Абдулмаҷид Кудиев дар риштаи гуштии озод дар радабандии вазни 70 кило бо 31 ҳазор имтиёз ҷойгоҳи чаҳорумро касб намуд. Дар ин навъи варзиш боз ду нафари дигар аз Тоҷикистон - Виктор Рассадин дар вазни 74 кг бо 36 ҳазор имтиёз дар ҷойгоҳи панҷум ва Магомет Евлоев дар вазни 79 кило бо 17 ҳазор имтиёз дар ҷойгоҳи нӯҳум қарор доранд.
Ёдовар мешавем, Абдулмаҷид Кудиев, узви дастаи мунтахаби Тоҷикистон, дар мусобиқаи қаҳрамонии ҷаҳон дар риштаи гуштии озод дар вазнҳои ғайриолимпӣ, ки моҳи октябри имсол дар шаҳри Тиранаи Албания доир гардид, медали биринҷӣ ба даст овард.
Дарвоқеъ, Абдулмаҷид Кудиев пас аз 17 сол барои Тоҷикистон дар қаҳрамонии гуштии ҷаҳон медал овард. Қаблан Юсуф Абдусаломов соли 2007 дар қаҳрамонии ҷаҳон дар риштаи гуштии озод дар вазни 84 кило дар шаҳри Бокуи Озарбойҷон медали нуқра гирифта буд.
Абдулмаҷид Кудиев, ки зодаи Доғистони Русия мебошад, аз моҳи январи соли 2023 дар ҳайати дастаи мунтахаби Тоҷикистон ҳунарнамоӣ мекунад. Вай дар риштаи гуштии озод ду бор ба унвони қаҳрамони Тоҷикистон (солҳои 2023, 2024) мушарраф шудааст.
Виктор Рассадин дар Бозиҳои 33-юми тобистонаи олимпӣ дар шаҳри Пориси Фаронса дар риштаи гуштии озод, мақоми панҷумро касб карда буд.
Виктор Рассадин, ки зодаи Ёқутистони Русия мебошад, дар мусобиқаи қаҳрамонии Осиё дар риштаи гуштии озод, ки моҳи апрели соли равон дар шаҳри Бишкеки Қирғизистон баргузор шуд, дар ҳайати мунтахаби Тоҷикистон медали нуқра ба даст овард.
Магомет Евлоеви 26-сола низ легионер аст ва аз Ингушистони Русия мебошад. Вай дар мусобиқаи байнулмилалии гуштии озод «Яшар Догу-2024» дар Анталияи Туркия медали нуқра гирифт. Евлоев дар мусобиқаи қаҳрамонии Осиё дар риштаи гуштии озод дар Бишкек ҷойи панҷумро соҳиб шуда буд.
