Наздикони Cадриддин Муллоев, сокини шаҳри Кӯлоб, ки бо чанд моддаи Кодекси ҷиноӣ муттаҳам мешавад, аз таъхир дар мурофиаҳои додгоҳӣ ва иҷоза наёфтан ба дидорбинии ӯ изҳори нигаронӣ доранд. Муллоеви 35-сола, ки ба узвият дар созмони мамнӯи "Ҷамоати таблиғ" муттаҳам аст, ба гуфтаи наздиконаш, бо ваъдаи афв аз Туркия ба Тоҷикистон баргашт ва рӯзи 21-уми сентябри имсол боздошт гардид.
Додситонии кулли Тоҷикистон нисбат ба ӯ бар асоси моддаҳои "терроризм", "зархаридӣ" ва "ташкили иттиҳоди ифротӣ ва иштирок дар он" айб эълон кардааст. Моҳи октябри имсол додситон барои Садриддин Муллоев 18 соли зиндон талаб карда буд.
Хайриддин Муллоев, падари Садриддин Муллоев, рӯзи 24-уми декабр ба Радиои Озодӣ гуфт, мақомоти Додгоҳи ноҳияи Синои Душанбе ба онҳо барои дидор бо писараш иҷоза надодаанд. Ӯ гуфт, бори охир, ду моҳ пеш писарашро дида буданд. “Пас аз ин, моро дигар боре ҳам даъват накарданд. Писари хурдиамро фиристодам, ки бубинад бародараш чӣ ҳол дорад. Дар додгоҳ гуфтаанд, ки ҳангоми мурофиа аст ва дидор мумкин нест. Ба вакили мудофеаш низ иҷозаи дидорро намедиҳанд”.
Рӯзи 23-юми декабр додраси Додгоҳи ноҳияи Синои Душанбе Мирзо Одиназода ҳозир нашуд дар бораи парвандаи Садриддин Муллоев суҳбат кунад. Дар Додгоҳи ноҳияи Сино низ аз ҳар гуна шарҳ дар бориа парвандаи Муллоев худдорӣ намуданд.
Раҳмоналӣ Раҷабов, вакили мудфоеи Садриддин Муллоев ба Радиои Озодӣ тасдиқ кард, ки чанд вақт боз нафари зери ҳимояташро надидааст ва барои мулоқот бо вай иҷозаи додрас зарур аст. “Рӯзи ҷумъаи гузашта ба мақомоти додгоҳ муроҷиат кардам. Гуфтанд, ки ҳисоботи солона омода мекунан ва дертар хабардор мекунанд. Бе иҷозаи додрас имкони дидани зерҳимояам нест”, -- афзуд ӯ.
Бархе аз ҳуқуқшиносон, ки таҷрибаи иштирок дар мурофиаҳои додгоҳиро доранд, мегӯянд, додрас бояд ба хонаводаи Садриддин Муллоев ба таври дақиқ далели таъхири тӯлонии мурофиаро шарҳ диҳад. Ҳуқуқшинос Шӯҳрат Қудратов мегӯяд, пас аз талаби додситон ба муҳлати ду моҳ танаффус шудан дар мурофиа суолҳоеро ба вуҷуд меорад.
Қудратов гуфт, «агар Муллоев барои гуфтани сухани охирин омода набошад, ҳақ дорад, аз додрас вақти иловагӣ талаб кунад, вале омода бошад, набояд мурофиа ба таъхир гузошта шавад. Фикр мекунам, ба эҳтимоли зиёд, ҳоло сари афв кардан ё накардани ӯ баҳсу гуфтугӯҳо миёни мақомоти қудратӣ идома дорад ва то ҳол ба хулосае наомадаанд.»
Пайвандони Садриддин Муллоев мегӯянд, мақомот бо ваъдаи афв ӯро ба кишвар баргардониданд ва ҳоло ҳам умед доранд, ки додгоҳ нисбат ба ӯ қонуни афвро татбиқ мекунад.
Аммо тибқи қонуни нави афв, афроде, ки бо моддаҳои "терроризм" ва "зархаридӣ" муттаҳам дониста мешаванд, шомили афв нахоҳанд шуд. Танҳо ин эҳтимол вуҷуд дорад, ки бар асоси як моддаи боқимонда ӯ қисман шомили афв шавад.
Браузери шумо HTML5-ро намешиносад
Нигаронии наздикони Мулло Садриддин ва сукути додрас
Мақомоти Тоҷикистон соли 2014 ба Кодекси ҷиноӣ тағйирот ворид кард, ки бар асоси он, афроди гумонбар дар созмонҳои ифротию террористӣ дар сурати ба мақомот иқрор шудан ва изҳори пушаймонӣ кардан, афв мешаванд.
Боздошти Садриддин Муллоев дар ҳоле буд, ки ӯ баъди ба Душанбе омадан дар як навори видеоӣ гуфта буд, баъди баргаштан ба кишвар мавриди афв қарор гирифтааст. Ӯ дар ин навор мегуфт, аз узвият дар созмони "Ҷамоати таблиғ" пушаймон аст ва аз он даст кашида, ба зиндагии оддӣ рӯ овардааст. Маълум нест, видео дар чӣ шароит сабт шудааст.
"Ҷамоати таблиғ" як созмони мазҳабист, ки бо ҳукми Додгоҳи олии Тоҷикистон фаъолияташ дар ҳудуди кишвар аз соли 2006 мамнӯъ эълон шудааст. Даҳҳо пайрави ин созмон аз шаҳру навоҳии мухталифи Тоҷикистон ба зиндон маҳкум шудаанд.
Садриддин Муллоев соҳиби чаҳор фарзанд буда, домоди руҳонии маъруф Мулло Ҳайдар Шарифзода аст. Ӯро дар шаҳри Кӯлоб бо номи мулло Садриддин мешиносанд. Ба гуфтаи наздиконаш, Муллоев соли 2013 ба Русия ва сипас аз онҷо ба Туркия рафта буд.