Дар чанд ҷумла
Зарари "рахна шудани пиряхҳо" ба 28 оила дар Тоҷикобод
Бар асари омадани сел дар ноҳияи Тоҷикобод (минтақаи Рашт), ки сабабаш "бориши шадид" ва "рахна шудани пиряхҳо" гуфта шуд, 28 хонавода зиён дидааст.
Ҳодиса рӯзи 6-уми ноябр дар деҳаи Миразиёни ҷамоати Қалъаи Лаби Об рӯй дод.
Кумитаи ҳолатҳои фавқулода рӯзи 9-уми ноябр гуфт, "талафоти ҷонӣ нест", аммо ба чор хона, дувоздаҳ бинои дигар ва дувоздаҳ қитъаи замин осеб расид.
Офати табиӣ ба 750 метр хати об, 6 пул ва беш аз 230 чорво низ зарар расондааст.
Мақомоти Кумитаи ҳолатҳои фавқулода гуфтанд, як кумисюн дар ҳоли таҳқиқ ва ҳисоби зиёни расида аст.
Тоҷикистон дар фасли баҳори имсол шоҳиди омадани селҳои зиёд буд, ки дар натиҷаи он даҳҳо манзили сокинон ва иншооти иҷтимоӣ осеб диданд. Зиёни расида аз офатҳои табиӣ дар шаш моҳи аввали соли 2024 қариб 131 миллион сомонӣ (12 миллион доллар) эълон шуд.
Ҳамаи хабарҳои имрӯзро дар инҷо бихонед
Зеленский гуфт, Русия боз ба зербунёдҳои Украина зарба зад
Владимир Зеленский, раисҷумҳури Украина, рӯзи 19-уми март гуфт, ки Русия дигарбора ба зербиноҳои энергетикии кишвараш зарба задааст.
Ҳамлаҳо, ба гуфтаи ӯ, чанд соат пас аз суҳбати телефонии Владимир Путин, президенти Русия бо Доналд Трамп, раисҷумҳури Амрико сурат гирифт.
Путин дар ин суҳбат розӣ шудааст, ки барои расидан ба оташбаси комил сӣ рӯз ҳамлаҳоро ба бахши энержии Украина бас мекунад.
Зеленский рӯзи чоршанбе дар нишасти матбуотӣ дар Ҳелсинки гуфт, “150 ҳавопаймои бесарнишини Русия ба қаламрави Украина ҳамла кард ва ба зербиноҳои энергетикӣ зарба зад.”
“Бояд суханони Путин санҷида шавад... Мо рӯйхати биноҳо ва иншоотеро, ки ҳавопаймоҳои бесарнишин ва мушакҳои Русия задаанд, таҳия хоҳем кард. Агар русҳо нишон гирифтани биноҳои моро бас кунанд, мо ҳам зарбаҳои худро ба қаламравҳои Русия қатъ хоҳем кард,” - афзуд ӯ.
Дар ҳамин ҳол, мақомоти Русия гуфтанд, ки ҳавопаймоҳои бесарнишини украинӣ ба як анбори нафт дар вилояти Краснодари Русия зарба задаанд.
Боздошти Акрам Имомоғлу, шаҳрдори Истанбул
Акрам Имомоғлу, шаҳрдори Истанбул, рӯзи 19-уми март бо иттиҳоми фасод ва ёрӣ ба як гурӯҳи террористӣ боздошт шудааст.
Вай рақиби сиёсии раисҷумҳури Туркия Раҷаб Таййиб Эрдуғон ном бурда мешавад.
Ба гузориши “Рейтерс”, ҳизби умдаи мухолифи ҳукумати Туркия боздошти Имомоғлуро “табаддулоте алайҳи раисҷумҳури оянда” номид.
Боздошти Имомоғлу дар идомаи саркӯби чандмоҳаи чеҳраҳои мухолиф сурат гирифт. Иқдоме, ки дорои ангезаи сиёсӣ гуфта шудааст.
Ҳукумати Туркия иддаои мухолифонро рад карда, гуфтааст, низоми додгоҳӣ дар ин кишвар мустақил аст.
Додгоҳе дар Амрико ба нафъи USAID қарор содир кард
Додраси Додгоҳи федеролӣ дар Мериленд амр дод, ки кори Оҷонси рушди байнулмилалии Амрико (USAID) барқарор карда шавад, "чун бастанаш ғайриқонунӣ мебошад".
Дар қарор гуфта мешавад, ки маъмурияти президент Доналд Трамп бо масдуд кардани кори USAID метавонист ба поймоли муқаррароти конститутсионӣ даст зада бошад.
Қарори 68-саҳифаиро додрас Теодор Чуанг содир кард.
Додрас гуфт, ин амал на танҳо ба ҷабрдидаҳо ва кормандони собиқи Оҷонсӣ, балки ба манфиатҳои иҷтимоии Амрико ҳам осеб расониданд
"Намояндагони интихобшудаи ҷомеаро дар Конгресс аз ҳаққи конститутсионии онҳо барои қабули қарор дар робита бо замон, шева ва далели бастани Оҷонсӣ маҳрум карданд," – гуфта шудааст дар қарор.
Додрас амр дод, ки шикояткунандагонро дар корашон барқарор кунанд ва ба онҳо ба дафтари корие, ки онҳо мерафтанд, дастрасӣ кафолат дода шавад.
Амр шудааст, ки дастрасии ҳама кормандони USAID ба почтаи кории электронӣ барқарор шавад.
Додрас ба Департаменти самаранокии кори ҳукумат (DOGE) таҳти раёсати Илон Маск амр дод, ки бе иҷозаи мустақими мақомдори ин оҷонсӣ дигар ҳеч иқдоме нисбат ба USAID наандешад. Вазифаи мудирияти муваққатии оҷонсиро маъмурияти Трамп ба дӯши Марко Рубио, котиби давлатии Амрико вогузор кардааст.
DOGE бо як қарори Трамп ба хотири назорат аз сарфу харҷи давлат таъсис шуд. Илон Маск, ки роҳбари ин идора таъйин шудааст, гуфт, USAID ниҳоди номуассир аст ва бояд баста шавад.
Кохи Сафед аз ин қарори миллиардер ҳимоят намуд.
Кормандони Оҷонсӣ ихроҷ ё ба рухсатӣ фиристода шуда, барояшон кор дар аксар тарҳҳои ин ниҳод манъ гардид. NPR гуфт, бисёре аз онҳо қарорро ҳангоми кор дар хориҷа гирифтанд.
