ИМА он чиро, ки як маъракаи танзимшудаи Русия барои дурӯғпароканӣ дар бораи воксинаи сохташуда дар ИМА бар зидди COVID-19 номид, ошкоро маҳкум кард. Нед Прайс, сухангӯи Департаменти давлатии ИМА рӯзи 8-уми март ба хабарнигорон гуфт, ки Русия мисле, ки дар гузашта мекард, аз роҳи пахш кардани иттилои дурӯғин дар бораи воксинаҳое, ки барои наҷоти ҷони одамон сохта шудаанд, мехоҳад эътибори онҳоро ба ҳам занад. Ин изҳорот як рӯзи баъди он нашр шуд, ки ба навиштаи The Wall Street Journal, Маркази ҳамкориҳои ҷаҳонӣ, ниҳоди вобаста ба Департаменти давлатии ИМА маълум кардааст, ки дар пушти чаҳор пойгоҳи интернетие, ки дар ҳамоҳангӣ кор мекунанд, сохторҳои амниятии Русия истодаанд. Ин вебсайтҳо дар талоши таблиғи воксинаи сохти русии Sputnik V бо сиёҳ кардани воксинаи сохти амрикоии Pfizer машғул будаанд. Дар вебсайтҳо хабару гузоришҳое дар бораи гӯё зарарнок будани ду воксинаи сохти Амрико бидуни овардани далели тасдиқкунандаи ин иддаоҳои сиёҳкунанда нашр мешаванд. Сухангӯи Кохи Сафед Ҷен Псаки гуфт, “мо бо ҳама гуна иттилои дурӯғин бо ҳар василае, ки бошад, мубориза мебарем”.
ИМА Русияро аз сиёҳ кардани воксинаҳои амрикоӣ ҳушдор дод
Воксинаҳои ширкатҳои Moderna and Pfizer-BioNTech аз ҷониби ширкатҳои амрикоиву олмонӣ сохта шудаанд