Романи "Сармаддеҳ"-и нависандаи маъруфи тоҷик Баҳманёр ба хатти форсӣ нашр шуд. Ин китобро нависанда ва хабарнигори тоҷик Шаҳзодаи Самарқандӣ (Назарова) ҳамроҳ бо ҳамсараш Меҳдии Ҷомӣ ба ҳуруфи форсӣ баргардон кардаанд. Ин китоб аз 522 саҳифа иборат буда, ҳоло дар торнамои “Амазон” дастрас аст. Шаҳзодаи Самарқандӣ дар сӯҳбат бо Радиои Озодӣ гуфт, қарор буд, ин китоб дар ҷашни 60-солагии Баҳманёр, ки соли гузашта таҷлил гардид, рӯи чоп ояд, аммо тӯл кашид. “Ниҳоят, ин китоб 20 августи соли ҷорӣ интишор шуд,” -- афзуд ӯ. Шаҳзодаи Самарқандӣ мегӯяд, бахши муҳими ин китоб луғатномааш будааст, ки Меҳдии Ҷомӣ таҳия кардааст. “Ӯ вожаҳои тоҷикии ин романро, ки барои форсизабонони дигар номафҳуманд, гирд овард ва онҳо хеле зиёданд,” -- илова кард ӯ.
