Дастаи мунтахаби футболи ҷавонони то 20-солаи Тоҷикистон бо роҳбарии сармураббӣ Олег Кубарев, мутахассиси беларусӣ, дар доираи ҷамъомади таълимиву тамринӣ дар Анталияи Туркия бозии охирини санҷишӣ баргузор кард.
Рақиби футболбозони ҷавони тоҷик мунтахаби ҷавонони Узбекистон буд. Бозӣ, ки 14-уми феврал дар маҷмааи варзишии "Астерия Кремлин Палас"-и Кунду баргузор шуд, бо ҳисоби 0:0 хотима ёфт.
Қаблан дар доираи ин ҷамъомад бозиҳои санҷишии футболбозони ҷавони тоҷик бо мунтахаби ҷавонони Ироқ (U-20) бо ҳисоби 0:0, бо дастаи «Бухоро», ки дар Суперлигаи Узбекистон ҳунарнамоӣ мекунад, бо ҳисоби 3:1 ба фоидаи бухороиҳо, бо пешсафи лигаи аввали Полша – бошгоҳи LKS (Клуби варзишии Лодз) бо ҳисоби 1:1, бо мунтахаби ҷавонони Озарбойҷон бо ҳисоби 2:1 ба нафъи дастаи Тоҷикистон ва бо тими «Вишиста Краков»-и Полша бо ҳисоби 2:1 ба фоидаи лаҳистониҳо ба поён расида буд.
Ҳамин тариқ, дастаи мунтахаби ҷавонони Тоҷикистон (U-20) дар доираи ҷамъомади таълимиву тамринӣ дар Анталияи Туркия шаш бозии санҷишӣ анҷом дода, дар яктоаш ғолиб омад, се бозиро мусовӣ карда, дар дутоаш шикаст хӯрд.
Зимнан, мунтахаби ҷавонони Тоҷикистон (U-20) дар марҳилаи ниҳоии Ҷоми Осиё-2023, ки аз 1-ум то 18-уми март дар Узбекистон доир мегардад, дар гурӯҳи «С» бо дастаҳои Урдун (2-юми март), Умон (5-уми март) ва Кореяи Ҷанубӣ (8-уми март) бозӣ хоҳад кард.
Натоиҷи бозиҳои санҷишии мунтахаби ҷавонони Тоҷикистон (U-20) дар Анталияи Туркия:
Тоҷикистон (U-20) – Ироқ (U-20) – 0:0
23-юми январ. Сиде, Туркия. Маҷмааи варзишии «Арслон Закӣ Демирчӣ».
Тоҷикистон (U-20) – «Бухоро» (Узбекистон) – 1:3
Голи Тоҷикистон: Суннатулло Азизов.
27-уми январ. Сиде, Туркия. Маҷмааи варзишии «Арслон Зекӣ Демирчӣ».
Тоҷикистон (U-20) – ЛКС (Лаҳистон) – 1:1
Голҳо: Ҳамадонӣ Камолов, 26 (1:0). Петр Янчукович, 47 (1:1).
31-уми январ. Сиде, Туркия. Маҷмааи варзишии «Арслон Зекӣ Демирчӣ»
Тоҷикистон (U-20) – Озарбойҷон (U-20) – 2:1
Голҳои Тоҷикистон: Салам Ашурмамадов, Алиҷони Айнӣ.
6-уми феврал. Белек, Туркия. Маҷмааи варзишии «Корнелия».
Тоҷикистон (U-20) – «Вишиста Краков» (Полша) – 1:2
Голи Тоҷикистон: Абдулло Шарипов.
11-уми феврал. Белек, Туркия. Маҷмааи варзишии «Сусеси».
Тоҷикистон (U-20) – Узбекистон (U-20) – 0:0
14-уми феврал. Кунду, Туркия. Маҷмааи варзишии «Астерия Кремлин Палас».