Рӯзи сеюми Ҷоми ҷаҳонии футбол-2022 дар Қатар – 22-юми ноябр - чаҳор бозии даври аввал дар гурӯҳҳои С ва D баргузор шуд.
Нахуст бозӣ миёни дастаҳои мунтахаби миллии Аргентина ва Арабистони Саудӣ дар гурӯҳи С доир гардид. Ин бозӣ, ки дар варзишгоҳи «Лусаил Айконик»-и шаҳри Лусаил сурат гирифт, бо пирӯзии мунтахаби Арабистони Саудӣ бо ҳисоби 2:1 ба поён расид.
Ҳисоби бозӣ дар дақиқаи даҳум кушода шуд. Тӯбро аз пеналти ё ҷаримаи 11-метрӣ капитани аргентиниҳо, ҳамлагар Лионел Месси ба нишон расонд.
Дар нимаи аввали дидор бозигарони мунтахаби Аргентина боз се бор тӯбро ба дарвозаи футболбозони араб ворид карданд, вале гол ҳисобида нашуд, зеро ки дар ҳарсе маврид ҳолати нобозӣ ё офсайд мушоҳида гардид.
Нимаи дуюми бозӣ бо ҳуҷумҳои паиҳами мунтахаби Арабистони Саудӣ оғоз ёфт. Ал-Шеҳрӣ Солеҳ дар дақиқаи 49-ум ҳисобро баробар кард. Баъди чаҳор дақиқа голи дуюм ва пирӯзиовари арабҳоро Ал-Доссарӣ Салим зад. Дар ҷараёни бозӣ сардовар ба шаш бозигари саудиҳо корти зард нишон дод, аммо ягон нафар аз бозигарони Аргентина огоҳӣ нагирифт.
Зимнан, бори аввал мунтахаби Аргентина аз тими Арабистони Саудӣ шикаст хӯрд. Ин бохти Аргентина, ки яке аз тимҳои довталаби унвони қаҳрамонии Ҷоми ҷаҳонӣ-2022 ҳисобида мешавад, барои коршиносон ва мухлисон ғайримунтазира буд. Ҳарчанд дар нимаи аввали дидор аргентиниҳо хуб ҳунарнамоӣ карда, мухлисонашонро ба пирӯзӣ умедвор намуда буданд.
Аммо дар нимаи дуюм бозӣ ранги дигар гирифт ва мунтахаби Арабистони Саудӣ дар муддати чаҳор дақиқа ду гол вориди дарвозаи аргентиниҳо кард. Ин амр то андозае руҳияи бозигарони Аргентинаро шикаст ва то охири бозӣ онҳо натавонистанд ҳисобро тағйир диҳанд. Ҳамин тавр, яке аз шигифтиҳои Ҷоми ҷаҳонӣ дар мусобиқоти Қатар рақам хурд.
Мунтахаби Аргентина солҳои 1978 ва 1986 ба унвони қаҳрамони ҷаҳон мушарраф шудааст. Мунтахаби Арабистони Саудӣ бори шашум дар таърихи худ дар марҳилаи ниҳоии Ҷоми ҷаҳонӣ иштирок дорад. Соли 1994 саудиҳо ба ҳаштякфинали қаҳрамонии ҷаҳон роҳ ёфта буданд.
Қаҳрамони феълии ҷаҳон – мунтахаби Фаронса – дар нахустин бозиаш дар гурӯҳи D, ки дар варзишгоҳи «Ал-Ҷануб» барпо гардид, тими Австралияро бо ҳисоби 4:1 шикаст дод.
Дар ин дидор ҳисобро дар дақиқаи 9-ум нимҳимоятгари мунтахаби Австралия Крейг Гудвин кушод. Баъдан мунтахаби Фаронса дар муддати 5 дақиқа ду гол зад (дақиқаҳои 27-ум ва 32-юм). Голҳоро Адриен Рабо ва Оливйе Жиру ба самар расонданд..
Дар нимаи дуюми бозӣ Килян Мбаппе ва Жиру ду гол зада, бозиро бо ҳисоби 4:1 ба нафъи фаронсавиҳо анҷом доданд. Оливйе, ки дар ин бозӣ ду гол зад, шумораи умумии голҳояшро дар ҳайати мунтахаби Фаронса ба 51 расонд ва аз рӯи ин натиҷа ба Тйерри Анри баробар шуд.
Ду бозии дигари рӯзи сеюми мусобиқоти қаҳрамонии ҷаҳон дар Қатар бидуни гол хотима ёфт: гурӯҳи D - Дания – Тунис – 0:0, гурӯҳи C - Мексика – Лаҳистон (Полша) – 0:0.
Ба ин тартиб, мавқеи дастаҳо дар гурӯҳи С аз рӯи натиҷаҳои даври аввал чунин аст: Арабистони Саудӣ (се имтиёз), Лаҳистон ва Мексика (1-имтиёзӣ), Аргентина (0 имтиёз).
Мунтахаби Арабистони Саудӣ бозии навбатиашро 26-уми ноябр муқобили Лаҳистон (18.00 ба вақти Душанбе) анҷом медиҳад, аргентиниҳо бошанд, дар ин рӯз бо Мексика (00.00 ба вақти Душанбе) рақобат хоҳанд кард.
Дар гурӯҳи D аз рӯи натиҷаҳои даври аввал мунтахаби Фаронса (се имтиёз) пешсаф аст, Дания — дуюм (1 имтиёз), Тунис — сеюм (1 имтиёз), Австралия — чаҳорум (0 имтиёз).
Мунтахаби Фаронса бозии навбатиашгро 26-уми ноябр муқобили Дания (21.00 ба вақти Душанбе) баргузор мекунад, австралиягиҳо бошанд, дар ин рӯз бо Тунис (15.00 ба вақти Душанбе) рақобат хоҳанд кард.
Мусобиқаи қаҳрамонии футболи ҷаҳон-2022 дар Қатар, ки 20-уми ноябр шуруъ шуд, то рӯзи 18-уми декабр идома хоҳад кард. Бозиҳо дар ҳашт варзишгоҳи панҷ шаҳри Қатар сурат мегиранд.
Дар марҳилаи гурӯҳӣ 32 дастаи мунтахаб, ки ба 8 гурӯҳи чордастаӣ тақсим шудааст, барои роҳ ёфтан ба даври плей-офф мубориза мебарад. Дастаҳое, ки дар гурӯҳҳо ҷойҳои якуму дуюмро мегиранд, ба даври ҳаштякниҳоӣ роҳ меёбанд.
Таркиби гурӯҳҳо:
гурӯҳи А – Қатар, Эквадор, Сенегал, Нидерланд;
гурӯҳи В – Англия, Эрон, ИМА (Иёлоти Муттаҳидаи Амрико), Уэлс;
гурӯҳи С – Аргентина, Арабистони Саудӣ, Мексика, Лаҳистон (Полша);
гурӯҳи D – Фаронса, Австралия, Дания, Тунис;
гурӯҳи Е – Испания, Коста-Рика, Олмон, Ҷопон;
гурӯҳи F – Белгия, Канада, Марокаш, Хорватия;
гурӯҳи G – Бразилия, Сербия, Швейтсария, Камерун;
гурӯҳи H - Португалия, Гана, Уругвай, Кореяи Ҷанубӣ.
Ҷоми ҷаҳонии футбол-2022 дар Қатар
Ҷадвали баргузории бозиҳо ба вақти Душанбе:
Марҳилаи гурӯҳӣ
20 ноябр, якшанбе
Гурӯҳи А. Қатар – Эквадор – 0:2
21 ноябр, душанбе
Гурӯҳи B. Англия – Эрон – 6:2
Гурӯҳи A. Сенегал – Нидерланд – 0:2
Гурӯҳи B. ИМА– Уэлс – 1:1
22 ноябр, сешанбе
Гурӯҳи C. Аргентина – Арабистони Саудӣ – 1:2
Гурӯҳи D. Дания – Тунис – 0:0
Гурӯҳи C. Мексика – Лаҳистон – 0:0
Гурӯҳи D. Фаронса – Австралия – 4:1
23 ноябр, чоршанбе
Гурӯҳи F. Марокаш – Хорватия − 15:00
Гурӯҳи E. Олмон – Ҷопон − 18:00
Гурӯҳи E. Испания – Коста-Рика − 21:00
Гурӯҳи F. Белгия – Канада − 00:00
24 ноябр, панҷшанбе
Гурӯҳи G. Швейтсария – Камерун − 15:00
Гурӯҳи H. Уругвай –Кореяи Ҷанубӣ − 18:00
Гурӯҳи H. Португалия – Гана − 21:00
Гурӯҳи G. Бразилия – Сербия − 00:00
25 ноябр, ҷумъа
Гурӯҳи B. Уэлс – Эрон − 15:00
Гурӯҳи А. Қатар – Сенегал − 18:00
Гурӯҳи A. Нидерланд – Эквадор − 21:00
Гурӯҳи B. Англия – ИМА − 00:00
26 ноябр, шанбе
Гурӯҳи D. Тунис – Австралия − 15:00
Гурӯҳи С. Лаҳистон – Арабистони Саудӣ − 18:00
Гурӯҳи D. Фаронса– Дания − 21:00
Гурӯҳи C. Аргентина – Мексика − 00:00
27 ноябр, якшанбе
Гурӯҳи E. Ҷопон – Коста-Рика − 15:00
Гурӯҳи F. Белгия – Марокаш − 18:00
Гурӯҳи F. Хорватия – Канада − 21:00
Гурӯҳи E. Испания – Олмон − 00:00
28 ноябр, душанбе
Гурӯҳи G. Камерун – Сербия − 15:00
Гурӯҳи H. Кореяи Ҷанубӣ – Гана − 18:00
Гурӯҳи G. Бразилия – Швейтсария − 21:00
Гурӯҳи H. Португалия – Уругвай − 00:00
29 ноябр, сешанбе
Гурӯҳи A. Эквадор – Сенегал − 20:00
Гурӯҳи A. Нидерланд – Қатар − 20:00
Гурӯҳи B. Эрон – ИМА − 00:00
Гурӯҳи B. Уэлс – Англия − 00:00
30 ноябр, чоршанбе
Гурӯҳи D. Австралия – Дания − 20:00
Гурӯҳи D. Тунис – Фаронса − 20:00
Гурӯҳи C. Арабистони Саудӣ – Мексика − 00:00
Гурӯҳи C. Лаҳистон– Аргентина – 00:00
1 декабр, панҷшанбе
Гурӯҳи F. Канада – Марокаш− 20:00
Гурӯҳи F. Хорватия – Белгия − 20:00
Гурӯҳи E. Коста-Рика – Олмон− 00:00
Гурӯҳи E. Ҷопон – Испания − 00:00
2 декабр, ҷумъа
Гурӯҳи H. Гана – Уругвай − 20:00
Гурӯҳи H. Кореяи Ҷанубӣ – Португалия − 20:00
Гурӯҳи G. Сербия – Швейтсария − 00:00
Гурӯҳи G. Камерун – Бразилия − 00:00
1/8 финал
3–6 декабр
1/4 финал
9–10 декабр
1/2 финал
13–14 декабр
Бозӣ барои ҷои 3-юм:
17 декабр
Финал
18 декабр