Сабти номи номзадҳо ба мақоми сарвазири нав дар Покистон оғоз шудааст. Пас аз барканории Имрон Хон аз мақоми сарвазири Покистон дар ин кишвар барои интихоби сарвазири нав омодагӣ мегиранд.
Шоми рӯзи 9-уми апрел аксари вакилони порлумон ба тарафдорӣ аз барканории Имрон Хон раъй доданд. Намояндагони ҳизбҳои сиёсии мухолиф дар порлумони ин кишвар сарвазири ҳамакнун собиқро барои бештар шудани мушкилоти иқтисодӣ ва фасоди густарда дар кишвар муттаҳам дониста, ҷалассае барои нобоварӣ ба ӯ даъват карданд.
Дар маҷмӯъ 174 нафар аз 342 вакили порлумони Покистон баъд аз 12 соат баҳс ба Имрон Хон раъйи нобоварӣ доданд.
Асад Қайсар, раиси порлумони Покистон, ки бо Имрон Хон аъзои ҳизби Таҳрики Инсофи Покистон ҳастанд, қабл аз оғози раъйдиҳӣ истеъфо дод. Эҳтимол меравад, ки Маҷлиси миллии Покистон 11-уми апрел барои нахуствазири нав раъй диҳад.
Имрон Хони 69-сола соли 2018 сарвазири Покистон интихоб шуда буд. Дар таърихи 75-солаи ҳукумати Покистон ҳоло ҳеҷ сарвазире натавонистааст, ки то охири мӯҳлат дар мақомаш боқӣ монад.
Имрон Хонро яке аз пуштибонҳо аслии ҳукумати Толибон дар Афғонистон медонанд. Ӯ аз раҳбарони кишварҳои дунё хоста буд, ки бо Толибон ҳамкорӣ кунанд ва ҳукумати ин гурӯҳро ба расмият шиносанд. Ин мавзуро зимни сафараш ба Тоҷикистон, тирамоҳи соли гузашта, низ матраҳ карда буд. Пас аз суҳбат бо Эмомалӣ Раҳмон, президенти Тоҷикистон гуфта буд, ки талош мекунад, то Толибон бо Ҷабҳаи муқовимат гуфтушнид кунанд.
Баҳси барканории ӯ дар Покистон чанд ҳафта боз давом дошт ва дар ин миён хабарҳо мерасад, ки Ҷабҳаи муқовимати миллӣ бо раҳбарии Аҳмад Масъуд, писари Аҳмадшоҳ Масъуд, дар вилоятҳои Панҷшеру Андароби Афғонистон ба Толибон ҳамла кардаанд.
Хабаргузории “Омоҷнюз” гузориш додааст, ки дар ду ҳафтаи охир чанд ҳамлаи Толибон ба Панҷшеру Андароб ноком шудааст ва даҳҳо Толиб куштаву захмӣ шудаанд. Ин хабаргузорӣ видеоӣ, зоҳиран, ҷангиёни фавтидаи Толибонро низ нашр кардааст.
Бархе коршиносон гуфтаанд, ки Покистон даргири баҳси дохилӣ аст, аз ин рӯ, ба Толибон барои мубориза зидди Ҷабҳаи муқовимат кумак накардааст. Масъулони Ҷабҳаи муқовимат иддао доштанд, ки моҳи сентябри соли гузашта Толибон бо кумаки Покистон вориди дараи Панҷшер шуда буданд.
Ин гурӯҳ моҳи августи соли гузашта Афғонистонро тасарруф карданд ва ҳукумати худро эълон намуданд. То ҳол ҳеҷ кишваре ин гурӯҳро ба расмият нашинохтааст. Маълум нест, ки сарвазири ояндаи Покистон нисбат ба ин гурӯҳ чӣ назар хоҳад дошт, вале ба гуфтаи аксар коршиносон, новобаста ба дигар шудани сарвазир сиёсати Покистон дар қиболи Толибон тағйири зиёд нахоҳад кард.
ИНЧУНИН, БИХОНЕД:
Нахуствазири Покистон гуфт, ҳукумати мухолифонро қабул нахоҳад кард Додгоҳи олии Покистон зидди Имрон Хон раъй дод ва порлумони парокандашударо барқарор кардТоҷикистон ва ҳукумати "Толибон". Аз таҳдиду ҳушдорҳо то додугирифти барқу мол"Аҳмад Масъуд барои музокирот ба Тоҷикистон омад, вале аз Толибон дарак нашуд"Раҳмон ва Хон вазъи Афғонистонро баррасӣ кардаандИмрон Хон гуфт, эътирози Раҳмонро ба "Толибон" расонд. Дар Тоҷикистон чӣ интизориҳо доранд?Имрон Хон нагузошт шоире дар Душанбе шеъри танқидияшро барои ӯ бихонадРаҳмон ва Имрон Хон ба гуфтушуниди "Толибон бо тоҷикон" дар Душанбе тавофуқ карданд