Рӯзҳои 16-18-уми феврал дар пойтахти Исроил – шаҳри Тел-Авив - мусобиқаи силсилаи ҷаҳонии ҷудо “Tel Aviv Grand Slam 2023” баргузор мешавад.
Ба иттилои сомонаи расмии Федератсияи байналмилалии ҷудо (IJF), дар ин мусобиқа иштироки 398 варзишгар (224 мард ва 174 зан) аз 52 кишвари панҷ қора дар назар аст. Вале дар ин мусобиқаи пурнуфузи байналмилалӣ варзишгарони тоҷик ширкат намеварзанд.
Зимнан, аз кишварҳои собиқи шӯравӣ дар "Tel Aviv Grand Slam 2023" варзишгарони ҳафт кишвар – Гурҷистон (6 мард), Литва (1 мард ва 2 зан), Озарбойҷон (10 мард), Туркманистон (9 мард ва 4 зан), Узбекистон (1 зан), Украина (9 мард ва 7 зан) ва Эстония (4 мард) – ҳунарнамоӣ мекунанд.
Барномаи мусобиқа:
16-уми феврал (панҷшанбе). Қувваозмоиҳо дар вазнҳои -48 кг, -52 кг, -57 кг миёни занон; -60 кг, -66 кг миёни мардон.
17-уми феврал (ҷумъа). Қувваозмоиҳо дар вазнҳои -63 кг, -70 кг миёни занон; -73 кг, -81 кг миёни мардон.
18-уми феврал (шанбе). Қувваозмоиҳо дар вазнҳои -78 кг, +78 кг миёни занон; -90 кг, -100 кг, +100 кг миёни мардон.
Ба ҷуз аз медал, ба ғолибону ҷоизадорони рақобатҳои инфиродӣ мукофоти молӣ супурда мешавад: барои ҷойи 1-ум - 3000 евро, барои ҷойи 2-юм - 2000 евро, барои ҷойҳои 3-юм - 1500-евроӣ.
Инчунин дар “Tel Aviv Grand Slam 2023” варзишгарон барои дарёфти имтиёҳо дар радабандии ҷаҳонӣ ва инфиродии олимпӣ мубориза мебаранд.
Дар ҳамин ҳол се варзишгари тоҷик – Темур Раҳимов, Эмомалӣ Нуралӣ ва Комроншоҳ Устопириён – аз рӯи имтиёзҳои дар мусобиқоти пешин бадастовардаашон дар феҳристи инфиродии олимпӣ ба минтақаи литсензионӣ барои гирифтани роҳхат ба Бозиҳои тобистонаи олимпии соли 2024 дар Пориси Фаронса дохил шудаанд.
Темур Раҳимов дар вазни +100 кило бо 1740 имтиёз дар мақоми аввал аст. Эмомалӣ Нуралӣ дар вазни то 66 кило бо 615 имтиёз дар ҷойи 19-ум қарор дорад. Алъон ҳарду ба қатори соҳибони эҳтимолии роҳхатҳо ба Олимпиадаи Порис-2024 шомиланд.
Комроншоҳ Устопириён, ки дар вазни то 90 кило бо 512 имтиёз дар зинаи 23-юм ҷойгир шудааст, дар ҳамин ҳол бо ин натиҷа меъёри муқарраршудаи квотаи қитъавиро иҷро кардааст.
Зимнан, «Tel Aviv Grand Slam 2023” сеюмин мусобиқаи байналмилалии ҷудо дар мавсими имсола ба шумор меравад. Паҳлавонони тоҷик дар аввалин мусобиқаи имсолаи байналмилалии "фаслҳои ҷудои ҷаҳонӣ" – «Grand Prix Portugal 2023», ки рӯзҳои 27-29-уми январ дар шаҳри Алмадаи Португалия баргузор шуд, натавонистанд медал бигиранд.
Тоҷикистонро дар ин мусобиқаи байналмилалӣ дар рақобатҳо миёни мардон ҳафт варзишгар намояндагӣ кард. Аз байни онҳо танҳо Ҷаҳонгир Маҷидов натиҷаи хубтар нишон дода, дар вазни то 90 кило мақоми ҳафтумро касб намуд.
Аммо дар мусобиқаи дуюми байналмилалии ҷудо дар мавсими ҷорӣ – “Paris Grand Slam 2023», ки рӯзҳои 4-5-уми феврал дар пойтахти Фаронса – шаҳри Порис - доир гардид, ягон варзишгар аз Тоҷикистон иштирок надошт.
Ёдовар мешавем, дар мусобиқаи силсилаи ҷаҳонии ҷудо “Tel Aviv Grand Slam 2022”, ки моҳи феврал дар шаҳри Тел-Авиви Исроил баргузор шуда буд, Тоҷикистонро чаҳор варзишгар – Сомон Маҳмадбеков (-73 кг), Шодмон Ризоев (-81 кг), Ҷаҳонгир Маҷидов (-90 кг) ва Темур Раҳимов (+100 кг) - намояндагӣ карданд. Аз байни онҳо танҳо Раҳимов соҳиби ҷоиза гардид, бо медали биринҷӣ сарфароз гашт.