Вазорати тандурустии Тоҷикистон бо нашри як баёния аз мусофироне, ки мехоҳанд ба Русия сафар кунанд даъват намудааст, дар телефонҳои ҳамроҳи худ замимаи «Саёҳат бидуни COVID-19» («Путешествую без COVID-19»)-ро насб кунанд. Сипас дар озмоишгоҳҳои эътирофшуда аз ташхиси COVID-19 гузашта, маълумотномаи QR-code бигиранд.
Вазорати тандурустӣ ёдовар шудааст, ки сар аз якуми сентябр мақомоти Русия бидуни рамзи QR-code намегузоранд мусофирон вориди ин кишвар шаванд. Дар Тоҷикистон то 23-уми август 1 миллиону 891 ҳазору 850 нафар шаҳрвандон ваксинаи зидди COVID-19 гирифтаанд. Вояи дуюми ваксина ба беш аз 363 ҳазору 895 нафар тазриқ шудааст.
Дафтари матбуоти Вазорати тандурустӣ мегӯяд, то кунун Тоҷикистон дар доираи барномаи COVAX-и Созмони ҷаҳонии тандурустӣ ва ёриҳои башардӯстонаи кишварҳои алоҳида 4 миллиону 160 ҳазору 740 воя ваксина дарёфт кардааст. Ба кишвар ҳоло чор навъи ваксина - Moderna-и амрикоӣ, "Короновак"-и чинӣ, AstraZeneka-и Британиёву Шведсия ва "Спутник-V"-и русӣ ворид шудааст.
Тибқи қарори Ситоди ҷумҳуриявӣ оид ба пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19 дар Тоҷикистон, аз 3 июли соли равон ваксинаи зидди коронавирус барои шаҳрвандони аз 18-сола ҳатмӣ мебошад.
«Саёҳат бидуни COVID-19» - шарти ҳатмии ворид шудан ба Русия
QR code як рамзи электронии маълумотномаи тиббӣ дар бораи надоштани коронавирус мебошад. Ин рамз барои нишон додан дар бисёр муассисаҳои давлатии санҷишӣ, аз ҷумла, ҳангоми сафар дар фурудгоҳҳои Русия талаб мешавад.