “демократия дар Гурҷистонро таҳти хатар меандозанд” раводиди ин кишвар дода нашавад. Гурҷистон, ки як замон шарики наздики Амрико ва Иттиҳоди Аврупо буд, бо самтгирӣ ба ҷониби Русия ва саркӯби дигарандешон хашми ҳарду шарикони пешинашро барангехт.

Ӯ зимни паёми солонааш ба вакилони Маҷлиси олӣ гуфт: “Ҳукумат, роҳбарони вазорату идораҳо, раисони вилоятҳо ва шаҳру ноҳияҳо вазифадоранд, ки тамоми имкониятҳоро барои дар панҷ соли оянда дар ҳамаи соҳаҳои иқтисоди миллӣ таъсис додани беш аз 1 миллиону 400 ҳазор ҷойи кории нав сафарбар созанд.”

Ба ибораи дигар, мақомоти расмӣ акнун вазифадоранд, солона дар Тоҷикистон на камтар аз 280 000 ҷойи кори нав биёфаранд, ки кори осоне нест. Дар Тоҷикистон, бекорӣ яке аз мушкилоти аслии иқтисод ба ҳисоб меравад ва аз ин рӯ солона садҳо ҳазор нафар, бахусус нерӯи ҷавони корӣ ба Русия барои кор ва пайдо кардани музди беҳтар мераванд.

Чанде пеш Бонки Ҷаҳонӣ дар як гузориши фарогире дар бораи иқтисоди Тоҷикистон гуфт, ки модели рушди иқтисодии кишвар дар оянда дигар натиҷа намедиҳад, зеро натавонистааст, барои аҳолии афзояндаи кишвар ҷойҳои кории муносиб фароҳам кунад.

Эмомалӣ Раҳмон охири ҳар соли милодӣ бо паём ба мардум ва вакилони Маҷлиси миллӣ ва Маҷлиси намояндагон, палатаи болоӣ ва поёнии порлумон муроҷиат карда, дар бораи дастовардҳои гузашта ва вазифаҳои оянда мегӯяд.

Аз моҳи сентябри соли 2025 маоши кормандони боғчаҳои бачагона ва омӯзгорон дар Тоҷикистон 30 дарсад зиёд мешавад. Дастмузди дигар кормандони соҳаи маориф, илм, тандурустӣ ва стипендияҳо 20 дарсад афзоиш меёбад. Дар ин бора президент Эмомалӣ Раҳмон 28-уми декабр дар назди вакилони ҳарду палатаи порлумон хабар дод.

Раиси ҷумҳур ҳамчунин гуфт, аз соли оянда маоши кормандони ниҳодҳои қудратӣ 20 дарсад зиёд мешавад. Ҳаҷми нафақаҳо бошад 10 дарсад зиёд мешудааст.

Дар миёни кишварҳои собиқ Шӯравӣ, шаҳрвандони Тоҷикистон маошу нафақаи аз ҳама камро мегиранд. Кам будани маоши кормандони буҷавӣ яке аз сабабҳои ба миён омадани фасод гуфта мешавад.

Эмомалӣ Раҳмон рӯзи 28-уми декабр ҳамчунин гуфт, маоши ҳадди ақал дар кишвар аз соли оянда ҳазор сомонӣ (қариб 100 доллар) таин мешавад. То ин вақт маоши ҳадди ақал дар Тоҷикистон 800 сомонӣ буд.

Раҳмон рӯзи 28-уми декабр зимни паёми солонааш ба аъзои Маҷлиси олӣ аз камбуди барқ дар кишвар ёдовар шуд ва гуфт, “ташвишу заҳмати мардуми Тоҷикистонро” эҳсос мекунад. Нарасидани барқ дар Тоҷикистон яке аз интиқодҳои асосӣ аз кори ҳукумати Тоҷикистон аст, чун сокинони кишвар дар фасли тирамоҳ ва зимистон бо реҷа барқ мегиранд.
Эмомалӣ Раҳмон дар паёми солонааш ба порлумон афзуд, соли 2027 аз ҳисоби неругоҳи “Роғун” ва дигар неругоҳҳои дарёи Вахш ба камбуди барқ дар кишвар хотима медиҳад.

