Мақомоти Испания ба минтақаи Валенсия, ки аз обхезиҳои шадид осеб дидааст, иловатан 500 нафар низомиёнро сафарбар кард, то барои поккории оқибатҳои офати табиӣ иштирок кунанд.
Ин қарор дар ҳоле қабул шуд, ки мақомоти маҳаллиро барои вокуниши кунд ба бӯҳрон интиқод мекунанд.
Бар асоси иттилои ахир, дар обхезиҳои ахир на камтар аз 200 нафар ҷон додаанд ва эҳтимоли афзоиши ин омор ҳам вуҷуд дорад. Рӯзи душанбе дар ин минтақа боронҳои сели зиёд борид ва дар натиҷа, пулу роҳҳо, хатҳои барқу лӯлаҳои об хароб гардида, роҳҳои интиқоли хӯрокворӣ осеб диданд.
Барои кӯмак дар поккории оқибатҳо ҳазорҳо нафар сафарбар шудаанд. Хатари бадтар шудани вазъи ҳаво боқӣ мемонад.
Дар Тоҷикистон президент Эмомалӣ Раҳмон дар барқияе ба номи подшоҳи Испания Филипп аз “талафоти бузурги инсонӣ ва харобиҳои зиёд” изҳори тасаллият кардааст.