Фоҷеа шаби 8- уми декабр дар маҳаллаи "Хуҷамбиёи поён"-и пойтахт рух додаааст.
Ҷасади зани сокини ин маҳалларо бо ду духтараш зуҳри имрӯз ба хок супурданд.
Ислом, раиси ин маҳалла дар сӯҳбат бо Радиои Озодӣ марги се нафар аз як оиларо тасдиқ кард, аммо тафсилот надод.
Кумитаи ҳолатҳои фавқулодаи Тоҷикистон дар сӯҳбат бо Радиои Озодӣ гуфт, модару духтарон ҳангоми хоб бар асари заҳролудшавӣ аз дуди ангишт ҷон бохтаанд.
Модар 42 сола буда, духтаронаш яке 18 ва дигари 3 сол доштааст. Аз онҳо ном бурда нашудааст.
Браузери шумо HTML5-ро намешиносад
Марги се узви як оила аз заҳролудшавӣ
Хабарнигори Радиои Озодӣ рӯзи 9-уми декабр ба маҳалли ҳодиса рафт. Наздикони афроди ҷонбохта аз сӯҳбат худдорӣ карда, монеаи наворбардорӣ шудаанд.
Аммо яке аз афроди ошно бо ин хонавода, ба Радиои Озодӣ гуфт, падари оила дар муҳоҷират буда, як духтари дигари онҳо оиладор ва дар хонаи шавҳар будааст. Дар аксе, ки вай ба Радиои Озодӣ фиристод, дида мешавад, ки ҷасади варамидаи модар ва ду духтари рӯйи фарши хона хоб аст.
Ҳар сол бо фаро расидани ҳавои сард сокинони рустоҳои Тоҷикистон хонаҳои худро бо ҳезуму ангишт гарм мекунанд. Дар баъзе маврид риоя накардани қоидаҳои бехатарӣ бо ин гуна фоҷеаҳо меанҷомад.
Дар аввали соли равон ҳам дар ноҳияи Кушониёни вилояти Хатлон як зану шавҳари ҷавон бар асари дуди ангишт дар дохили ҳаммом ҷон додаанд. Дар як ҳодисаи дигар дар ҳамин вилоят моҳи январ падар бо писари панҷсолааш заҳролуд шуда, ба ҳалокат расиданд.
ИНЧУНИН, БИХОНЕД: Ҳалокати зани ҳомила ва шавҳараш аз дуди ангишт дар Хатлон ИНЧУНИН, БИХОНЕД: Марги се узви як оила аз заҳролудшавӣ дар Хуросон ИНЧУНИН, БИХОНЕД: Як марди 80-сола дар Суғд аз дуди ангишт ҳалок шудааст