Тибқи омори созмонҳои байналмилалӣ, ҳар кӯдаки 6 -ум дар Тоҷикистон бо табъизу зӯроварӣ рӯ ба рӯст. Муҷозоти кӯдак дар Тоҷикистон умдатан ҳамчун як бахши тарбияи онҳо талаққӣ мешавад ва ҷомеа онро маҳкум намекунад. Пажӯҳиши ахири Бунёди атфоли СММ маълум кардааст, ки ҳатто худи хурдсолон низ хушунату зӯровариро дар нисбати худ на чун нақзи ҳуқуқ, балки чун як роҳи тарбия қабул мекунанд.
Дар Тоҷикистон беш аз 50 дарсади аҳолӣ сини то 17-сола ҳастанд ва бо вуҷуди талошу корҳои марказу созмонҳои мухталифи умури кор бо кӯдакон, атфоли тоҷик бо надоштани дастрасӣ ба таҳсили хуб, сӯистифода аз нерӯии кории онҳо ва хушунати хонаводагӣ нақзи ҳуқуқ мешаванд.
Таҳлилагрон низ мегӯянд, дар қиёс бо даврони Шӯравӣ, ки дар нисбати кӯдакон муроқибат бештар буд, ҳоло дар ин замина маблағҳои камтар ҷудо мешавад. Аз сӯи дигар волидайн низ барои тарбия ва нигаҳубини фарзандон дасти кӯтаҳ доранд. Ва кӯдакон ҳам дар ин мавҷе, ки ҳар кас барои бақои зиндагии худ талош мекунад ба гунае, дар ин маврид ҳамсангари волидайн ҳастанд.
Браузери шумо HTML5-ро намешиносад
Кӯдакон мехоҳанд, аммо...
Бо вуҷуди мушкилоти фаровони худ, аз орзӯҳои кӯдакон дар ин рӯз метавон пай бурд, ки онҳо ғолибан ба оғӯши гарми падар ва ё модари худ ниёз доранд. Аз ҷумла Зӯҳрои 9-сола мегӯяд, хеле мехоҳад аз забони модар афсона бишнавад ва ё бо кӯмаки падар дарсҳои хонагиро иҷро кунад. Ӯ гуфт, «падарам аз кор дер меояд, аммо модарам аз кори хона монда мешавад ва ягон филм тамошо мекунад. Бо ҳамроҳи ман апаҳоям дарс тайёр мекунанд. Ман орзу дорам, ки падару модарам ҳамеша хурсанд бошанд. Чун вақте падарам ба кор мераванд, модарам дар хона танҳо мемонад ва зиқ мешавад.»
Аммо орзӯи ягонаи Мадина Исломоваи 12-сола, расидан ба дидори падари муҳоҷираш аст. Мадина мегӯяд, падарашро ду сол инҷониб надидааст ва зиндагияшон бо мушкил мегузарад. Вай гуфт, «ҳафтае пеш бо падарам, ки дар Русия аст, сӯҳбат кардам, ваъда дод, ки корҳояш ки хуб шуд, ба наздамон бармегардад. Зиндагиямон чандон хуб нест. Падарам гоҳ-гоҳ пул мефиристад. Чун аз оилаи камбизоат будем, бо мусоидати президент дар мактаб бепул таҳсил мекунам. Хеле мехоҳам, ки падарам биёяд ва зиндагии мо нағз шавад.»