“Шояд ин зимистонҳои охире бошад, ки мо бо мушкилӣ паси сар мекунем, зимистони дар пеш истода хеле беҳтар мешавад, нисбат ба имсол... Соли 2027 ба он тараф дар таърихи гузаштааш мемонад. Мо ин душвориҳоро мегузарем. Ҳам барои мардум ҳам барои рушди далват ин бениҳоят муҳим аст.”- гуфт раиси ҷумҳури Тоҷикистон.

Ӯ афзуд: То имрӯз ду агрегати неругоҳи «Норак» ва се агрегати неругоҳи «Қайроққум» пурра навсозӣ карда шуд. Соли 2025 бо таҷдиду навсозии боз се агрегати дигар дар неругоҳи «Қайроқум» иқтидори он иловатан 24 мегаватт зиёд гардида, ба 174 мегаватт мерасад. Инчунин, як агрегати дигар дар неругоҳи «Норак» таҷдид шуда, иқтидори он 40 мегаватт зиёд мегардад ва сохтмони неругоҳи «Себзор» бо тавоноии 11 мегаватт ба анҷом расонида мешавад. Яъне иқтидорҳои мавҷудаи энергетикии мамлакат дар соли 2025 танҳо аз ин ҳисоб 180 мегаватт зиёд мегарданд."

Соли 2018 Эмомалӣ Раҳмон зимни ифтитоҳи як чархаи нерӯгоҳи Роғун гуфта буд, ки дигар дар Тоҷикистон камбуди нерӯи барқ ба “афсона” табдил хоҳад ёфт. Вале аз он ба баъд, ҳар сол дар Тоҷикистон маҳдудият ҷорӣ мешавад. Изҳороти Эмомалӣ Раҳмон дар ҳолест, ки дар мавсими зимистон вазъи бахсус минтақаи дурдасти Тоҷикистон аз назари дастрасӣ ба нирӯи барқу васоили гармидиҳию энержӣ хеле танг мешавад. Бархе мунаққидон мушкилро на танҳо бо кори ҳанӯз нопурраи нирӯгоҳҳои барқии обӣ, балки бо фурӯши барқ ба кишварҳои ҳамсояи мисли Афғонистону Узбекистон дар фасли зимистон рабт медиҳанд.

Раҳмон бидуни зикри тафсилот гуфт, кори баъзе ширкатҳо, ки ба коркарди металҳои қиматбаҳо машғуланд, давоми як сол аз 25 то 40 маротиба санҷида мешавад. “Баъзе сохторҳо то 5-7 маротиба санҷиш рафтанд. дар натиҷаи санҷиш ягон чиз нест сифр. Рӯирост маълум, ки дар инҷо санҷиш нест, ин барои амалӣ кардани дигар корҳо аст. Мо ба ин корҳо хотима мебахшем.”

Раиси ҷумҳури Тоҷикистон ҳамчунин гуфт, давоми се моҳи оянда барнома ё стратегияи ҷалби сармоя то соли 2040 таҳия хоҳад шуд.

Мақомот дар гузашта низ санҷиши фаъолияти соҳибкоронро дар Тоҷикистон муваққатан манъ карда буданд. Тоҷирон мегӯянд, мораторияҳои гузашта ба вазъи иқтисодӣ таъсири зиёд надоштанд, чун риоят ва назорат намешуданд.

Эмомалӣ Раҳмон 28-уми декабр дар назди вакилон ва аъзои ҳукумат гуфт, даромади пулии аҳолӣ аз 48 млрд сомонии соли 2019 ба 147 млрд сомонӣ дар соли 2024 расид. Раҳмон инро дастоварди кори ҳукумат ва порлумон гуфт. Ҳарчанд бархе коршиносон мегӯянд, пули муҳоҷирон дар беҳтар шудани сатҳи зиндагии мардум ва зиёд шудани даромади онҳо нақши асосӣ дорад.

“Вакилони мардумӣ навишта гиред, назди мардум меравед мепурсанд, ин хизмати вакилон ҳам ҳаст. Ҳукумат бо порлумон ва мардуми Тоҷикистон ба ин нишондиҳанда расид,”-гуфт президент.

Ба гуфтаи Эмомалӣ Раҳмон, давоми панҷ соли ахир маоши кормандони буҷавӣ 4 маротиба ва дар маҷмуъ ба андозаи 100 фоиз зиёд карда шуд. “Дар ин муддат дар 5 сол сатҳи таваррум ё баландшавии нархҳо ҳамагӣ 29 фоизро ташкил кард. Яъне дар ин давра маошу нафақа ва стипендияҳо нисбат ба сатҳи таваррум бамаротиб зиёд гардиданд ки бевосита ба коҳишёбии сатҳи камбизоатӣ ва беҳтар кардани сатҳи зиндагии мардум мусоидат намуд.”

Раиси ҷумҳури Тоҷикистон дар ҳоле аз афзоиши маош дар кишвар ситоиш мекунад, ки нархи маҳсулот ва манзил дар кишвар назаррас боло рафтааст.

Эмомалӣ Раҳмон дар назди вакилон ҳамчунин гуфт, ҳаҷми Маҷмӯи маҳсулоти дохилии кишвар соли 2024 ба беш аз 150 миллиард сомонӣ расид.

Ҳамасола дар моҳи декабр раиси ҷумҳурии Тоҷикистон паёми солонаи худро ба порлумон ироа мекунад.

Маъмулан дар пайи ироаи паёми солонаи президент телевизионҳои расмӣ рӯзҳо ин мавзуъро инъикос карда, гурӯҳҳои вижа барои фаҳмондани нуктаҳои он таъсис дода мешаванд.

Ширкати “Azerbaijan Airlines" ки ҳавопаймояш дар Қазоқистон суқут кард, рӯзи 28-уми декабр аз манъи парвоз ба 7 шаҳри Русия хабар дод. Ба навиштаи РБК маҳдудият дар парвоз ба шаҳру минтақаҳои Минералные Води, Сочи, Волгоград, Уфа, Самара, Грозний ва Махачкалъа рабт хоҳад дошт. Масъулини ширкат гуфтаанд, тасмими мазкур “натиҷаи таҳқиқи пешаки”- и суқути ҳавопаймои Embraer-190 ва хатарҳои эҳтимолӣ барои парвоз гирифта шудааст.

Рӯзи 25-уми декабр ҳавопаймои Azerbaijan Airlines дар Қазоқистон суқут кард ва дар натиҷа 38 мусофири он ба ҳалокат расиданд. Бино ба навиштаи расонаҳо, аз ҷумла хабаргузории “Ройтерс”дар пайи зарбаи низоми зиддаҳавоии Русия суқут кардааст.

Аз ин пеш ба далели хатари бесарнишинҳо, фурудгоҳҳои Маскав, Шереметево, Домодедово, Внуково ва Жуковский муваққатан баста шуда буданд. 26- уми декабр ширкати миллии ҳавопаймоии "ЭлАл"и Исроил "ба далели ҳодисаҳо дар фазои Русия" парвозҳо ба Маскавро барои як ҳафта қатъ кард. Ширкати қазоқистонии Qazaq Air ҳам то 27-уми январ парвозҳоро дар хатсайри Остона-Екатеринбург боздоштааст.

Хабаргузории расмии Куриёи Ҷанубӣ рӯзи 27-уми декабр бо такя ба мақомоти амниятӣ гуфт, ки сарбози куриёӣ қабл аз онки ба дасти нерӯҳои махсуси Украина биафтад, ҷон додааст. Як рӯз пеш аз ин яке аз расонаҳои украинӣ хабар дод, ки як сарбоз аз Куриёи Шимолӣ дар вилояти Курск ба асорати нерӯҳои Украина афтодааст.

Акси як сарбозеро, ки бовар мерафт, маҷрӯҳ аст, дар Телеграм нашр карданд, ҳарчанд воқеӣ будани акс аз манобеи мустақил тасдиқ нашудааст. Моҳи гузашта Куриёи Шимолӣ як аҳднома дар бораи шарикии стратегӣ бо Русияро тасдиқ кард ва роҳ барои ширкати сарбозони он кишвар дар ҷанг ба зидди Украина боз шуд.

Владимир Зеленский, раиси ҷумҳури Украина рӯзи 23-уми декабр гуфт, аз миёни 10 ҳазор сарбози нерӯҳои махсуси Куриёи Шимолӣ, ки ба ҷанг фиристода шудаанд, бештар аз 3 ҳазор нафари онҳо кушта шудаанд. Хадамоти Иттилоотии Куриёи Ҷанубӣ пештар гуфта буд, ки теъдоди куштаву маҷрӯҳшудагони куриёӣ на бештар аз 1100 нафарро ташкил медиҳад.

Радиои Озодӣ ин иттилоро мустақилона тасдиқ карда наметавонад ва мақомоти Русия ҳам онро шарҳ намедиҳанд.

Ин ниҳод 26-уми декабр хабар дод, ки қаллобон бо ваъдаи пул кортҳои бонкии шаҳрвандонро "ба иҷора" мегиранд ва онро барои амалҳои ғайриқонунӣ истифода мебаранд. Раёсати корҳои дохилии Душанбе ҳеч оморе нашр накардааст.

Дар хабарномаи ин ниҳод аз як намунаи дигари қаллобӣ зикр шудааст, ки баъзе афрод бо баҳонаи пешниҳоди ҷойи кор, нусхаи шиноснома ва рақами корти шаҳрвандонро гирифта, барои қонуншиканӣ истифода мебаранд. Пулиси Душанбе ба сокинон ҳушдор додааст, ки эҳтиёт кунанд, чун дар чунин ҳолат худашон шарики ҷиноят ҳисоб мешаванд.

Пулиси пойтахт ба сокинон ҳушдор додааст, ки корти бонкӣ ё дигар маълумоти хусусии худро ба шахси дигар надиҳанд ва агар касе аз онҳо “иҷораи корт”-ро дархост кард ба мақомот хабар расонанд. Фиреб хӯрдани сокинон тавассути корти бонкӣ солҳои гузашта низ иттифоқ афтода буд.

Телевизиони Евронюс ҳам тасдиқ кардааст, ки мушаки "замин ба ҳаво"-и низоми зиддиҳавоии Русия сабаби ба садама дучор шудани ҳавопаймои ширкати озарӣ шуд. Дар натиҷаи ин ҳодиса, ки 25-уми декабр рух дод, 38 нафар ба ҳалокат расиданд.

Хабаргузории “Ройтерс” гузориш додааст, ки мақомот нахуст нафаҳмиданд, ки чаро ҳавопаймое, ки аз Боку ба Грозний бояд парвоз мекард, маҷбур шуд хати парвозро дигар карда, садҳо километр дуртар аз ҷойи таъиншуда дар Қазоқистон фуруд ояд. Ҳавопаймои мусофирбари Embraer баъд аз онки натавонист дар фурудгоҳи Грознийи Чеченистон фуруд ояд, осмони Русияро тарк кард.

Расонаҳои русӣ аз қавли Ҳамзат Қодиров, котиби Шӯрои амнияти Русия ва хоҳарзодаи Рамзан Қодиров навиштаанд, дар лаҳзаи фуруди ҳавопаймои озарӣ, бесарнишин ё дронҳо ба ин ҷумҳурии Русия ҳамла мекарданд. Ин иттилоъро телеграм-канали чечении NIYSO низ тасдиқ кардааст.

Фарзияи расмии суқути ҳавопаймо феълан маълум нест ва таҳқиқ идома дорад. Мақомоти Озарбойҷон ва Қазоқистон дар бораи сабабҳои садама расман суҳбат накардаанд.

Кумитаи ҳолатҳои фавқулода бо нашри ин хабар гуфтааст, ин афродро ба беморхона интиқол додаанд ва феълан зери назорати пизишкон қарор доранд.

Ба иттилои манбаъ, ин афрод модари 33-сола ва се фарзанди 13, 10 ва 4-сола мебошанд. Онҳо сокинони ноҳияи Шоҳмансури Душанбе ҳастанд.

"Сабаби ин ҳодиса риоя накардани қоидаҳои бехатарии истифода аз ангишт барои гарм кардани хонаҳост",-навиштааст Кумитаи ҳолатҳои фавқулода.

Ин аввалин ҳодиса заҳролуд шудани сокинон дар моҳи декабр нест. Рӯзи 17-уми декабр чор наврас дар ноҳияи Шаҳристон аз дуди ангишт заҳролуд шуда, ду нафарашон фавтидаанд. Солҳои гузашта низ ин ҳодиса иттифоқ афтодааст.

Дар Тоҷикистон, ки сокинон дар тирамоҳ ва зимистон бо маҳдудият барқ мегиранд, сокинон маҷбур мешаванд бо ангишт хонаҳоро гарм кунанд.

Онро дар қаламрави Тибет месозанд, ки ба ҳаёти миллионҳо сокини поёноби Ҳинду Бангладеш таъсир хоҳад дошт.

Сарбанди баландтарин, қарор аст, дар дарёи Ярлунг Сангпо сохта шуда, соле 300 миллиард кловатт-соат барқ истеҳсол кунад.

