Ҳодиса
Иҳотаи Ҳоҷӣ Ҳалим, таслими бародараш ва боздошти 32 "одами" ӯ (ХАРИТА)
Вазорати корҳои дохилӣ мегӯяд, ки бародари Абдуҳалим Назарзода, муовини барканоршудаи Вазорати дифои Тоҷикистон, таслим шуда, то кунун 33 тан аз "одамони" ӯ низ дастгир кардаанд.
Вазорати корҳои дохилии Тоҷикистон мегӯяд, Назаров Мирзоҳаёт Мирзоевич (1972), бародари Абдуҳалим Назарзода, ки барои ҳамла болои дастгоҳи марказии Вазорати дифоъ ва ШКД-и шаҳри Ваҳдат муттаҳам мешавад, ихтиёрӣ худро таслим кардааст. Масъулони вазорати дохилӣ рӯзи 5 сентябр гуфтанд, "худи Назарзода бо ҳамроҳии 7-8 нафар ҳаммаслаконаш дуртар аз шаҳри Душанбе ба масофаи 150 километр дар дараи Ромит пинҳон гаштааст. Гирду атрофи ин минтақа пурра ба иҳота гирифта шуда, амалиёт барои дастгир ва безарар гардондани онҳо идома дорад."
Дафтари матбуоти ВКД хабарҳо дар бораи ҳалокати 33 корманди ин ниҳод ва Вазорати дифоъро рад карда ва гуфт, ки дар пайи амалиёти якҷояи ВКД, КДАМ, ВМ ва дигар сохторҳои қудратӣ то ҳол 32 узви гурӯҳи Абдуҳалим Назарзода, маъруф ба Ҳоҷӣ Ҳалим, дастгир шуда, 13 нафарашон безарар гардонда шудаанд: "Аз ин гурӯҳ зиёда аз 500 яроқу аслиҳаи ҷангӣ мусодира карда шуд. Инчунин, якчанд махфигоҳи яроқу аслиҳа ва автомашинаҳои тамғаҳои гуногуни "ҶИП" ва "Седан" дарёфт карда шуд."
Вазорат мегӯяд, то кунун дар пайи амалиёти муқобила бо гурӯҳи Абдуҳалим Назарзода ва боздошти онҳо (рӯзҳои 4 ва 5 сентябр) 9 корманди мақомоти корҳои дохилӣ ба ҳалокат расида, 6 нафар ҷароҳати сабуки ҷисмонӣ бардоштаанд. "Вазъият дар ҷумҳурӣ тинҷу ором буда, таҳти назорати қатъии мақомоти қудратии Тоҷикистон қарор дорад," -- таъкид карданд дар дафтари матбуоти ВКД.
Ҳукумат хост, Абдуҳалим Назарзода таслим шавад
Як манбаъ дар ниҳодҳои қудратии Тоҷикистон рӯзи 5 сентябр ба Радиои Озодӣ хабар дод, ҳукумат ба Абдуҳалим Назарзода, маъруф ба "Ҳоҷӣ Ҳалим" мӯҳлат додааст, ки бидуни хунрезӣ ва ба зудтарин фурсат таслим шавад. "Ҳоҷӣ Ҳалим" барои ҳамлаи бомдоди 4 сентябр болои дастгоҳи марказии Вазорати дифоъ ва Шӯъбаи корҳои дохилии шаҳри Ваҳдат муттаҳам мешавад ва рӯзи гузашта бо қарори ҳукумат аз мақоми муовини вазири дифоъ барканор шуд.
Хабарнигорони Радиои Озодӣ, ки дар Ромит, дар панҷоҳкилометрии Душанбе қарор доранд, мегӯянд, ки онҳо то Марғоб чор постгоҳро гузаштаанд. Ба иттилои онҳо ҳамин субҳ ба Ромит 150 нерӯи иловагӣ интиқол шуда, чарболҳо низ мушоҳида шудаанд. Нерӯҳои давлатӣ гуфтаанд, ки вазъ ором ва таҳти назорати онҳост. Ба иттилои хабарнигорони мо сокинони Ромит дар сӯҳбат ба онҳо аз баргузории кадом амалиёте изҳори бехабарӣ кардаанд.
Амалиёти боздошти Абдуҳалим Назарзода ва ҳамроҳони ӯро, ки ба иттилои мақомот ба Ромит фирор кардаанд, Вазорати корҳои дохилии Тоҷикистон бар уҳда дорад.
ҲНИТ: Ҳоҷӣ Ҳалим аз мо нест
Дар ҳамин ҳол, Ҳизби наҳзати исломии Тоҷикистон (ҲНИТ) аз задухӯрдҳои маргбор дар Душанбе ва шаҳри Ваҳдат, ки аз ду ҷониб - гуруҳи Абдуҳалим Назарзода ва нерӯҳои давлатӣ - 17 кушта бар ҷой гузошт, нигаронии амиқ карда, вазъияти ба вуҷудомадаро барои суботу оромии хатарбор ҳисобидааст. Шӯрои сиёсии ҲНИТ баъди як ҷаласаи изтирорӣ ин задухӯрдҳоро "мушкили дохилии ниҳодҳои низомӣ" донист.
Дар идома аз он ки мақомот Абдуҳалим Назарзода -- муовини, инак, собиқи вазири дифоъ ва Зиёраддин Абдуллоев -- корманди кушташудаи Шӯъбаи корҳои дохилии шаҳри Ваҳдатро узви ин ҳизб муаррифӣ кардаанд, изҳори норозигӣ шудааст. Шӯрои сиёсии ҲНИТ мегӯяд, қонунгузории Тоҷикистон узвияти афсарону сарбозон ва кормандони мақомоти низомиро дар ҳизбҳои сиёсӣ манъ намудааст ва ингуна афрод наметавонанд узви ягон ҳизби сиёсӣ бошанд.
"Гузашта аз ин, чанде қабл гурӯҳе аз ин фармондеҳон ва афсарон бо изҳорот аз бастани ҲНИТ ҷонибдорӣ карда, барои аз узвияти ҲНИТ хориҷ кардани аъзо кӯшишҳо ба харҷ дода буданд," -- таъкид шудааст дар изҳороти ҲНИТ.
СПАД: Ҳамлаҳо кори дохилии Тоҷикистонанд
Созмони паймони амнияти дастҷамъӣ (СПАД), ки Тоҷикистон узвияташро дорад, низ гуфтааст, ки вазъ дар ин кишварро пайгирӣ доранд. Владимир Зайнуддинов, сухангӯи СПАД ба расонаҳои Русия гуфтааст, ки ҳамлаҳои субҳи чоруми сентябр дар душанбе ва Ваҳдат кори дохилии Тоҷикистонанд ва изҳори бовар кардааст, ки мақомоти қудратии кишвар аз уҳдаи ҳалли он хоҳанд баромад.
Зайнуддинов ҳамлаҳои Душанбе ва Ваҳдатро, ки бино ба иттилои расмии мақомот аз ду ҷониб 17 кушта бар ҷой гузошт, як амали роҳзанӣ хондааст. Вай гуфтааст, "бовар дорем, мақомоти Тоҷикистон роҳзанҳоро маҳв хоҳанд кард." Ин ҳамлаҳо дар ҳоле сурат гирифтанд, ки 15 сентябр дар Душанбе нишасти сарони кишварҳои узви СПАД дар назар аст. Дар ин нишаст Владмир Путин, раисиҷумҳури Русия низ иштирок хоҳад кард.
Ҳамаи хабарҳои имрӯзро дар инҷо бихонед
Дар бораи ду тоҷике, ки дар ҳавопаймои Озарбойҷон буданд, чӣ медонем?
Субҳонқул Раҳимов ва Зиннатулло Саъдуллоев, ду тоҷике, ки дар ҳавопаймои ширкати "Azerbaijan Airlines" буданд, кӣ ҳастанд? Ин ҳавопаймо, ки аз Боку ба Грозний парвоз мекард, рӯзи 25-уми декабр дар ҷануби Қазоқистон суқут кард. Мақомот гуфтанд, аз 67 мусофир ва сарнишин 38 кас ҷон бохт.
"Тобистон ба Тоҷикистон меомад, боз ба Русия бармегашт"
Субҳонқул Раҳимов 48 сол дошта, зодаи деҳаи Нарванди ноҳияи Айнии вилояти Суғд аст.
Усмон Азизов, раиси деҳаи Нарванд, рӯзи 26-уми декабр дар суҳбат бо Радиои Озодӣ гуфт, ки Субҳонқул Раҳимов бо ҳамсар ва шаш фарзандаш дар шаҳри Екатеринбург зиндагӣ мекунад ва ҳар тобистон ба зодгоҳаш меояд.
Ба гуфтаи ҳамсуҳбати мо, Раҳимов ва ҳамсару фарзандонаш шаҳрвандии Тоҷикистон ва ҳам Русияро доранд: "Субҳонқул аз падари тоҷик ва модари рус ба дунё омадааст. Факултаи нақлиёт ва инфрасохтори роҳи Донишгоҳи техникиро тамом кард. Беш аз 20 сол аст, ки ба Русия рафта меояд. То ҷое медонам, дар Русия дар кадом сохтмон кор мекунад."
Азизов ҳамчунин гуфт, пас аз садамаи ҳавопаймо ва то вақте ки худи Субҳонқул Раҳимов тамос нагирифт, наздиконаш нигарони сарнавишти ӯ буданд. Масъули деҳаи Нарванд афзуд, Раҳимов ҳоло дар бемористоне дар Қазоқистон зери назорати пизишкон аст.
Дар наворе, ки худи Субҳонқул Раҳимов баъд аз садамаи ҳавопаймо сабт кард, дида мешавад, ки пешониаш осеб дидааст. Ӯ дар наворе аз дохили ҳавопаймо, ки қабл аз суқут сабт шудааст, ором ба назар мерасад. Баъд аз афтодани ҳавопаймо, дар навори дигар худ ва пораҳои ҳавопайморо нишон дода, мегӯяд, "халабон ҳалок шуд".
Талошҳои Радиои Озодӣ барои тамос бо Субҳонқул Раҳимов то ин дам бенатиҷа буд.
Ба сари Зинатулло чӣ омад?
Дар рӯйхати мусофирони ҳавопаймои афтода, ки расонаҳои Қазоқистон ва ширкати "Azerbaijan Airlines" дар шабакаи "X" (Твиттер) нашр карданд, номи Зиннатулло Саъдуллоев ҳам омадааст.
Ҷустуҷӯйи Радиои Озодӣ нишон дод, ки Саъдуллоев 29-сола ва аз ноҳияи Файзобод аст. Вай аз соли 2020 шаҳрвандии Русияро доштааст. Наздиконаш намехоҳанд дар ин бора бо расонаҳо суҳбат кунанд.
Ба гузориши чанд расонаи русӣ, аз ҷумла "Газета" ва "Лента" Зиннатулло Саъдуллоев дар садамаи ҳавопаймо фавтидааст. Наздикони Саъдуллоев аз ҷумла, хоҳарзодаи ӯ иддао доранд, ки "ӯ ҳалок нашудааст".
"Зиннатулло дар соли 2020 шаҳрвандии Русияро гирифта буд. Барои як кор ба Озарбойҷон рафта, ба Русия бармегашт. Як духтари хурдсол дорад," -- гуфт хоҳарзодаи Зиннатулло Саъдуллоев.
Ҷустуҷӯи Радиои Озодӣ нишон дод, ки Зиннатулло Саъдуллоев моҳи феврали соли 2024 ҳамчун соҳибкори инфиродӣ дар идораи молиёт (андоз)-и Ёқутистони Русия сабтином шудааст. Кори ӯ “харидуфурӯши чакана тавассути почта ё тавассути шабакаи иттилоотию коммуникатсионӣ” таъин шудааст.
Мақомоти Тоҷикистон дар бораи ин ду зодаи Тоҷикистон шарҳе надодаанд. Радиои Озодӣ барои гирифтани шарҳ ба дафтари матбуоти Вазорати корҳои хориҷӣ муроҷиат карда, интизори посух аст. Татяна Москалкова, омбудсмени Русия, низ рӯзи панҷшанбе гуфт, дар миёни мусофирони ҳавопаймои суқуткарда шаҳрвандони Тоҷикистон ҳам буданд, вале тафсилот надод.
Ҳодиса чӣ хел рух дод?
Ҳавопаймои ширкати "Azerbaijan Airlines" рӯзи 25-уми декабр, ки аз Боку ба Грозний парвоз мекард, дар секилометрии Оқтау, дар ҷануби Қазоқистон нишасти изтирорӣ анҷом дод.
Канат Бозумбаев, муовини нахуствазири Қазоқистон, гуфтааст, аз 67 нафаре, ки дар дохили ҳавопаймо буданд, 38 нафар ба ҳалокат расида, 29 кас зинда монд. Аҳволи 11 мусофири зиндамонда вазнин гуфта мешавад.
Аз 67 мусофир ва ҳайати парвоз, 42 нафарашон шаҳрванди Озарбойҷон, 6 кас аз Қазоқистон, 3 нафар қирғизистонӣ ва 16 каси дигар табааи Русия будаанд.
Фарзияи расмии суқути ҳавопаймо феълан маълум нест ва таҳқиқ идома дорад. Бархӯрд бо селаи паррандаҳо, таркиши баллони кислород дар дохили ҳавопаймо ва мушкили фаннӣ аз сабабҳои эҳтимолии садама гуфта мешавад. Як фарзияи дигар ҳам ахиран расонаӣ шуд, ки ҳавопаймо шояд тавассути низоми дифои ҳавоии Русия зарба хӯрдааст.
Гумонзадҳо ба қатлҳои мармуз дар Конибодом кистанд?
Пайвандони баъзе аз гумонзадҳо ба қатлҳои мармуз дар шаҳри Конибодом мавқеи худро ба қазия баён карданд.
Додситонии кулли Тоҷикистон рӯзи 21-уми декабр хабар дод, ки Солеҳҷон Худойбердиев, Аҳадҷон Тӯхтаев, Манучеҳр Одилов ва Бахтиёр Равшановро бо иттиҳоми даст доштан дар кушторҳои пайиҳам дар Конибодом дастгир кард. Дар як моҳи охир дар ин минтақаи вилояти Суғд даҳ кас, аз ҷумла чор ноболиғ аз се оила кушта шуданд. Аз моҳи марти соли 2024 то ин дам теъдоди умумии кушташудаҳо зиёда аз бист кас ҳисоб шудааст.
