Дар ин феҳрист Аргентина, қаҳрамони феълии ҷаҳон, бо 1889,02 имтиёз дар байни 210 даста дар ҷойгоҳи аввал аст. Фаронса, ҷоизадори нуқраи қаҳрамонии ҷаҳон, бо 1851,92 имтиёз дар ҷойгоҳи дувум ва Испания, қаҳрамони феълии Аврупо, бо 1836,42 имтиёз зинаи севумро соҳиб шудаанд.
Инчунин ба даҳгонаи беҳтарин тимҳои миллии Англия, Бразилия, Белгия, Ҳолланд (Нидерланд), Португалия, Колумбия ва Италия дохиланд.
Аз байни тимҳои мунтахаби кишварҳои пасошӯравӣ зинаҳои баландро дар феҳристи FIFA Украина (24-ум, 1548,29 имтиёз), Русия (34-ум, 1508,73 имтиёз) ва Узбекистон (60-ум, 1413,06 имтиёз) ба даст овардаанд.
Тоҷикистон дар байни кишварҳои собиқи шӯравӣ аз Қирғизистон (106-ум), Қазоқистон (109-ум), Озарбойҷон (113-ум), Эстония (122-юм), Латвия (137-ум), Литва (139-ум), Туркманистон (142-юм) ва Молдова (149-ум) пеш буда, пас аз Украина (24-ум), Русия (34-ум), Узбекистон (60-ум), Гурҷистон (66-ум), Арманистон (96-ум) ва Беларус (97-ум) ҷойгир шудааст.
Тоҷикистон дар байни тимҳои миллие, ки ба Конфедератсияи футболи Осиё (AFC) шомиланд, ҷойгоҳи 17-умро азони худ кардааст.
Дар Осиё Ҷопон дар мақоми аввал (дар ҷаҳон 16-ум), Эрон дар мақоми дувум (дар ҷаҳон 19-ум) ва Кореяи Ҷанубӣ дар мақоми севум (дар ҷаҳон 23-юм) мебошанд.
Феҳристи FIFA аз соли 1993 ба ин сӯ тартиб дода мешавад. Натиҷаи беҳтарини мунтахаби Тоҷикистон дар тамоми таърихаш дар феҳристи FIFA ҷойгоҳи 99-ум ва натиҷаи пасттаринаш ҷойгоҳи 180-ум мебошад. Феҳристи навбатии FIFA 24-уми октябри соли равон нашр хоҳад шуд.
Бояд зикр намуд, тими миллии Тоҷикистон аз ҳаққи ширкат дар марҳилаи сеюми интихобии Ҷоми ҷаҳон-2026 маҳрум гашт. Ҳамакнун футболбозони тоҷик дар марҳилаи ниҳоии интихобии Ҷоми Осиё-2027, ки 25-уми марти соли оянда оғоз меёбад, иштирок хоҳанд кард.