Шӯрои сиёсии ҲНИТ шоми 25 август дар як ҷаласаи изтирориаш дар Душанбе қароре қабул кард, ки бар тибқи он анҷумани ин ҳизби сиёсӣ дар мӯҳлати аз пеш муқарраршуда, яъне 15 сентябр, баргузор мешавад. Дар ин ҷаласаи изтирорӣ ду масъала - мӯҳр зада шудани дари қароргоҳи марказии ҲНИТ ва ҷараёни омодагиҳо ба анҷумани 12-уми ҳизб баррасӣ шудааст. Дари қароргоҳи марказии ҲНИТ рӯзи 25 август бо як қарори додгоҳи иқтисодӣ мӯҳр зада шуд ва сабабаш, ба гуфтаи мақомот, дар баҳси соҳибмулки феълӣ ва қаблии бинои мазкур будааст. Аз ин пеш додситонии кулли Тоҷикистон гуфтааст, ки бинои мазкур ба таври ғайриқонунӣ харидуфурӯш шудааст. ҲНИТ дар изҳороташ мегӯяд, ки ин ҳодиса дар фаъолияти ҳизб бетаъсир нахоҳад монд». Саидумар Ҳусайнӣ, муовини аввали раиси ҲНИТ рӯзи 24 август дар сӯҳбат бо радиои Озодӣ гуфт, ин амал идомаи фишорҳои мақомот болои ҳизб буда, ҳоло онҳо мехоҳанд пеши роҳи баргузории анҷумани ҳизбиро бигиранд. Яке аз масоили муҳими ин анҷуман – интихоби раиси нав мебошад.
Дар изҳороти ҲНИТ гуфта мешавад, ки раиси ҳизб Муҳиддин Кабирӣ, ки ним соли охир бо тақозои Шӯрои сиёсӣ дар хориҷа ба сар мебарад, тавассути Интернет дар кори ин ҷаласаи изтирорӣ иштирок кард. Кабирӣ гуфтааст: «ташрифи зиёди мақомот ба қароргоҳи ҲНИТ барои анҷоми санҷишҳои гуногун ҳадафмандона сурат мегирад, вале дар ҳама ҳолат бояд дарк кард, ки аъзои ҲНИТ коре хилофи қонун накардаанд». Муҳиддин Кабирӣ дар изҳороташ пойбандии ҳизбро ба қонунҳои Тоҷикистон таъкид кардааст.
Додгоҳи иқтисодии Душанбе бо дархости Додситонии кулли Тоҷикистон шоми 24 август қароргоҳи марказии Ҳизби наҳзати исломӣ (ҲНИТ), воқеъ дар кӯчаи Борбади пойтахтро бастааст. Ин кор дуруст бист рӯз пеш аз анҷумани ҳисоботӣ ва интихоботии ҲНИТ сурат гирифт ва мавриди нигаронии аъзои ҳизб шуд. Масъулони додгоҳ гуфтаанд, ин кор на ба фаъолияти ҳизби мухолифи наҳзати исломӣ, балки ба баҳси ҳалношудаи Кумитаи давлатии сармоягузорӣ ва амволи давлатӣ бо соҳибмулки асосии бино рабт дорад. Ҳарчанд дар ин қазия аз ягон нафари мушаххас ном бурда намешавад, вале ба қавли мақомот гӯё бинои қароргоҳи марказии ҲНИТ ғайриқонунӣ харидорӣ шуда, ба ширкати "Тиҷорат" тааллуқ доштааст.
Браузери шумо HTML5-ро намешиносад
Қароргоҳи Ҳизби наҳзати исломии Тоҷикистон баста шуд
Бастани қароргоҳи марказии ҲНИТ баъди ду ҳафтаи муҳр задани чопхонааш сурат мегирад. Ду ҳафта пеш намояндагони Вазорати фарҳанг, Кумитаи андоз, "Тоҷикстандарт" ва Идораи санитарӣ-эпидемиологӣ бо мактуби Вазорати фарҳанг ба қароргоҳи ҲНИТ омада, фаъолияти матбаашро мавриди санҷиш қарор доданд. Дар пайи санҷиш ба далели вуҷуди камбудҳои беҳдоштӣ фаъолияти чопхонаи ҲНИТ муваққатан манъ шуд. Чопхонаи ҲНИТ аз соли 2000-ум ба фаъолият шурӯъ карда, дар он ба ҷуз “Наҷот” маҷаллаҳо ва китобҳову дастуроти ҳизб низ чоп мешуд.
Ҳизби наҳзати исломии Тоҷикистон бо 45 ҳазор узваш аз аҳзоби умдаи мухолиф ба ҳисоб мерафт. Ин ҳизб дар интихоботи моҳи марти парлумонӣ аз ду курсияш маҳрум шуд ва мақомот гуфтанд, ки ҲНИТ нуфузашро аз даст додааст ва видеои зиёди сокинон ҳам дар шабакаҳои иҷтимоӣ пахш шуд, ки мегуфтанд, баъди ин аз узвият дар ҲНИТ даст кашидаанд.
Вазорати адлияи Тоҷикистон ҳам гуфт, даҳҳо аризаи узви Ҳизби наҳзатро тариқи почта дарёфт кардааст, ки бо хоҳиши худ аз ин ҳизб рафта, ташкилоти ибтидоияш дар баъзе аз маҳалҳоро барҳам додаанд. Аммо масъулни ҲНИТ мегӯянд, ки ин аризаҳо таҳти фишори мақомот навишта шудааст ва аз эътибор соқит дониста мешавад.
Ҳоло раҳбари ин ҳизб Муҳиддин Кабирӣ дар хориҷа ба сар мебарад ва дар ҷаласаҳои ҳизбаш низ маҷозӣ, яъне тариқи Интернет иштирок мекунад. Ӯ дар нимаҳои моҳи марти соли ҷорӣ аз Тоҷикистон берун рафта, гуфта буд, ки баъд аз як муддати табобат ва иштирок дар ҳамоишҳо дубора ба Ватан бармегардад.
Вале баъдан Шӯрои сиёсии ҲНИТ аз ӯ хост, ки муваққатан ба Тоҷикистон наояд, чун ба иддаои онҳо эҳтимоли ҷисман аз байн бурдани ӯ вуҷуд дорад. Муҳиддин Кабирӣ аз соли 2006, пас аз даргузашти Сайид Абдуллоҳи Нурӣ раҳбарии ҲНИТ-ро бар дӯш дорад ва ҳоло дар матбуот эҳтимоли ба ҷойи ӯ омадани нафари дигар дар анҷумани ҳисоботӣ ва интихоботии моҳи сентябри ҳизбаш ҳадс зада мешавад.
Бархе аз таҳлилгарони сиёсӣ низ дар ҳоли ҳозир се фарзияи "ояндаи ҲНИТ"-ро пешбинӣ мекунанд, ки аввалаш ҳам дар сари ҳизб боқӣ мондани худи Кабирист. Дувумаш ба раҳбарии ҲНИТ расидани Муҳаммадҷони Нурӣ, писари Сайид Абдуллоҳӣ Нурӣ ва севумаш ба ҷиноҳҳо тақсим ва ба ин тариқ аз саҳнаи сиёсӣ канор рафтани ҳизби мухолифи наҳзати исломист. Худи раҳбарияти ҲНИТ низ аз эҳтимоли тағйироти кадрӣ дар ҳизбашон сӯҳбат мекунанд, аммо мегӯянд, ҳамагуна тасмимро дар ин замина раёсати олӣ ва анҷумани ҳизб хоҳад гирифт.