Сирояти коронавирус миёни омӯзгорони тоҷик ва хабари марги чанде аз онҳо бар асари бемории COVID-19 нигарониҳоеро аз шеваи чораҳои пешгирӣ аз ин беморӣ дар донишгоҳҳо, ба миён гузоштааст.
Бархе аз омӯзгорон мегӯянд, дар пайи эътирофи сирояти коронавирус дар кишвар шогирдон бо таъхир ба таътил фиристода шуданд ва худи онҳо то ҳол аз сӯи раёсати донишгоҳ ба кор даъват мешаванд. Чунин бархурди масъулони донишгоҳҳоро дар шароити хатари сирояти коронавирус баъзе омӯзгорон бар зарари саломатии худу атрофиён медонанд.
Як устоди Донишкадаи кӯҳӣ-металлургии Тоҷикистон, воқеъ дар шаҳри Бӯстони вилояти Суғд мегӯяд, ду ҳамкораш аз бемории COVID-19 фавтида, 10 тан аз ҳамкорони дигар бо нишонаҳои сирояти коронавирус беморанд. Ин омӯзгор, ки нахост номаш бурда шавад, рӯзи 20-уми май ба Радиои Озодӣ гуфт, "баъзе ҳамкорон дар хона табобат мегиранд, дигарон ҳанӯз ба кор даъват мешавем".
Мухтор Фозилзода, ректори Донишкадаи кӯҳӣ-металлургии Тоҷикистон марги танҳо як омӯзгори донишкадаро аз бемории COVID-19 тасдиқ намуд, аммо ба ин беморӣ гирифтор шудани 10 омӯзгори дигарро рад кард. Ӯ ба Радиои Озодӣ гуфт, омӯзгорони аз 60-сола болоро аз рӯзи 11-уми май ба хонаҳояшон ҷавоб доданд ва дигарон вобаста аз имконияташон омада корашонро анҷом медиҳанд. Дар зимн фавтидаи дувум аз ни донишкада омӯзгор набуда, корманди шӯъбаи кадрҳо буд.
Хабарҳо аз сирояти коронавирус миёни омӯзгорон ва фавти онҳо бар асари ин беморӣ на танҳо дар Суғд, балки дар дигар шаҳру навоҳии кишвар борҳо дар шабакаҳои иҷтимоиву бархе расонаҳо нашр шудаанд.
Нуралӣ Шоҳиён, ректори Донишгоҳи давлатии Данғара мегӯяд, устодони ин донишкада то 15-уми май ба кор меомаданд, вале феълан онҳоро ҷавоб додаанд. Ӯ ба Радиои Озодӣ гуфт, воқеан ҳам наздики 10 нафар аз омӯзгорони ин донишгоҳ ба беморӣ гирифтор шудаанд, вале дар бора ба кадом намуд беморӣ гирифтор шудани онҳо чизе гуфта наметавонад:
"Ҳозир дилхоҳ бемориро ба коронавирус мепайванданд, лекин ҳоло маълумоти аниқ нест, мумкин аз бемории дил ранҷ кашида истодаанд ё бемори дигар бошанд то ба ман маълумоти расмӣ наояд чизи дақиқ гуфта наметавонам,"- гуфт Шоҳиён.
Ректори Донишгоҳи Данғара таъкид намуд, ки дар маҷмӯъ вазъи бемории устодони ин донишгоҳ беҳтар шудааст ва ба онҳо кӯмаки яквақтаинаи молиявӣ расонидаанд.
Чанде аз омӯзгорони Донишгоҳи давлатии шаҳри Хоруғ гуфтанд, барномаҳои таълимиро ба анҷом расонидаанд, донишҷӯёнро низ ҷавоб додаанд, вале дар шароити хатари сирояти коронавирус, худи онҳо ҳанӯз сари коранд. Нигаронии баъзе аз омӯзгорон ин аст, ки бо вуҷуди анҷоми барномаҳои таълимӣ ва таътили донишгоҳҳо, масъулони бахши маориф ба онҳо таъкид мекунанд, ки дар ҷои кор ҳозир бошанд.
Шермамад Ҷонмамадов, ректори Донишгоҳи давлатии шаҳри Хоруғ мегӯяд, то ҳанӯз ҳамаи омӯзгорони ин донишгоҳ ба кор меоянд ва барои рухсатии онҳо дастури Вазорати маорифро интизоранд.
Ҷонмаҳмадов гуфт, "омӯзгорон ба корҳои таълимӣ, методӣ, корҳои кафедра, ба корҳои илмияшон машғуланд. Омӯзгорон бо риояи қойдаҳои беҳдоштӣ ба кор меоянд".
Раҳбарият ва муаллимони Донишгоҳ Хоруғ гуфтанд, миёни омӯзгорони ин донишгоҳ касе ба бемории COVID-19 гирифтор нашудаанд.
Дар Душанбе низ устодони баъзе донишгоҳҳо баъд аз гирифторӣ ба коронавируси нав вафот карданд ва бархе ҳам гуфтанд, ба беморӣ ғолиб омадаанд. Аз ҷумла Баҳриддин Камолиддинов, профессор ва устоди Донишгоҳи миллӣ ҳамроҳ бо духтараш рӯзи 13-уми май даргузаштанд. Инчунин Ҷовид Муқим аз устодони дигари факултаи журналистикаи Донишгоҳи миллӣ ҳам дар саҳифаи фейсбукиаш гуфт, гирифтори бемории COVID-19 шуд ва шифо ёфтааст. Гуфта мешавад чанде аз омӯзгорони дигари ин донишгоҳ ҳам бо нишонаҳои сирояти коронавирус бистариянд.
Сайидамир Вализода, ки собиқаи 40 солаи кор дар соҳаи маорифро дорад, мегӯяд, дар шароити хатари сирояти коронавирус, ки дар макотиби олӣ таътил эълон намуданд, шарт нест омӯзгоронро ба ҷои кор даъват намоянд.
Чун ба назари Вализода, "дар давраи таътил даъват намудани омӯзгорон ба ҷои кор аз камҳавсалагӣ ва назари танги роҳбарони муассисаҳои таълимӣ ва роҳбарони шуъбаҳои маориф аст. Дар шароити технологияи информатсионӣ мешавад чорабиниҳои заруриро тариқи онлайнӣ баргузор кард".
Абдулло Давлат, табиби тоҷики муқими Маскав мегӯяд, дар шароити хатари сирояти коронавирус омӯзгорон ба гурӯҳи осебпазир шомил мешаванд ва бо сар задани уфунате чун коронавирус бояд мактабҳо баста бошанд.
Бо ин вазъ то ҳол маълум нест, ки чанд нафар аз устодони донишгоҳҳо дар Тоҷикистон ба коронавируси нав сироят ёфтаанд. Масъулини Вазорати маориф ва илм то ҳол чунин рақамеро пахш накардаанд.
Давлати Тоҷикистон мавҷудияти коронавирусро дар кишвар танҳо 30-юми апрел тасдиқ намуд. Аммо Вазорати маориф ва илм таътили донишҷӯёни курсҳои 1,2,3-ро аз 4-уми май ва ҷамбасти имтиҳони хатмкунандагони донишгоҳҳоро 15-уми май пешбинӣ кард. Ҳарчанд мунтақидон гуфтанд, ин кор бояд хеле барвақтар сурат мегирифт.
Корбарони азиз!
Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!