Бонки ҷаҳонӣ ва Вазорати энержии Қирғизистон 27 май сармоягузории иловагӣ ба лоиҳаи “Дастгирии техникии неругоҳи Қамбарота-1”-ро баррасӣ карданд.
Хадамоти матбуотии вазорат иттилоъ дод, ки сармояи иловагӣ ба лоиҳа 13,6 миллион долларро ташкил медиҳад, ки 11 миллион доллари он ҳамчун қарзи бефоиз ба муҳлати 50 сол ироа шуда, 2,6 миллион доллари боқӣ грант хоҳад буд.
"Пули ҷудошуда ба сармоягузории чорабиниҳои муҳим барои омода кардани лоиҳаи бунёди неругоҳ равона мешавад", - афзудааст манбаъ.
Раиси Девони вазирони Қирғизистон Оқилбек Жапаров моҳи ноябри соли 2023 гуфт, кишвараш мехоҳад аз Бонки ҷаҳонӣ барои бунёди "Қамбарота-1" 500 миллион қарз гирад. Қаблан ин бонк барои неругоҳ 5 миллион доллар ҷудо карда буд.