Ато Мирхоҷа, муовини раиси Иттифоқи нависандагон ба Радиои Озодӣ гуфт, Шакурзода як соли ахир гирифтори бемории қанд буд.
Ба иттилои дарёфтии Радиои Озодӣ, маросими видоъ бо нависанда 19-уми октябр дар деҳаи Худгифи Сояи ноҳияи Мастчоҳ баргузор мешавад. "Мирзо Шакурзода бемор буданд ва дар манзили яке аз духтаронашон дар шаҳри Хуҷанд вафот карданд,"-гуфт як масъули ҳукумати ноҳияи Масчоҳ.
Мирзо Шакурзода муаллифи чандин китоб дар мавзӯи тоҷикон ва ориёиҳо ҳаст, ки ба ҷуз сириллик бо ҳуруфи форсӣ ҳам нашр шудаанд. "Тоҷикон дар масири таърих", "Кӯҳкане аз користони дил", "Ҷонпайванд", "Тоҷикон дар қаламрави Ориёно", "Тоҷикон, ориёиҳо ва фалоти Эрон" аз ҷумлаи осори Мирзо Шакурзода мебошад.
Ин нависандаи шинохта солҳо дар Афғонистон ва Эрон низ кор кардаааст.
Китоби "Тоҷикон дар қаламрави Ориёно" соли 2007 аз сӯи ҳафтавори "Варорӯд" "Китоби беҳтарини сол" эълом шуд. Мирзо Шакурзода соли 2007 барои маҷмӯи "Ҷонпайванд" барандаи ҷоизаи Садриддин Айнӣ шуд.
Фаъолияти эҷодии ӯ пас аз хатми донишгоҳ дар рӯзномаи "Тоҷикистони советӣ" (ҳоло "Ҷумҳурият") оғоз ёфта, солҳои охир масъули бахши насри Иттифоқи нависандагон будааст.
Дар Эрон Мирзо Шакурзода яке аз муаллифони "Донишномаи адаб ва ҳунари форсӣ" буда, дар таҳкими пайвандҳои адабӣ ва илмии ду кишвар саҳм гирифтааст.