Низомиҳои украиниро аз пойгоҳҳои ин кишвар дар Қрим нирӯҳои тарафдори Русия берун мекунанд.
Раҳбари муваққати Украина рӯзи 24 март фармон дод, ки тамоми нирӯҳои низомии ин кишварро аз вилояти Қрим, ки аз тарафи Русия тасарруф шудааст, берун бикашанд.
Кафили раисиҷумҳури Украина Олександр Турчинов ба вазорати дифоъ амр дод, ки тамоми нирӯҳои низомии Украинаро аз Қрим берун бикашанд. Ӯ гуфт, ин фармон ба хотири таҳдидҳоест, ки нирӯҳои Русия ба ҷони низомиҳои украинӣ ва аҳли хонаводаҳои онҳо дар Қрим эҷод кардаанд. Ин эълон ҳамагӣ чанд соат баъд аз тасарруфи пойгоҳи баҳрии Украина дар Феодосияи Қрим аз сӯи нирӯҳои Русия садо дод.
Сухангӯи вазорати дифои Украина гуфт, нирӯҳои Русия субҳи 24 март вориди пойгоҳи баҳрии Украина дар Феодосияи Қрим шудаанд. Ин пойгоҳ аз ангуштшумор таъсисоти низомии воқеъ дар вилояти Қрим аст, ки то ҳол таҳти назорати нирӯҳои Украина боқӣ монда буд. Бино ба хабарҳо, бо вуҷуди тирандозӣ касе дар пойгоҳи Феодосия осеб надидааст. Сухангӯи нирӯҳои Украина дар Қрим гуфт, ҳамлаи нирӯҳои Русия таҳти ҳимояти чархболҳои низомӣ сурат гирифтааст.
Дар ҳамин ҳол, вазири дифои Русия Сергей Шойгу рӯзи 24 март аз маҳалли истиқрори флоти баҳрии Русия дар Севастопол боздид ва бо сарвазири ҷудоиталаби Қрим Сергей Аксёнов мулоқот кардааст. Шойгу контр-адмирал Денис Березовскийро муовини фармондеҳи флоти баҳри Сиёҳи артиши Русия таъин кард. Березовский дар аввали март фармондеҳи нирӯҳои баҳрии Украина таъин шуда буд, вале рӯзе баъд ба тарафи мақомоти рӯ ба Маскави Қрим гузашт. Дар Украина алайҳи Березовский баъди ин бо иттиҳоми "хиёнат ба ватан" парвандаи ҷиноӣ кушодаанд.
Видео аз пойгоҳи Феодосияро инҷо тамошо кунед:
Браузери шумо HTML5-ро намешиносад
Тасарруфи пойгоҳи баҳрии Украина дар Феодосияи Қрим аз сӯи нирӯҳои Русия
Як рӯз пеш вазорати дифои Русия дар пайи тасарруфи пойгоҳи ҳавоии Белбек ва пойгоҳи Новофёдоровка дар наздикии Севастопол гузориш дод, ки алакай дар 189 таъсисоти низомии Украина дар Қрим парчами Русияро афрохтаанд.
Обама: Русия бояд баҳои рафтораш дар Қримро бипардозад
Раисиҷумҳури Амрико, ки бо хабарнигорон баъди мулоқоташ бо сарвазири Ҳолланд Марк Рутте дар Амстердам сӯҳбат мекард, гуфт, Амрико ва Аврупо дар ин масъала, ки Русия бояд "баҳо"-и рафтораш дар Қримро бипардозад, ваҳдати назар доранд. Обама ҳамин тавр ба рӯзномаи ҳолландии "de Volkskrant" гуфт, паёми ӯ ба раҳбарони Аврупо ин аст, ки раисиҷумҳури Русия Владимир Путин ба "дарки паёмадҳои иқтисодиву сиёсии аъмолаш дар Украина" зарурат дорад.
