Дар чанд ҷумла
Human Rights First: Тоҷикистон набояд ба Чеченистони дуюм табдил шавад
Як созмони мудофеи ҳуқуқи инсон дар Вашингтон - Human Rights First бо пахши изҳороте дар робита бо рӯйхат шудани афроди марбут ба аққалиятҳои ҷинсӣ дар Тоҷикистон изҳори ташвиш карда аз вазири умури хориҷии ин кишвар Рекс Тиллерсон хостааст дар ин замина иқдом кунад. Дар изҳороти ин созмон, ки рӯзи 19 октябр дар вебсайташ нашр шудааст, гуфта мешавад, ки таҳияи рӯйхати афроди марбут ба гурӯҳи ЛГБТ дар Тоҷикистон метавонад боиси эҷоди хушунат ва табъйизи афроди марбут ба ин гурӯҳ шавад. Дар ин изҳорот аз вазъи аққалиятҳои ҷинсӣ дар Озарбойҷону Чеченистон ба унвони мисоли табъизу бадрафторӣ ёд шуда, гуфта мешавад, ки дар ин кишварҳо ҳодисаҳои боздошт, шиканҷа ва қатли ин афрод дар пушти панҷара ба қайд гирифта шудааст. «Департаменти давлатӣ бояд сареъ иқдом кунад ва нагузорад, ки Тоҷикистон ба Чеченистони дуюм табдил шавад», гуфта мешавад дар изҳороти созмони Human Rights First.
Ахиран сохторҳои ҳифзи қонун дар Тоҷикистон феҳрасти наздики 370 ҳамҷинсгаро таҳия шудааст, ки ба қавли онҳо, бино ба сабаби афроди шомили “гурӯҳи осебпазир” буданашон, ба қайди оперативӣ гузошта шудаанд. Шумори ҳамҷинсгароҳо дар амалиёти ходимони ҳифзи ҳуқуқ бо номи шартии “Ахлоқ” ва “Тозакунӣ”, ошкор ва мушаххас шудаанд. Гурӯҳҳои ҳуқуқи башар мегӯянд, ақаллиятҳои ҷинсӣ дар Тоҷикистон воқеан ҳам ба бахши гурӯҳҳои осебпазир шомиланд ва дар ҳолатҳои зиёд на танҳо аъзои ҷомеа, балки ходимони полис ҳам ҳуқуқи онҳоро нақз мекунанд.
Ҳамаи хабарҳои имрӯзро дар инҷо бихонед
Як шаҳрванди Амрико дар Русия 15 сол ҳукми зиндон гирифт
Додгоҳи Маскав Евгений Спектор, шаҳрванди Амрико ва зодаи Русияро бо иттиҳоми ҷосусӣ барои 15 сол равонаи зиндон кард
Ӯро моҳи августи соли 2023 боздошт карда буданд.
Шаҳрванди ИМА ба чӣ гумонбар мешавад, маълум нест. Парвандаи ӯ бо баҳонаи доштани маълумоти сиррӣ пушти дарҳои баста баррасӣ шуд.
Евгений Спектор иттиҳомро рад кардааст ё пазируфтааст, номаълум аст.
Моҳи августи имсол Русия ду шаҳрванди дигари Амрикоро бо дигар русҳои боздоштшуда дар ИМА иваз карда буд.
Шӯрои уламои Русия фатвои никоҳ бо чанд занро бекор кард
Шӯрои уламои Русия фатвои ҷанҷолбарангези худ дар бораи ҳаққи то чор ҳамсар доштани мардони мусалмонро бекор кард.
Шӯрои уламои исломии Русия рӯзи 18-уми декабр фатво дода буд, ки мардони мусулмон бо иҷрои шартҳои шариати исломӣ метавонанд бо чор зан никоҳ кунанд.
Рӯзи 23-юми декабр Додситонии кулли Русия ба Равил Ғайнуддин, муфтии Русия ҳушдор дод, ки қонуншиканиро ислоҳ кунад.
Шамил Алоуддинов, намояндаи Шурои уламои Русия дар Телеграм навиштааст, ки пас аз вокуниши Додситонӣ ва ҷомеаи Русия фатво бекор шуд.
Фатвои "Мушкили бисёрзанӣ дар ҷомеаи мусулмонии Русия" ба издивоҷи динии мусалмонон машварат медод.
Дар он гуфта мешуд, ки марди мусалмон ҳақ дорад, ки бо риояи фармудаҳои шариат бо чанд зан издивоҷ кунад.
Бар асоси ин фатво бояд мард аз нигоҳи молиявӣ ҳама занҳоро баробар таъмин карда, ба ҳар кадоми онҳо хонаи ҷудогона гирад ва бар асоси нақша бо онҳо баробар вақт гузаронад.
Ин фатво ҷанҷолбарангез ва хилофи қонунҳои Русия дониста шуд.
Дар сомонаи Шӯрои уламои Русия навишта шудааст, ки никоҳи мусалмонӣ "қувваи қонунӣ надорад."
Бар асоси оморҳои гуногун дар Русия ҳудуди 20 миллион мусалмон зиндагӣ мекунад.
Раҳмон ва Путин дар бораи муҳоҷират гап мезананд
Президенти Тоҷикистон Эмомалӣ Раҳмон ба шаҳри Санкт-Петербурги Русия парвоз кард, то дар ҷаласаи ғайрирасмии сарони кишварҳои Иттиҳоди давлатҳои ҳамсуд иштирок кунад.
Вале имрӯз қарор аст ӯ бо президенти Русия Владимир Путин дидору гуфтугӯ анҷом диҳад.
Юрий Ушаков, ёвари Путин гуфт, "масоили доғи соҳаи муҳоҷират" дар маркази гуфтугӯҳои ду раҳбар хоҳад буд.
Маълум нест, манзур мушаххасан чӣ аст. Соли 2024 ҳамла ба “Крокус”-ро мақомоти рус кори дасти шаҳрвандони Тоҷикистон дониста, фишор болои муҳоҷирони тоҷикро афзоиш доданд.
