Маросими супоридани ҷоизаҳо ба беҳтарин футболбозону мураббиёни ҷаҳон дар асоси натиҷагирии мавсим бо номи The Best FIFA Football Awards 2023 шаби 15-уми январ дар Лондон доир гардид. Аммо Месси дар ин маросим ширкат надошт.
Месси бори сеюм ба унвони беҳтарин футболбози сол аз рӯи фарзияи FIFA даст ёфт. Аз ин пеш ӯ солҳои 2016 ва 2022 барандаи ин ҷоиза шуда буд.
Ба ғайр аз Месси барои ин унвон Эрлинг Ҳоланд («Манчестер Сити»/мунтахаби Норвегия) ва Килиан Мбаппе («ПСЖ»/мунтахаби Фаронса) муддаӣ буданд.
Месси ва Эрлинг Ҳоланд 48-имтиёзӣ ба даст оварданд, аммо аз рӯи шумораи бештари ҷойҳои аввал Месси ғолиб шуд.
Дастоварди асосии ин ситораи дурахшони олами футбол дар мавсими 2022/23 ба унвони қаҳрамони ҷаҳон дар Қатар мушарраф шудани ӯст.
Ҳамчунин Месси соли 2023 дар ҳайати «ПСЖ» қаҳрамони Фаронса гардид ва бо «Интер Майами» барандаи Ҷоми лигаҳо шуд.
Зимнан, Лионел Месси, моҳи октяри соли 2023 бори ҳаштум ҷоизаи нашрияи фаронсавии France Football «Беҳтарин футболбози ҷаҳон»-ро ба даст оварда буд.
Ба ғайр аз ҷоизаи «Беҳтарин футболбози сол”, инчунин дар маросими ботантана ҷоизаҳои дигар ба соҳибонашон тақдим шуд.
Ҳамаи ғолибони номинатсияҳо дар маросими ҷоизасупории The Best FIFA Football Awards 2023:
Беҳтарин мураббии соли 2023 байни мардон — Хосеп Гвардиола («Манчестер Сити»);
Беҳтарин мураббии соли 2023 миёни занон — Сарина Вингман (мунтахаби занонаи Англия);
Мунтахаби рамзии мардонаи соли 2023: Тибо Куртуа; Кайл Уолкер, Ҷон Стоунз, Рубен Диаш; Кевин Де Брёйне, Ҷуд Беллингем, Бернарду Силва; Лионел Месси, Килиан Мбаппе, Эрлинг Ҳоланд, Винисиус Жуниор;
Мунтахаби рамзии занонаи соли 2023: Ирпс, Кармона, Бронз, Гринвуд, Уэлш, Руссо, Ҷеймс, Тун, Бонмати, Морган, Кёрр;
Беҳтарин дарвозабони соли 2023 миёни занон: Мэри Ирпс («Манчестер Юнайтед» ва мунтахаби Англия);
Беҳтарин дарвозабони соли 2023 миёни мардон: Эдерсон («Манчестер Сити» ва мунтахаби Бразилия);
Ҷоизаи фэйр-плей (бозии шаффоф) барои соли 2023— мунтахаби Бразилия барои муборизааш зидди нажодпарастӣ;
Ҷоизаи Пушкаш (голи зеботарин) дар соли 2023 — голи нимҳимоятгари «Ботафого» Гилерме Мадруга ба дарвозаи «Новоризонтино» (1:0) дар бозии даври 14-уми Силсилаи В-и Бразилия;
Беҳтарин мухлиси соли 2023 — мухлиси бошгоҳи футболи аргентинии «Колон»;
Беҳтарин бозигари соли 2023 — Лионел Месси («Интер Майами» ва мунтахаби Аргентина);
Ҷоиза барои рушди футболи занона — Марта (мунтахаби Бразилия);
Беҳтарин футболбоззани соли 2023 — Айтана Бонмати («Барселона» ва мунтахаби Испания).