Мулоқоти Обама бо Ҷинпинг дар Гаага
Обама рӯзи 24 март аз Амстердам барои мулоқот бо раҳбари Чин Сӣ Ҷинпинг ва ширкат дар анҷумани амнияти ҳастаӣ ба Гаага рафт. Зоҳиран як мавзӯъи дидори Обама бо Ҷингпинг низ вазъи Украина хоҳад шуд. Чин дар ҳоли ҳозир аз камшумор кишварҳоест, ки рафтори Русия дар Қримро маҳкум накардааст, балки аз раъйдиҳиҳо дар Шӯрио Амнияти СММ дар ин масъала худдорӣ мекунад.
Дар ҳошияи анҷумани ҳастаӣ нишасти сарони гурӯҳи G7, ки 7 кишвари аз нигоҳи саноатӣ пешрафтаи дунё - Амрико, Олмон, Фаронса, Бритониё, Канада, Италия ва Ҷопонро муттаҳид мекунад, ширкат меварзад. Сарони G7 дар Ҳолланд низ масъалаи посухҳои шадидтар ба ишғоли Қрим аз сӯи Русияро баррасӣ мекунанд.
Нишасти сарони G7 дар ҳолест, ки рӯзи якшанбе генерал Филип Бридлов, як фармондеҳи аршади НАТО гуфт, таҷаммӯъи зиёди нирӯҳои Русия дар марзҳои Украина ба вилояти ҷудоиталаби Приднестровйеи Молдова ҳам таҳдид мекунад. Муовини вазири дифои Русия Анатолий Антонов аммо гуфт, ҳузури низомиҳои Русия дар марзи Украина ҷавобгӯи меъёрҳоест, ки созишномаҳои байналмилалӣ муқаррар кардаанд.
Аммо оё дар худи Русия, аз ҷумла дар пойтахташ, Маскав, мардуми оддӣ ба масъалаи Қрим ва таҳримҳои зидди Русия чӣ назар доранд? Бештари ҳамсӯҳбатони Озодӣ дар пойтахти Русия мегӯянд, аз инки Қрим ба Русия пайваст, истиқбол мекунанд. Бархе аз он нигаронанд, ки Русия бояд боз як вилоятро хӯронад. Дар масъалаи таҳримот мардуми Маскав мӯътақиданд, ки ин таҳримҳо зидди атрофиёни Путин буда, ба мардуми оддӣ осебе нахоҳад расонд.
Сӯҳбати мардум дар бораи Қрим ва таҳримотро инҷо тамошо кунед:
Браузери шумо HTML5-ро намешиносад
Қрим ва таҳримот аз нигоҳи мардуми Маскав
Тимошенко: Путин душмани рақами яки Украина аст
Тимошенко ва Путин (Акс аз бойгонӣ)
Сарвазири собиқи Украина Юлия Тимошенко дар як барномаи телевизионӣ раисиҷумҳури Русия Владимир Путинро "душмани рақами яки Украина" номид. Юлия Тимошенко, ки баъди табобат дар Олмон ба Украина баргашт, дар барномаи телевизионии Савик Шустер дар шабакаи "Интер" раисиҷумҳури Русия Владимир Путинро "душмани рақами яки Украина" номид ва изҳори итминон кард, ки Украина Қримро дер ё зуд бар хоҳад гардонд.
Тимошенко шоми 21 март дар барномаи Шустер.LIVE бо як лаҳни шадиде ба рафтори Русия дар Украина баҳо дода, аз ҷумла гуфтааст, ҳадафи Путин нафақат як Қрим, балки тамоми Украина, аз ҷумла пойтахташ, шаҳри Киев, буд, вале "блитскриг(ҳамлаи барқосо) ноком шуд ва имрӯз барои Путин, дар асл оғози анҷом аст."