“Садои Амрико” навишт, ки тарҳи сарбанд соли 2020 аз ҷониби Маҷмаи сохтмони нерӯгоҳҳои барқии Чин таҳия шудааст. Ҳоло сарбанди бузургтарин (дар Чин ҳаст) “Садди седара” ном дорад ва соле 88,2 миллиард киловатт-соат барқ тавлид мекунад.

"Синҳуа", хабаргузории расмии Чин, рӯзи 25-уми декабр навишт, ки сохтмони нерӯгоҳи азим барои кам кардани партоби газ ба ҳаво ва эҷоди ҷойҳои кории нав мусоидат мекунад. Пешбинӣ мешавад, ки арзиши сохтмони нерӯгоҳи азимтарин тақрибан 35 миллиард доллар хоҳад буд.

Дар минтақае, ки қарор аст нерӯгоҳ сохта шавад, 1,4 миллион нафар зиндагӣ мекунанд ва онҳоро бояд ба ҷойҳои дигар кӯчонанд. Мақомот ҳанӯз нагуфтанд, ки масъалаи кӯч додани мардумро чӣ гуна ҳал хоҳанд кард.

Ҳукумати Чин то ҳол таъкид кардааст, ки ин тарҳ пайомадҳои азими экологӣ нахоҳад дошт. Ҳинду Бангладеш аз таъсири тарҳ ба экосистема ва дигар шудани самти об изҳори нигаронӣ кардаанд.

Дарёи Ярлунг Сангпо дар қаламрави Тибет бо номи дарёи Браҳмапутра маъруф аст ва он тавассути иёлоти Аруначал Прадеж ва Ассами Ҳинд гузашта, дар ниҳоят вориди Бангладеш мешавад.

Чин дар гузашта генераторҳои барқи обиро дар болооби дарёи Ярлунг Сангпо бунёд кардааст, ки маҷрои обро аз ғарб ба шарқи Тибет мебарад. Дар қисмати болоии дарё бунёди тарҳҳои бештаре дар назар аст.

Дар ин бора ширкати "Росавиатсия" хабар дод.

Фурудгоҳҳои Шереметево, Домодедово, Внуково, Жуковский ва Калуга парвози ҳавопаймоҳоро боздоштаанд.

Дар се фурудгоҳи асосии Маскав (Домодедово, Шереметево ва Внуково) тахминан 30 парвоз боздошта шуд.

Торнамоҳои "Baza" ва "Mash" сабаби ҷорӣ шудани маҳдудиятро ба барномаи рамзии "Ковёр" рабт доданд, ки баъд аз таҳдиди паҳподҳо ҷорӣ шудааст.

Вазорати дифои Русия дар бораи таҳдиди ҳамлаи бесарнишинҳо ба Маскав ва Калуга хабар намедиҳад.

Лутфӣ Сатторова рӯзи 23-юми декабр дар суҳбат бо Радиои Озодӣ гуфт, аз замони боздошт писарашро надидааст, вале ба бегуноҳии ӯ бовар дорад. "Писарам дар шаби ҳодиса ба ҳеч куҷо нарафтааст, ҳамроҳи ман дар хона буд," -- гуфт ӯ.

Коллегияи ҳарбии Додгоҳи олии Тоҷикистон дар охири моҳи ноябри соли 2024 Марат Сатторови 43-соларо бо гуноҳи куштори аъзои ду оила ба ҳабси абад маҳкум кард. Радиои Озодӣ дар ин бора 12-уми декабр хабар дода, он замон мавқеи вакили мудофеъ ва наздикони ӯро дастрас накарда буд.

"Вай айбдор нест. Як соли охир дар мактаби деҳа посбон буд. Камтар замин дорем, бо корҳои саҳро машғул мешуд. Ба он ҳодиса рафтагӣ не, дидагӣ не, аз хона баромадагӣ ҳам нест," – афзуд Лутфӣ Саттороваи 75-сола.

Марат Сатторов соҳиби ду фарзанд аст. Падараш дувоздаҳ сол пеш фавтидааст. Хоҳару бародаронаш дар Қирғизистон ҳастанд ва шаҳрвандии он кишварро доранд.

Модараш, Лутфӣ Сатторова, гуфт: "Дар хона бо як саг танҳо мондам. Ҳама ҷоро тит карда рафтанд. Ҳуҷҷатҳо ва кортҳои бонкиро бо худ бурданд. Ақаллан кортамро диҳанд, панҷмоҳа нафақаамро нагирифтаам. Кӣ нигоҳ мекунад маро? Шароити ҳама вазнин."