Намояндагони Додситонии кул ба ҷуз нашри номи гумонбарон ҷузъиёт надоданд ва нагуфтанд, ки ин сокинони Конибодомро бо чӣ далел гумонбар медонанд. Инчунин, маълум нест, боздоштшудаҳо ба қатлҳои мармуз дар моҳи декабр гумонзад ҳастанд ё дар мавридҳои аз он пеш низ даст доранд.
Ҷустуҷӯйи хабарнигори Радиои Озодӣ ва суҳбат бо наздикони онҳо маълум кард, ки аз чор боздоштшуда се нафар қаблан бо иттиҳомҳои дигар, аз ҷумла бадахлоқӣ, зиндонӣ шудаанд. Вале пайвандонашон мегӯянд, ки онҳо ба кушторҳои пайиҳам дар Конибодом робита надоранд.
СОЛЕҲҶОН ХУДОЙБЕРДИЕВ
Хонаи Солеҳҷон Худойбердиеви 26-сола, яке аз дастгиршудаҳо, дар деҳаи Гулбоғи ҷамоати Фирӯзобаи шаҳри Конибодом ҷорйгир аст. Падараш чанд сол пеш бар асари тасодуфи нақлиётӣ фавтида, ӯ то замони боздошт ҳамроҳи модару бибияш мезист.
Рӯзи 23-юми декабр модараш дар хона набуд. Бибияш, Галиябону Аҳмадулинаи 75-соларо дар назди дарвоза ёфтем. "Каме ба бокс машғул шуда, баъд ба гурӯҳи дорбозҳо ҳамроҳ шуд. Боре ба деҳа дорбозҳо омаданд. Азбаски набераи ман боқувват буд, ӯро ба гурӯҳашон гирифтанд. Вай аз он кораш пули зиёд ба даст намеовард ва ба хӯрдану пӯшиданаш намерасид. Сипас ба шаҳр рафта, кор мекард. Як бор ба Русия ҳам рафта омад. Бештар бо кори саҳро машғул буд", -- гуфт ӯ.
Ба нақли Галиябону Аҳмадулина, гурӯҳе аз кормандони ҳифзи ҳуқуқ шаби 19-уми декабр Солеҳҷон Худойбердиевро аз хона гирифта бурдаанд.
"Он шаб духтарам гиря кард, ман гиря кардам, набераам тарсида буд. Се нафар дар назди ойина бо ходаҳои дароз истода, "Солеҳҷон баро, Солеҳҷон баро" гуфта, дод заданд. 5 ё 10 дақиқа аз хона набаромад. Ҳамаамон дод гуфта, дар назди дар истодем. Ман гуфтам, ки ойинаро нашиканед. Баъд дарро шикаста даромаданду набераамро гирифта рафтанд," – изофа кард Галиябону Аҳмадулина.
Ин зан гуфт, намояндагони мақомот се рӯз ҳавлии онҳоро тафтиш карда, "вале чизе наёфтаанд". Мегӯяд, дар шароити сангин зиндагӣ мекунанд ва наберааш "боре ҳам пули зиёд ё тилову ҷавоҳирот наовард". Мақомот дар ин бора шарҳ намедиҳанд. Ба ҷуз изҳороти Додситонии кул дар бораи боздошти ӯ маълумоти дигари расмӣ дастрас нест.
АҲАДҶОН ТӮХТАЕВ
Аҳадҷон Тӯхтаеви 27-сола низ сокини деҳаи Гулбоғ аст ва ҳамроҳи модараш мезист. Рӯзи 23-юми декабр дарвозаи ҳавлияшон қуфл зада буд. Назари пайвандони ӯ дар бораи боздошт шуданаш маълум нест. Бархе ҳамдеҳагонаш дар суҳбати бидуни микрофон гуфтанд, ки Аҳадҷон Тӯхтаев дар назди як қассоб кор меомӯхт ва аз ин ҳисоб рӯз мегузаронд.
МАНУЧЕҲР ОДИЛОВ
Пайвандони Манучеҳр Одилови 28-сола аз ҷамоати Раҷаб Ҳамробоеви шаҳри Конибодом омода нашуданд, ки дар назди дурбин гап зананд. Онҳо дар суҳбати бидуни микрофон гуфтанд, ки ӯ ҳамроҳи модараш ба савдои кӯчагӣ машғул буд.
Тибқи иттилои дарёфтӣ, Манучеҳр Одилов, Аҳадҷон Тӯхтаев ва Солеҳҷон Худойбердиев дар гузашта бо гуноҳи бадахлоқӣ боздошту зиндонӣ шуда, бо ҳамдигар шинос будаанд.
БАХТИЁР РАВШАНОВ
Ҳамсари Бахтиёр Равшанови 36-сола, боздоштшудаи дигар, мегӯяд, шавҳараш бо се нафари аввалӣ "робитаи кориву ҳамкорӣ надошт".
Зарнигор Баротова рӯзи 23-юми декабр гуфт: "Шавҳарам ба ин корҳо ҳамроҳ набуд. Ман бо боварии сад дарсадӣ мегӯям. Баъди ин ҳодисаҳо боре чорворо ба саҳро бурдем. Дидем, ки дар як тараф коғазҳо буд. Пурсидам, ки агар ҳамаи ин коғазҳо пул бошад, чӣ кор мекардед? Гуфтанд, онҳоро гирифта ба ятимхона медодам. Одаме, ки ҳамин хел дилу ният дорад, аз дасташ чунин кор меояд?"
Мақомот дар ин бора шарҳ намедиҳанд. Ба ҷуз изҳороти Додситонии кул маълумоти дигари расмӣ дар бораи Бахтиёр Равшанов ва боздоштшудаҳои дигар дастрас нест.
Бахтиёр Равшанов писархолаи Солеҳҷон Худойбердиев будааст. Ба гуфтаи пайвандонаш, ӯ кафшергар аст ва чанд сол боз дар сохтмонҳо дар Конибодом кор мекард. Пештар дар муҳоҷирати корӣ дар Русия низ будааст.
Хонаводаи Бахтиёр Равшанов дар деҳаи Санҷидзори Конибодом зиндагӣ мекунанд. Дар ҳоле ки маълум нест, мақомот ӯро ба кадом кушторҳо айбдор медонанд, баъд аз қатли аъзои ду оила дар ин деҳа дар тобистони имсол ӯ 5 рӯз боздошт ва сипас раҳо карда шудааст.
Аз моҳи марти соли 2024 то ин дам дар Конибодом зиёда аз бист нафар дар шароити мармуз кушта шуда, мардуми минтақаро сахт нигарон кард. Додгоҳи олии Тоҷикистон ва Додгоҳи вилояти Суғд дар моҳи декабр ду нафарро дар пайванд ба кушторҳо дар Конибодом зиндонӣ карданд, аммо наздиконашон норозиянд. Гузашта аз ин, сокинони баъзе аз деҳаҳо мегӯянд, ки ҳанӯз пурра ором нестанд. Онҳо шабона гулхан афрӯхта, навбатдорӣ ва хонаву дару оилаашонро муҳофизат мекунанд.
Видеоро дар инҷо бинед:
"Ба бачаҳоям нарасед." Баъзе ҷузъиёти қатли як зану шавҳар дар Конибодом
Бо гузашти се рӯз аз ду мавриди нави куштор дар шаҳри Конибодом, фарзияҳои расмӣ дар бораи ҳодиса ва изи гумонбарон эълон нашудааст.
Шаби 15 ба 16-уми декабр дар деҳаи Ҳисорак (Қӯрғонча)-и ҳамин шаҳр чор нафар аз ду оила ба таври шубҳабарангез ба ҳалокат расиданд. Як ҳафта аз он пеш шаш узви як оиларо дар Шӯробқалъаи Конибодом кушта дарёфтанд. Ангезаи ин кушторҳо чист?
"Фикр мекунам, онҳоро барои пулу чиз куштаанд"
"Духтараш нақл кард, ки охирин гапи модараш "ба мо расидед, илтимос, ба се бачаам нарасед, баромада равед" будааст," – гуфт Назира, ҳамсояи Ғайбулло ва Зарнигор Маҷидовҳо, ки шаби 15 ба 16-уми декабр ба таври мармуз ҷон бохтаанд.
Дар ин ҳодиса се фарзанди онҳо ҷон ба саломат бурда, ончиро, ки дидаанд, ба сокинону мақомот гуфтаанд. Духтари калонии онҳо 7-сола, хурдиаш 1,5 сола аст. Ба гуфтаи онҳо, волидонашон бо ҳамлагарон даргир шуда, муқовимат кардаанд, вале ба ҳалокат расидаанд.
Назира, сокини деҳаи Ҳисораки Конибодом, гуфт: "Онҳо ду кас будаанд. Маска (ниқоб)-и сиёҳ доштаанд. Духтараш нақл кард, ки "модарам тилою пуламонро дар байни хона партофтанд. Баъд ба дасти модарам либосовезак пайдо шуду бо он ҳардуи мардро заданд."
Пайвандони оилаи Маҷидовҳо мегӯянд, Ғайбулло Маҷидови 35-сола ва Зарнигор Маҷидоваи 28-сола “зану шавҳари меҳрубон буданд” ва бо аҳли деҳа “муносибати хуб доштанд”. Ғайбулло Маҷидов соҳибкор буда, зиндагии миёнҳолона доштааст. Чанд сол пеш иморати нав сохта, дар канори деҳаи Ҳисораки шаҳри Конибодом ҳамроҳи оилааш мустақилона мезист.
Турсуной Шерматова, холаи Ғайбулло Маҷидов, мегӯяд, “фикр мекунам, онҳоро барои пулу чиз куштаанд. Хайр, пулу чизашро гирифтанд, худашонро чаро куштанд? Онҳоро ягон модар зоидааст ё ягон ваҳшӣ ҳастанд? Ман барои ҳамин ҳайрон мешавам”.
Дар дурии тақрибан 500 метр аз ҳавлии оилаи Маҷидовҳо дар он шаб ду узви оилаи Шокировҳо низ ба қатл расидаанд. Ойиша Шокироваи 70-сола нафақахӯр буда, Ҷавлон Шокирови 44-сола ба муҳоҷирати меҳнатӣ мерафтааст. Дар рӯзи сабти ин гузориш дар хонаи онҳо ба ҷуз аз муфаттишон пайвандону наздиконаш набуданд ва ҷузъиёти марги модару фарзанд маълум нест.
Деҳаи Ҳисорак (собиқ Қӯрғонча) як рустои хурде дар наздикии маркази шаҳри Конибодом аст.
Видеоро дар ин ҷо бинед:
Мақомот чӣ гуфтанд?
Мақомот то ин лаҳза дар бораи ин ҳодиса ҳеч шарҳе намедиҳанд. Радиои Озодӣ барои гирифтани шарҳи ҳодиса ба шаҳрдории Конибодом ва Дафтари матбуоти Вазорати корҳои дохилии Тоҷикистон муроҷиат кард, вале посухе нагирифт.
Раиси вилояти Суғд рӯзи 16-уми декабр ба куштори чанд оила дар шаҳри Конибодом вокуниш карда, гуфтааст, барои пайдо кардани омилони ин кушторҳо, "беҳтарин муфаттишону коршиносон аз тамоми мақомоти ҳифзи ҳуқуқу тартибот сарҷамъ омада", барои "дар мӯҳлатҳои кутоҳтарин пайдо намудани ҷинояткорон" талош доранд.
Дар хабарномаи расмӣ омадааст, ки дар Конибодом ситод ва навбатдорони ихтиёрӣ ташкил шуда, дар кӯчаҳо дурбинҳои назоратӣ гузошта мешавад. Вале дафтари матбуоти Раиси вилояти Суғд дар бораи шумораи қурбониёни кушторҳои охир дар Конибодом ва инки чаро гунаҳкорон пайдо нашудаанд, чизе нагуфтааст.
Баъд аз моҳи марти имсол дар бораи кушта шудани аъзои дастикам ҳашт оила дар шаҳри Конибодом гузориш расид. Ангезаи кушторҳо норӯшан монда, омилон боздошт нашудаанд. Маълум нест, ин ҳодисаҳо ҳалқаҳои як занҷиранд ё аз ҳам ҷудо, дуздию ғоратгариянд ё ваҳшатангезӣ.
Дар шаҳри Конибодом боз чор касро куштаанд
Шаби 15-уми декабр дар шаҳри Конибодом чор каси дигар кушта шудаанд. Инҳо аъзои ду оила ҳастанд. Ҳодиса дар деҳаи Ҳисорак (собиқ Қурғонча) рух додааст.
Як манбаи Радиои Озодӣ дар мақомот ва ҳам сокинон гуфтанд, ду нафар аз кушташудаҳо зану шавҳар ва ду каси дигар модару писар буданд.
Тибқи иттилои дарёфтӣ, Ғайбулло Маҷидови 35-сола ва ҳамсараш Зарнигори 28-сола будаанд. “Аз инҳо се фарзанд ятим монд, шаби ҳодиса онҳоро накуштаанд,”-афзуд манбаи Озодӣ.
Ба гуфтаи манобеи Озодӣ, афроди номаълум шаби гузашта Ойиша Шокирова 70-сола ва писари 44-солааш Ҷавлон Шокировро ҳам ба қатл расониданд.
Мақомот то ин лаҳза дар бораи ин ҳодиса ҳеч шарҳе намедиҳанд. Радиои Озодӣ барои гирифтани шарҳи расмии ҳодиса ба шаҳрдории Конибодом ва Дафтари матбуоти Вазорати корҳои дохилии Тоҷикистон муроҷиат кард. Абдусалом Тухтасунзода, раиси шаҳри Конибодом баъди шунидани суоли мо, бо зикри инки "маҷлис дорам" гӯширо гузошт. Сухангӯи Вазорати корҳои дохилӣ ба зангҳои батакрори мо посух надод.