Дар моҳи феврал созишномаи Оҷонсӣ бо бинои кории он, ки қароргоҳи USAID ҷойгир мебошад, қатъ карда шуд.
Илон Маск дар шабакаи “Х" қарори додгоҳро танқид намуд. Маск навиштааст, додрасе, ки аз ҷониби собиқ президент Барак Обама таъин шуда буд, бар пояи ақидаҳои пуштибонӣ аз демократҳо чунин қарорро қабул кард.
Файзалӣ Идизода – раиси нави Маҷлиси Намояндагон дар Тоҷикистон
Ҳайати нави Маҷлиси Намояндагон дар Тоҷикистон, ки асосан аз аъзои ҳизби ҳоким ва ҷонибдорони ҳукумат иборат аст, рӯзи 19-уми март ба кор сар кард.
Файзалӣ Идизода дар овоздиҳии пинҳонӣ раиси нави Маҷлиси Намояндагон интихоб шудааст. Вай 48-сола аст ва аз ноҳияи Рашт.
Ин курсӣ тибқи қонунҳои нонавишта дар Тоҷикистон марбути намояндагони шарқи кишвар аст. Тайи панҷ соли охир ин мақомро Маҳмадтоир Зокирзода бар уҳда дошт.
Шермуҳаммади Шоҳиён, раиси пешини Додгоҳи олӣ муовини аввал, Мавсума Муинӣ ва Азиз Гиёзода муовинҳои раиси Маҷлиси Намояндагон интихоб гардидаанд.
Ҳамаи онҳо намояндагони ҳизбе ҳастанд, ки раёсаташро президент Эмомалӣ Раҳмон бар уҳда дорад ва пайваста барои инҳисори қудрат танқид мешавад.
Интихоботи порлумонии Тоҷикистон рӯзи 2-юми марти имсол баргузор шуд.
Мақомоти Тоҷикистон ва созмону кишварҳои ҳампаймони Душанбе маъракаро “озоду шаффоф”, вале намояндагони мухолифин “сохтаву ғайриозод” донистанд.
Нозирони Созмони Амнияту Ҳамкорӣ Дар Аврупо ва баъзе аз расонаҳои мустақилу байнулмилалӣ, аз ҷумла Радои Озодӣ, Би-би-сӣ ва “Азия Плюс” аз назорат ва гузоришдиҳӣ дар бораи интихобот маҳрум буданд.
Вакилони порлумонро дар Тоҷикистон дар панҷ сол як дафъа интихоб мекунанд. Онҳо ҳамвора барои сукут дар баробари душвориҳои мардум ва қабули бечунучарои қонунҳои пешниҳодии ҳукумат танқид мешаванд.
Гапи Озод: Интихобот ё таъйинот?
Даври нави музокирот барои поён додан ба ҷанги Украина дар Ҷидда
Даври нави гуфтушунид барои поён додан ба ҷанг дар Украина рӯзи 23-юми март дар шаҳри Ҷиддаи Арабистони Саудӣ баргузор хоҳад шуд. Дар ин бора Стив Виткофф, фиристодаи президенти Амрико Доналд Трамп, дар суҳбат бо телевизиони Fox News хабар дод.
Ин хабар баъд аз анҷоми гуфтугӯи телефонии президентони Амрико ва Русия шоми 18-уми март нашр шуд.
Виткофф гуфт, ин навбат ҳам ба музокира бо мақомоти Русия Марко Рубио, котиби давлатии Иёлоти Муттаҳида ва мушовири Трамп дар умури амнияти миллӣ Майк Волтс сафар мекунанд.
Онҳо дар моҳи феврал бо намояндагони Русия ва моҳи март бо фиристодаҳои Украина гуфтугӯ карда буданд.
Феълан маълум нест, ки баъди чор рӯз маҳз бо кадоме аз ин ду кишвар гуфтугӯҳо дар назар гирифта шудааст. Ҳанӯз на Русия ва на Украина нагуфтаанд, ки дар нишасти Ҷидда иштирок хоҳанд кард ё на.
Виткофф гуфт, музокираҳои навбатӣ ба ҷузъиёти вобаста ба оташбас бахшида мешавад. Украина қаблан ба оташбаси сирӯза розӣ шуд ва Русия то ҳол ба ин пешниҳод посухе надодааст.
Вале дар поёни суҳбати телефонии Трамп ва Путин дар рӯзи 18-уми март Кремл хабар дод, ки Русия омода аст ҳамлаҳоро ба бахши энержӣ ба муддати 30 рӯз бас кунад.
Парвандаи ҷиноӣ зидди як милиса ба гумони "қаллобӣ"
Оҷонсии зидди фасоди Тоҷикистон аз боз шудани парвандаи ҷиноӣ нисбати як корманди Раёсати ВКД дар Хатлон ба иттиҳоми "қаллобӣ", хабар дод.
Ин фард ба гирифтани 20 ҳазор доллар аз як сокини ин вилоят барои аз ҷавобгарии ҷиноӣ озод кардани бародараш, гумонбар дониста мешавад.
Оҷонсӣ аз ин нафар Назаров Ф., ном бурдааст, ки ба ҳайси ваколатдори оперативии шуъбачаи мубориза зидди гардиши ғайриқонунии маводи мухаддир дар Раёсати Вазорати корҳои дохилӣ дар вилояти Хатлон кор мекардааст.
Ба гуфтаи манбаъ, Назаров "бо истифода аз мақоми хидматӣ бо роҳи фиреб ба боварии як шаҳрванд даромада, бо баҳонаи қатъ кардан ва аз ҷавобгарии ҷиноятӣ озод намудани бародараш, маблағи умумии 20 ҳазор доллар талаб карда гирифтааст".
Аммо ба гуфтаи манбаъ, баъди гирифтани маблағ, ӯ ба нафъи ҷониби дигар коре анҷом надодааст.
Бо ин ҳол, Оҷонсии зидди фасод нагуфтааст, ки Назаров Ф.З боздошт шудааст, ё не. Ҳамчунин, маълум нест, ки худи ӯ дар робита ба ин ҳодиса чӣ назар дорад.
Фасод аз мушкилиҳои асосии Тоҷикистон гуфта мешавад ва солона даҳҳо корманди давлатӣ, аз ҷумла кормандони мақомоти ҳифзи ҳуқуқ ва мизи ҳарбӣ бо ҷурми гирифтани пора дастгир мешаванд.
Порлумони Тоҷикистон созишномаи марзиро бо Қирғизистон қабул кард
Вакилони Маҷлиси Намояндагон, палатаи поёнии порлумони Тоҷикистон, 18-уми март, дар рӯзи охирини кори панҷсолаи худ созишномаи сарҳадиро бо Қирғизистон қабул карданд.
Дар ин рӯз ду ҳуҷҷати дигар дар бораи бунёду истифодаи роҳҳо ва дастрасӣ ба иншооти обу энержӣ дар марзи ду кишвар ҳам пазируфта шуд.
Аз рӯзи 19-уми март ҳайати нави вакилони порлумон ба кори худ сар мекунад.
Созишномаи марзии Тоҷикистон ва Қирғизистон рӯзи 13-уми март дар шаҳри Бишкек имзо шуд.
Ҳарчанд мақомоти Қирғизистон баъзе ҷузъиёти онро ошкор карданд, ҷониби Тоҷикистон на дар гузашта ва на ҳоло тафсилоти музокирот ва созишномаро нагуфтааст.
Дар як ҳуҷҷате, ки Радиои Озодӣ дид, созишномаи марзии Тоҷикистону Қирғизистон "бемуҳлат аст" ва тибқи он "парвози ҳама гуна ҳавопаймоҳои бесарнишин дар қитъаҳои сарҳадӣ манъ аст".
"Марзро нерӯҳои сарҳадӣ аз дидбонгоҳҳо бо истифода аз аслиҳа ва техникаи низомии муқаррарӣ ҳифз намоянд. Тоҷикистону Қирғизистон ба ҷобаҷоии техникаи вазнини ҳарбӣ, қувваҳо ва воситаҳои иловагӣ дар минтақаҳои наздисарҳадӣ роҳ надиҳанд," – гуфта шудааст дар санад.
Тоҷикистон ва Қирғизистон беш аз ҳазор километр сарҳад доранд. Тақрибан панҷсад километри он дар се соли охир мушаххас шудааст.
Номуайянии марз дар гузашта сабаби ҷангу хунрезӣ байни ду кишвари Осиёи Марказӣ шуда буд. Аз ҷумла, дар муноқишаи солҳои 2021-2022 аз ду тараф даҳҳо кас куштаву захмӣ гаштанд.
Оташбас, замин ва нерӯгоҳ. Трамп ва Путин дар бораи чӣ хоҳанд гуфт?
Доналд Трамп, президенти Амрико, гуфтааст, рӯзи 18-уми март бо Владимир Путин, президенти Русия дар бораи хатми ҷанг дар Украина суҳбат мекунад.
Вай умед дорад, Путин тарҳи оташбаси 30 рӯзаро, ки Украина ба он розӣ шудааст, қабул мекунад: “Бубинем, ки то куҷо метавонем ҷангро поён диҳем. Фикр мекунам, имкони хуб дорем."
Трамп дар суҳбат бо хабарнигорон гуфт, бо Путин дар масъалаи ба кӣ додани нерӯгоҳи ҳастаии Запарожйе ва гузашти ҳудудӣ низ гап мезанад.
"Бале, дар бораи замин гап мезанем. Онҷо замини зиёд аст. Медонед, вазъ дар муқоиса ба пеш аз ҷанг хеле фарқ мекунад. Дар бораи замин гап мезанем ва дар бораи нерӯгоҳ. Ин як баҳси бузург аст, вале мо аз пеш бо Украина ва Русия дар бораи бисёр масъалаҳо суҳбат кардаем," – афзуд ӯ.
Раисҷумҳури Амрико дақиқ нагуфт, кадом нерӯгоҳро дар назар дорад, вале нерӯгоҳи Запарожйеи Украина, бузургтарини нерӯгоҳи ҳастаӣ дар Аврупо таҳти ишғоли Русия қарор дорад. Русия ва Украина борҳо бар сари фалокати эҳтимолӣ аз ин неругоҳ ҳамдигарро айбдор кардаанд.
Дар Кремл ҳам тасдиқ карданд, ки Путин бо Трамп телефонӣ суҳбат мекунад. Ҳарчанд Трамп дар бораи замину нерӯгоҳ гуфт, мақомоти Русия гуфтанд, то анҷоми суҳбати телефонӣ ин мавзуъро шарҳ намедиҳанд.
Ҳамлаи беш аз 40 паҳпод ба минтақаҳои Русия. Захмиҳо ҳастанд
Дар ҳамлаи ҳавопаймоҳои бесарнишин ба вилояти Белгород дар Русия як кас захмӣ шудааст.
Дар ин бора саҳифаи "Пепел" дар Телеграм хабар дод, ки вазъро дар минтақаҳои наздисарҳадӣ бозтоб медиҳад. Вячеслав Гладков, волии Белгород, хабари захмӣ шудани як сокини 18-соларо тасдиқ кард.
Суқути ҳавопаймои бесарнишин сабаби сӯхтор дар як маркази савдо дар наздикии “Белгород Арена” шудааст.
Дар вилояти Красноярск бар асари таркиши ду мусофирбар панҷ нафар маҷруҳ гашт. Ба гузориши саҳифаи “Маш” дар Телеграм, осебдидаҳо кормандони ширкати “Краснояругский бройлер” ҳастанд.
Дертар Гладков таркиши автобусро тасдиқ кард, вале гуфт, ки се кас захмӣ шуд.
Вазорати дифои Русия аз маҳви 46 ҳавопаймои бесарнишини украинӣ хабар дод. Ба иттилои манбаъ, 41 ҳавопаймои бесарнишин дар фазои Белгород сарнагун карда шудааст.
Александр Хинштейн, раиси вилояти Курск, мегӯяд, дар ҳамлаи ҳавопаймоҳои бесарнишин ба ин минтақаи Русия панҷ кас маҷруҳ шуд.
Раҳмону Путин аз додугирифту ҳамкорӣ гуфтанд, аз вазъи муҳоҷирон чӣ?
Додугирифти Тоҷикистон ва Русия дар соли 2024 ба тақрибан ду миллиард доллар расидааст. Ҳудуди ҳабдаҳ дарсад бештар аз соле қабл аз он.
Ин омор дар мулоқоти президенти Русия Владимир Путин бо раисҷумҳури Тоҷикистон Эмомалӣ Раҳмон рӯзи 17-уми март дар Маскав садо дод.
Ба иттилои Кремл, Путин гуфтааст, "равобити мо рушд мекунад. Сармоягузорӣ ҳам тақрибан ҳамин хел ва ҳатто андаке бештар аз 1,6 миллиард долларро ташкил медиҳад."
Эмомалӣ Раҳмон аз "рушди босуръати равобит" байни ду кишвар ситоиш карда, гуфтааст, Маскав "шарики пешрафтаи тиҷоратӣ ва иқтисодӣ"-и Тоҷикистон мемонад.
Дертар ҳардуи онҳо ба хабарнигорон гуфтанд, ки масъалаи муҳоҷирати кориро ҳам баррасӣ карданд.
“Имрӯз мо ҳамкорӣ дар соҳаи муҳоҷирати меҳнатиро муфассал баррасӣ намудем,” - гуфт президенти Тоҷикистон, вале тафсилот надод.
Раисҷумҳури Русия изофа кард, ки “ҳудуди як миллион шаҳрванди Тоҷикистон дар Русия кору зиндагӣ мекунанд. Онҳо дар соҳаҳои гуногун, бавижа сохтмон ва хоҷагии манзилию коммуналӣ, нақлиёт ва ҳамлу нақл кор мекунанд ва дар рушди иқтисоди Русия саҳми намоён доранд. Ва муҳим он аст, ки пулҳои фиристодаи онҳо ба ватан дастгирии қобили мулоҳиза ҳам барои Тоҷикистон ва ҳам барои хонаводаҳояшон аст.”
Аммо дар бораи он чӣ ки дар мулоқоти як ба як ва паси дарҳои бастаи ду тараф садо додааст, иттилое дар даст нест.
Ин ҳам дар ҳолест, ки тайи як соли охир, баъди ҳамлаи маргбор ба "Крокус", муҳоҷирони кории тоҷик дар Русия дар шароити сахттарин қарор доранд.
Сафари президент Раҳмон ба Маскав низ дар остонаи яксолагии ҳамла ба толори консертии “Крокус" сурат гирифт. Бо гумони ҳамла, тарҳрезӣ ва кумак дар он беш аз бист нафар, асосан шаҳрвандони Тоҷикистон гумонбар дониста мешаванд.
Ниҳодҳои интизомии Русия ҳангоми боздошту бозпурсии шаҳрвандони Тоҷикистон ба таври ошкор онҳоро шиканҷа карданд.
Бо ин вуҷуд Русия макони муҳими муҳоҷирати кории шаҳрвандони Тоҷикистон боқӣ мемонад.
Трамп дар бораи поёни ҷанг дар Украина бо Путин гап мезанад
Доналд Трамп, президенти Амрико, гуфт, рӯзи 18-уми март бо раисҷумҳури Русия Владимир Путин телефонӣ суҳбат хоҳад кард. Вай талош дорад, ки ба ҷанги сесолаи Маскав дар Украина поён бахшад.
"Рӯзи сешанбе бо президент Путин суҳбат хоҳам кард. То ин дам корҳои зиёде анҷом дода шуд," – гуфт Трамп шоми 16-уми март ба хабарнигорон ҳангоми бозгашт аз осоишгоҳаш дар Флорида ба Вашингтон.
"Мехоҳем, бубинем, ки оё ҷангро ба поён расонда метавонем ё на. Шояд тавонем, шояд натавонем, аммо фикр мекунам, ки мо шонси бисёр хуб дорем," – афзуд ӯ.
Хабарнигорон аз раисҷумҳури Амрико дар бораи гузаштҳои эҳтимолӣ пурсиданд. Доналд Трамп гуфт, "мо дар бораи замин, дар бораи нерӯгоҳҳои барқӣ суҳбат хоҳем кард."
Кремл то ҳол дар ин бора изҳори назар накардааст.
Мақомоти Украина ва Амрико баъд аз музокироти худ дар Арабистони Саудӣ рӯзи 11-уми март эълон карданд, ки Киев ба пешниҳоди оташбаси 30-рӯза розӣ шуд, ба шарте ки Русия онро бипазирад.
Маскав то кунун ба ин пешниҳод дилгармӣ нишон надодааст. Баръакс, Путин шартҳои изофӣ, аз ҷумла қатъи интиқоли силоҳро аз Амрико ба Киев дар миён гузошт.
Дар ҳамин ҳол, як мансабдори баландпояи Русия гуфт, Маскав исрор хоҳад кард, ки Украина иҷозаи пайвастан ба НАТО-ро надошта бошад ва дар ҳама гуна созиши сулҳ кишвари бетараф боқӣ монад.
Киев дар гузашта чунин шартҳоро рад карда буд.
Шарти Пентагон барои қатъи ҳамла ба ҳусиҳои Яман
Пентагон ё Вазорати дифои Иёлоти Муттаҳидаи Амрико гуфтааст, то замоне ки ҳусиҳои Яман монеи ҳаракати киштиҳо дар Баҳри Сурх мешаванд, амалиёти зидди ин гурӯҳ идома хоҳад кард.
Ҳусиҳои Яман, ки аз ҷониби Эрон пуштибонӣ мешаванд, пас аз ҳамлаҳои Амрико эълон карданд, ки интиқом мегиранд.
Амрико рӯзи 15-уми март ҳамла ба ҳусиҳои Яманро оғоз кард.
“Лаҳзае, ки ҳусиҳо гуфтанд, ба киштӣ ва ҳавопаймоҳои шумо ҳамла намекунем, амалиёт бас мешавад, вагарна беист идома медиҳем,” – гуфт Пит Ҳегсет, вазири дифои Амрико.
Вазорати тандурустии ҳусиҳои Яман гуфт, дар ин ҳамлаҳо 31 нафар кушта шуданд.
Сухангӯи артиши ҳусиҳо эълон кард, ки нови ҳавопаймобари Амрико ва киштиҳои ҷангии ин кишвар дар Баҳри Сурх бо мушакҳои дурпарвоз ва бесарнишинҳо ҳамла кард. Пентагон ба ин иддао ҳанӯз вокуниш накардааст.
Фармондеҳи марказии артиши Амрико рӯзи шанбе наворе нашр кард, ки ҳавопаймоҳои ҷангии Иёлоти Муттаҳида аз макони номаълум парвоз карда, ба ҳадафҳо зарба мезананд. Маскав аз Вашингтон хостааст, ки ҳамлаҳоро қатъ кунад.
Ҳусиҳо ҳафтаи гузашта эълон карданд, ки агар Исроил роҳи кумакҳои башардӯстона ба Ғаззаро боз накунад, ба киштиҳои ин кишвар дар Баҳри Сурх ҳамла мекунанд.
Ин гурӯҳ бо пуштибонӣ аз фаластиниён аз моҳи октябри соли 2023 эълон кард, ки ба киштиҳои марбут ба Исроил ҳамла мекунад.
Доналд Трамп аз Эрон хост, ки аз пуштибонии ҳусиҳои Яман даст кашад, вагарна ҷавоб хоҳад дод. Эрон ҳамлаҳои Амрикоро маҳкум кард ва Сипоҳи посдорони ин кишвар гуфт, ҳусиҳо худашон тасмим мегиранд, ки чӣ кор кунанд.
Чоруним сол зиндон. Ҳукми нави Михаил Саакашвилӣ
Додгоҳе дар Тбилиси раисҷумҳури пешини Гурҷистон Михаил Саакашвилиро бо иттиҳоми ғайриқонунӣ гузаштан аз сарҳад дар соли 2021 ба чоруним сол зиндон маҳкум кард.
Ба гузориши расонаҳои Гурҷистон аз 17-уми март, Саакашвили дар мурофиа ширкат надошт.
Михаил Саакашвилӣ дар моҳи октябри соли 2021, баъди ҳашт сол аз хориҷа ба ватанаш баргашт, вале аз тарафи маъмурони интизомӣ дастгир шуд. Аз он замон то ҳоло дар ҳабс аст.
Ҳафтае пеш додгоҳи Тбилиси президети пешини Гурҷистонро бо гуноҳи тасарруфи пули давлат дар солҳои 2009-2013 ба 9 сол зиндон маҳкум кард. Ҳизби “Ҷунбиши муттаҳиди миллӣ”-и Саакашвилӣ ин ҳукмро дорои ангезаи сиёсӣ номид.
Қаблан Саакашвилӣ бо гуноҳи суистифода аз мансаб ба шаш сол ҳабс маҳкум шуда буд.
Михаил Саакашвилӣ аз соли 2004 то 2012 раисҷумҳури Гурҷистон буд.
Мардум бештар медиҳанд, Талко камтар. Афзоиши нархи барқ дар Тоҷикистон
Ҳукумати Тоҷикистон нархи истифода аз нерӯи барқро барои мардум ва корхонаҳо гарон кард.
Сокинон аз якуми апрел барои ҳар киловат соат барқ 35,36 дирам хоҳанд супурд. Дар ҳоли ҳозир ин рақам ба 30,75 дирам баробар аст.
Қарори ҳукумати Тоҷикистон рӯзи 17-уми март дар нашрияи расмии "Ҷумҳурият" нашр шуд.
Тибқи он, нархи нерӯи барқ аз якуми апрел барои корхонаҳои коркарди нахи пахта 40,45 дирам, литсейу гимназияҳои хусусӣ 60,70 дирам ва корхонаҳои истеҳсолӣ 80,90 дирам таъйин шудааст.
Ин дар ҳолест, ки корхонаҳои "Талко", "Азот" ва "Комбинати металлургии Тоҷикистон" нерӯи барқро арзонтар мегиранд. "Талко" ё ширкати алюминиюми тоҷик – 20,77 дирам, "Азот" – 35,36 дирам ва "Комбинати металлургии Тоҷикистон" – аз 1-уми май то 30-юми сентябр 14,19 дирам ва аз 1-уми октябр то 30-юми апрел 80,90 дирам.
"Талко" давлатӣ аст ва Комбинати металлургии Тоҷикистон тибқи ҳуҷҷатҳои Кумитаи андоз аз сӯйи “Фароз” таъсис ёфтааст. Намояндагони Комбинати металлургӣ борҳо гуфтаанд, ки ба “Фароз” ҳеч робита надоранд.
Корхонаи нуриҳои “Азот”-ро соли 2022 ширкати “Осиё Кемикал” харид ва як сол баъд фаъол шуд. Номи соҳиби ширкате, ки “Азот”-ро харид, маълум нест ва дар борааш дар интернет маълумоти зиёд ҳам вуҷуд надорад.
Додани имтиёз ба ширкатҳои алоҳида дар Тоҷикистон ҳамеша як мавзӯи баҳсбарангез буда, наздикии баъзе аз онҳо бо хонаводаи президент шубҳаеро ба миён овардааст, ки ширкатҳои дигари соҳиби имтиёз низ ба ин оила ва ё шахсони наздик ба онҳо рабт доранд.
Узбекистон ва Толибон дар бораи ду тарҳи барқ гуфтугӯ кардаанд
Ширкати "Брешна"-и зери назорати Толибон эълон кардааст, ки тимҳои техникии Афғонистон ва Узбекистон дар Кобул дар бораи иҷрои ду тарҳи барқ гуфтугӯ кардаанд.
Ин тарҳҳо шомили хати интиқоли 500-мегават аз Узбекистон ба Афғонистон ва бунёди як нерӯгоҳи тавлиди барқӣ бо ангишт, дар шимоли Афғонистон мешавад.
Бар асоси хабарномае, ки ширкати афғонистонии "Брешна" рузи 16 март нашр кард, ҳайати техникии Узбекистон дар ин нишаст бар ӯҳдадориҳои ин кишвар барои ҳамкорӣ дар рушди зерсохторҳои энержии Афғонистон таъкид кардааст.
Абдулборӣ Умар, раиси ширкати "Брешна" дар ин нишаст гуфт, ки пас аз ниҳоӣ шудани баррасиҳои техникӣ, кори ин ду тарҳ ҳамзамон бо оғози соли нави хуршедӣ оғоз хоҳад шуд.
Дар ҳоле, ки Афғонистон бо камбуди шадиди барқ рӯбарӯ аст, ин тарҳҳо барои рушди энержии Афғонистон муҳим гуфта мешаванд.
Дар ҳамла ба сарбозон дар Покистон чандин кас куштаву захмӣ шудаанд
Манобеи амниятӣ дар Кветта, маркази Балуҷистони Покистон, гуфтанд, дар таркише, ки дар ҷараёни ҳамлаи ҷангҷӯён рух дод, 11 сарбоз кушта ва 21 тани дигар захмӣ шудаанд.
Ҳамла ба автобуси сарбозон рӯзи 16-уми март сурат гирифт.
Артиши Покистон гуфт, ки билофосила ба ин ҳамла вокуниш нишон дод ва се ҷангҷӯро кушт.
Масъулияти ҳамла ба сарбозонро гурӯҳи ҷудоихоҳ бо номи “Артиши озодибахши Балуҷ” ба уҳда гирифтааст.
Ин гурӯҳ дар изҳороте, ки ба расонаҳо фиристод, иддао кардааст, ки дар ҳамла ба корвони автобусҳои артиши Покистон 90 сарбозро кушта ва захмӣ кард.
Радиои Аврупои Озод/Радиои Озодӣ иттилои ҳарду ҷонибро дар бораи талафот мустақилона тасдиқ карда наметавонад.
Иёлоти Муттаҳидаи Амрико ва Иттиҳоди Аврупо гурӯҳи "Артиши озодибахши Балуҷ"-ро дар феҳрасти созмонҳои террористӣ ҷой додаанд.
"Хориҷиён дари Маркази муҳоҷиратро дар Екатеринбург шикастанд"
Пулиси Русия мегӯяд, издиҳоми коргарони хориҷӣ дари Маркази муҳоҷиратро дар шаҳри Екатеринбург шикастаанд.
Ҳодиса рӯзи 11-уми март ҳангоми навбатпойӣ барои дарёфти патент ё иҷозаномаи кор рух додааст.
Як вакили маҷлиси шаҳри Екатеринбург аз додситонӣ хостааст, ки ин ҳодисаро санҷад.
Шаҳрвандони хориҷӣ дар Русия ҳақ надоранд, ки бе патент кор кунанд. Парвонаи кор бояд мунтазам дароз ва пули ҳармоҳаи он пардохт карда шавад, вагарна, шаҳрвандони хориҷӣ ҳаққи дарёфти даромади расмиро аз даст медиҳанд.
Як муҳоҷири тоҷик дар Русия гуфт, ҷараёни дарёфти ҳуҷҷат имсол дар он кишвар печида ва тӯлонӣ шудааст. Ӯ афзуд, "агар як сол пеш ҷараёни супоридани ҳуҷҷатҳо 15 дақиқа вақт мегирифт, имсол барои як муҳоҷир ин ҷараён 45 дақиқа вақт мегирад. Барои ҳамин навбатпойӣ тӯлонӣ мешавад.”
Илова ба ин, қонунгузории муҳоҷират дар Русия дар охири соли 2024 ва аввали соли 2025 сахттар шуд.
Ирина Волк, сухангӯи ВКД-и Русия, хабар дод, ки ҳудуди 700 ҳазор муҳоҷир, асосан аз кишварҳои Осиёи Марказӣ, шомили рӯйхати “шахсони зери назорат” ҳастанд. Ин муҳоҷирон то 30-юми апрел вақт доранд, ки будубоши худро дар Русия қонунӣ гардонанд, вагарна ронда хоҳанд шуд.
40 миллион евро. Талафоти барқ кам ва нархи пахта зиёд мешавад?
Иттиҳоди Аврупо барои гузаштан ба энергияи сабз ва ба вуҷуд овардани занҷираи маҳаллии арзиши пахта дар Тоҷикистон 40 миллион евро ҷудо мекунад. Созишнома рӯзи 14-уми март дар шаҳри Душанбе имзо шуд.
22 миллион евро барои кам кардани талафоти нерӯи барқ дар Тоҷикистон дар назар аст ва аз тариқи Бонки аврупоии таҷдид ва рушд дастрас хоҳад шуд. Бахши дигари ин ёрӣ, ки беш аз 18 миллион евро аст, аз сӯйи Оҷонси рушди Олмон барои ба вуҷуд овардани занҷираи маҳаллии арзиши пахта равона мешавад.
Ба гуфтаи Йозеф Сикела, комиссиари Иттиҳоди Аврупо дар бахши ҳамкориҳои байнулмилалӣ бо Осиёи Марказӣ, ин ёрӣ гузаштан ба иқтисоди сабз ва суботи иқтисодии Тоҷикистонро тақвият хоҳанд дод.
“Бо коҳиш додани талафоти барқ, мо на танҳо хароҷотро барои хонаводаҳо ва соҳибкорон коҳиш медиҳем, балки роҳро барои сармоягузорӣ ба энергияи барқароршаванда мекушоем, ки ояндаи Тоҷикистон аст,” -- гуфт Сикела.
Аз назари комиссари аврупоӣ, соҳаи пахтаи Тоҷикистон дар иқтисоди кишвар, таъмини ҷойҳои корӣ ва баланд бардоштани рушди саноати нассоҷӣ ва содирот нақши муҳим мебозад ва Иттиҳоди Аврупо бо як барномаи 5-сола мехоҳад ин бахшро ба тағйироти иқлим устувортару самарбахштар гардонад.
Дар ҳоле ки масъулони Иттиҳоди Аврупо ба муассир воқеъ шудани тарҳҳояшон дар Тоҷикистон таъкид мекунанд, баъзе аз коршиносоне, ки бо ин гуна тарҳҳо кор кардаанд, самарбахшии онро ба чанд шарт бастагӣ медиҳанд.
“Якум, шакли мустақим, яъне як ба як бо соҳибкор. Агар ин ҷо миёнаравҳо зиёд бошанд, масалан, ташкилоти кредитиву бонкӣ, монеаи изофӣ пайдо мешавад. Баъд, дили соҳибкор ҳам мемонад. Даводаваш зиёд ва болои ин фоизҳо дорад. Дуюм, ҳамин пахта барои деҳқон ҳама вақт зараровар буд ва зараровар мемонад. Фақат системаро дигар кардан даркор, ки инҳо намехоҳанд,” – мегӯяд Сайфиддин Қараев, рӯзноманигор ва таҳлилгари масъалаҳои иқтисодӣ.
Дар Тоҷикистон солҳои охир сатҳи баланди талафоти нерӯи барқ яке аз мушкилоти умдаи таъмини мардум бо барқ, аз ҷумла дар мавсими зимистон дониста мешавад. Ба иттилои расмӣ, ҳар 5-ум киловат барқи истеҳсолкардаи Тоҷикистон талаф мешавад. Дар ним соли 2024 ду миллиарду 203,2 миллион киловатт-соат барқи Тоҷикистон талаф шудааст, ки беш аз 21%-и нерӯи барқи истеҳсолшударо дар бар мегирад.
Ҳамчунин пойин рафтани арзиши пахта, яке аз молҳои асосии содиротии Тоҷикистон низ солҳои ахир таваҷҷуҳи деҳқононро ба кишту парвариши он кам кардааст. Аммо мақомоти давлатӣ дар навоҳии пахтакор деҳқононро маҷбур мекунанд, ки дар бештари заминҳои худ пахта бикоранд.
Ҳалокати беш аз 50 кас дар сӯхторе дар Мақдунияи Шимолӣ
Дар натиҷаи сӯхтор дар як клуби шабона дар шаҳри Кочании Мақдунияи Шимолӣ камаш 51 кас ҷон бохтааст.
Панче Тошковски, вазири корҳои дохилии Мақдунияи Шимолӣ, рӯзи 16-уми март дар нишасти матбуотӣ гуфт, “зиёда аз 100 тани дигар дар бемористон ҳастанд”.
Ӯ афзуд, сӯхтор ҳангоми истифода аз маводи пиротехникӣ дар консерти гурӯҳи DNA рух додааст.
Хешовандон ва дӯстони қурбониён дар назди бемористону идораҳои шаҳр ҷамъ омада, талоши гирифтани маълумоти бештар доранд.
Додситонии Мақдунияи Шимолӣ дар изҳороте гуфт, “теъдоди қурбониён ва захмиён дар сӯхтор муайян карда мешаванд.”
Кочанӣ дар 100-километрии шарқи Скопйе, пойтахти Мақдунияи Шимолӣ ҷойгир аст.
Ҳамлаи густурдаи Амрико ба шӯришиёни ҳусӣ дар Яман
Иёлоти Муттаҳида алайҳи шӯришиёни ҳусии зери ҳимояти Эрон дар Яман ҳамлаи густардаеро анҷом дода, ҳамзамон ба Теҳрон гӯшзад кард, ки пуштибониро аз ин гурӯҳ фавран бас кунад. Амрико шӯришиёни ҳусиро як гурӯҳи террористӣ медонад.
Ҳамла рӯзи 15-уми март сурат гирифт. Қабл аз он Доналд Трамп, раисҷумҳури Амрико, ҳушдор дода буд, ки агар ҳусиҳо ҳамларо ба киштиҳои Иёлоти Муттаҳида ва мушакпарониро ба хоки Исроил хотима надиҳанд, дӯзах бар сарашон чаппа хоҳад шуд.
Трамп ҳамчунин ба Эрон ҳушдор дод, ки агар ба ҳимоят аз ҳусиҳо поён надиҳад, Амрико Теҳронро комилан ҷавобгар медонад ва ҳеч нармише нисбат ба он нишон нахоҳад дод.
Президенти Амрико дар шабакаи иҷтимоии Truth ҳусиёнро “авбош” номид, ки “аз ҷониби Эрон сармоягузорӣ мешаванд” ва “корзори беамони дуздии дарёӣ, хушунат ва терроризмро алайҳи Амрико ва дигарон ба роҳ мондаанд”.
Шӯришиёни ҳусӣ тайи 18 моҳи гузашта ба киштиҳо даҳҳо бор ҳамла карда, иддао доранд, ки дар ҷанги Исроил бо “Ҳамос” (аз сӯи Амрико ва Иттиҳоди Аврупо созмони террористӣ дониста шудааст) дар Ғазза аз дувумӣ ҳимоят мекунанд.
Ба назар мерасад, ҳамлаҳо дар Яман амалиёти бузургтарини низомии Амрико дар Ховари Миёна баъди ба қудрат расидани Доналд Трамп дар моҳи январи имсол аст.
Хабаргузории “Reuters” аз қавли сокини маҳаллӣ Абдуллоҳ Яҳё навишт, ки “таркишҳо шадид буданд ва маҳалларо мисли заминларза такон доданд.”
Мақомҳои ҳусӣ гуфтаанд, ки ҳадди ақал 12 ғайринизомӣ кушта ва 9 ғайринизомӣ захмӣ шуд, аммо ин иддаоро ба таври мустақилона тасдиқ кардан имконпазир нест.
Идомаи зарбаҳои Русия ва Украина ба хоки ҳамдигар
Дар ҳоле ки раҳбарони Амрико ва Аврупо барои созиши оташбас миёни Русия ва Украина талош доранд, нерӯҳои ду кишвар шаби 15 ба 16-уми март аз ҳаво ба хоки якдигар зарба задаанд.
Вячеслав Гладков, волии Белгород дар Русия, гуфт, бар асари бархӯрди ҳавопаймоҳои бесарнишини украинӣ ба як манзил дар шаҳри Губкин се кас захмӣ шуд.
Александр Гусев, волии Воронеж дар ҷанубу ғарби Русия, хабар дод, ки дар се ноҳия зиёда аз 15 ҳавопаймои бесарнишини украиниро аз байн бурданд. Дар бораи талафот гузорише дар даст нест.
Мақомот дар вилояти Ростови Русия низ аз ҳамлаҳои ҳавопаймоҳои бесарнишини Украина гузориш доданд.
Дар ҳамин ҳол, Сергей Лисак, раиси Идораи низомии вилояти Днепропетровск дар Украина гуфт, ки русҳо шаҳри Никополро тирборон карда, як зани 70-соларо куштанд.
Мақомот дар Черниҳов гуфтанд, ки ҳавопаймоҳои бесарнишини Русия ба як бинои панҷошёна бархӯрда, ду табақаи болоиро вайрон кард. Теъдоди қурбониён дар ҳоли ҳозир маълум нест.
Бар асари ҳамлаҳои Русия дар шаҳри Изюми вилояти Харкови Украина низ як кас кушта ва ду кас маҷруҳ шудааст.
Матбуоти Украина аз чанд таркиш дар наздикии Киев низ гузориш дод. Мақомот аз эҳтимоли ҳамлаҳои ҳавопаймоҳои бесарнишин дар минтақа ҳушдор додаанд.
"Дифоъ кунед." Дархости CPJ аз раҳбарони Конгресси Амрико
Кумитаи Дифоъ аз Рӯзноманигорон (CPJ) аз раҳбарони Конгресс хостааст, ки аз USAGM ё Оҷонси Расонаҳои Байнулмилалии Амрико ҳимоят кунанд.
Доналд Трамп, раисҷумҳури Амрико, рӯзи 14-уми март дар бораи ихтисори шадиди буҷаи ҳафт ниҳод, аз ҷумла USAGM дастур дод. Радиои Аврупои Озод/Радиои Озодӣ бахше аз ин Оҷонсӣ аст.
Рӯзи 15-уми март Кэри Лейк (Kari Lake), мушовири аршади мудири муваққати USAGM, дар номае эълон кард, ки ёрии тасдиқшуда аз тарафи Конгресс қатъ гардид.
Карлос Мартинез де ла Серна, мудири Кумитаи Дифоъ аз Рӯзноманигорон, қароргоҳаш дар Ню-Йорк, дар баёнияе гуфт, “ин ки Кохи Сафед қасд дорад ин ниҳоди таъминшуда аз сӯи Конгрессро, ки аз рӯзноманигории мустақил дар баробари ривоятҳои ҳукуматҳои худкома ҳимоят мекунад, суст кунад, иқдоме такондиҳанда аст.”
Ӯ рӯзи 15-уми март афзуд, “аз раҳбарони Конгресс мехоҳем, аз ин ниҳоди ҳаётӣ, ки ахбори бидуни сензураро барои кишварҳое бо расонаҳои маҳдуд нашр мекунад, дифоъ кунанд.”
Буҷаи USAGM барои соли молии 2025 ба маблағи 950 миллион доллар дархост шудааст ва ин пул барои кор ва пардохти маоши кормандон равона мешавад.
Ин оҷонсӣ кори Радиои Аврупои Озод/Радиои Озодӣ, Садои Амрико, Радиои Осиёи Озод, Радиои Мартӣ (барои Куба), шабакаҳои Ховари Миёна ва Бунёди фанновариҳои бозро назорат мекунад.
Ҳукумати Толибон аз созиши марзии Тоҷикистон ва Қирғизистон истиқбол кард
Рӯзи 15 март бо нашри изҳороте ҳукумати Толибон, ки худро “Аморати исломии Афғонистон” меномад, аз қарордоди имзошудаи миёни Тоҷикистон ва Қирғизистон истиқбол кардааст.
Вазорати корҳои хориҷии Толибон, аз ҷумла, навиштааст: “Аморати исломии Афғонистон дастёбӣ ба хатми баҳси дарозмуддати миёни ду кишвари бародарро аз роҳи ҳамдигарфаҳмӣ қадами мусбате ба самти суботи минтақавӣ, рушди иқтисодӣ ва тақвияти эътимоди байниҳамдигарӣ арзёбӣ мекунад”.
Дар изҳорот гуфта шудааст, ки “Афғонистон ҳамеша пуштибони сулҳ, ҳамдигарфаҳмӣ ва тавсеаи ҳамкориҳои минтақавӣ аст ва бовар дорад, ки ин созишнома саҳифаи навро дар сулҳи давомдор дар Осиёи Марказӣ боз хоҳад кард”.
Ҳукумати Толибон, ки соли 2021 дар Афғонистон сари қудрат баргаштааст, ҳанӯз аз ҷониби ҳукумати Тоҷикистон ба расмият шинохта нашудааст, вале ҳамкориҳои энержӣ ва тиҷоратӣ миёни ин кишварҳо вуҷуд доранд.
Созиши марзии миёни Душанбе ва Бишкек рӯзи 13 март имзо шуд ва то ҳол бисёр давлату созмонҳои шарики ин кишварҳо, аз ҷумла, СММ, Иттиҳоди Аврупо, кишварҳои ИМА, Русия, Чин ва дигарҳо аз имзои ин санад истиқбол кардаанд.
ИМА қоидаҳои вуруди шаҳрвандони 43 кишварро шадидтар мекунад - The New York Times
ИМА қоидаҳои вуруд ба ин кишвар барои шаҳрвандони 43 кишварро шадидтар мекунанд ва дар ин феҳрист аз миёни давлатҳои собиқ шӯравӣ инчунин Русия, Беларус, Туркманистон ёд мешаванд. Дар ин бора рӯзи 15 март нашрияи The New York Times хабар додааст.
Бино ба навиштаи ин расонаи амрикоӣ, феҳристи кишварҳо ба се гурӯҳ – “сурх”, “норанҷӣ” ва “зард” тақсим шудааст.
Шаҳрвандони кишварҳое, ки ба гурӯҳи “сурх” ворид карда шудаанд, ҳақи ворид шудан ба хоки ИМА-ро надоранд. Ин кишварҳо: Афғонистон, Бутан, Венесуэла, Эрон, Куба, Кореяи Шимолӣ, Либия, Сомалӣ, Судон, Сурия, Яман мебошанд.
Русия, Беларус, Туркманистон ва Покистон ба гурӯҳи “норанҷӣ” ворид шудаанд ва додани виза ба шаҳрвандони ин кишварҳо метавонад маҳдуд шавад. Барои шаҳрвандони ин кишварҳо танҳо дар сурати “сайёҳони бисёр сарватманду соҳиби кор” буданашон додани виза иҷоза дода мешавад.
Ба кишварҳое аз рӯйхати “зард” 60 рӯз фурсат дода мешавад, ки нигарониҳои мавриди ИМА-ро ислоҳ кунанд. Ба ин гурӯҳ исми 22 давлат, аз ҷумла Зимбабве, Чад, Сент-Китс и Невис, Вануату ва дигарҳо ворид карда шудаанд.
Нашрия навиштааст, ки феҳристи ниҳоии кишварҳо метавонад тағйир ёбад.
Трамп аз аввалин рӯзи раёсатҷумҳуриаш мубориза бо муҳоҷирати ғайриқонуниро аз ҳадафҳои муҳими худ эълон карда дар сарҳад бо Мексика ҳолати фавқулодда ҷорӣ кард.
СММ гуфт, Эрон бо истифода аз паҳпод ҳиҷоби занонро назорат мекунад
Як гузориши СММ мегӯяд, мақомот дар Эрон барои назорат аз қонуни пӯшидани ҳиҷоб аз фанновариҳои пешрафтаи мисли паҳподу дастгоҳҳои шинохти чеҳра ва замимаҳои гузоришдиҳии шаҳрвандон истифода мекунанд. Муҳимтарин дастгоҳи назорат аз болои занон дар ҷомеаи Эрон замимаи ҳукуматии бо номи “Назорат” мебошад.
Ин замима ба полис имконият медиҳад, ки аз мавридҳои эҳтимолии вайрон кардани қонуни ҳиҷоб дар дохили мошинҳо, аз ҷумла, мошини ёрии таъҷилӣ, мусофирбарҳо ваё таксиҳо назорат кунанд.
Замима ба корбарон имкон медиҳад, ки маълумот дар бораи шаҳодатномаи мошин, маҳалли ҳаракати он ваё замони нақзи муқаррарот хабар диҳанд.
Маълумот рост ба полис меравад. Бар асоси ин шикоят, полис метавонад ба соҳиби мошин паёмак ё СМС фиристода ҳушдор диҳад, ки онҳо ҳолати вайрон кардани қоидаи пӯшидани ҳиҷобро сабт кардаанд ва дар сурати нодида гирифтани ҳушдорҳо, мошин мусодира мешавад.
Гузориши СММ мегӯяд, мақомот дар Теҳрон ва минтақаҳои ҷанубии кишвар бо истифода аз паҳпод ё дрон пӯшидани ҳиҷобро аз ҷониби занҳо назорат мекунанд. Илова ба ин, дар даромадгоҳи донишгоҳи Амиркабири Теҳрон як нармафзоре насб шудааст, ки вазифааш чеҳрашиносӣ ва сабти симои духтарони беҳиҷоб мебошад. Қарор аст ин гузориш рӯзи сешанбе дар ихтиёри Шӯрои ҳуқуқи башари СММ вогузор шавад.
