Бозии даври севуми мусобиқот дар гурӯҳи “А” миёни футболбозони навраси Тоҷикистону Афғонистон шаби чоршанбеи 21-уми август дар Варзишгоҳи марказии шаҳри Душанбе доир гардид. Голи ягонаро дар дақиқаи 7-уми дидор Соҳил Сарварӣ ба самар расонд. Ӯ тӯбро бо зарбаи ҷаримавӣ аз масофаи дур ба дарвозаи мизбонон ворид кард.
Дар бозии даври севум дар гурӯҳи “В” мунтахаби наврасони Узбекистон тими Эронро бо ҳисоби 1:0 мағлуб сохт. Голи Миразиз Абдукаримов дар замони иловагӣ (90+4) ба дастаи Узбекистон се имтиёз овард.
Мавқеи дастаҳо дар ҷадвали мусобиқот дар гурӯҳҳо ба таври зайл аст: гурӯҳи “А” – 1. Афғонистон – 6 имтиёз (таносуби тӯбҳо – 3-0). 2. Тоҷикистон – 3 (3-1). 3. Қирғизистон – 0 (0-5); гурӯҳи “В” – 1. Узбекистон – 6 имтиёз (таносуби тӯбҳо – 2-0). 2. Эрон – 3 (6-2). 3. Туркманистон – 0 (1-7).
Ба ин тартиб, дар бозии ниҳоӣ, ки рӯзи шанбеи 24-уми август дар Варзишгоҳи марказии Душанбе соати 20:00 шуруъ мешавад, дастаи ғолиби гурӯҳи “А” – Афғонистон - бо тими ғолиби гурӯҳи “В” – Узбекистон - барои унвони қаҳрамони CAFA-2024 ва медалҳои тилло мубориза мебаранд.
Дастаи наврасони Тоҷикистон бошад, барои ҷойи севум бо тими Эрон талош мекунад. Ин бозӣ шаби ҷумъаи 23-юми август дар Варзишгоҳи марказии Душанбе соати 21:30 оғоз меёбад.
Дар бозии тасаллобахш барои ҷойи панҷум дастаҳои мунтахаби наврасони Қирғизистон ва Туркманистон рақобат мекунанд. Ин бозӣ 23-юми август дар Варзишгоҳи марказии ҷумҳуриявӣ соати 18:00 шуруъ мешавад.
Дар мусобиқоти қаҳрамонии CAFA-2024, ки дар Душанбе то рӯзи 24-уми август идома хоҳад кард, шаш дастаи мунтахаби наврасони то 17-солаи минтақа – Тоҷикистон, Узбекистон, Қирғизистон, Туркманистон, Эрон ва Афғонистон - иштирок доранд.
Тибқи қуръакашӣ ба гурӯҳи “А” дастаҳои мунтахаби наврасони Тоҷикистон, Қирғизистон ва Афғонистон, ба гурӯҳи «В» тимҳои Узбекистон, Эрон ва Туркманистон дохил шуданд.
Дар марҳилаи гурӯҳӣ дастаҳо аз рӯйи системи даврӣ рақобат карданд. Ғолибони гурӯҳҳо дар финал ба ҳам меоянд. Дастаҳое, ки дар гурӯҳи худ ҷойи дуюмро мегиранд, дар бозӣ барои ҷойи сеюм мубориза мебаранд. Инчунин барои ҷойи панҷум бозии тасаллобахш сурат мегирад.
Ширкат дар қаҳрамонии CAFA-2024 барои мунтахаби наврасони Тоҷикистон (U-17) зери раҳбарии Марко Раҷини, мутахассиси итолиёӣ, як давраи омодагии даста ба марҳилаи интихобии Ҷоми Осиё-2025 маҳсуб мешавад.
Дастаи мунтахаби наврасони Тоҷикистон (U-17) дар марҳилаи интихобии Ҷоми Осиё-2025 дар гурӯҳи «J» бо тимҳои Умон, Сингапур ва Гуам рақобат хоҳад кард. Бозиҳо дар ин гурӯҳ аз 19-ум то 27-уми октябри соли равон дар Сингапур барпо мегарданд.
Бар асоси натиҷагирии марҳилаи интихобии Ҷоми Осиё-2025 даҳ дастаи ғолиби гурӯҳҳо ва панҷ тими беҳтарини ҷойҳои дуюм ба қисми ниҳоӣ роҳ меёбанд.
Марҳилаи ниҳоии Ҷоми Осиё-2025 миёни дастаҳои наврасони то 17-сола аз 3-юм то 20-уми апрели соли оянда дар Арабистони Саудӣ доир мегардад.
Қаҳрамонии CAFA-2024 байни дастаҳои мунтахаби наврасон (U-17)
23-юми август (ҷумъа)
Бозӣ барои ҷойи 5-ум
18:00 – Қирғизистон - Туркманистон
Бозӣ барои ҷойи 3-юм
21:30 – Тоҷикистон - Эрон
Финал
24-уми август (шанбе)
20:00 – Афғонистон – Узбекистон
Эзоҳ: ҳамаи бозиҳо дар Варзишгоҳи марказии Душанбе баргузор мешаванд.