Деҳаи Ҳисорак ё собиқ Қурғонча, як деҳаи хурде дар наздикии маркази шаҳри Конибодом аст.
Баъд аз моҳи марти имсол, дар бораи кушта шудани аъзои дастикам ҳашт оила дар шаҳри Конибодом гузориш расид. Ангезаи кушторҳо норӯшан монда, омилон боздошт нашудаанд. Маълум нест, ин ҳодисаҳо ҳалқаҳои як занҷиранд ё аз ҳам ҷудо, дуздию ғоратгариянд ё ваҳшатангезӣ.
Додгоҳҳои Тоҷикистон то ин дам ду касро барои даст доштан дар қатлҳои мармузи Конибодом ба ҳабс маҳкум кард. Марат Сатторов ба ҳабси абад ва Шарифҷон Ашӯров ба 20 сол зиндон маҳкум шуд. Наздикони Шарифҷон Ашӯров ба бегуноҳии ӯ пойфишорӣ доранд. Пайвандони бархе аз кушташудаҳо ҳам мегӯянд, агар инҳо қотилони асосӣ бошанд, пас чаро куштори оилаҳо дар Конибодом то ҳол давом дорад?
20 сол зиндон. Ҳукми сокини дигари Конибодом бо гуноҳи куштани ду кас
Баъд аз ҳабси абади як сокини Конибодом, ки омили қатли ду оила дониста шуд, Додгоҳи вилояти Суғд сокини дигари ин шаҳрро қотили аъзои хонаводаи дигаре номид.
Ҳукми Шарифҷон Ашӯров рӯзи 12-уми декабр дар Додгоҳи вилояти Суғд эълон шуд. Додрас ӯро ба куштани бародараш Музаффар Урмонов ва ҳамсари ӯ, Иноят Урмонова, айбдор донист ва ба 20 сол зиндон маҳкум кард.
Ҳарду тарафи қазия ҳукмро ноодилона ва бедалел мешуморанд. Дар оғоз додситон ба маҳкумшуда ҳабси абад талаб карда буд, аммо Шарифҷон Ашӯров дар сухани охирин худро бегуноҳ донист.
Дилдора Ғиёсова, духтари Шарифҷон Ашӯров, рӯзи 12-уми декабр ба Радиои Озодӣ гуфт: “Ту куштӣ гуфтанд. Падарам ин корро накардаанд. Одамоне ҳастанд, ки ҳодисаро дидаанд. Ҳоло ҳақиқат мебарояд. Падарам ба синни 68 расиданд. Гапро дуруст намефаҳманд. Гуфтанд, ки кушторро ман накардам. Он касро маҷбур кардаанд, ки баёнот диҳанд. Халта пӯшонда, скоч (ширеш) карда, задаанд.”
Куштори зану шавҳари тақрибан 70-сола шаби 16 ба 17-уми апрели 2024 дар деҳаи Сайҳуни шаҳри Конибодом рух додааст. Мақомоти интизомӣ баъзе аз хешовандонро, ба гуфтаи худашон, борҳо бозпурсӣ ва якеро дастгир карданд.
Пайвандон мегӯянд, зери фишору шиканҷа баёнот додаанд ва биноан хоҳони таҳқиқи дубора ва одилона ҳастанд. Шарифа Холматова, хоҳари Шарифҷон Ашӯров, қаблан дар суҳбаташ бо Радиои Озодӣ чунин гуфта буд: “Маро заданд, дод гуфтам. Шояд акоям (Шарифҷон Ашӯров) инро шунида, раҳмашон омад ва иттиҳомро ба гардан гирифтанд. Туҳмат кардам, бахти акоямро сиёҳ кардам.”
“Ба ман гуфтанд, ин корро шавҳарат кардаасту ба гардан гирифт, чаро ту намегирӣ? Шавҳарамро дидам, нишаста наметавонистанд. Ба ман гуфтанд, рав як куртаамро гиру тасдиқ кун, ки дастонаш хун буд ва ман онро тоза кардам. 44 сол боз зиндагӣ дорем. Гуфтани ин гапи дурӯғро виҷдонам намебардорад,” – нақл карда Дилором Ашӯрова, ҳамсари Шарифҷон Ашӯров.
Ашӯрова мегӯяд, шаби ҳодиса шамол буду ҳамроҳи шавҳараш дар хона нишаста буданд. Пайвандони дигари оила ҳам ба даст доштани онҳо дар ҳодиса шубҳа доранд, чун аз хонаи кушташудаҳо молу дороии зиёде рабуда шудааст.
Музаффар Урмонов ва Шарифҷон Ашӯров дар ҳамсоягӣ зиста, дар Хоҷагии деҳқонии Комилҷон Султонови деҳаашон мироб буданд. Вай ба номи падараш насаб гирифта, бародарону хоҳаронаш насаби Ашӯров доранд. Шеваи таҳқиқи куштори Музаффар Урмонов ва ҳамсараш, Иноят Урмонова, дар деҳаи Сайҳуни шаҳри Конибодом наздиконашонро нигарон кардааст.
Гузашта аз ин, ангезаи куштор маълум нест. Ба гуфтаи наздикон, мақомот ҳодисаро “заминаи бадбинӣ” номидаанд. Хайрулло Урмонов, писари Музаффар Урмонов, мегӯяд, “рости гап, бо амакам дар як ҷо зиндагӣ мекунем. Ҳамроҳи бачаҳояшон бозӣ карда, калон шудем. Ягон бор даъвои падару модарамро бо амакам нашунидаам”.
Пайвандони ин ду оила дар Конибодом аз мақомот хоста буданд, ки ҳодисаҳоро мӯшикофона таҳқиқ карда, гунаҳкоронро ёбанд ва ҷазо диҳанд. Вале бо ин муроҷиатҳо аз ҳукми тӯлонӣ гирифтани Шарифҷон Ашӯров дар ҳайратанд. Ҳамакнун азм доранд, аз рӯйи ин ҳукм ба зинаҳои болоӣ шикоят баранд.
Видеоро дар инҷо бинед:
Дар як соли охир дар бораи кушта шудани аъзои дастикам шаш оила дар шаҳри Конибодом гузориш расид. Охиринаш аввали моҳи декабр рух дод. Ангезаи кушторҳо норӯшан монда, омилон боздошт нашудаанд. Маълум нест, ин ҳодисаҳо ҳалқаҳои як занҷиранд ё аз ҳам ҷудо, дуздию ғоратгариянд ё ваҳшатангезӣ.
Барои қатли ду оила дар Конибодом як нафар ба ҳабси абад маҳкум шуд
Додгоҳи олии Тоҷикистон як сокини шаҳри Конибодомро бо гуноҳи қатли аъзои ду хонавода ба ҳабси абад маҳкум кардааст.
Тибқи иттилои дарёфтии Радиои Озодӣ, Марат Сатторов посбони мактаби деҳаи Санҷидзори Конибодом буд. Назари худаш ва пайвандонаш ба ҳукм маълум нест. Пайвандони баъзе аз кушташудаҳо ба қотили ҳақиқӣ ё ба камияш ягона будани ӯ шубҳа доранд.
"Гоҳ мегуфт, ки ӯ куштааст, гоҳи дигар мегуфт, накуштааст"
Ҳукми Коллегияи ҳарбии Додгоҳи олии Тоҷикистон дар охири моҳи ноябр содир шуда, Радиои Озодӣ танҳо 12-уми декабр тасдиқи хабарро ба даст овард. Ба иттилои дарёфтӣ, парвандаи Марат Сатторовро яке аз додрасҳои Коллегияи ҳарбии Додгоҳи олӣ баррасӣ кардааст. Мурофиа моҳи ноябр дар бинои Додгоҳи вилояти Суғд гузашт. На тафтишот ва на додгоҳ ангезаҳои қатлҳоро номбар намекунанд.
Рӯзи 12-уми декабр дар Додгоҳи олии Тоҷикистон гуфтанд, бо сабаби қувваи қонунӣ нагирифтан, феълан ҳукмро шарҳ дода наметавонанд.
Яке аз сокинони деҳаи Санҷидзор, ки ҳамсар ва ду фарзандаш охири моҳи майи имсол кушта шудаанд, ба Радиои Озодӣ гуфт, наздикони кушташудаҳо дар мурофиаи Марат Сатторов ширкат доштанд.
“Сатторови 42-сола дар мурофиа гоҳ мегуфт, ки кушторро ӯ кардааст, гоҳ мегуфт, ки накардааст. Ба ғайр аз гуноҳи куштани шаш кас, дар парвандаи Сатторов чанд иттиҳоми дигар буд. Мо аз ҳукм шикоят надорем, аммо дар диламон шубҳа аст. Бинед баъди боздошти Марат Сатторов боз ҳам чанд оиларо дар Конибодом куштанд. Ростӣ гап шубҳа дорем, ки ҳамин кас қотили асосӣ бошад,” - афзуд ин ҳамсуҳбати мо.
Кӯшишҳои Радиои Озодӣ барои суҳбат бо вакили дифоъ ва наздикони Марат Сатторов то ин дам бенатиҷа буд. Ба гуфтаи чанд сокини деҳаи Санҷидзор, Сатторов моҳи июл дастгир шуда буд.
Рӯзи 31-уми июли имсол Абдусалом Тухтасунзода, раиси шаҳри Конибодом, ҳам дар бораи боздошти як гумонзад дар куштори чанд сокини Санҷидзор хабар дод. Аммо ӯ ва намояндагони дигари мақомот ҳеч шарҳе намедиҳанд.
Кушторҳои пайиҳам
Моҳи майи имсол дар деҳаи Санҷидзор аз ду оила (яке тоҷик ва дигаре қирғизтабор) шаш кас кушта шуданд. Се кушташуда Маҳбуба Аҳмадоваи 38-сола, Нозанин Аҳмадоваи 17-сола ва Дамир Аҳмадови 14-сола буданд. Аз аъзои кушташудаи оилаи қирғизтабор Зулайхо Иброҳимоваи 54-сола, додараш Абдуфаттоҳ Иброҳимови 47-сола ва Қурбонгул Иброҳимоваи 46-сола ном бурданд.
Баъди моҳи май ҳадди ақал шаш куштори мармуз ё норӯшан дар шаҳри Конибодом расонаӣ шуд. Намунаи охираш қатли шаш узви як хонавода дар деҳаи Шӯробқалъаи Конибодом аст, ки шаби 8-уми декабр рух дод. Падари хонавода Наимҷон Неъматов 37-сола, ҳамсараш 33 сола ва фарзандонаш аз 2 то 13-сола буданд.
Ангезаи ин кушторҳо маълум нест. Наздикони баъзе аз қурбониён, аз ҷумла, пайвандони Муҳиддин Шарифов, гуфтанд, ки баъди ҳодиса аз хонаи онҳо як пулу тило гум шудааст. Бино ба хабарҳои нашршуда дар шабакаҳои иҷтимоӣ, шаби 28 ба 29-уми март Муҳиддин Шарифови 65-сола гуё ҳамсараш Марям Шарифоваи 60-сола, Фирӯза Шарифова, набераҳояш Абубакр Шарифов ва Азиза Кабирзодаро кушта, сипас худашро ба дор овехтааст. Фарзандонаш, ки он замон дар Русия буданд, мегӯянд, ба ин фарзия бовар надоранд.
Масъулони мақомоти маҳаллӣ мегӯянд, қисме аз чунин ҳодисаҳо ба ҷанҷолҳои хонаводагӣ рабт доштанд ва таҳқиқи дигар ҳодисаҳо идома дорад. Дар як маврид аз даст доштани як нафар ё гурӯҳи беруна суҳбат шуда буд.
Кушторҳои норӯшан дар Конибодом нигаронии сокинонро ба миён овардааст ва корбарони шабакаҳои иҷтимоӣ талаб карданд, ки мақомот гунаҳкоронро пайдо кунанд. Мақомот, аз ҷумла шаҳрдори Конибодом талош карданд сокинонро ором созанд ва гуфтанд, ин кушторҳо ба ҳам пайванд надоранд. Дар гузашта чунин парвандаҳо боиси баёнияҳои мақомот мешуд ва онҳоро президенти кишвар ё вазири корҳои дохилӣ таҳти назар мегирифтанд. Дар мавриди қатлҳои Конибодом то ҳол касе аз мансабдорони баландпояи Тоҷикистон изҳороте надодааст.
"Ҷасадҳоро ба ташхис бурданд." Марги мармузи 6 узви як оила дар Конибодом
Дар шаҳри Конибодоми вилояти Суғд марги мармузи шаш узви як хонадон аз деҳаи Шӯробқалъа (Шӯрқӯрғон)-ро таҳқиқ доранд. Ин ҳодиса шаби 8-уми декабр рӯй додааст.
Мақомот шарҳ надоданд. Чанд ҳамсуҳбати огоҳи Радиои Озодӣ рӯзи 9-уми декабр гуфтанд, ки ҷасади падару модар ва чор фарзанди онҳо дар рӯйи ҳавлии хонаашон пайдо шуд.
Онҳо:
- Наимҷон Неъматови 37-сола,
- Нафиса Неъматоваи 33-сола,
- Амина Неъматоваи 13-сола,
- Фотима Неъматоваи 10-сола,
- Зӯҳро Неъматоваи 10-сола,
- Муҳаммадюсуф Неъматови 2-сола ҳастанд.
Дар ҳоле ки мақомот дар ин бора маълумот намедиҳанд, чанд манбаи Радиои Озодӣ гуфтанд, ки зоҳиран аъзои ин хонавода кушта шудаанд. Сабабу омилаш маълум нест.
Пайвандони Неъматовҳо дар деҳаи Шӯробқалъаи Конибодом рӯзи 9-уми декабр ба хабарнигори Радиои Озодӣ гуфтанд, ки "мақомот ҷасадҳоро ба муоина бурданд". Онҳо низ тафсилот надоданд.
Дар ҷойи ҳодиса гурӯҳи таҳқиқотии Вазорати корҳои дохилӣ пайи муайян кардани сабаби ҳодиса буд, аммо намояндагонаш омода нашуданд, ки дар ин бора шарҳ диҳанд.
