Раиси Сенати Қазоқистон Маулен Ашимбоев гуфт, кишвараш омодааст, бар асоси шартҳои муайян ба русиягиҳо иҷозати иқомат диҳад.
Ба гуфтаи ӯ, шаҳрвандони Русия барои дарёфти иҷозати иқомат дар Қазоқистон бояд иҷозатномаи бурунрафт аз кишвари худро дошта бошанд. Дар сурати пешниҳод нашудани чунин санад Қазоқистон иҷозати иқоматро нахоҳад дод.
Ашимбоев афзуд, ки "мо сафари шаҳрвандони Русияро ба кишвари худ маҳдуд карданӣ нестем ва набояд маҳдуд кунем". Вай изҳори умедворӣ кард, ки "вазъ дар Украина ба эътидол хоҳад омад".
Раиси Сенати Қазоқистон бори дигар изҳор дошт, ки мавқеи Остона дар робита ба ҷанги Русия ва Украина тағйир наёфтааст. "Онро танҳо аз роҳи сиёсӣ, созиш ва қарорҳои қобили қабул ҳал кардан мумкин аст", - гуфт Ашимбоев.
Владимир Путин, раиси ҷумҳури Русия, рӯзи 21-уми сентябр аз сафарбар кардани дар кишвараш хабар дод. Баъд аз ин хабар дар фосилаи кӯтоҳе билети парвози ҳавопаймо аз Маскав ба кишварҳое фурӯхта шуданд, ки шаҳрвандони Русия метавонанд, бидуни виза сафар кунанд.