Бозии 1/8-ниҳоии Ҷоми Осиё-2023 миёни дастаҳои мунтахаби Тоҷикистон ва Имороти Муттаҳидаи Араб рӯзи якшанбеи 28-уми январ дар варзишгоҳи Аҳмад бин Алии шаҳри Доҳа соати 19:00 бо вақти маҳаллӣ (21:00 бо вақти Душанбе) оғоз меёбад.
Зимнан, бозии дӯстона миёни тимҳои миллии Имороти Муттаҳидаи Араб ва Тоҷикистон, ки 25-уми марти соли гузашта дар шаҳри Абузабӣ баргузор шуда буд, бо ҳисоби 0:0 анҷом ёфтааст.
Аз рӯи натиҷагирии марҳилаи гурӯҳии Ҷоми Осиё-2023 мунтахаби Тоҷикистон бо касби чаҳор имтиёз дар гурӯҳи «А» мақоми дуюмро касб кард. Мунтахаби Имороти Муттаҳидаи Араб низ бо касби чаҳор имтиёз дар чаҳоргонаи «С» дуюм шуд.
Бозии даври охирин дар гурӯҳи “С” миёни дастаҳои мунтахаби Эрону Имороти Муттаҳидаи Араб, ки шаби 23-юми январ дар шаҳри Ал-Райян, дар варзишгоҳи Education City Stadium гардид, бо пирӯзии эрониҳо бо ҳисоби 2:1 ба поён расид.
Дар бозии дигари ин гурӯҳ, ки ҳамзамон дар варзишгоҳи Абдуллоҳ Бин Халифаи шаҳри Доҳа баргузор шуд, мунтахаби Фаластин дастаи Ҳонконгро бо ҳисоби 3:0 шикаст дод.
Ба ин тартиб, дар гурӯҳи “С” тими миллии Эрон бо касби 9 имтиёз ғолиб шуд. Мунтахаби Иморот бо касби 4 имтиёз ҷои дуюмро азони худ кард. Ҳарду даста ба 1/8 финал баромад.
Мунтахаби Фаластин ҳам 4 имтиёз ба даст овард, аммо аз рӯи таносуби тӯбҳо ҷойи сеюмро гирифт. Фаластиниҳо, ки ҳоло дар байни чаҳор дастаи нишондодҳояш беҳтари ҷойҳои сеюм ҷойгир шудаанд, барои ба даври баъдӣ роҳ ёфтан имкони хуб доранд.
23-юми январ бозиҳои даври охирин дар гурӯҳи “В” барпо гардид. Мунтахаби Сурия дар варзишгоҳи Ал-Байти шаҳри Ал-Хаур дастаи Ҳиндустонро бо ҳисоби 1:0 шикаст дод.
Бозии дигари ин гурӯҳ дар варзишгоҳи Ал-Ҷануби шаҳри Ал-Вакра миёни дастаҳои мунтахаби Австралия ва Узбекистон бо ҳисоби 1:1 хотима ёфт.
Дар гурӯҳи ”В” Австралия бо касби 7 имтиёз мақоми аввал ва Узбекистон бо касби 5 имтиёз мақоми дуюмро соҳиб шуда, ба 1/8 финал роҳ пайдо карданд.
Мунтахаби Сурия, ки бо касби 4 имтиёз дар зинаи сеюм аст, барои дар байни чаҳор дастаи нишондодҳояш хубтари ҷойҳои сеюм талош дорад.
Мусобиқоти қаҳрамонии футболи Осиё дар Қатар бо иштироки 24 тими миллӣ ҷараён дорад. Дастаҳо ба шаш гурӯҳ тақсим шудаанд. Аз ҳар гурӯҳ ду дастаи пешсаф, инчунин чаҳор дастаи беҳтарин аз миёни ҷойҳои сеюм ба даври ҳаштякниҳоии Ҷоми Осиё-2023 роҳ меёбанд.
То ҳоло аз 16 дастаи иштироккунандаи даври ҳаштякниҳоии мусобиқот ҳашттоаш муайян шудааст: Қатар ва Тоҷикистон (гурӯҳи “А”), Австралия ва Узбекистон (“В”), Эрон ва Имороти Муттаҳидаи Араб (“С”), Ироқ (“D”) ва Арабистони Саудӣ (“F”).
Бозиҳои даври охирини Ҷоми Осиё-2023 дар се гурӯҳи дигар - “D”, “Е” ва “F” – рӯзҳои 24-25-уми январ баргузор мешаванд.
Ҷоми Осиё-2023
Гурӯҳи “D”: Ҷопон, Индонезия, Ироқ, Ветнам
24-уми январ (чоршанбе)
Ҷопон - Индонезия, Доҳа, варзишгоҳи Ал-Тумама, 16:30
Ироқ - Ветнам, Ар-Райян, варзишгоҳи ба номи шайх Ҷассим бин Ҳамад, 16:30
Гурӯҳи “E”: Ҷумҳурии Корея, Малайзия, Урдун, Баҳрайн
25-уми январ (панҷшанбе)
Ҷумҳурии Корея - Малайзия, Ал-Вакра, варзишгоҳи Ал-Ҷануб, 16:30
Урдун - Баҳрайн, Ар-Райян, варзишгоҳи Халифа, 16:30
Гурӯҳи “F”: Арабистони Саудӣ, Тайланд, Қирғизистон, Умон
25-уми январ (панҷшанбе)
Арабистони Саудӣ - Тайланд, Ар-Райян, варзишгоҳи Эдюкейшн сити, 20:00
Қирғизистон - Умон, Доҳа, варзишгоҳи Абдуллоҳ бин Халифа, 20:00
1/8 финал
28-уми январ (якшанбе)
Оғози бозӣ – соати 21:00
Тоҷикистон – Имороти Муттаҳидаи Араб
Доха, варзишгоҳи Аҳмад бин Алӣ
Эзоҳ: замони оғози бозиҳо бо вақти Душанбе аст.