Куштори аъзои ин оила дар ҳолест, ки шаҳри Конибодом бештар аз як сол боз бо чунин ҳодисаҳо сархати расонаву шабакаҳои иҷтимоӣ гардидааст. Дастикам чанд аъзои шаш оила дар ин минтақа бо аломатҳои қасдан ба ҳалокат расондан ёфт шудаанд.
Масъулони мақомоти маҳаллӣ мегӯянд, қисме аз чунин ҳодисаҳо ба ҷанҷолҳои хонаводагӣ рабт доштанд ва таҳқиқи дигар ҳодисаҳо идома дорад. Дар як маврид аз даст доштани як нафар ё гурӯҳи беруна суҳбат шуда буд.
Шаби 16 ба 17-уми апрели соли 2024 дар ҷамоати Ғафурҷон Ортиқови шаҳри Конибодом як зану шавҳар дар хонаашон кушта шуданд. Мақомоти корҳои дохилӣ гуфтанд, ки дар ҷасади Музаффар Урмонов ва Иноят Урмонова нишонаҳои марги маҷбуриро диданд.
Шаби 28 ба 29-уми майи 2024 шаш узви ду оила дар деҳаи Санҷидзори шаҳри Конибодом кушта шуданд. Як оила тоҷик ва хонаводаи дигар қирғиз. Оилаи тоҷик аз модар ва ду фарзанд иборат буд: Маҳбуба Аҳмедоваи 38-сола, Нозанин Аҳмедоваи 17-сола ва Дамир Аҳмедови 14-сола. Пайвандонашон гуфта буданд, ки дар бадани онҳо аломати куштори маҷбуриро диданд. Зулхо Иброҳимоваи 54-сола, додараш Абдуфаттоҳ Иброҳимови 47-сола ва Қурбонгул Иброҳимоваи 46-сола аз оилаи қирғизтабор буданд. Дар шаби ҳодиса се кӯдаки Абдуфаттоҳ Иброҳимов ва Қурбонгул Иброҳимова низ ҳамроҳашон буда, зинда мондаанд.
Ин вазъ бисёре аз хонаводаҳо ва пайвандони онҳоро, ки дар муҳоҷирати корӣ дар Русия ва кишварҳои дигар қарор доранд, нигарон кард. Абдусалом Тухтасунзода, раиси шаҳри Конибодом, моҳи июл аз боздошти як гумонзад дар куштори чанд сокини Санҷидзор хабар дод, вале ҷузъиёти парванда ва муҳокимааш ошкор нашуд.
Гузориши видеоиро дар ин ҷо бинед:
Як ҳавопаймои бесарнишин дар наздикии Душанбе афтодааст
Як паҳпод (дрон)-и калонҳаҷм, ки бештар ба ҳавопаймоҳои бесарнишини низомӣ шабоҳат дорад, дар шаҳраки Шарораи Ҳисор афтодааст. Ин минтақа дар панҷкилометрии шаҳри Душанбе ҷойгир аст.
Ҳодиса рӯзи 3-юми декабр дар кӯчаи ба номи Карим Девонаи шаҳраки Шарора, дар наздикии минтақаи аҳолинишин, рӯй дод.
Сокинони маҳаллӣ дар суҳбат бо Радиои Озодӣ гуфтанд, "ягон кас ва ягон хона зарар надид".
Ба нақли онҳо, ҳавопаймо ба симчӯби барқ бархӯрда, ба замин задааст.
Дар наворҳое, ки дастраси Радиои Озодӣ шуд, алангаи оташ дар ҷойи ҳодиса намоён аст.
Маъмурони пулису низомиён гирди ҷойи ҳодисаро ҳалқа гирифтаанд.
Нозирони роҳ дар шаҳраки Шарораи Ҳисор тасдиқ карданд, ки "дар фосилаи тақрибан 1 ё 2 километр як паҳпод суқут кардааст ва онро бор мекунанд".
Мақомоти Тоҷикистон ба таври расмӣ ҳодисаро шарҳ намедиҳанд.
Фурудгоҳи низомии Айнӣ дар канори шаҳри Душанбе ва дар ихтиёри Вазорати дифои Тоҷикистон аст. Радиои Озодӣ рӯзи 3-юми барои гирифтани шарҳи расмӣ ба дафтари матбуоти вазорат муроҷиат кард, аммо то ин лаҳза посух нагирифт.
Оташи таниш домани Башор Асадро ҳам гирифт. Дар бораи гурӯҳҳо чӣ медонем?
Оташи танишҳои минтақаӣ дар Ховари Миёна домани Башор Асадро ҳам гирифт.
Дар ҳоле ки ҳукумати Сурия дар бештар аз як соли охир талош карда буд, худро аз даргириҳои Ғазза ва Лубнон дур нигаҳ дорад, пас аз барқарории оташбас миёни “Ҳизбулоҳ” ва Исроил, гурӯҳҳои мухолифи ҳукумати Башор Асад худро зуд ба Ҳалаб расонданд. Ин гурӯҳҳо, ки дар миёнашон ҷангҷӯёни тоҷику узбек ҳам ҳастанд, чӣ собиқа доранд ва идеологияашон чист?
Саид Ҷаъфарӣ, Радиои Фардо
“Таҳрир аш-Шом”
Ин гурӯҳ дар аввал ба унвони “Ҷабҳат-ун-нусра” шинохта мешуд. Шохае аз гурӯҳи “Ал-Қоида” дар Сурия. “Ҷабҳат-ун-нусра” дар соли 2012 дар ҷанги дохилӣ дар Сурия нақши муҳим ва пурранг дошт. Баъд аз сар задани ихтилофҳо, ба шохаҳо ҷудо шуд.
Гурӯҳи нави “Таҳрир аш-Шом” соли 2016 зуҳур кард. Раҳбараш Абумуҳаммад Ҷулонист. Ин гурӯҳи ҷадид иртиботи худро бо “Ал-Қоида” қатъ ва таъкид кард, ки дигар нисбате ба он надорад. Амрико дар соли 2018 “Таҳрир аш-Шом”-ро ба унвони созмони террористӣ муаррифӣ кард. Кишварҳои зиёде низ ин гурӯҳро террористӣ медонанд.
Рӯйкард ё равиши “Таҳрир аш-Шом” ҳамчунон салафӣ аст. Эътиқоди идеологӣ дар раҳбарони он, аз ҷумла раҳбари асосии он Абумуҳаммад Ҷулонӣ, ки қаблан ба унвони фармондеҳи "Ҷабҳат-ан-Нусра" маъруф буд, мушоҳида мешавад. Бо ДОИШ, ки дар шарқи Сурия ҳузур дорад, тафовут дорад. Ин ду дар гузашта ҳатто бо якдигар вориди даргирӣ шудаанд. Аз он ҷо ки “Таҳрир аш-Шом” муддате назорати Идлибро дар ихтиёр дошт, навъи ҳукуматдории онро метавон бештар шабеҳи “Толибон” донист.
“Таҳрир аш-Шом” раҳбари ҳамлаи охир дар Сурия аст, аммо дигар гурӯҳҳои мухолифи ҳукумати Башор Асадро гирдиҳам овардааст, то якҷоя минтақаҳои бештаре аз хоки Сурияро таҳти тасаллути худ дароваранд.
“Артиши озоди Сурия”
Бархилофи гурӯҳҳои исломгаро, “Артиши озоди Сурия” аз фармондеҳони пешини артиш таркиб ёфтааст. Онҳо дар ибтидо рӯйкарди миллӣ доштанд, вале дертар ба “Ихвон-ул-муслимин” гароиш пайдо карданд.
Ин гурӯҳ аз аввали ҷанги дохилӣ дар Сурия мавриди кишварҳои ғарбӣ қарор дошт. Пештар дар манотиқи мухталифе аз Сурия фаъол буд, ҳоло ҳузураш дар гӯшаҳои зери назорати Туркия дар шимоли Сурия маҳдуд аст.
Чаро ҳоло?
Пешравии гурӯҳҳои ситезаҷӯ билофосила пас аз он сурат гирифт, ки оташбаси миёни “Ҳизбуллоҳ”-и Лубнон ва Исроил ниҳоӣ шуд.
“Ҳизбуллоҳ” ва гурӯҳҳои зери назари Эрон, ба монанди “Лашкари фотимиюн”, солҳои охир дар ҷилавгирӣ аз пешравии гурӯҳҳои мухолифи Башор Асад нақши муҳим доштанд. Тайи моҳҳои охир бахши қобили таваҷҷуҳе аз тамаркузи нерӯҳои ниёбатӣ мутаваҷҷеҳи ҷабҳаи Лубнон аст.
Аз сӯйи дигар, аз кор уфтодани амалиёти мавсум ба “меҳвари муқовимат” боис шуд, то ҳамоҳангии ин гурӯҳҳо барои ҷилавгирӣ аз пешравии нерӯҳои мухолифи Сурия бо душвории бештаре рӯ ба рӯ шавад. Артиши Исроил ҳафтаҳои охир марзи Лубнон ва Сурияро бо ҳадафи қатъи иртиботи миёни “Ҳизбуллоҳ” ва гурӯҳҳои вобаста ба Ҷумҳурии Исломӣ бомбаборон кард.
Албатта, дар тӯли чанд моҳи охир таҳаррукоте аз сӯйи гурӯҳҳои мухолифи Башор Асад барои анҷоми амалиёт ва пешравӣ мушоҳида шуда буд, аммо ҳаракати аслӣ пас аз барқарории оташбас миёни “Ҳизбуллоҳ” ва Исроил сурат гирифт.
Равиши Русия чист?
Туркия дар соли 2019 бо номи амалиёти "Чашмаи сулҳ" ба Ҳалаб ҳамла кард. Ҳадафаш дур кардани гурӯҳҳои курд ва эҷоди як минтақаи ҳоил ё буферӣ дар наздикии марзии Сурия бо Туркия буд, то ба гуфтаи Анкара аз ин тариқ битавонад суриҳоро дар онҷо паноҳ диҳад.
Он ҳамла, ки бо танқидҳои густурдаи байнулмилалӣ ҳамроҳ буд, сабаб шуд, дар ниҳоят бо миёнравии Русия созиши хатми ҷанг ҳосил шавад. Ва минтақаи ҳоил дар марзи Сурия ва Туркия эҷод шуда, нерӯҳои Русия дар канори Ҳалаб ҷой гирифтанд.
Ҳамлаи охири ситезаҷӯён ба минтақае сурат гирифт, ки нерӯҳои русӣ ҳам дар онҷо ҳузур доранд, аммо Маскав дар тӯли моҳҳои охир дар қиболи ин таҳаррукот иқдоми хосе анҷом надодааст. Сиёсате, ки метавонад аз даргириҳои муҳимтари Маскав дар Украина ва ё шояд созиши паси пардаи Владимир Путин бо Раҷаб Таййиб Эрдуғон ҳикоят дошта бошад.
Манфиатҳои Туркия
Туркия аз ибтидои ҷанги дохилӣ дар Сурия талош кардааси, ки бо ҳузури густурдатари худ ва нерӯҳои вобаста ба ин кишвар, зимни афзоиши нуфузи минтақаияш, суст кардани гурӯҳҳои курдро чи дар хоки Сурия ва чи дар хоки худаш пеш барад.
Ҳукумати Эрдуғон дар солҳои ҷанги дохилии Сурия ҳамчунин ошкоро хоҳони канор рафтани Башор Асад аз қудрат буд ва аз гурӯҳҳои гуногуни ситезаҷӯ дар ин кишвар ҳимоят мекард.
Вазъияти Эрон
Яке аз марказҳое, ки нерӯҳои низомии Эрон дар Сурия ҳузури фаъол доранд, шаҳри Ҳалаб аст. Дувумин шаҳри бузурги Сурия, ки барои Ҷумҳурии Исломӣ арзиши роҳбурдӣ дорад, то ба воситаи он битавонад масири интиқоли аслиҳаро ба “Ҳизбуллоҳ”-и Лубнон такмил кунад.
Бо ин ҳол, дар ҳафтаҳои охир тамаркузи гурӯҳҳои ниёбатии вобаста ба Эрон беш аз ҳама мутаваҷҷеҳи даргирҳои “Ҳизбуллоҳ”-и Лубнон бо Исроил буд. Дар натиҷа, онҳо фурсати чандоне барои муқобила бо таҳдиди гурӯҳҳои шӯришӣ дар Сурия пайдо накарданд.
Бо зарбаҳое, ки гурӯҳҳои ниманизомии вобаста ба Ҷумҳурии Исломӣ дар тӯли беш аз як соли охир дидаанд, метавон интизор дошт, ки авзоъ барои ҳукумати Эрон дар Сурия низ бадтар шавад.
Манобеъ: "Боим" дар Туркия дастгир ва ба Тоҷикистон оварда шудааст
Иброҳим Сафаров, машҳур бо лақаби “Боим”, сокини 53-солаи шаҳри Душанбе, ки номаш борҳо бо фурӯшу интиқоли маводи мухаддир расонаӣ шудааст, дар Туркия боздошт ва ба Тоҷикистон истирдод шудааст.
Ду манбаи Радиои Озодӣ дар мақомоти тафтишотӣ рӯзи 1-уми декабр гуфтанд, ки Иброҳим Сафаров дар аввали моҳи октябр аз Истанбул ба Душанбе оварда шуд.
“Ӯ ба таъсиси шабакаи фурӯши ҳабҳои экстазӣ” ва “нигаҳдории силоҳ айбдор мешавад,” – афзуд як манбаъ.
Наздикони Иброҳим Сафаров боздошту истирдоди ӯро на тасдиқ ва на рад карданд.
Дар гузашта низ исми Иброҳим Сафаров бештар бо интиқолу фурӯши миқдори бузурги маводи мухаддир расонаӣ шуда буд.
Расонаҳои русӣ аз ӯ “Пабло Эскобари Тоҷик” ном мебурданд. Ӯ соли 2006 дар Русия бо беш аз 200 кило ҳероин боздошт ва ба 19 сол зиндон маҳкум шуда буд. Соли 2020 дар саҳифааш дар Фейсбук хабар дод, ки озод шудааст. Маълум нест, ки Иброҳим Сафаров таҳти чӣ шароит пеш аз муҳлат аз зиндон раҳо шудааст.
