Бозии ниҳоии қаҳрамонии CAFA-2024 шаби шанбеи 24-уми август дар Варзишгоҳи марказии Душанбе миёни дастаи ғолиби гурӯҳи “А” – Афғонистон - ва тими ғолиби гурӯҳи “В” – Узбекистон – баргузор шуд. Голи ягонаро ба дарвозаи наврасони Узбекистон Аъзамуддин Ҳоҷизода дар дақиқаи 28-уми дидор зад.
Бозӣ барои ҷойи сеюми мусобиқот миёни футболбозони навраси Тоҷикистону Эрон шаби ҷумъаи 23-юми август дар Варзишгоҳи марказии шаҳри Душанбе доир гардид. Замони асосии дидор бо ҳисоби мусовии 1:1 хотима ёфт. Аз рӯи силсилаи пеналти ё зарбаҳои 11-метрӣ мунтахаби наврасони Тоҷикистон бо ҳисоби 4:2 пирӯз шуд. Дарвозабони дастаи Тоҷикистон Абубакр Раҳмонқулов, ки ду тӯби аз пеналти задаи рақибонро баргардонд, беҳтарин бозигари ин дидор эътироф гашт.
Дар бозии тасаллобахш барои ҷойи панҷум дастаҳои мунтахаби наврасони Қирғизистон ва Туркманистон рақобат карданд. Ин бозӣ, ки 23-юми август дар Варзишгоҳи марказии ҷумҳуриявӣ доир шуд, бо ғалабаи наврасони туркман бо ҳисоби 2:0 ба поён расид. Голҳоро Какамурат Бобоев дар дақиқаи 17-ум ва Муҳаммадалӣ Носиров дар дақиқаи 50-ум ба самар расонданд.
Дар мусобиқоти қаҳрамонии CAFA-2024, ки дар Душанбе аз 17-ум то 24-уми август барпо гардид, шаш дастаи мунтахаби наврасони то 17-солаи минтақа – Тоҷикистон, Узбекистон, Қирғизистон, Туркманистон, Эрон ва Афғонистон - иштирок карданд.
Тибқи қуръакашӣ ба гурӯҳи “А” дастаҳои мунтахаби наврасони Тоҷикистон, Қирғизистон ва Афғонистон, ба гурӯҳи «В» тимҳои Узбекистон, Эрон ва Туркманистон дохил шуданд.
Дар марҳилаи гурӯҳӣ дастаҳо аз рӯйи системи даврӣ рақобат карданд. Ғолибони гурӯҳҳо ба финал роҳ ёфтанд. Дастаҳое, ки дар гурӯҳи худ ҷойи дуюмро гирифтанд, дар бозӣ барои ҷойи сеюм мубориза бурданд. Инчунин барои ҷойи панҷум бозии тасаллобахш сурат гирифт.
Дар маросими ҷоизасупорӣ нахуст ба доварони бозии ниҳоӣ бо сарварии Абдулло Давлатов аз Тоҷикистон ҷоизаҳо тақдим гардид. Ҷоизаи “Fair Play” (“Бозии одилона”) ба тими наврасони Эрон супурда шуд. Салмон Ғаффорифавзӣ, бозигари тими Эрон, ки се гол задааст, бо ҷоизаи “Беҳтарин нишонзани мусобиқот” сарфароз гашт. Капитан ё сартими Афғонистон Ҳамид Амирӣ бо ду ҷоиза – “Беҳтарин дарвозабон” ва “Беҳтарин бозигар” – мукофотонида шуд.
Баъдан ба дастаи мунтахаби Тоҷикистон зери раҳбарии сармураббӣ Марко Раҷини, мутахассиси итолиёӣ, медалҳои биринҷӣ эҳдо гашт. Тими наврасони Узбекистон (сармураббиаш Анвар Раҳимов) медалҳои нуқра гирифт. Тими навниҳолони Афғонистон бо сарварии Илёс Аҳмад Манучеҳр бо медалҳои тилло ва Ҷоми қаҳрамони CAFA-2024 (U-17) сарфароз гардид.
Ширкат дар қаҳрамонии CAFA-2024 барои мунтахаби наврасони Тоҷикистон (U-17) як давраи омодагии даста ба марҳилаи интихобии Ҷоми Осиё-2025 маҳсуб мешуд.
Наврасони Тоҷикистон дар марҳилаи интихобӣ дар гурӯҳи «J» бо тимҳои Умон, Сингапур ва Гуам рақобат хоҳанд кард. Бозиҳо дар ин гурӯҳ аз 19-ум то 27-уми октябри соли равон дар Сингапур барпо мегарданд.
Бар асоси натиҷагирии марҳилаи интихобии Ҷоми Осиё-2025 даҳ дастаи ғолиби гурӯҳҳо ва панҷ тими беҳтарини ҷойҳои дуюм ба қисми ниҳоӣ роҳ меёбанд.
Марҳилаи ниҳоии Ҷоми Осиё-2025 миёни дастаҳои наврасони то 17-сола аз 3-юм то 20-уми апрели соли оянда дар Арабистони Саудӣ доир мегардад.
Қаҳрамонии CAFA-2024 байни дастаҳои мунтахаби наврасон (U-17):
Гурӯҳи «А»
Тоҷикистон
Афғонистон
Қирғизистон
Гурӯҳи «В»
Узбекистон
Эрон
Туркманистон
Даври 1-ум
17-уми август (шанбе)
Гурӯҳи “А”
Қирғизистон - Тоҷикистон – 0:3
Гурӯҳи “В”
Туркманистон – Узбекистон – 0:1
Даври 2-юм
19-уми август (душанбе)
Гурӯҳи “А”
Афғонистон - Қирғизистон – 2:0
Гурӯҳи “В”
Эрон – Туркманистон – 6:1
Даври 3-юм
21-уми август (чоршанбе)
Гурӯҳи “А”
Тоҷикистон – Афғонистон - 0:1
Гурӯҳи “В”
Узбекистон – Эрон – 1:0
Мавқеи дастаҳо дар ҷадвали мусобиқот дар гурӯҳҳо: гурӯҳи “А” – 1. Афғонистон – 6 имтиёз (таносуби тӯбҳо – 3-0). 2. Тоҷикистон – 3 (3-1). 3. Қирғизистон – 0 (0-5);
гурӯҳи “В” – 1. Узбекистон – 6 имтиёз (таносуби тӯбҳо – 2-0). 2. Эрон – 3 (6-2). 3. Туркманистон – 0 (1-7).
23-юми август (ҷумъа)
Бозӣ барои ҷойи 5-ум
Қирғизистон – Туркманистон – 0:2
Бозӣ барои ҷойи 3-юм
Тоҷикистон – Эрон – 1:1, аз рӯи пеналти – 4:2
Финал
24-уми август (шанбе)
Афғонистон – Узбекистон – 1:0
Душанбе, Варзишгоҳи марказии ҷумҳуриявӣ