Ушаков гуфтааст, азбаски раҳбарии давраии Иттиҳоди давлатҳои ҳамсуд барои соли 2025 аз Русия ба Тоҷикистон мегузарад, Путин ва Раҳмон қарор аст ҳамкориҳои муштаракро дар ин бахш баррасӣ кунанд.
Футболбозони навраси тоҷик дар Дубай ду бозии дӯстона мекунанд
Дастаи мунтахаби футболи наврасони Тоҷикистон (U-17) зери раҳбарии Марко Раҷини дар доираи омодагӣ ба қисми ниҳоии Ҷоми Осиё-2025 аз 24-ум то 29-уми декабр дар Дубай ҷамъомади таълимию тамринӣ анҷом медиҳад.
Дар доираи ин ҷамъомади таълимию тамринӣ футболбозони навраси тоҷик бо ҳамсолони худ аз Имороти Муттаҳидаи Арабӣ ду бозии дӯстона баргузор мекунанд. Бозиҳо рӯзҳои 26-ум ва 28-уми декабр доир мешаванд.
Бояд гуфт, ки бозиҳои дӯстона дар Дубай барои наврасони тоҷик як марҳилаи омодагӣ ба қисми ниҳоии Ҷоми Осиё-2025 мебошад, ки аз 3-юм то 20-уми апрел дар Арабистони Саудӣ барпо мегардад. Рақибони дастаи мунтахаби наврасони Тоҷикистон (U-17) дар гурӯҳ 23-юми январ дар қуръакашии мусобиқот маълум хоҳанд шуд.
Ёдовар мешавем, дастаи мунтахаби наврасони Тоҷикистон (U-17) бо роҳбарии Марко Раҷини, мутахассиси итолиёӣ, дар марҳилаи интихобӣ мунтахаби Гуамро бо ҳисоби рекордии 33:0, дастаи мизбон – Сингапурро бо ҳисоби 3:1 ва тими Умонро бо ҳисоби 2:0 шикаст дода, дар ҷадвали гурӯҳи «J» бо 9 имтиёз мақоми аввалро касб кард ва ба қисми ниҳоии Ҷоми Осиё-2025 миёни наврасони то 17-сола роҳхат гирифт.
ZaTelecom: Ютуб амалан дар Русия баста шудааст
Суръати кори шабакаи Ютуб дар Русия ба таври рекордӣ суст шудааст.
Михаил Климарев, масъули шабакаи ZaTelecom навиштааст, рӯзи 23-юми декабр суръат ё трафики Ютуб танҳо 20 дарсад буд. ZaTelecom мунтазам маълумоти суръати бозшавии шабакаҳоро тавассути хидмати мониторинги Google назорат мекунад.
Ба гуфтаи Михаил Климарев, "YouTube амалан дар Русия баста шудааст."
Чанде аз корбарони Радиои Озодӣ ҳам шикоят карданд, ки видеҳоро дар Ютубро бо мушкилӣ тамошо мекунанд ё садои наворро намешунаванд.
Суръати Ютуб дар Русия аз охири тобистони имсол якбора суст шуд. Идораи “Ростелеком” иддао кард, ки мушкилоти техникӣ дар кори хидмати Google Global Cache ба вуҷуд омадааст, аммо Google даст доштан дар мушкили дастрасӣ ба Ютубро дар Русияро рад кард. Баъдтар, ҳадди аққал се ширкати мухобиротӣ эътироф карданд, ки мушкили кори Ютуб аз "танзими Роскомнадзор" ба вуҷуд омадааст.
Тоҷикистон барои "Роғун" аз як бонки чинӣ $270 млн доллар қарз гирифт
Тоҷикистон барои идомаи сохтмони неругоҳи "Роғун" аз як бонки чинӣ 270 миллион доллар қарз гирифтааст.
Ба иттилои расмӣ, созишномаи мазкурро ноиби президенти Бонки Осиёии Сармоягузорӣ ва Инфрасохторӣ ва Вазири молияи Тоҷикистон рӯзи 20-уми декабр дар шаҳри Пекин имзо кардаанд.
Ба гузориши Вазорати молияи Тоҷикистон, ин бонк дар умум барои “Роғун” 500 миллион доллар сармоягузорӣ мекунад, ки дар ду навбат ҷудо мешавад.
Аммо дар хабарномаи расмӣ гуфта нашудааст, ки ин маблағ бо кадом шарту шароит ба Тоҷикистон дода мешавад. Вазорати молия танҳо навиштааст, ки сармояи Бонки Осиёии Сармоягузорӣ ва Инфрасохторӣ дар сохтани неругоҳи “Роғун” ва “таъмири 55 км роҳ, аз ҷумла, пулҳои байни деҳаҳо", сарф мешавад.
Мақомоти Тоҷикистон талош доранд, ки барои бунёди неругоҳи “Роғун” аз ниҳодҳои молии байнулмилалӣ сармоя ҷалб кунанд. Рӯзи 17-уми декабр Бонки ҷаҳонӣ барои “Роғун” 350 миллион доллар грант ё маблағи бебозгашт ҷудо кард.
Тумани ғафс боиси қатъи муваққати парвозҳо аз Душанбе шуд
Дар пайи фаромадани баҳман ё тумани сахт дар шаҳри Душанбе, парвозҳо аз фурудгоҳи пойтахт муваққатан қатъ шудааст.
Аз шоми 23 декабр Душанберо тумани сахте фаро гирифтааст ва ин вазъ субҳи 24-уми декабр низ чунин буд.
Бар асоси онлайн-лавҳаи фурудгоҳи Душанбе, ҳамаи парвозҳо аз соати 21-и шоми 23-юми декабр қатъ шудаанд ва ҳавопаймоҳое, ки аз Русия ва Кувайт ба Душанбе омада буданд, ба фурудгоҳҳои Хуҷанд ва Тошканд фиристода шудаанд.
Ҳанӯз маълум нест, ки туман дар Душанбе кай аз байн меравад ва фурудгоҳ кори худро аз сар мегирад.
Путин ва Раҳмон дар бораи ҳамкориҳои дуҷониба суҳбат мекунанд
Роҳбарони Тоҷикистон ва Русия рӯзи 24-уми декабр дар вилояти Ленингради Русия вомехӯранд.
Юрий Ушаков, ёвари президенти Русия ба расонаҳои он кишвар гуфтааст, дидори Владимир Путин ва Эмомалӣ Раҳмон дар маҷмааи “Игор” баргузор мешавад.
Ба гуфтаи Ушаков, роҳбарони ду кишвар дар бораи ҳамкориҳои низомӣ, иқтисодӣ ва ҳамчунин вазъият дар Афғонистон сӯҳбат мекунанд.
Ёвари президенти Русия ҳамчунин гуфтааст, дар дидори як ба яки Путин ва Раҳмон "албатта, масъалаҳои мубрам дар бахши муҳоҷират баррасӣ мешаванд".
Дар назар аст, ки дидори Эмомалӣ Раҳмон бо Владимир Путин дар ҳошияи нишасти сарони кишварҳои узви Иттиҳоди давлатҳои мустақил баргузор шавад.
Соли оянда раёсати ин созмони зери нуфузи Русия, ки чанд кишвари собиқ Шӯравиро фаро мегирад, ба ӯҳдаи Тоҷикистон мегузарад.
4 созишнома дар бахши муҳоҷират. Нақшаи Тоҷикистон барои ИДМ
Намояндагони Вазорати корҳои хориҷии Тоҷикистон зимни як нишаст дар Душанбе гуфтанд, ки талош мекунанд давоми як соли роҳбарӣ дар Иттиҳоди Давлатҳои Мустақил 4 созишнома дар бахши муҳоҷират қабул шавад. Ҷузъиёти санадҳо маълум нест, аммо мақомоти Тоҷикистон гуфтанд, тасдиқи ин ҳуҷҷатҳо тӯл мекашад.
Соли 2025 раёсати созмони Иттиҳоди Давлатҳои Мустақил ба уҳдаи Тоҷикистон мегузарад.
Аҳмад Саидмуродзода, сардори раёсати кишварҳои ИДМ дар Вазорати корҳои хориҷӣ, рӯзи 20-уми декабр гуфт, ҳадафи асосии Душанбе ин аст, ки мавқеи ин созмон дар арсаи ҷаҳонӣ боло равад: “Ҳадафи дигари мо мутобиқ кардани сохтор, раванд ва усулҳои кори ИДМ ба воқеиятҳои нав аст.”
Тақвияти ҳамкории кишварҳои узв дар бахшҳои саноат, энергетика, мубориза бо қочоқи маводи мухаддир ва харидуфурӯши инсон аз барномаҳои дигари Тоҷикистон барои роҳбарии ИДМ будааст. Дар ин нишаст баъзе аз хабарнигорон пурсиданд, ИДМ як созмони заиф асту Тоҷикистон барои боло бурдани “имиҷи он” дар арсаи ҷаҳонӣ чӣ кор карда метавонад?
Аҳмад Саидмуродзода, намояндаи ВКХ-и Тоҷикистон гуфт, ба ин назар, ки ИДМ як созмони заиф аст, розӣ нест. “Тоҷикистон ИДМ-ро ҳамчун як абзори муҳим барои рушди робитаҳои анъанавии кишварҳои пасошӯравӣ медонад. Нақши ин абзор чаро аз нигоҳи мо муҳим аст? Чунки дар давраи оғози истиқлоли давлатии кишварҳои пасошӯравӣ, дар ин минтақа абзоре вуҷуд надошт, ки робитаи анъанавиро ҳифз ва рушд диҳад. Яке аз ҳадафҳое ки ИДМ ба натиҷааш расидааст, ин барқарор ва таъмин намудани муколамаи устувор ва робитаи анъанавии он кишварҳои пасошӯравӣ аст,”—шарҳ дод Аҳмад Саидмуродзода.
Гузориши видеоӣ дар инҷост:
Иттиҳоди Давлатҳои Мустақил як созмони зери нуфузи Русия 33 сол пеш ба хотири сарҷамъ кардани 15 кишвари шӯравии собиқ таъсис ёфтааст.
Озарбойҷону Арманистон, Беларус, Қазоқистон, Қирғизистон, Молдова, Русия, Тоҷикистон, Туркманистон ва Узбекистону Украина шомили ин созмон ҳастанд. Намояндагони Украина чанд сол боз дар нишастҳои ин созмон ширкат намекунанд.
Ин кишварҳо миёни худ ихтилофҳои зиёде доранд. Аз ҷумла, ҳамлаи Русия ба Украина, ҷанг миёни Озарбойҷону Арманистон бар сари Қаробоғи Кӯҳӣ ва муноқишаҳо дар марзи Тоҷикистону Қирғизистон. Вале масъалаи муҳим барои Тоҷикистон имсол шояд мавзӯи муҳоҷират бошад.
Хабарнигори Радиои Озодӣ зимни нишасти хабарӣ аз намояндаи Вазорати корҳои хориҷии Тоҷикистон пурсид, ки дар давраи раёсаташон дар ИДМ барои муҳоҷирон чӣ нақшаҳое доранд?
Аҳмад Саидмуродзода, намояндаи Вазорати корҳои хориҷӣ, гуфт, талош доранд ҷаласаҳои коршиносон барои ниҳоӣ кардани чор санад дар бахши муҳоҷират баргузор шаванд. Масъули вазорат бе овардани ҷузъиёти бештар дар бораи ин санадҳо афзуд, ин ҳуҷҷатҳо бахши муҳоҷират дар ҳудуди кишварҳои узви ИДМ-ро фаро мегирад, аммо “ниҳоӣ шудани ҳуҷҷатҳо ба душвориҳо рӯбарӯ шуда истодаанд.”
Намояндагони Вазорати корҳои хориҷии Тоҷикистон ҳамчунин гуфтанд, соли оянда роҳбарони кишварҳои узви ИДМ дар Душанбе ҷамъ мешаванд. Дар шароите, ки ихтилоф байни кишварҳои узви ИДМ кам нест, рӯшан нест, ки дар давраи роҳбарии Тоҷкистон ин созмонро чӣ интизор аст.
Раисҷумҳури Гурҷистон хост, санаи нави интихоботро муайян кунанд
Раисҷумҳури Гурҷистон Саломе Зурабишвилӣ аз ҳизби ҳокими "Орзуи гурҷӣ" хостааст, то 29-уми декабр санаи интихоботи нави порлумониро муайян кунад.
Ҳизби “Орзуи гурҷӣ”-ро наздик ба Маскав медонанд.
Зурабишвилӣ дар як суханронӣ рӯзи 22-юми декабр миллиардер Бидзина Иванишвилӣ, сарвазири собиқ ва бунёдгузори “Орзуи гурҷӣ”-ро ба қасри президент хонд, то дар бораи таъйини рӯзи интихобот гап зананд.
Ин дархост дар пасманзари эътирозҳо алайҳи натиҷаи интихоботи гузашта ва тасмими якҷонибаи ҳукумат барои ба таъхир андохтани музокираи пайвастани Гурҷистон ба Иттиҳоди Аврупо сурат гирифт.
Интихоботи порулмонӣ дар Гурҷистон рӯзи 26-уми октябр баргузор шуд. Мақомот ҳизби “Орзуи гурҷӣ”-ро пирӯз донистанд, вале Саломе Зурабишвили ва мухолифон натиҷаҳоро напазируфтанд.
“Орзуи гурҷӣ” ҳар гуна қонуншиканиро дар интихобот рад карда, сарфи назар аз эътирозҳо аз баррасии интихоботи нав худдорӣ кард.
Вокуниши Кремл ба суханони Трамп дар бораи мулоқот бо Путин
Кремл гуфт, дар ҳоли ҳозир нақшаи мулоқоти Владимир Путин, президенти Русия, бо Доналд Трамп, раисҷумҳури мунтахаби Амрико, дар даст нест.
Трамп рӯзи 22-юми декабр дар як нишаст изҳор дошт, ки "Путин гуфтааст, мехоҳад ҳарчи зудтар бо ман мулоқот кунад".
Дмитрий Песков, сухангӯйи Кремл, рӯзи 23-юми декабр ба хабаргузории "ТАСС" гуфт, барои мулоқоти Путин бо Трамп, пеш аз савгандёдкунии ӯ дар моҳи январи 2025, "ангезаи воқеӣ вуҷуд надорад".
Маскав дар ҳафтаҳои охир ҳамлаҳоро бо мушаку ҳавопаймоҳои бесарнишин ба саросари Украина бештар кардааст.
Мақомоти Украина мегӯянд, Русия асосан зербунёдҳои иҷтимоӣ ва энергетикиро нишон мегирад.
Пас аз пирӯзии Доналд Трамп дар интихоботи Амрико гуфтугӯҳо дар бораи созиши эҳтимолии сулҳ барои хатми ҷанги Русия алайҳи Украина афзоиш ёфтааст.
Надежда Антонова қаҳрамони шоҳмоти Осиё шуд
Надежда Антонова, шатранҷбози маъруфи тоҷик, дар мусобиқаи қаҳрамонии Осиё дар риштаи шоҳмоти маъмулӣ (стандарт) соҳиби медали тило гардид.
Дар мусобиқаи қаҳрамонии Осиё миёни дӯстдорони шоҳмот, ки аз 14-ум то 23-юми декабр дар шаҳри Ал-Айни Имороти Муттаҳидаи Арабӣ баргузор шуд, намояндагони 31 кишвар ширкат карданд.
Қаблан устоди байнулмилалӣ Надежда Антонова дар ин мусобиқа дар навъи рапид (зудбозӣ) соҳиби медали биринҷӣ гардида буд.
Ин варзишгари 36-сола, ки қаҳрамони бисёркаратаи шоҳмоти Тоҷикистон аст, дар ҳашт Олимпиадаи ҷаҳонӣ иштирок кардааст. Надежда дар шаҳри Душанбе дар оилаи шатранҷбозон ба дунё омадааст. Падараш Павел Антонов солҳои дароз дар мактаби варзишӣ мураббии шоҳмот буд. Модараш Лидия Антонова яке аз шатранҷбозони маъруф дар Тоҷикистон аст.
Бояд гуфт, ки дар муддати як моҳи охир шатранҷбозони тоҷик дар қаҳрамонии Осиё соҳиби ду медали тилло шуданд. Ба ғайр аз Надежда Антонова, моҳи ноябри имсол Сӯҳроб Ҳамдамов дар қаҳрамонии Осиё миёни шоҳмотбозони имконияташон маҳдуд соҳиби ҷойи аввал шуда буд.
Омбудсмен гуфт, низомиёни Русия боз панҷ асири украиниро куштаанд
Омбудсмен ё Ваколатдори ҳуқуқи инсон дар Украина гуфтааст, низомиёни Русия боз панҷ асири ҷангии украиниро ба қатл расонданд.
Дмитрий Любинетс рӯзи 22-юми декабр дар изҳороте дар Телеграм навишт, ки нерӯҳои Русия панҷ сарбози бесилоҳи украиниро пас аз таслим шуданашон аз масофаи дур тирборон карданд.
Вай ҷузъиёт надод, аммо гуфт, "дар ин бора ба Созмони Милали Муттаҳид ва Додгоҳи байнулмилалии ҷиноӣ хабар хоҳам дод."
"Ҷинояткорони ҷангии Русия бояд ба Додгоҳи байнулмилалӣ оварда, бо ҷазои сангинтарин маҳкум карда шаванд", - афзуд Любинетс.
Русия ин ҳодисаро шарҳ надод, аммо пештар содир кардани ҷиноятҳои ҷангиро рад карда буд.
Дмитрий Любинетс дар аввали моҳи декабр гуфт, ки аз оғози ҳамлаи густурдаи Русия ба Украина (моҳи феврали соли 2022) то кунун 177 мавриди қатли асирони ҷангии украинӣ аз сӯи артиши Русия тасдиқ шудааст.
Сӯҳроб Зафарро ба зиндони Ваҳдат, Насимҷон Шарифовро ба Хуҷанд бурдаанд
Сӯҳроб Зафар (Тӯраев), раҳбари маҳкумшудаи "Гурӯҳи 24"-ро дар зиндони низомаш сахти шаҳри Ваҳдат ҷойгир кардаанд.
Дар ин бора як корманди маҳбас бе зикри номаш рӯзи 23-юми декабр ба Радиои Озодӣ хабар дод. "Ӯ ҳамроҳи чаҳор нафари дигар оварда шуд," – гуфт мусоҳиби мо.
Пайвандони Сӯҳроб Зафар ва намояндагони Идораи зиндонҳо ба зангҳои мо посух надоданд. Додгоҳи шаҳри Душанбе ӯро рӯзи 10-уми октябр ба 30 сол зиндон маҳкум кард.
Насимҷон Шарифов, узви дигари "Гурӯҳи 24", барои адои давраи ҷазо ба маҳбаси шаҳри Хуҷанд бурда шудааст.
Бародараш, Файзалӣ Шарифов, рӯзи 23-юми декабр ба Радиои Озодӣ гуфт, "аз телефони маҳбас тамос гирифт. Гуфт, ки дар ҳамин ҷо аст. Кӯшиш дорем, базудӣ барояш хӯроку либос барем."
Сӯҳроб Зафар ва Насимҷон Шарифов дар моҳҳои феврал ва марти соли 2024 дар шаҳри Истанбули Туркия ба таври мармуз нопадид шуданд.
Додситони кул Юсуф Раҳмон баъди қариб ним сол дар Тоҷикистон будани онҳоро тасдиқ кард. Дар ҳоле ки мақомот чӣ гуна дастгир ва аз Туркия ба Тоҷикистон овардани онҳоро нагуфтанд, "Гурӯҳи 24" қазияро "дуздӣ" номид.
Сӯҳроб Зафар аз соли 2014 дар Туркия мезист. Вай дар гузашта, аз ҷумла соли 2018, чанд дафъа дар Туркия дастгир, вале озод гардида буд. Насимҷон Шарифов аз соли 2015 дар Туркия мезист ва ба камияш се бор дастгиру раҳо шудааст. Ӯ соли 2018 беш аз ду моҳ дар боздоштгоҳ буд.
“Гурӯҳи 24”, ки соҳибкори норозӣ Умаралӣ Қувватов бунёд гузоштааст (худаш соли 2015 дар Туркия кушта шуд), бо қарори Додгоҳи олӣ дар Тоҷикистон “ифротгаро” ва “мамнуъ” эълон шудааст. Раҳбаронаш дар хориҷа худро мухолифи ҳукумати Тоҷикистон ва фаъолияташонро қонунӣ медонанд. Ниҳодҳои Созмони Милал, Иттиҳоди Аврупо ва САҲА намояндагони онро ба маҳфилҳои худ даъват мекунанд.
Сарвазири Словакия ба дидори Путин рафт
Нахуствазири Словакия Роберт Фитсо дар як сафари аз қабл эълоннашуда ба Маскав рафта, бо президент Владимир Путин гуфтугӯ кардааст.
Дар ин бора Павел Зарубин, хабарнигори наздик ба Кремл шоми 22-юми декабр хабар дод.
Қаблан нахуствазири Словакия гуфта буд, шояд дар фурсатҳои наздик барои баррасии мавзӯи интиқоли гази Русия ба ин кишвари аврупоӣ, ба Маскав биравад. Украина мехоҳад аз 1-уми январ интиқоли гази Русияро тавассути қаламраваш ба Словакия манъ кунад.
Кремл дар бораи сафари Роберт Фитсо қаблан иттилое надода буд. Дмитрий Песков, сухангӯи Путин дар сӯҳбат бо расонаҳои русӣ дақиқ нагуфтааст, ки роҳбарони Русия ва Словакия кадом мавзуъҳоро баррасӣ мекунанд.
Песков танҳо таъкид кардааст, ки интиқоли газ яке аз мавзӯъҳои сӯҳбат аст. Ба гуфтаи сухангӯи Кремл, Путин ва Фитсо танҳо сӯҳбат карданд, вале натиҷаҳои ин вохӯрӣ барои расонаҳо пешниҳод нашуд.
Маълум нест, ки Русия ва Словакия бар сари масъалаи интиқоли газ ба ягон тавофуқ даст ёфтанд ё не. Ин аввалин сафари нахуствазири Словакия баъд аз ҳамлаи бедалели Русия ба хоки Украина аст. Словакия узви паймони низомии НАТО мебошад.
Иттиҳоди Аврупо нисбат ба Русия таҳрими нав ҷорӣ мекунад
Иттиҳоди Аврупо дар ростои сеюмин солгарди ҳамлаи Русия ба Укарина таҳрими нав нисбат ба ин кишвар ҷорӣ мекунад.
Русия моҳи феврали соли 2022 ба Украина ҳамла кард ва дар моҳи феврали соли 2025 аз ин ҳамла се сол сипарӣ мешавад.
Нашрияи "Welt am Sonntag" бо такя ба манобеаш дар Иттиҳоди Аврупо навиштааст, ки тарҳи таҳрими нав таҳия мешавад ва ҳадаф “паёми рӯшан ба Маскав аст.”
Қарор аст, ки нисбат ба бахшҳое аз иқтисоди Русия, ки то кунун таҳрим нашуда буданд, таҳрим ҷорӣ шавад. Афроду созмонҳое ҳам, ки ба нафъи Русия ташвиқот мебаранд ва мухолифи якпорчагии Украина ҳастанд, таҳрим мешаванд.
Дар ҷанги тақрибан се солаи Русия дар Укарина аз ду тараф садҳо ҳазор нафар куштаву маҷрӯҳ шуданд.
Кишварҳои аврупоӣ аз Украина пуштибонӣ мекунанд ва Русияро борҳо таҳрим кардаанд.
Дар ҳамлае дар Покистон 16 сарбозу афсар кушта шудааст
Ҷангҷӯён дар марзи Покистон бо Афғонистон дар ҳамлае 16 сарбозу афсари Хадамоти амнияти ин кишварро куштаанд.
Ҳидоятуллоҳ, сардори пулиси ноҳияи Ладдӣ дар Покистон бо бахши покистонии Радиои Озодӣ гуфтааст, ки ҷангҷӯён соати 2-и шаби 21-уми декабр ба дидбонгоҳи марзӣ дар Вазиристони Ҷанубӣ ҳамла карданд. Ба гуфтаи ӯ, 16 сарбозу афсар кушта ва 8 тани дигар маҷрӯҳ шудаанд.
Гурӯҳи “Таҳрики Толибони Покистон” масъулияти ҳамларо бар душ гирифтааст.
Ин гурӯҳ иддао кардааст, ки 35 корманди Хадамоти амнияти Покистонро куштааст.
Тасдиқи дурустии иддаои ин гурӯҳ мушкил аст.
Пас аз онки дар соли 2021 Толибон Афғонистонро ишғол карданд, гурӯҳи “Таҳрики Толибони Покистон” фаъолтар шудааст.
Маркази омӯзишӣ низоъ ва амният дар Покистон дар охирин ҳисоботаш гуфтааст, ки дар ҳамлаҳои террористӣ дар вилояти Хайбар-Пахтунхоҳ 240 нафар кушта шудаанд, ки 68 нафарашон маъмурони амниятӣ ҳастанд.
10 миллион доллар ҷоиза барои пайдо кардани Ҷулонӣ бекор шуд
Амрико пешниҳоди 10 миллион доллар ҷоиза барои Аҳмад ал-Шараъ, раҳбари созмони "Ҳайат Таҳрир аш-Шом"-ро бекор кард.
Аҳмад ал-Шараъ, ки бо номи Абумуҳаммад Ҷулонӣ шинохта мешуд, пас аз фирори Башор Асад дар 8-уми декабр ҳоло амалан раҳбари Сурия аст.
Чанд рӯз пеш намояндаҳои ИМА дар Димишқ бо ӯ суҳбат карданд ва қарори лағви ҷоиза барои хабар додан аз макони ӯ бекор шуд.
Барбара Лиф, ёвари вазири умури хориҷии ИМА, ки ҳайати амрикоиро раҳбари мекард, суҳбат бо Аҳмад ал-Шараъро “созанда” ва худи ӯро одами “воқеъбин” тавсиф кард.
Намояндаҳои Амрико бо ӯ дар бораи ояндаи Сурия ва таҳдидҳои террористӣ суҳбат карданд. Барбара Лиф гуфтааст, ки Ҷулонӣ омодаи ҳамкорӣ ҳаст.
Ҳамзамон масъалаи бекор кардани таҳримҳо нисбат ба Сурия, ки дар замони Башор Асад ҷорӣ шуда буд, дар ин суҳбат матраҳ шудааст.
"Ҳайат Таҳрир аш-Шом", ки дар гузашта бо “Ал-Қоида” робита дошт, дар феҳрасти созмонҳои террористии аксари кишварҳои дунё қарор дорад. ИМА барои хабар додан аз макони раҳбари он, Абумуҳаммад Ҷулонӣ 10 миллион доллар ваъда карда буд.
Абумуҳаммад Ҷулонӣ дар суҳбат бо расонаҳо пайвастанаш бо "Ал-Қоида"-ро "хатои ҷавонӣ" дониста, ба таъкид мегӯяд, ки Сурияро ба як кишвари озод табдил медиҳад. Ба гуфтаи ӯ, Сурия як кишваре хоҳад шуд, ки занон дар он озодона кору таҳсил хоҳанд кард ва ҳама қавму миллат баробар хоҳанд буд.
Дар замони ҳукумати ӯ дар Идлиб масеҳиён озод буданд ва калисои онҳо кор мекард. Шояд кору рафторҳои ахираш буд, ки назари ҷомеаи ҷаҳонӣ нисбат ба ӯ то андозае тағйир кардааст.
"Ҳайат Таҳрир аш-Шом", ки аз соли 2015 шаҳри Идлиби Сурияро дар ихтиёр дошт, охири моҳи ноябр ҳамлаи густардае алайҳи нерӯҳои Башор Асадро оғоз кард. Рӯзи 8 уми декабр артиши ҳукумати Башор Асад таслим шуд ва худи ӯ аз кишвар фирор кард. "Ҳайат Таҳрир аш-Шом" бо раҳбарии Абумуҳаммад Ҷулонӣ назорати Димишқро дар ихтиёр гирифтанд.
Онҳо ба ҳукуматдории беш аз 50-солаи хонаводаи Асад, ки бо зулму ситам ба мардум ном бароварда буд, поён доданд. Ҳоло намояндаҳои аксари кишварҳои дунё бо "Ҳайат Таҳрир аш-Шом" робита барқарор кардаанд ва масъалаи аз рӯйхати созмонҳои террористӣ берун кардани онро баррасӣ доранд.
Ихроҷи 88 тоҷикистонӣ аз хоки ИМА дар чор соли гузашта
Дар давоми чор соли гузашта аз хоки ИМА 88 шаҳрванди Тоҷикистон ихроҷ шудааст ва сабаби асосии ин ихроҷҳо қонуншиканӣ будааст.
Дар ин бора як омори муфассали Идораи муҳоҷират ва гумруки ИМА хабар додааст, ки рӯзи 20 декабр дар сомонаи ин ниҳод нашр шуд. Омор марҳилаи аз октябри соли 2020 то сентябри соли 2024-ро фаро мегирад.
Дар гузориши муфассали мақомоти муҳоҷирати Амрико омори тамоми шаҳрвандони хориҷие оварда шудааст, ки дар қаламрави ин кишвар дар муддати чор соли гузашта ҳабс, боздошт ё ихроҷ шудаанд.
Дар ин муддат 825 шаҳрванди Тоҷикистон боздошт ва аз миёни онҳо 103 нафарашон ҳабс шудаанд, омадааст дар ин санади расмӣ.
Ҷузъиёти вобаста ба навъи қонуншиканиҳои эҳтимолии шаҳрвандони Тоҷикистон дар ИМА нашр намешавад.