“Ӯ пас аз озод шудан ба Туркия рафт ва аз он ҷо як шабакаи фурӯши маводи мухаддир дар Тоҷикистонро ба роҳ монд. Ҳудуди даҳ узви гурӯҳи ӯ боздошт шуданд ва худаш дар ҷустуҷӯ буд,” –гуфт яке аз манбаъҳои Радиои Озодӣ, ки нахост номаш фош шавад.
Вазорати корҳои дохилии Тоҷикистон дар моҳи июли имсол Комрон Ҳамроев, сокини 28-солаи шаҳри Душанберо бо гумони фурӯши “ҳабҳои экстазӣ” боздошт кард.
Мақомот дар хабарномае гуфтанд, ки Комрон Ҳамроев аз наздикони “Боим” буда, бо дастури ӯ дар Душанбе маводи мухаддир мефурӯхт.
“Ҳамроев Комрон таҳти роҳбарии хешовандаш Сафаров Иброҳим, бо тахаллуси Боим, ки пеш барои кочоқи маводи мухаддир суд шуда, ҳоло дар хориҷи кишвар қарор дорад, ба ин кирдори ҷиноятӣ машғул буд,” -- гуфта шудааст дар хабарномаи ВКД.
ВКД гуфта буд, ки гурӯҳи “Боим” аз тариқи шабакаҳои иҷтимоӣ ва бо истифода аз васоили пешрафта ин корро анҷом медод.
Иброҳим Сафаров солҳои 2000-ум дар Тоҷикистон чеҳраи маъруф буд. Ӯ дар баргузории консерт ва таҳияи суруд ба сарояндагон мадад мекард.
Мақомот ба тахриби ду бинои навсохт дар Душанбе шуруъ кардаанд
Намояндагони мақомот дар шаҳри Душанбе рӯзи 28-уми ноябр ба тахриби ду бинои навсохт оғоз карданд. Сокинон мегӯянд, бо ин тасмим розӣ нестанд. Бино аз 19 хона буда, дар умум 70-80 кас дар он зиндагӣ мекунанд. Ҷиҳози бошандагон ҳанӯз ҳам дар дохили хонаҳост.
Дар аксу наворҳое, ки рӯзи панҷшанбе ба дасти Радиои Озодӣ расид, чанд нафар боми хонаҳоро мекананд ва техникаву таҷҳизоти дигар омодаи кор истодаанд. Мошини ёрии таъҷилӣ ва оташнишонӣ низ дар маҳалли ҳодиса ҳаст.
Хабарнигори Радиои Озодӣ аз наздикии ҷойи ҳодиса гуфт, ки атрофи бино бо деворҳои оҳанин печонида шудааст ва дар берун маъмурони милиса қарор доранд.
Як сокини бино ба шарти фош нашудани номаш гуфт, манзили онҳоро тахриб мекунанд, вале намегӯянд, ки ба куҷо раванд. "Мо мехоҳем, ба мо хона диҳанд. Гап задан намемонанд. Ҳар касе гап зад, бурда маҳкам мекунанд ва дертар сар медиҳанд. 15 сол пул ҷамъ карда, нав соҳиби хона шуда будам. Ҳанӯз ҳам аз бонк қарздорам," -- шикоят кард ӯ.
Пулиси шаҳри Душанбе рӯзи 13-уми октябр дар саҳифааш дар Фейсбук хабар дод, ки ин ду бино дар хиёбони Рӯдакӣ “худсарона” ва бо таҳияи санадҳои “сохта” бунёд шудаанд. Додситонӣ гуфтааст, ки дар ҷойи онҳо бояд баландошёнаҳои дигаре қомат афрозанд.
Таваккал Нозимов, яке аз сокинон, рӯзи 16-уми октябр ба Радиои Озодӣ гуфта буд, ки хабари тахриби бино ӯро нигарон кардааст, чун ҷойи дигаре барои рафтан надорад. Соҳибони манзилҳои дигар аз он дар ҳайратанд, ки чаро баъди бештар аз як сол масъалаи ғайриқонунӣ бунёд шудани бино ба миён омадааст?
Ба чунин пурсишҳо ниҳодҳои давлатӣ, аз ҷумла ҳукумат ва Додситонии ноҳияи Шоҳмансур ва Додситонии шаҳри Душанбе посух надоданд. Рӯзи 16-уми октябр хабарнигорони Радиои Озодӣ аз намояндагони ин ниҳодҳо хостанд, ки мавзуъро шарҳ диҳанд, аммо ҷавобе нагирифтанд.
Ҷамшед Азизмуҳаммадзода, соҳиби ин ду бинои навсохт, дар боздошт аст ва мавқеаш ба қазия маълум нест. Пулиси шаҳри Душанбе дар баёнияаш рӯзи 13-уми октябр ӯро ба он гумонзад кард, ки ба 16 кас ғайриқонунӣ хона фурӯхтааст.
Сокинон мегӯянд, дар даст санад доранд ва тайи бештар аз як сол пули обу барқ ва хидматрасониҳои дигари иҷтимоиро низ додаанд.
Дар солҳои охир Бунёди биноҳои истиқоматӣ дар Душанбе афзудааст. Баъзе аз сокинон мегӯянд, ба ин восита мушкили камбуди манзил ҷуброн хоҳад шуд. Иддае аз сифати сохтмонҳо розӣ нестанд ва бархеи дигар аз он шикоят мекунанд, ки хонасозон як манзилро ба чанд нафар фурӯхтаанд. Иҷозаи сохтмони хонаҳоро мақомот медиҳанд.
"Ягон қонун нагуфтааст, ки..." Шикояти Маҳпора Киромова зидди нозирони милиса
Маҳпора Киромова, рӯзноманигори тоҷик, шикоят дорад, ки нозирони милиса дар Душанбе рӯзи 20-уми ноябр ҳуқуқи писари 14-солаашро поймол кардаанд. Ба нақли ӯ, писараш "бо зӯр дастгир ва ҷайби ӯ бе ҳузури шоҳидон кофтукоб шудааст". Дар идораи милиса касе масъаларо шарҳ надод.
"Ягон қонуни Ҷумҳурии Тоҷикистон нагуфтааст, ки биё ва бе риояи ягон қонун ҷайби кӯдакро коб, як чизро барор ва онро асос куну нисбаташ зӯроварӣ кун. Яъне, аз ҷониби нозири минтақа ҳуқуқи фарзанди ман комилан поймол шудааст", - изҳор дошт ӯ рӯзи 22-юми ноябр ба Радиои Озодӣ.
"Мавзӯест, миёни модару фарзанд"
Ба гуфтаи рӯзноманигор, баҳс аз як сигори электронӣ сарчашма мегирад, ки нозирони милиса аз ҷайби фарзандаш пайдо ва сипас барои боздошту зӯран бурдани ӯ асос кардаанд. Дар асл, ба гуфтаи рӯзноманигор, сигори электронӣ ба дӯсти яке аз ҳамсинфони писараш тааллуқ дошта, аз ӯ хоста шудааст, ки дар хона ба барқ гузорад.
"Саргарми бозӣ шуда, фаромӯш кардааст, ки дастгоҳро ба барқ пайваст кунад. Ҳангоми гусели ҳамсинфаш нозирони милиса аз ҷайби ӯ ҳамон дастгоҳро пайдо мекунанд. Ин ки ягон қонуншиканӣ нест, ҷиноят ҳам нест. Ин мавзӯест, ки бояд миёни кӯдак ва модар ҳаллу фасл шавад”, - афзуд Киромова.
Дар идораи милиса (нозироти минтақавии №5) касе масъаларо шарҳ надод. Ширкатдорони дигари воқеа низ нахостанд, бо хабарнигорони Радиои Озодӣ рӯ ба рӯ шаванд. Дар Раёсати корҳои дохилии шаҳри Душанбе аз ин қазия изҳори бехабарӣ карданд.
Киромова ҳоло ба зидди нозирони милиса ба Додситонии кул, Додситонии ноҳияи Исмоили Сомонӣ, Ваколатдор ва Кумисюни ҳуқуқи кӯдак шикоят кардааст.
Ҳикояти Маҳпора Киромова аз боздошти писари ноболиғаш ва бархӯрди ғайриҳирфаии пулис ба ӯ ва ҳам худи рӯзноманигор дар шабакаҳои иҷтимоӣ баҳсҳоеро ба миён овард. Бештари шарҳнависон рафтори нозиронро зидди қонун номиданд.
Шарҳи ҳуқуқдон
Рӯзноманигор Меҳрангез Турсунзода рӯзи 25-уми ноябр ба Радиои Озодӣ гуфт, дар ин ҳодиса қонун аз сӯйи шахсе поймол гаштааст, ки бояд онро ҳифз кунад: “Дар ин сурат кӯдак метавонад як хулоса кунад, ки ҳамаи гуфтаҳои мо дар бораи Конститутсия, қонунҳо ва ҳуқуқи инсон дурӯғанду бояд бар асоси қонунҳои кӯча зиндагӣ кард”.
Ба гуфтаи ҳуқуқшинос, Хуршед Қурбоншоев, кормандони ҳифзи ҳуқуқ метавонанд ҳар шаҳрвандро дар ҳолати шубҳаовар буданаш дастгир кунанду аз назар гузаронанд. “Вале агар шахси шубҳанок ноболиғ бошад, фавран бояд намояндаи қонунии ӯ огоҳ карда шавад. Ҳангоми тафтиши чизу чораи онҳо бояд ду шахси холис иштирок кунад,” – шарҳ дод ӯ.
Маҳпора Киромова мегӯяд, барои ҳимояи манфиатҳои фарзандаш ба ӯ ҳуқуқшиносони Эътилофи зидди шиканҷа ва Бунёди иҷтимоии Ташаббуси ҳуқуқӣ кумак мекунанд.
Шикоятҳо аз бархӯрди номуносиби маъмурони милиса ҳар чанд вақт расонаӣ шуда, таваҷҷуҳи мақомоту ҷомеаро барои чанд муддат ба ин мушкил ҷалб мекунанд, аммо бо гузашти вақт ҳама чиз фаромӯш ва ҳодисаҳо аз нав такрор мешаванд.
Видеоро дар ин ҷо бинед:
Чанд хонандаи мактаб дар як тасодуф дар Суғд маҷруҳ шудаанд
Муфаттишон дар ноҳияи Бобоҷон Ғафуров (вилояти Суғд) тафтиши тасодуф ё садамаи нақлиётиеро оғоз кардаанд, ки дар натиҷаи он чанд хонандаи як мактаб захм бардоштаанд.
Фалокат рӯзи 15-уми ноябр дар ҳудуди хоҷагии деҳқонии “Комронбек” дар ҷамоати Ёва рух дод. Гуфта мешавад, ки он рӯз мошини "Портер" хонандагони мактаби рақами 48-и деҳаи Боғи Болоро ба пахтачинӣ мебурд.
Як манбаъ дар Раёсати корҳои дохилии Суғд бо шарти фош нашудани номаш гуфт, ки се хонанда – ду духтар ва як писар – ҷароҳати сахт бардошта, муолиҷа мегиранд. Онҳо то 15-сола ҳастанд ва ба ҳамин сабаб ному насаби онҳоро наменависем.
Сокинони деҳаи Боғи Боло гуфтанд, ки теъдоди наврасони осебдида бештар аст ва аксари онҳоро ба беморхонаи шаҳри Хуҷанд бурданд. Як пизишки беморхона низ ба шарти фош нашудани номаш гуфт, “дар он рӯз 13 наврасро оварданд ва аксарият баъди муоинаву табобат ба хона ҷавоб дода шуданд”.
Волидони наврасони осебдида бо хабарнигорон гап задан нахостанд. Ҳамсуҳбати мо дар Раёсати корҳои дохилии Суғд гуфт, ба зидди ронанда барои риоя накардани қоидаи ҳаракат дар роҳ парванда боз мешавад.
Суоли асосӣ ин аст, ки он рӯз хонандагони мактаб барои чӣ ба майдони пахта рафта буданд? Омӯзгорони мактаби рақами 48 дар деҳаи Боғи Боло гуфтанд, толибилмонро барои ёрӣ ба деҳқонон бурда буданд, то ҳосили пахта дар сармо ҳайф нашавад. Ҳангоми бозгашт садама рух додааст.
Сокинони деҳаи Боғи Боло дар суҳбати ҳузурӣ гуфтанд, ки кӯдаконро чанд вақти охир ба пахтачинӣ мебаранд.
Чанд сол пеш ба пахтачинӣ фиристодани хонандагони мактабро дар Тоҷикистон расман манъ карданд, чун ба гуфтаи мақомот ба рафти таҳсили онҳо зарар мерасонад. Созмонҳои ҳомии ҳуқуқи инсон борҳо аз Тоҷикистон хостаанд, аз корҳои вазнини кӯдакон пешгирӣ кунанд.
Видеоро дар инҷо бинед:
Як кушта ва панҷ захмӣ. Дар марзи Тоҷикистону Афғонистон чӣ гузашт?
Дар ҳамла ба дараи Зарбузи ноҳияи Шамсиддини Шоҳин (вилояти Хатлон), дар сарҳади Тоҷикистон бо Афғонистон, як шаҳрванди Чин кушта ва панҷ нафар захмӣ шудааст.
Дар ҳукумати ноҳияи Шамсиддини Шоҳин рӯзи 18-уми ноябр ҳодисаро тасдиқ карда, вале тафсилот надоданд.
Ду манбаи огоҳ аз қазия ба Радиои Озодӣ гуфтанд, ки ҳамла шаби 17 ба 18-уми ноябр "аз тарафи шахсони мусаллаҳ ва аз он сӯйи марз" сурат гирифтааст. Аммо ҳардуи онҳо дақиқ гуфта натавонистанд, ки ҳодиса кори қочоқчиёни маводи мухаддир будааст, ё гурӯҳҳои ҷангҷӯ.
"Аз панҷ захмӣ чаҳор нафар шаҳрвандони Чин ҳастанд. Як нафар сокини маҳаллӣ. Ҳамаи онҳо аз пой маҷруҳ шуда, ба бемористони вилоятӣ ба Кӯлоб бурда шудаанд. Мақомоти интизомӣ дар ҷойи ҳодиса ҳастанд ва таҳқиқ мекунанд", -- гуфт яке аз манбаъҳо ба Радиои Озодӣ.
