Субҳидин Баҳриддинзода, як масъули Маркази миллии қонунгузорӣ, ки натиҷаи татбиқи се қонуни афви ахирро таҳлил кардааст, рӯзи 3 июн дар як ҳамоиш дар Душанбе гуфт, дар аксари маворид бекорӣ одамонро ба ҷинояткорӣ таҳрик додааст. Ин пажӯҳиш бо ҳимояти Созмони Амният ва Ҳамкорӣ дар Аврупо анҷом ёфтааст.
Баҳриддинзода гуфт, бар пояи омор, 78 дарсади афроде, ки даст ба ҷиноят зада ва маҳкум шудаанд, ҷои кор надоштаанд. Аз ин рӯ, ба таъкиди ӯ, "ба хотири пешгирӣ аз ҷинояткорӣ, қабл аз ҳама фароҳам сохтани ҷойҳои корӣ ба сокинон аҳамияти аввалиндараҷа дорад."
Ин пажӯҳиш собит кардааст, тақрибан ду дарсади онҳое, ки мавриди авф қарор гирифтаанд, дубора ҷиноят содир карда ва пушти панҷараҳои зиндон баргаштаанд.
52 дарсади онҳое, ки дубора ҷиноят содир кардаанд, сабаби ин амалашонро дар набуди ҷои кор гуфтаанд. 21 дарсади ин гурӯҳ гуфтаанд, ки бинобар вазъи сангини иқтисодии хонаводаҳояшон маҷбур шудаанд, ки даст ба ҷиноят зананд.
Дар таркиби ҷиноятҳое, ки ин афрод дубора содир кардаанд, дуздӣ дар ҷои аввал будааст. Яъне, 69 дарсади афроде, ки афв шудаву дубора даст ба ҷиноят задаанд, дуздон будаанд. 11 дарсади дигар, ки дубора даст ба ҷиноят задаанд, одамони машғул ба тиҷорати маводи мухаддир будаанд.
Аз ин рӯ, муҳаққиқон пешниҳод доранд, ки барои дубора ба ҳаёти осоишта баргардонидани зиндониёни пешин, зарур аст, марказҳои вижаи доимоамалкунандаи офиятбахшӣ таъсис дода шавад. То бо кӯмаки ин марказҳо, маҳбсусони собиқ дубора дар ҷомеа мавқеи худро пайдо кунанд.
ТАФСИЛОТИ БЕШТАР НАШР МЕШАВАД