Моҳи майи соли 2024 дар деҳаи Санҷидзори Конибодом аз ду оила (яке тоҷик ва дигаре қирғизтабор) шаш кас кушта шуд.

Маҳбуба Аҳмедоваи 38-сола, Нозанин Аҳмедоваи 17-сола ва Дамир Аҳмедови 14-сола аз хонаводаи тоҷик ва Зулхо Иброҳимоваи 54-сола, додараш Абдуфаттоҳ Иброҳимови 47-сола ва Қурбонгул Иброҳимоваи 46-сола аъзои кушташудаи оилаи қирғизтабор буданд.

На тафтишот ва на додгоҳ ангезаҳои қатлҳоро номбар намекунанд.

Аз моҳи марти соли 2024 то кунун дар деҳаҳои Конибодом беш аз бист кас ба таври мармуз ба қатл расидааст. Танҳо дар моҳи декабр дар ин минтақаи вилояти Суғд даҳ узви се оила, аз ҷумла чор ноболиғ, дар шароити номаълум кушта шуданд.

Мақомот ба ҷуз хабарномаи пароканда ва эълони таҳқиқи ҳодиса дар бораи кушторҳо ва ангезаи он маълумот намедиҳанд. Аз аввали қатлҳои пайиҳам ду кас зиндонӣ шуда, чаҳор нафар дар боздошт ҳастанд, вале наздикони бархеи онҳо бо хулосаи муфаттишону додрасҳо розӣ нестанд.

Ҳодиса рӯзи 26-уми декабр рӯй дод.

Сергей Лисак, раиси вилоят, гуфт, ки ҳашт нафар осеб дид.

Аз миёни онҳо ҳафт нафарро ба беморхона бурдаанд. Як зан дар ҳолати вазнин аст.

Дӯконҳо низ зарар дидаанд.

Русия 25-уми декабр, дар Иди Милоди Масеҳ, ба шаҳрҳои Харков, Днепр ва Кривий Роҳи Украина силсилаи ҳамлаҳо анҷом дод.

Эълон дар ин бора рӯзи 25-уми декабр нашр шуд.

Аммо мақомот гуфтаанд, корҷӯёни аз 18 то 39-сола бояд шаҳодатномаи кафшергарӣ дошта, забони кореягиро азхуд карда бошанд.

Аз корҷӯёни дигар хоста шудааст, ки барои омӯхтани забони кореягӣ ва касбҳои зарурӣ ба маркази таълимии Вазорати кору муҳоҷират дар Душанбе, Бохтар ва Хуҷанд муроҷиат кунанд.

Бекорӣ ё кор бо маоши кам яке аз душвориҳои асосии ҷомеаи Тоҷикистон аст. Ин вазъ садҳо ҳазор касро ба муҳоҷирати корӣ дар хориҷа маҷбур мекунад.

Ҳукумати Тоҷикистон дар моҳи ноябри соли 2024 бо Кореяи Ҷанубӣ ва Кувайт тафоҳумномаи ҳамкориро дар заминаи муҳоҷират имзо кард.

То ин вақт муҳоҷирони кории тоҷик асосан ба Русия ва Қазоқистон мерафтанд.

Як ҳавопаймои ширкати “Azerbaijan Airlines” бо 67 мусофир рӯзи 25-уми декабр дар ҳудуди Қазоқистон суқут кард.

38 кас ҷон бохт, 29 нафар зинда монд.

Ҳавопаймо аз шаҳри Боку ба Грозний мерафт.

Сабаби рӯй додани фоҷеа ҳанӯз маълум нест.

Мақомоти Озарбойҷон ва Қазоқистон ҳодисаро таҳқиқ доранд.

Ба иттилои расмӣ, дар дохили ҳавопаймо 42 шаҳрванди Озарбойҷон, 16 шаҳрванди Русия ва боқимонда аз Қазоқистону Қирғизистон, Тоҷикистон ва кишварҳои дигар будаанд.

Мақомот теъдоди дақиқи шаҳрвандони Тоҷикистонро нагуфтанд.

Ба хабари ёфтаи Радиои Озодӣ, дар ҳавопаймо ду зодаи Тоҷикистон буданд. Як нафари онҳо ҷон ба саломат бурда, тақдири дувумӣ рӯшан нест.