Вале дар бораи як парвандаи боздошти гурӯҳии шаҳрвандони Тоҷикистон дар Амрико расонаҳои ҷаҳонӣ ҳам бо такя ба FBI – Хадамоти федеролии амнияти Амрико – хабар дода буданд.
Моҳи июн ҳашт шаҳрванди Тоҷикистон бо гумони иртибот ба гурӯҳи мамнӯи "Давлати исломӣ" дар шаҳрҳои Лос-Анҷелос, Ню-Йорк ва Филаделфия боздошт шуданд. Чор моҳ баъд - моҳи октябр мақомоти Амрико гуфтанд, аз онҳо се нафарро ба Тоҷикистон ва Русия баргардондаанд ва боқимондаҳо дар боздошт мемонанд.
Сарнавишти баъдии онҳо маълум нест ва мақомот дар Тоҷикистон ҳам ин мавзӯъро то ҳол шарҳ надодаанд.
Ихроҷи рекордӣ аз ИМА
Дар маҷмӯъ, ба навиштаи Идораи муҳоҷират ва гумрук, аз хоки ИМА дар давоми 12 моҳи гузашта 270 ҳазор шаҳрванди 192 давлат ихроҷ шудаанд ва ин баландтарин нишондод дар солҳои охир будааст. Пеш аз болотарин нишондоди ихроҷ аз хоки ИМА дар соли 2014 ба қайд гирифта шуда буд, вақте мақомот беш аз 315 ҳазор хориҷиро аз хоки ин кишвар берун карданд.
Президенти мунтахаб Доналд Трамп таҳдид кардааст, ки мубориза бо муҳоҷирати ғайриқонунӣ яке аз корҳои муҳими давраи нави раёсатҷумҳуриаш хоҳад буд. Дар давраи аввали раҳбариаш ӯ барои пешгирӣ аз убури ғайриқонунии марзи ИМА тавассути Мексика дар сарҳадро девор сохт, вале амали мақомоти Амрико мавриди интиқоду маҳкумиятҳои зиёди ҳомиёни ҳуқуқи муҳоҷирон гардид.
Маҳз қаламрави Мексика солҳои охир як роҳи маъруфи убури дастаҷамъонаи муҳоҷирон аз Осиёи Марказӣ ва аз ҷумла Тоҷикистон гардидааст. Тоҷикистониҳои зиёде, ки аз бекорӣ ва даромади ночиз дар ватанашон фирор мекунанд, талош доранд бо ҳар роҳ ба Амрико роҳ ёбанд. Омори куллии шаҳрвандони Тоҷикистон дар Амрико нашр намешавад, вале бовар меравад, ки шумори онҳо даҳҳо ҳазор нафарро ташкил медиҳад.
Дар Олмон шумори қурбониҳои ҳодисаи бозорчаи солинавӣ меафзояд
Дар шаҳри Магдебурги Олмон шоми 20 декабр мошине издиҳоми мардумро пахш кард ва дар натиҷа 4 кас кушта ва беш аз 200 кас маҷрӯҳ гардиданд.
Мақомот рӯзи шанбе гуфтанд, ки дар миёни кушташудаҳо як кӯдак ҳам будааст. Ҷароҳати 90 нафар сангин арзёбӣ мешавад.
Ҳодиса шоми ҷумъа дар бозорчаи солинавии маркази шаҳр рух дод. Мошини сиёҳранги навъи BMW тахминан 400 метр ба самти калисои марказӣ мардумро пахш карда рафтааст.
Намояндаи полис гуфт, феълан сабаби ин ҳодиса маълум нест ва ҳама фарзияҳо санҷида мешаванд. Гумонбари асосии боздоштшуда – як табиби 50-солаи зодаи Арабистони Саудӣ аст, ки ӯро дар ҷои ҳодиса дастгир карданд.
Матбуоти маҳаллӣ навиштааст, ки гумонбар аз соли 2006 бо мақсади таҳсил ба Олмон рафта соли 2016 мақоми паноҳандагӣ дарёфт кардааст. Сабаби содир шудани ҷиноят феълан маълум нест.
Матбуоти олмонӣ бар пояи таҳлили навиштаҳои ин мард дар шабакаҳои иҷтимоӣ мегӯяд, ин шахс зидди ифротгароии динӣ буд, нисбат ба Ислом диди танқидӣ дошт ва аз тарафдорони ислоҳот дар қонунҳои муҳоҷирати Олмон буд.
Маҷлиси намояндагони ИМА аз қатъи кори ҳукумат пешгирӣ намуд
Шоми ҷумъа, 20-уми декабр Маҷлиси намояндагони ИМА тарҳи қонунеро қабул кард, ки аз қатъи кори ҳукумат пешгирӣ мекунад.
Қаблан президенти мунтахаб Доналд Трамп тақозо карда буд, ки ба хотири боло бурдани лимит ё маҳдудияти қарзи хориҷии давлатӣ қонун қабул нашавад.
“Садои Амрико” навишт, барои қабули тарҳи қонун 366 тарафдор ва 34 вакил – мухолиф овоз доданд. Ҳамакнун ин қонунро бояд Сенат қабул карда баъд он ба имзои президент Ҷо Байден фиристода шавад.
Байден гуфт, ба хотири кори бетанаффуси ҳукумат ин санадро имзо мекунад. Тарҳи қонун тамдиди маблағгузории кори ҳукуматро то 14 март ва барои иёлоти аз офатҳои табиӣ зарардида додани 100 миллилард долларро пешбинӣ мекунад.
Айни замон, дар ин тарҳ навишта нашудааст, ки меъёри ҳадди аксари қарзи давлатӣ, ки Трамп ваъда додааст ин масъаларо то 20 январ ҳал кунад, чӣ қадар бояд бошад.
Агар кори ҳукумат қатъ мешуд, миллионҳо корманди сохторҳои ҳукуматии ИМА наметавонистанд сари вақт маоши худро дарёфт кунанд ва дар остонаи Соли нав соҳаҳои мисли туризму меҳмонхонаву ширкатҳои ҳавоӣ миллиардҳо доллар зарар медиданд.