Тимошенко гуфт, ҳатто агар нирӯҳои НАТО ба кумаки Украина нарасанд, артиши Украина нахоҳад гузошт, ки "нирӯҳои Путин" аз Қрим пой ба вилоятҳои дигари Украина гузоранд. Ӯ изҳори боварӣ кард, ки Путин бо рафтораш дар Украина амалан барои режими худаш дар Русия чоҳ канд ва ин бӯҳрон дар ниҳоят режими Путинро аз байн хоҳад бурд ваё, ба бовари Тимошенко, ӯ моҳе баъд худ дар ҷустуҷӯи миёнаравҳо барои халосиаш аз Қрим хоҳад шуд.
Хонум Тимошенко, ки баъди суқути давлати Виктор Янукович дар поёни моҳи феврал аз зиндон раҳо шуд ва як моҳ боз дар Олмон таҳти табобат қарор дошт, зоҳиран қасд дорад дар интихоботи президентии рӯзи 25 майи Украина номзад шавад, вале расман то кунун ин азмашро эълон накардааст.
Дешнитса: Эҳтимоли ҷанг байни Русияву Украина меафзояд
Кафили вазири хориҷаи Украина Андрий Дешнитса рӯзи 23 март дар сӯҳбат бо телевизиони амрикоии АВС гуфт, имкони ҷанг байни Украинаву Русия торафт бештар мешавад: "Мо намедонам, ки Путин дар сараш чӣ фикр дорад... Аз ин рӯ, вазъ ҳатто назар ба як ҳафтаи пеш таркишбортар мешавад."
Сарвазири рӯ ба Маскави Қрим Сергей Аксёнов дар Симферопол изҳори итминон кард, ки Русия ба хотири ҳимоят аз аҳолии русзабон ба вилоятҳои шарқи Украина ҳам ҳамла хоҳад кард. Ин дар ҳолест ки раисиҷумҳури Русия Владимир Путин қабл аз имзои созишномаи тасарруфи Қрим гуфта буд, ки сарусадоҳо дар бораи эҳтимоли ҳамлаи Русия ба вилоятҳои шарқии Украина асосе надоранд ва масъалаи Қрим комилан дигар буд.
Олександр Турчинов
Дар ҳамин ҳол, Олександр Турчинов, раиси ҷумҳури Украина, рӯзи 23 март гуфт, нерӯҳои Русия, Юлий Мамчур, яке аз фармондеҳи олирутбаи нерӯҳои ҳавоии кишварашро «рабуда» ва ҳоло дар Қрим нигаҳ медоранд. Олександр Турчинов аз Русия хост, билофосила фармондеҳи украиниро раҳо кунад, ки ӯро баъди ишғоли пойгоҳи ҳавоии Белбек дар наздикии шаҳри Севастопол дастгир карданд. Рӯзи шанбе нерӯҳои Русия бо талаби таслим шудан бо зиреҳпӯшҳо ба пойгоҳи Белбек ҳамла бурданд, вале нерӯҳои украинӣ бо муқовимат карданд, ки дар натиҷа як сарбози украинӣ маҷрӯҳ шуд.
Ҳамлаи нирӯҳои Русия ба пойгоҳи Украина дар Белбек
Вазорати дифоъи Русия рӯзи якшанбе гуфт, ки ҳоло дар 189 таъсисоти низомии нимҷазираи Қрим парчамҳои Русияро барафрохтаанд. Рӯзи шанбе дар киштии "Славутич"-и Украина дар Севастопол низ парчами Русияро афрохтаанд.
42 кило тило ва 4,8 млн $ пули нақд аз хонаи як вазири Янукович
Эдуард Ставитский
Вазорати умури дохилаи Украина мегӯяд, аз хонаи Эдуард Ставитский, вазири собиқи энергетикаи Украина 42 кило тило, 4,8 миллион доллар пули нақд ва соатҳои гаронбаҳо пайдо кардаанд. Худи Ставитский аз Украина фирор кардааст.
Арсен Аваков, вазири умури дохилаи Украина дар саҳифааш дар Фейсбук натиҷаи кофтукоб дар манзилҳои Эдуард Ставитский, вазири собиқи энергетика дар ҳукумати Виктор Януковичро чунин натиҷагирӣ кардааст: