Ҳафтаи гузашта ҳангоми сафар ба Сурия Валерӣ Амос аз Ҳумс ва Бобо Амр дидан карда ва гуфта буд, ки ин шаҳрҳо баъд аз муҳосираи якмоҳа дар вазъи сангин қарор доранд.
Дирӯз Бан Ки Мун, Дабири кулли СММ, аз ҳукумати Сурия ва мухолифини Башор Асад хост, ки бо фиристодаи вижаи СММ ва Иттиҳоди кишварҳои араб Кофӣ Аннан ба хотири хатми хушунат дар кишвар ҳамкорӣ кунанд.
Кофӣ Аннан ҳафтаи гузашта аз Сурия дидан ва тарҳи нави ҳалли мусолиматомези қазияи Сурияро ба Димишқ пешниҳод карда буд. Қарор аст, ки ӯ имрӯз аз натоиҷи сафараш ба Димишқ ба Шӯрои амнияти СММ гузориш диҳад. Тарҳи нави ҳалли мусолиматомези қазияи Сурия - оштии нерӯҳои ҳукуматӣ ва мухолифини мусаллаҳ, дастрасии мардум ба кӯмаки башарӣ ва шурӯи музокироти сулҳро дарбар мегирад.
Дар ҳамин ҳол тақрибан 200 гурӯҳу созмонҳои башариву дифоъ аз ҳуқуқи башар аз Русия ва Чин даъват карданд, ки аз талошҳои СММ барои хатми хушунат дар Сурия пуштибонӣ кунанд. Дар изҳороти онҳо гуфта шудааст, куштори беш аз 8 ҳазор суриягиҳо бар асари саркӯбии дигарандешӣ аз сӯи режими Башор Асад паёмади он буд, ки ҷомеъаи ҷаҳонӣ худро аз ҳалли ин қазия канор гирифт. Русия ва Чин алайҳи қатъномаҳои Шӯрои амнияти СММ, ки аз сӯи кишварҳои ғарбӣ ва Иттиҳоди кишварҳои араб таҳия шуда буданд ва Димишқро барои истифодаи нерӯ алайҳи эътирозгарон маҳкум мекарданд, раъй доданд.
Ахиран мақомоти Туркия хабар доданд, ки тайи ду рӯзи ахир боз ҳазор паноҳандаи суриягӣ вориди кишвар шуданд ва теъдодии умумии фирориён аз Сурияи ҳамсоя ба 14 ҳазор нафар расид.
Дар ҳамин ҳол сокинони Ҳумс мегӯянд, ҳарчанд шаҳр таҳти назорати нерӯҳои ҳукуматӣ қарор дорад, онҳо аз идомаи мубориза даст бардоштанӣ нестанд. Абу Умар ал-Ҳумсӣ, як фаъоли мухолифин мегӯяд, ки “ин инқилоб ба маънои
комили ин вожа аст, инқилоб алайҳи саркӯбӣ, истибдод ва фасод. Мо фаъолон аз ҳама мардуми Сурия хоҳиш дорем, ки устувор бимонанд ва чун пештара ба хиёбонҳо рехта озодӣ ва аз байн бурдани ин мустабидро талаб кунанд. Аз ин бештар мо чизе намехоҳем.”