Ҳамсуҳбати мо ҳузури чиниҳоро ба вуҷуди корхонаи тило дар минтақа пайванд дод: "Дараи Зарбуз дар наздикии мавзеи Сари Ғор ҷойгир аст. Чиниҳо дар онҷо кор мекарданд." Дар мавзеи Сари Ғор як Комендатураи сарҳадӣ низ ҷойгир аст.
Як намояндаи ҳукумати Шамсиддини Шоҳин, ки ба далелҳои амниятӣ номаш фош намешавад, корхонаи тило дар дараи Зарбуз нав номнавис шуда, чиниҳо корҳои иктишофӣ анҷом медоданд.
Марзи ноҳияи Шамсиддини Шоҳин бо Афғонистон, ки беш аз сад километр дарозӣ дорад, аз қитъаи назораташ мушкили сарҳади Тоҷикистон ба шумор меравад. Дар гузашта дар марзи ноҳияи Шамсиддини Шоҳин гаравгонгирӣ ва ҳамла ба шаҳрвандони Тоҷикистон ва сарҳадбонҳо сабт шуда буд. Бори аввал аст, ки дар пайи ҳамла дар марз як шаҳрванди Чин кушта мешавад.
Ин дар ҳолест, ки тайи моҳҳои охир ҳамла ба коргарони чинӣ дар Покистон афзудааст. Мақомоти Покистон ва Чин моҳи октябри имсол эълон карданд, ки дар пайи таркиш дар наздикии фурудгоҳи Карочӣ ду коргари чинӣ кушта ва дастикам 8 нафар захмӣ шуданд. Сафорати Чин таркишро "ҳамлаи террористӣ" хонд.
Бо вуҷуди ваъдаҳои "Толибон" дар бораи истифода нашудани хоки Афғонистон аз сӯи гурӯҳҳои террористӣ, мақомоти Тоҷикистон аз он тарафи марз нигаронӣ доранд. Онҳо соли 2023 аз чанд мавриди убури қочоқчиён ва террористон бо силоҳ ба Тоҷикистон хабар доданд.
Аз ҷумла, Кумитаи давлатии амнияти миллӣ 6-уми августи соли гузашта аз кушта шудани се узви гурӯҳи "Ансоруллоҳ" ва мусодираи аслиҳаи зиёд хабар дод. Санҷиш ва тасдиқи ин хабар ба воситаи манобеи мустақил мушкил аст, вале он дар расонаҳои ҷаҳонӣ баёнгари осебпазирии Тоҷикистон аз хатарҳое шуд, ки аз Афғонистон сарчашма мегиранд.
Видеоро дар инҷо бинед:
Идомаи амалиётҳо ба зидди муҳоҷирон ва бо бераҳмии хос дар Русия
Бо вуҷуди он, ки чанд рӯз пеш Вазорати корҳои дохилии Русия аз анҷоми амалиёти Нелегал-2024 гузориш дод, рейдҳои нерӯҳои амниятӣ ҳамроҳ бо намояндагони ҳаракати миллатгароёнаи “Русская Обшина” ва ё Ҷамъияти Русҳо ҳамоно дар шаҳру ноҳияҳои ин кишвар идома дорад.
Муҳоҷирони корӣ мегӯянд, тафтиш дар хобгоҳҳои онҳо дар Маскав ба таври густарда ва бо як бераҳмии махсус сурат мегирад. Аз ҷумла, дар аксу наворҳое, ки дастраси Радиои Озодӣ шуд, дар бадани муҳоҷирони тоҷик осори калтаккорӣ ва латту кӯб дида мешавад.
Ин ҳам дар ҳолест, ки ба гуфтаи ҷабрдидаҳо ҳамаи сандаҳои иқомат ва кори онҳо дар Русия қонунӣ буда, бархе ҳам шаҳрвандии ин кишварро доштаанд. Ба нақли яке аз мусоҳибони Радиои Озодӣ амалиёт дар як хобгоҳи Маскав нисфи шаб оғоз ёфта муҳоҷиронро то нисфирӯзӣ бо шикам рӯи фарш хобондаву иҷозати баланд шуданро надодаанд.
Дар наворе дигаре, ки дар яке аз анборҳои меваву сабзавот дар шаҳри Маскав сабт шудааст, бадрафторӣ бо муҳоҷирон ба чашм мехӯрад. Нерӯҳои қудратӣ бо алфозӣ қабеҳ муҳоҷиронро аввал саф кашонда, сипас фармон медиҳанд, ки ба зону бишинанд. Ҳамзамон нафарреро бо номи “акаи Сабур” меҷӯянд.
Фишор ба муҳоҷирон, бахусус шаҳрвандони Тоҷикистон дар Русия баъди ҳамла ба толори консертии “Крокус” зиёд шуд ва ҳоло боздошту ҳабс, ихроҷу истирдод аз мушкилоти рақами яки муҳоҷирони тоҷик дар Русия шудааст.
Вячеслав Володин, раиси Думаи Давлатӣ рӯзи сешанбе дар канали хул дар Телеграм навишт, ки аз оғози соли 2024 дар ин кишвар 13 қонуни марбут ба кору зиндагии муҳоҷирон қабул карда шудаааст.
Дар ин байн рӯзи 14-уми ноябр Владимир Путин президенти Русия дар мулоқот бо Леонид Слутский раҳбари Ҳизби Либерал Демократ роҳҳои халос шудан аз муҳоҷирони ба гуфтаи онҳо беихтисосро матраҳ кард.
Ӯ гуфт: «Албатта, мардум саволҳои душвор, аз ҷумла масъалаи муҳоҷирати кориро дар миён мегузоранд. Мо бо пешниҳоде кардем, ки онро аксари вакилон аз Ҳизби Русияи Воҳид ва дигар ҳамкоронамон дастгирӣ карданд. Яъне ба муҳоҷирони беихтисос иҷоза надиҳанд, ки оилаҳои бузурги худро биёранд, то манбаи ташаннуҷи иҷтимоӣ, навбатпоӣ дар дармонгоҳ, рафтори душвори кӯдакони муҳоҷир дар мактабҳо ва дигар чизҳое, ки ба урфу одатҳои мо, ба пояҳои ҷомеаи мо мувофиқат намекунанд, вуҷуд надошта бошад.”
Ба навиштаи пойгоҳи хабарии “Важние истории” дар 6 моҳи соли 2024 додгоҳҳои Русия ҳукми рондани 86 ҳазор муҳоҷирро содир кардаанд. Ин аз омори соли 2022 бештар аст. Тибқи иттилои расмӣ, дар нимаи аввали соли ҷорӣ 17 ҳазор шаҳрванди Тоҷикистон аз Русия берун карда шудаанд.
"Ҷасадро худам шустам." Марги сарбози 20-солаи тоҷик дар қисми низомӣ
Ҷасади Ботир Эргашев, сарбози Нерӯҳои марзбонии КДАМ-ро, ки дар як қисми низомӣ дар ноҳияи Шамсиддини Шоҳин хидмат мекард, дар зодгоҳаш - деҳаи Деҳмойи ноҳияи Ҷаббор Расулов - дафн карданд, аммо суолу тахминҳо дар бораи марги ӯ боқист. Вай 20-сола буд.
Намояндагони Нерӯҳои марзбонӣ ва ҳукумати маҳаллӣ рӯзи 11-уми ноябр ҳангоми супоридани ҷасади Ботир Эргашев ба волидонаш гуфтаанд, ки "ӯ худкушӣ кард". Падараш, Баҳодур Эргашев, иддао дорад, ки дар бадани ҷавон осори латукӯб буд. Додситони ҳарбии Кӯлоб тафтишро шуруъ кардааст.
"Лабҳояш дарида буд"
Падари Ботир Эргашев рӯзи 14-уми ноябр дар суҳбат бо Радиои Озодӣ гуфт, ки аз марги мармузи писараш дар як қисми низомӣ то ҳол ба худ наомадааст. Мегӯяд, писараш ҳамагӣ як рӯз пеш аз ҳодиса бо онҳо телефонӣ гап зада буд ва то поёни хидматаш рӯзҳои андак монда буд.
"Дар соли 2022 ба хидмат рафт. Бояд ҳамин шабу рӯз меомад. Рӯзи 10-уми ноябр додараш ҷашни зодрӯз дошт. Занг зад, табрик кард. Бо модараш гап зад. Рӯзи дигар писарамро қима-қима карда ба мо оварда доданд," – гуфт Баҳодур Эргашев.
Кӯшиши мо барои гирифтани шарҳи расмӣ то ин дам бенатиҷа буд.
Пайвандонаш мегӯянд, ҷасади Ботир Эргашевро намояндагони Раёсати марзбонии КДАМ ҳамроҳи масъулони ҳукумати ноҳияи Ҷаббор Расулов супориданд. Онҳо гуфтаанд, ки Ботир Эргшаев дар қисми низомӣ худкушӣ кард. Аъзои хонавода ба ин фарзия шубҳа доранд. "Дар суҳбат бо мо боре ҳам аз шароити хидмат шикоят накарда буд," – гуфт Баҳодур Эргашев.
Вай афзуд, дар ҷисми писараш осори латукӯб ва шиканҷаро дидааст: "Ҳарду мояаш кабуд буд. Ҷасади бачаамро худам шустам. Аз гардан то поёни нофашро бурида буданд. Ду ҷойи каллаашро бурида дӯхтаанд. Дар пушти сараш як шикофии калон буд, шояд задаанд. Лабҳояш дарида буд."
"Баъд мефаҳмам, ки давлат ҳаст"
Дар ҳамин ҳол манбаъҳои Радиои Озодӣ дар мақомоти вилояти Хатлон гуфтанд, ки Додситони ҳарбии гарнизони минтақаи Кӯлоб таҳқиқро сар кардааст. Пайвандонаш азм доранд, барои дарёфти ҳақиқат то ниҳодҳои болоӣ муроҷиат кунанд.
"Кӣ бачаи маро кушта бошад? Ба ман ёфта нишон диҳанд, шуд. Баъд ман мефаҳмам, ки давлат ҳаст. Имрӯз бачаи маро ин хел мекунанд, пагоҳ бачаи ҳамсояро. Ин ҳолатро дида, баъд кӣ рафта хидмат мекунад?" – афзуд Баҳодур Эргашев.
Марги сарбозони тоҷик дар артиши Тоҷикистон ҳодисаи нав нест. Дар гузашта ҳам дар натиҷаи тасодуфу муноқиша ба ҳалокат расидани онҳо расонаӣ шудааст. Омбудсмен ё Ваколатдори ҳуқуқи инсон дар Тоҷикистон дар як гузориши солонаи худ гуфтааст, ки дар соли 2023 марги 40 сарбоз дар артиш сабт шудааст. Аз ин шумора, ба эътирофи Омбудсмен, 8 маврид худкушӣ буда, "6 нафар аз беморӣ фавтиданд".
Радиои Озодӣ дар соли 2023 дар бораи марги камаш 5 сарбоз хабар дода буд. Наздикони ҳамаи онҳо мегуфтанд, ки ба табиӣ будани марги фарзандони худ бовар надоранд ва хоҳони таҳқиқ ҳастанд.
Гузориши видеоиро дар инҷо бинед:
"Платформа чаппа шуд." Ҳалокати 3 коргар дар сохтмони "Роғун"
Дар натиҷаи ҳодисаи нохуше дар маҳалли сохтмони неругоҳи барқии "Роғун" се коргар ба ҳалокат расида, як каси дигар маҷруҳ шудааст. Ба гуфтаи мақомот, ҳодиса рӯзи 12-уми ноябр рух додааст.
Дар Хадамоти назорат дар соҳаи куҳкорӣ, ки масъули бехатарии корҳо дар бахши сохтмон дар Тоҷикистон ҳастанд, рух додани ҳодисаро тасдиқ карданд. Як масъули ин ниҳод бидуни зикри номаш ба Радиои Озодӣ гуфт, фавтидагон коргарони ширкати "Хокрӯд" мебошанд, ки дар неругоҳи “Роғун” кор мекарданд.
Ба гуфтаи ҳамсуҳбати мо, коргарони фавтида 39, 40 ва 51 сола буданд.
Ин масъули Хадамот дар бораи ҳодиса ҷузъиёти зиёд надод. Дар Кумитаи ҳолатҳои фавқуллода аз ҳодиса бехабарӣ карданд.
Дар наворе, ки ба шабакаҳои иҷтимоӣ роҳ ёфт, яке аз коргарон мегӯяд, “платформа” ба рӯйи коргарон афтидааст ва се нафар ҳалок шуданд. Яке аз коргарон, ки зоҳиран пояш зери харобаҳо мондааст, "оча" гӯён фарёд мезанад. "Платформа" майдончаи муваққатӣ аст, ки коргарон дар рӯйи он истода, дар баландиҳо кор мекунанд.
Ҷузъиёти бештар нашр мешавад.
Сокини Хуросон барои латукӯби ҳамсар ва кӯдакаш 8 сол зиндонӣ шуд
Додгоҳи ноҳияи Хуросон, як сокини ин минтақаро барои задани ҳамсар ва фарзанди хурдсолаш, ба 8 соли зиндон маҳкум кардааст.
Дар хабари расмӣ омадааст, Алимов М.Г шоми 7-уми июли имсол дар ҳолати мастӣ, ба хонааш дар деҳаи Чорбоғи ноҳияи Хуросон омада, бо ҳамсараш ҷанҷол кардааст.
Ба навиштаи сомонаи Додгоҳи ноҳияи Хуросон, ин мард ҳамсарашро латукӯб мекунад, ки дар натиҷа фарзанди думоҳааш “зарари ҷисмонӣ ба саломатиаш бардошта” дар Беморхонаи вилояти Хатлон бистарӣ шудааст. Дар хулосаи ташхиси тиббӣ-додгоҳӣ омадааст, косахонаи сари кӯдаки навзод осеб гирифтааст, ки ба саломатии ӯ хавнок дониста мешавад.