Ҳуҷуми паҳподҳо ба шаҳри Қазон
Субҳи шанбе, 21-уми декабр ба чанд бинои истиқоматӣ дар шаҳри Қазони Ҷумҳурии Тотористони Русия паҳпод ё ҳавопаймоҳои бесарнишин ҳамла кард.
Мақомоти Тотористон гуфтанд, ки ҳашт паҳподи украинӣ ба хонаҳои истиқоматӣ ва як корхонаи саноатии шаҳр ҳамла кардааст. Хабар дар бораи талафоти эҳтимолӣ нашр намешавад, вале беморхонаҳо дар шароити изтирорӣ кор мекунанд, мегӯяд Радио Свобода.
Фурудгоҳҳои шаҳрҳои Қазон, Ижевск ва Саратов муваққатан аз кор мондаанд. Мактабу дигар муассисаҳои таълимӣ ва ҳам бархе марказҳои тиҷоратӣ муваққатан баста шудаанд, мардумро ташвиқ мекунанд дар паноҳгоҳҳо бошанд.
Вазорати дифои Русия гуфт, паҳподҳо чун мавҷ якбора аз чанд самти шаҳр ҳуҷум кардаанд.
Пешбарии 6 узви Ҳизби сотсиалистии Тоҷикистон ба интихобот
Ҳизби сотсиалистии Тоҷикистон дар анҷумани ахир шаш узвашро барои номзадӣ ба интихоботи парлумонии кишвар, ки моҳи марти соли 2025 барпо мешавад, пешбарӣ намуд.
Дар анҷумани ҳизб, ки 21 декабр дар Душанбе барпо шуд, ба навиштаи АМИТ “Ховар”, номзадии раиси Ҳизби сотсиалистии Тоҷикистон Ғулом Ҳалимзода, муовини якуми раис - Муртазо Аҳмадзода, муовинони раис Давлатхонум Саидошурова ва Меҳринисо Раҷабова, раиси Кумитаи иҷроияи ҳизб дар вилояти Суғд Маъруф Юсупов ва муовини раиси Кумитаи иҷроияи ҳизб дар шаҳри Душанбе Майсара Аброқуловаро ба вакилӣ дар интихоботи Маҷлиси намояндагон пешниҳод намуданд.
Пеш аз ин анҷуманҳои Ҳизби ҳокими халқии демократӣ бо пешбарии 28 номзад ва ҳизби демократии Тоҷикистон бо пешбарии панҷ намоянда ба интихоботи парлумонӣ ба анҷом расиданд.
Дар Тоҷикистон баъди соли 2015 аз саҳнаи сиёсӣ берун карда шудани Ҳизби наҳзати исломӣ, ҳафт ҳизби сиёсӣ ҳақи идомаи фаъолиятро дорад, вале ҳеҷ яки онҳо дар мавқеи интиқод ё мухолифати воқеъӣ қарор надоранд.
Ҳамлаи ҳавоии Русия ба Киев, зарбаи Украина ба Курск
Украина рӯзи 20-уми декабр ба вилояти Курски Русия ҳамлаи мушакии маргбор анҷом дод.
Кумитаи тафтишоти Русия гуфт, дар ин ҳамла аз мушакҳои HIMARS истифода шудааст.
Тибқи иттилои шабакаи “Mash” дар Телеграм, ҳадди ақал панҷ нафар кушта ва 26 кас захмӣ гардиданд. Чанд иншооти муҳими иҷтимоӣ, аз ҷумла коллеҷи омӯзгорӣ, маркази фарҳангӣ ва мактаб дар шаҳри Рилск низ вайрон шудааст.
Аз он пеш Русия ба шаҳри Киев, пойтахти Украина, ҳуҷуми густурдаи ҳавоӣ кард. Дар ин ҳодиса як нафар кушта, як калисои таърихӣ ва чанд бино, аз ҷумла шаш сафоратхона, зарар диданд.
Сергей Попко, раиси маъмурияти низомии Киев, гуфт, ба далели ҳамлаҳои мушакии Русия дар саросари Украина бонги хатар садо дод.
“Танҳо ба самти Киев ҳашт мушак, аз ҷумла мушакҳои моваросавтии “Кинжал” ва мушакҳои дурпарвози Искандер/КН-23 партофта шуданд,” – афзуд ӯ.
Пайомадҳои ҳамлаи густурдаи Русия ба Киев
Намояндаи “Барқи тоҷик”: Нерӯи барқ қатъ шуд, ба мо занг назанед
Як намояндаи ширкати “Барқи тоҷик” аз мардуми кишвар хостааст, дар ҳолати қатъ шудани нерӯи барқ дигар ба онҳо муроҷиат накунанд, балки ба шабакаҳои тақсимоти барқ занг зананд.
Қурбон Аҳмадзода, сухангӯи “Барқи тоҷик”, дар Фейсбук навиштааст, қатъи барқ ва пардохти ҳаққи истифодаи он, дигар кори ширкати онҳо нест. Аҳмадзода навиштааст, сарфи назар аз ин, мардум “ҳамоно шикоятҳояшонро ба суроғаи "Барқи тоҷик" равон мекунанд.”
Сухангӯи ин ширкат навиштааст, аҳолӣ ҳангоми қатъ шудани барқ бояд ба сомонаи "Шабакаҳои тақсимоти барқ" ворид шуда, рақами заруриро барои тамос онҷо пайдо кунанд.
Мо ба рақами “Шабакаҳои тақсимоти барқ”, ки дар сомонааш гузошта шудааст, занг задем ва дар бораи реҷаи интиқоли барқ пурсидем. Намояндагони ин ширкат ба суолҳои мо посухи дақиқ надоданд.
Бо фаро расидани сардӣ шикоятҳо аз қатъи барқ дар кишвар зиёд шудааст. Сокинони шаҳри Душанбе ҳам мегӯянд, ки барқашон зуд-зуд қатъ мешавад. Аз ҷумла, шоми 19-уми декабр дар маркази шаҳри Душанбе барқ барои тақрибан як соат қатъ шуд.
Аз охири моҳи сентябр дар Тоҷикистон лимит ё маҳдудияти интиқоли барқ ҷорӣ шудааст.
Гуфтугӯ