Нурулло Алиев, варзишгари тоҷик рақобати дуюми худро дар ташкилоти маъруфи UFC, санаи 11-уми январи соли оянда мегузаронад. Ин хабарро чанд сомонаи варзишӣ пахш карданд ва худи варзишгар ҳам дар саҳифаи Инстаграмаш инро тасдиқ кард.
Рақиби навбатии Нурулло Алиев, варзишгари исроилӣ Янал Ашмози 29-сола аст. Рақобати ду варзишгар дар шаҳри Лас-Вегаси Амрико баргузор мешавад.
Нурулло Алиеви 25-сола, дар корномаи варзишиаш дар муҳорибаҳои омехта, 9 рақобат гузаронда, дар ҳамаи онҳо пирӯз шудааст. Рақиби ӯ Янал Ашмоз 8 ғалаба ва 1 бохт дорад.
Нурулло Алиев аввалин варзишгар аз Тоҷикистон аст, ки шомили ташкилоти маъруфи амрикоии UFC шуд. Алиев моҳи феврали соли 2023 аввалин рақобаташро дар ташкилоти UFC пирӯзӣ анҷом дод. Вале ӯ баъдан осеб бардошта, давоми якуним соли ахир дигар ба майдон набаромад.
Ба ҷуз Нурулло Алиев, се варзишгари дигари тоҷик Лоиқ Раҷабов, Муҳаммад Наимов ва Муин Ғафуров ҳам бо UFC шартнома бастаанд.
ИНЧУНИН, БИХОНЕД: Нурулло Алиев: "На Ҳабиб ҳастам, на худро ба ӯ монанд кардам" ВИДЕО