Назари гумонбар Алимов ва наздиконаш ба қазия маълум нест. Рӯшан нест, ки онҳо аз болои ҳукми додгоҳ шикоят бурдаанд ё не.
Ин мард бо иттиҳоми расондани зарари вазнин ба саломатӣ (моддаи 110-и Кодекси ҷиноӣ) ба 8 соли зиндони низомаш пурзӯр маҳкум шудааст. Додгоҳ нисбати ин мард ҳадди камтарини ҷазоро таин кардааст, чун ин банди қонун аз 8 то 12 соли зиндонро пешбинӣ кардааст.
Хушанати хонаводагӣ ва нофаҳмӣ миёни зану шавҳар, аз масъалаҳои доғ дар ҷомеаи Тоҷикистон гуфта мешавад. Ҳарчанд вақт Вазорати корҳои дохилӣ аз муноқишаҳои хонаводагӣ хабар медиҳад, ки баъзеаш бо фоҷиа тамом мешаванд.
Маҳбуси фирории тоҷик дар Русия боздошт шуд. Ӯ чӣ тавр аз зиндон гурехтааст?
Ҷустуҷӯйи яке аз шаш маҳбусе, ки аз зиндони Липетски Русия фирор кардааст, идома дорад.
Расонаҳои Русия рӯзи 26-уми октябр хабар доданд, ки 6 маҳбус аз зиндони Липетски Русия гурехтаанд. То ҳол 5 нафари онҳо боздошт шудаанд.
Бино ба иттилои мақомоти Русия, маҳбусони фирорӣ, зодагони кишварҳои Осиёи Марказӣ мебошанд. Ба навиштаи расонаҳои русӣ, яке аз маҳбусон шаҳрванди Тоҷикистон ва дигарон зодаҳои Узбекистон ҳастанд.
Саҳифаи “Маш" дар Телеграм, акс ва маълумоти шаҳрванди фирории Тоҷикистонро нашр кардааст, ки ӯро пайдо кардаанд. Ин нафар Даврон Ҷабборов, сокини 27-солаи вилояти Хатлон мебошад. Ба қавли манбаъ, ӯ соли 2022 бо иттиҳоми таҷовуз ва авбошӣ ба 9 сол зиндон маҳкум шудааст. Назари худаш ва пайвандонаш ба ҳукм ва ҳамчунин фирори ӯ маълум нест.
Расонаҳои Русия, аз ҷумла саҳифаи “Маш" ва "Baza" навиштаанд, маҳбусон таавассути нақбе фирор кардаанд, ки ним сол ба кандани он машғул буданд. Ду нафарро дар вилояти Тамбов ва се 3 нафари дигарро дар наздикиҳои зиндон боздошт намуданд. Бино ба иттилои мақомоти маҳаллӣ, аввал сокинон кулоҳҳои маҳбусонро пайдо карда, дертар пулис худи онҳоро дастгир кардааст.
Маҳбустон мехостанд марзро убур карда, ба кишварҳои худ баргарданд. Вазорати Корҳои дохилии Русия аз лаҳзаи пурсиши яке аз маҳбусон нашр кардааст, ки дар он вай мегӯяд, “ният доштем, ки ба хона равем.”
Дар робита ба ин қазия Кумитаи тафтишотии Русия нисбати кормандони зиндон бо иттиҳоми хунукназарӣ парвандаи ҷиноятӣ боз кардааст.
Ҳадди ақал ду маҳбуси фирорӣ дар бозпурсиҳои аввал гуфтанд, мехостанд аз тариқи Қазоқистон ба Узбекистон раванд.
Нашрияи «Коммерсант» менависад, зиндониёни фирорӣ бо гуноҳи таҷовуз ба номус ва қочоқи маводи мухаддир адои ҷазо мекарданд. Яке аз онҳо фақат ним сол дар зиндон будааст.
"Ӯро бо банд нафасгир кардаанд." Куштори як ҷавон дар Конибодом
Як ҷавони 21-сола дар шароити мармуз ё норӯшан дар шаҳри Конибодом кушта шудааст. Амрулло Боймирзоев, сокини ноҳияи Мастчоҳ, дар коргоҳи тоза кардани пахта кор мекард. Ҳодиса шаби 22 ба 23-юми октябр дар ҷамоати "Патар"-и шаҳри Конибодом рух додааст.
Як манбаи огоҳ аз қазия рӯзи 24-уми октябр ба Радиои Озодӣ гуфт, Боймирзоев дар ҷойи кораш мехобид ва шахсони ношинос шабона ӯро куштаанд.
"Тафтиш нишон додааст, ки ӯро бо банд нафасгир кардаанд. Амрулло 20 рӯз пеш соҳиби фарзанд шуда, ӯро ба серӣ надида буд," - гуфт ин манбаъ.
Мақомот қазияро то ҳол шарҳ надодаанд ва сабабҳои куштори ҷавон феълан маълум нест.
Амрулло Боймирзоев, писари Нарзулло Боймирзоев, мудири идораи кишоварзии ноҳияи Мастчоҳ буд. Ҷасади ӯро рӯзи 24-уми октябр дар зодгоҳаш, ҷамоати Оббурдони ноҳияи Мастчоҳ, дафн карданд.
Ин ягона куштори норӯшан дар шаҳри Конибодом нест. Баъд аз моҳи апрели имсол дар бораи кушта шудани аъзои камаш панҷ оила дар шаҳри Конибодом гузориш расид. Ин ҳодисаҳо нигарониҳоро ба миён оварданд, зеро ба гуфтаи сокинони шаҳр шахсони ношинос шабона бо ниқоб дар кӯчаҳо мегаштанд.
Абдусалом Тухтасунзода, раиси шаҳри Конибодом, моҳи август аз боздошти як гумонзад дар пайванд ба ин кушторҳо хабар дод. Аммо на раиси шаҳр ва на дигар мақомот дар ин бора ҷузъиёт намедиҳанд.
Тасодуфи нақлиётии як маъмури милиса дар Кӯлоб. Ду кас ҷон бохтааст
Як маъмури милисаро дар шаҳри Кӯлоб ҳамчун сабабгори тасодуфи нақлиётие боздошт кардаанд, ки дар натиҷаи он ду нафар ба ҳалокат расид.
Орзу Ҷононов ба он муттаҳам аст, ки шоми 15-уми октябри имсол ҳангоми ҳаракат бо суръати баланд идораи мошинро аз даст дода, се нафарро дар пиёдароҳ задааст.
Баҳодур Ҷалилови 35-сола дар ҷойи ҳодиса ҷон бохта, Ҷаҳонгир Шерафганзодаи 31-сола дар бемористон фавтид. Сиёвуш Холматови 28-сола дар бемористон муолиҷа мегирад.
Ду манбаи огоҳ дар Додситонӣ ва Раёсати корҳои дохилии Кӯлоб рӯзи 23-юми октябр гуфтанд, ки ҳодиса дар наздикии "Боғи Хуталон" рух дод. Ба гуфтаи мусоҳибони мо, Орзу Ҷононов ҳангоми ронандагӣ "маст буда", мошини "Ҳундай-Аванти"-ро бо суръати бештар аз сад километр дар як соат рондааст, ки мухолифи қоидаҳои ҳаракат дар шаҳр аст.
"Мошин ба дарахт ва симчӯб бархӯрда, ба пиёдароҳ рафтааст. Ҳамон вақт Баҳодур Ҷалилов, Ҷаҳонгир Шерафганзода ва Сиёвуш Холматов аз кор баромада, ба хона мерафтанд. Мошин онҳоро пахш кардааст,” -- гуфт як манбаи Радиои Озодӣ.
Манбаъҳо гуфтанд, ки Орзу Ҷононов осеб надидааст. Абдулло Ҳакимови 31-сола, ки дар канори ӯ нишаста буд, маҷруҳ шуда, дар бемористон бистарист.
Хабарнигори Радиои Озодӣ рӯзи 22-юми октябр талош кард, ки бо хонаводаи фавтидаҳо суҳбат кунад, аммо онҳо нахостанд дар назди дурбин гап зананд. Бузургони ин хонаводаҳоро рӯзи 22-юми октябр ба Додситонии шаҳри Кӯлоб даъват кардаанд.
Пайвандони Ҷаҳонгир Шерафганзода, яке аз фавтидагон, ба Радиои Озодӣ гуфтанд, ӯ панҷ моҳ пеш оиладор шуда буд. Ин ҳамсуҳбати мо гуфт, аз ҷараёни тафтишот феълан шикоят надоранд.
Ҳамсоягони фавтидаҳо дар суҳбатҳои хусусӣ гуфтанд, ки аз Баҳодур Ҷалилов се фарзанд ятим мондааст. Яке аз наздикони Баҳодур Ҷалилов ба Радиои Озодӣ гуфт, чанд моҳ пеш бародари ӯ фавтида буд ва Баҳодур ягона писари хонадон ба ҳисоб мерафт.
Ба зидди корманди милиса Орзу Ҷононов бо иттиҳоми вайрон кардани қоидаҳои ҳаракат дар роҳ, ки боис ба марги одамон шудааст, парванда боз кардаанд. Моддаи 212-и Кодекси ҷиноии Тоҷикистон барои ин иттиҳом аз аз 10 то 15 сол зиндонро пешбинӣ мекунад.
Гузориши видеоиро дар ин ҷо бинед:
Бори аввал нест, ки кормандони милиса дар Кӯлоб бо риоят накардани қоидаҳои ҳаракат дар роҳ сабаби марги раҳгузарон мешаванд.
Рустам Нозимзода, афсари Бозрасии Давлатии Автомобилӣ (ГАИ), соли 2023 дар як садама сабаби марги сокини 83-солаи ноҳияи Шамсиддини Шоҳин шуд. Дар ҳодисаи шабеҳ соли 2018 як ҷавони 15-сола зери чархи мошини Саидмуъмин Исломов, муфаттиши Бозрасии Давлатии Автомоблии шаҳри Кӯлоб монду ҷон дод.
Дар нимаи аввали соли равон дар вилояти Хатлон 122 тасодуфи нақлиётӣ сабт шудааст. 67 нафар дар ин садамаҳо ҷон бохтаанд.
Боздошти сардори ШКД-и Ромит. Фирдавс Кабутов ба чӣ гумонзад аст?
Маъмурони Додситонии кулли Тоҷикистон Фирдавс Кабутов, сардори Шуъбаи милисаи Ромит (минтақае дар шаҳри Ваҳдат)-ро дастгир кардаанд. Ду манбаи Радиои Озодӣ рӯзи 16-уми октябр гуфтанд, ки ӯ ба "таҷовузи духтари ноболиғ" гумонзад аст. Шарҳи расмӣ дастрас нест.
Ба гуфтаи ҳамсуҳбатони Радиои Озодӣ, дастури боздошти Фирдавс Кабутов дар ҳафтаи аввали моҳи октябр содир шудааст. "Ӯ ҳоло дар Боздоштгоҳ аст ва нисбаташ бо гумони “таҷовузи такрорӣ нисбат ба духтари ноболиғ” (моддаи 138, қисми 2, банди “д”-и Кодекси ҷиноӣ) парванда боз шудааст,” -- гуфт яке аз манбаъҳои Радиои Озодӣ.
Вай афзуд, “духтар 17-сола аст, аммо ба додситонӣ шикоят кардааст, ки Фирдавс Кабутов ӯро бо таҳдид аз 16-солагӣ таҷовуз мекард. Ҳодиса дар шаҳри Душанбе шудааст.”
Яке аз пайвандони дури Фирдавс Кабутов, ки нахост аз ӯ ном барем, ба Радиои Озодӣ гуфт, ӯро “пешпо” додаанд. Ба қавли ӯ, “духтар бо хоҳиши худаш бо ӯ тамос дошта, синни воқеияшро пинҳон доштааст.” Ин нафар иддао кард, ки гуё духтар аз Кабутов пул хоста, бо шунидани ҷавоби рад ба зидди ӯ ба додситонӣ шикоят кардааст.
Назари духтар ва наздиконаш дастрас нест, вале афроде, ки аз қазия хабар доранд, мегӯянд, ҷабрдида ба додситонӣ гуфтааст, беш аз як сол Кабутов ӯро тарсондааст, то ба касе шикоят накунад.
“Яке аз наздикони духтар аз воқеа огоҳ шуда, ба додситонӣ хабар додааст. Додситонӣ Кабутовро барои суҳбат даъват кардааст, вале ӯ мегӯяд, то вазир иҷозат надиҳад, ба ҳеч куҷо намеравад. Баъдан боздошт мешавад,” -- гуфт ҳамсуҳбати Радиои Озодӣ.
Дар Вазорати корҳои дохилии Тоҷикистон ҳодисаро шарҳ надода, вале гуфтанд, ки Фирдавс Кабутов аз мансаб сабукдӯш шудааст.
Шуъбаи умури дохилӣ дар Ромит, ки Фирдавс Кабутов сардори он буд, соли 2015 боз шуда, даҳҳо корманд дорад.
Дар сурати исбот шудани иттиҳом, ба сардори ҳамакнун собиқи Шуъбаи пулис дар Ромит аз ҳафт то 25 сол зиндон таҳдид мекунад.
Солҳои охир хабарҳо аз озори ҷинсии ноболиғон бештар расонаӣ мешаванд. Порлумони Тоҷикистон моҳи ноябри соли 2023 тағйиротеро ба Кодекси ҷиноӣ қабул кард, ки тибқи он ҷазо барои озори ҷинсии ноболиғон сахттар шудааст.
"Ҳамаро ваҳшат фаро гирифтааст." Мусибати ҷанг дар Ғазза ва Лубнон
Зарифа Абу Таъмия, сокини шаҳри Хон Юнуси Ғазза, дар мотами наздиконаш нишастааст. Исроил рӯзи 14-уми октябр ба хонаи онҳо бомба андохт. Худаш зинда монд, ҷияну пайвандони дигараш кушта шуданд.
Наздикони Зарифа аз ҷумлаи 100 нафаре ҳастанд, ки рӯзи 14-уми октябр ба гуфтаи мақомоти тандурустии "Ҳамос" (Амрико ва Иттиҳоди Аврупо созмони террористӣ медонанд) дар ҳамлаҳои Исроил дар Ғазза кушта шуданд. Созмони Милал гуфт, дар ин рӯз дар ҳамлаи Исроил 10 зану кӯдаке кушта шуд, ки дар навбати нон буданд.
Мисли ин зан бисёриҳо дар Ғазза дар сӯг нишастаанд. Касе намедонад, ки зери бомбаборон чӣ қадар зинда мемонад.
Зарифа Абу Таъмия, сокини Ғазза, гуфт, "онҳо ба мо ягон огоҳӣ надоданд. Ҳамаи мо хоб будем. Вақте бедор шудам, ки одамони зиёд болои сарам буданд ва мепурсиданд, ки “зиндаӣ”? Ман хестаму Монаро суроғ кардам, ки бо ман дар як хона хоб буд. Ҷустам, вале наёфтам. Ҳамсари бародарам ҳам занг зад, ки кӯдаконро дар ҳеч ҷой наёфтааст."
Исроил ҷангҷӯёни “Ҳамос”-ро муттаҳам мекунад, ки мардумро чун сипари зинда истифода мекунад. Яъне, дар хонаҳои сокинону мактабу шифохонаҳо пинҳон мешаванду меҷанганд.
Як сол боз маросими ҷанозаи дастҷамъӣ инҷо маъмулӣ шудааст. Созмони Милали Муттаҳид мегӯяд, ҳеч ҷойи Ғазза амн нест. Дар хобу бедорӣ, дар интизори обу нон, дар мактабу беморхона ва ҳатто дар паноҳгоҳи оворагон марг ба суроғашон меояд.
Исроил мегӯяд, “Ҳамос”-ро нобуд карданист, ки соле пеш 1200 нафар исроилиро кушт ва беш аз 200 нафарро гаравгон гирифт. Аз замони ҳамлаҳои Исроил ба Ғазза (аз моҳи октябри соли 2023 то ин дам) беш аз 42 ҳазор фаластинӣ кушта шудаанд.
Нерӯҳои Исроил пас аз чанд рӯз “танаффус” ҳамлаҳоро ба зидди “Ҳизбуллоҳ”-и Лубнон, ки ҳам созмони ҷангҷӯ асту ҳам ҳзизби сиёсӣ, аз сар гирифт. Сокинони Бейрут метарсанд, ки сарнавишти Ғазза дар инҷо такрор мешавад.
Самир Шараф, сокини Бейрут, гуфт: “Мо ҳама дар як вазъият ҳастем. Вазъ дар кишвар одӣ нест ва касе намедонад, ки фардо чӣ хоҳад шуд. Ҳар касеро пурсӣ, мегӯяд, намедонам чӣ мешавад. Ҳамаро ваҳшату тарс фаро гирифтааст ва ояндаи номаълум.”
Исроил мегӯяд, бо “Ҳизбуллоҳ”-и таҳти ҳимоти Эрон меҷангад. Ин гурӯҳ, ки ҷануби Лубнонро назорат мекунад, бо пуштибонӣ аз фаластиниён Исроилро мушакборон мекунад.
Созмони Милали Муттаҳид мегӯяд, дар ҳамлаи Исроил ба Ғазза ва Лубнон бештар одамони бегуноҳ кушта шудаанд. Исроил мегӯяд, тамоми талошро мекунад, то ғайринизомиён осеб набинанд. Шумори кушташудаҳо дар Лубнон дар як моҳи охир аз ду ҳазор гузашт.
Гузориши видеоӣ дар инҷост:
"Фақат мегуфтанд, хун биёред." Сабаби марги Мижгонаи 27-сола чист?
Хонаводаи Нуровҳо дар шаҳри Ваҳдат иддао доранд, ки духтари ягонаашон – Мижгона Нуроваи 27-сола – "дар пайи хунукназарӣ ва иштибоҳи табибон" баъд аз таваллуди кӯдак дар бемористон ҷон бохтааст. Пизишкон мегӯянд, зан бемории музмин дошт.
Даъвои наздикон
Мижгона Нурова рӯзи 7-уми октябри имсол, баъд аз бист рӯзи зоймон, фавтидааст. Тифли ӯ ҳамагӣ чанд соат умр дид.
Шарофат Нурова, аммаи Мижгона, рӯзи 9-уми октябр ба Радиои Озодӣ гуфт, пизишкони таваллудхонаи шаҳри Ваҳдат шаби 19-уми сентябр "ба хато роҳ доданд", ки гуё дар ниҳоят боис ба фавти Мижгона ва кӯдакаш шудааст.
"Бачадонро мекафонанд, хунравӣ мешавад. Аз як тараф кӯдак "вазнин" шуда фавтид ва аз тарафи дигар духтарро барои ҷарроҳӣ дароварданд. Ҳангоми ҷарроҳии бачадон пешобдонро “заданд”, - изҳор дошт Шарофат Нурова.
Ӯ ҳамзамон иддао дорад, ки бародарзодааш бе ризояти наздикон “чанд бор” ҷарроҳӣ шуда, табибон шарҳ надодаанд, ки чаро чунин карданд. “Фақат мегуфтанд, ки хун биёред, плазма биёред”, - афзуд вай.
Посухи пизишк
Пизишкони Бемористони марказии шаҳри Ваҳдат ин иддаоро рад мекунанд. Фарангис Одинаева, табиби занон дар бемористони шаҳри Ваҳдат, 9-уми октябр ба Радиои Озодӣ гуфт, Мижгона танҳо ду бор бо ризоияти хатии наздикон ҷарроҳӣ шудааст.
“Мо ду ҷарроҳӣ гузаронидем. Бори аввал экстирпатсияи бачадон гузарондем, бори дувум барои набудани пешоб нефростомаи гурдаҳо гузошта шуд. Зан дар 14-солагӣ ҷарроҳии гурда шудааст. Дар гурдаи тарафи росташ пучшавӣ мушоҳида мешуд”, - афзуд Одинаева.
Фотима Меликова, хушдомани Мижгона, табибонро ба он айбдор кард, ки гуё бо вуҷуди дар ҳолати вазнин будани келину набераи навзодаш аз ӯ пул талаб карданд: “Гуфт, холаҷон духтар таваллуд кард. Ба ин фаррош 50 сомонӣ, ба худам 200 сомонӣ ва ба ин зан 300 сомонӣ деҳ”.
Шодигул Ҷонмадова, момодояе, ки гуфта мешавад шаби 19-уми сентябр дар таваллудхонаи шаҳри Ваҳдат навбатдор буд, 9-уми октябр дар суҳбати телефонӣ бо Радиои Озодӣ гуфт, аз касе пул талаб накардааст. Баръакс, иддао дорад, ки барои табобати Мижгона 1400 сомонӣ ёрӣ кард.
“300 сомонӣ дар дасти духтур худашон доданд, ки гиреду тақсим кунед. Ман ба Худо, пул нагуфтаам. Барои чӣ пул гӯям?” - изҳор дошт ӯ.
Мунтазири натиҷаи ташхис
Наздикони Мижгона нисбат ба табибон ба мақомоти қудратии шаҳри Ваҳдат шикоят карданд ва ҳоло натиҷаи ташхиси тиббиву додгоҳиро мунтазиранд.
Дар беморхонаи марказии шаҳри Ваҳдат сабаби эҳтимолии марги Мижгонаву кӯдакашро дар бемориҳои музмини модар ва бо таъхир овардан ба беморхона мебинанд.
“Тифли аз муҳлат гузашта бо нуқси модарзодӣ, яъне астити шикам ва нуқси дил таваллуд шуд. Дигар нуқсонро духтури неонатолог тасдиқ мекунад. Аз гапҳояш бармеояд, зан то ба ҳадде камхун будааст, ки роҳ гашта наметавонистааст. То ба ҳамин ҳолат овардаанд. Ягон маротиба дору нагирифта будаанд”, - мегӯяд Одинаева.
Фавти модарон ҳангоми таваллуд дар Тоҷикистон одатан эълом карда намешавад. Созмони Ҷаҳонии Тандурустӣ ду сол пеш дар як гузориш навишт, ки дар Тоҷикистон аз миёни ҳар 100 ҳазор модар ҳангоми таваллуд 24 зан мефавтад. Масъулони Раёсати тандурустии вилояти Хатлон ҳам соли 2023 дар як нишасти хабарӣ гуфта буданд, ки дар як соли охир дар вилоят 24 марвиди марги занони ҳомила ҳангоми таваллуд сабт шудааст.
Наздикони фавтидаҳо дар бештари маврид пизишконро гунаҳкор мекунанд, вале табибон дар навбати худ мегӯянд, ба онҳо дер муроҷит шудааст ё давраи ҳомиладорӣ дуруст пушти сар нашудааст. Яке аз сабабҳои марги занон ҳангоми таваллуд камхунӣ ва норасоии ғизои солим гуфта мешавад.
Видеоро дар ин ҷо бинед:
"Аз гулӯям дошту ба девор пахш кард." Дар мактаби шаҳри Ваҳдат чӣ гузашт?
Масъулони Вазорати маориф ва илми Тоҷикистон гуфтанд, ки хабари дар мактаб латукӯб шудани як омӯзгорро дар шаҳри Ваҳдат таҳқиқ доранд. Акси омӯзгори ҷавон бо чеҳраи осебдида дар шабакаҳои иҷтимоӣ хашми корбарони зиёдро барангехт. Хабарнигорони мо ӯро пайдо карданд ва моҷароро аз худаш пурсиданд.
"Дод задам, ки ягон касро даъват кунед"
Файзихон Раҷабова, омӯзгори мактаби рақами 8 дар шаҳри Ваҳдат, иддао дорад, ки аз сӯйи модари як хонанда латукӯб шуда, ба ин сабаб дар беморхона бистарист. Тарафи дигари баҳс мегӯяд, дар ин моҷаро қурбонӣ ҳаст, на гунаҳкор.
"Даромад, аз ҷоям хеста гуфтам, ки исто. Баромаданӣ будам, як шапалоқ заду аз гулӯям қапид ва ба девор зер карда, гуфт, туро мекушам. Тела кардам, нашуд, зӯрам нарасид. Дод задам, ки рафта ягон касро даъват кунед. Талабаҳо рафта кадомеро оварданд," – нақл кард омӯзгор Файзихон Раҷабова.
Ӯ мегӯяд, ин ҷанҷол баъд аз он сар задааст, ки вай аз хонанда хост, ба дарс халал нарасонад. Фирӯза Сармисоқова, модари хонанда, эътироф кард, ки бо муаллима даст ба гиребон шуд, вале мегӯяд, ӯ ва духтараш дар ин ҳодиса гунаҳкор нестанд. Худаш нахост дар назди дурбин гап занад.
"Дар вақти дарси химия (кимиё) аз таърих дарс додааст. Духтарам ҷавоб надодааст, дар рӯзнома баҳои ду мондааст. Духтарам пурсидаст, чаро баҳои ду мондӣ, муаллимаҷон? Гуфтааст, хуб кардам, лаънатиро лаънатӣ мегӯянд. Рав очаатро биёр, ман тарбияаш диҳам," – иддао кард Фирӯза Сармисоқова.
"Бо ҷадвали оҳанинаш "дарси ибрат" додааст"
Омӯзгор сабаби моҷароро ба таври дигар шарҳ дод: "Ҳангоми дарс як талаба бо ҳамроҳаш гап зад. Гуфтам, “хап кун, духтар. Як соат аст, ки нигоҳ дорам, гап зада истодаӣ." Баъд гуфт, "э, шумо, муаллимаҳо аз худ гузаронидед”. Ман гуфтам, ту кӣ ҳастӣ? Аз куҷо омадӣ? Як ҳамсинфаш гуфт, аз мактаби 68 омадааст. Гирифта, ба утоқи мудир бурданӣ будам. Гуфт, рафта ба модарам мегӯям."
Модари хонанда эътироф мекунад, ки ба мактаб омад, то муаллимаро "ҷазо" бидиҳад: "Вай чӣ ҳақ дорад, ки ин гапҳоро нисбат ба фарзанди ман мегӯяд? Бар замми ин корҳо ба тахтапушти духтарам зада, бо ҷадвали оҳанинаш “дарси ибрат” додааст. Ман ба сараш омадам, то пурсам, ки чӣ воқеа шуд. Бо ҳамон ҷадвали оҳанинаш маро низ тарбия доданӣ буд. Зад. Ман гуфта наметавонам, ки чӣ ҳақ дорӣ ҳам маро мезанӣ ва ҳам фарзандамро?"
Шикояти омӯзгор рӯзи 6-уми октябр дар шабакаҳои иҷтимоӣ нашр шуд ва вокунишҳои зиёде дар пай дошт. Ду омӯзгор ба Радиои Озодӣ муроҷиат карданд, ки аз ҳуқуқи ҳамкасбашон ҳимоят шавад.
Вазорати маориф ва илми Тоҷикистон гуфт, воқеаро таҳқиқ мекунад ва дар таҷрибаи чорсолаи Файзихон Раҷабова ягон арзу шикоят нисбат ба ӯ набудааст. Дар ин вокуниш вазорат бар пояи баёноти худи хонанда ва ҳамсинфонаш хабар додааст, ки омӯзгор Файзихон Раҷабова нисбат ба хонанда калимаи “лаънатӣ”-ро истифода кард.
Мо омӯзгорро дар бемористон дидем. Дар нимаи мусоҳиба Фирӯз Гадоев, сардухтури беморхона, онро қатъ кард. Баъди ин, Файзихон Раҷабова аз идомаи суҳбат худдорӣ намуд.
Масрур Қодиров, мудири мактаби рақами 8-и шаҳри Ваҳдат низ аз шарҳи қазия худдорӣ кард. Бино бар навиштаи як омӯзгор, раёсати маориф пештар қазияро баррасӣ карда, ба муаллима "Сипоснома" додааст.
Ба Радиои Озодӣ гуфтанд, ки таҳқиқи ҳодисаро Шуъбаи корҳои дохилии шаҳри Ваҳдат баррасӣ дорад ва “мехоҳанд, онро байни худ ҳал кунанд”.
Видеоро дар ин ҷо бинед:
Гуфтугӯ