Ба иттилои Федератсияи футболи Тоҷикистон, мусобиқаи байнулмилалӣ барои Ҷоми Мердека-2024 бо иштироки чаҳор дастаи мунтахаб аз даври ниманиҳоӣ шуруъ мешавад. Бар асоси қуръакашӣ дар бозии дигари даври ниманиҳоӣ тимҳои миллии Малайзия ва Филиппин рӯбарӯ хоҳанд шуд.
Ҳарду бозии даври ниманиҳоии мусобиқаи байнулмилалӣ барои Ҷоми Мердека-2024 рӯзи 4-уми сентябр дар Варзишгоҳи миллии Букит Ҷалили Куала-Лумпур барпо мегардад.
Ғолибони даври ниманиҳоӣ дар финал ва мағлубшудагон дар рақобат барои ҷойи сеюм мубориза мебаранд. Бозиҳои ҳалкунандаи Ҷоми Мердека-2024 рӯзи 8-уми сентябр доир мешаванд.
Дастаи мунтахаби Тоҷикистон зери раҳбарии Гела Шекиладзе, мутахассиси гурҷӣ, омодагиҳоро ба бозии ниманиҳоии мусобиқаи «Ҷоми Мердека-2024» дар шаҳри Куала-Лумпур оғоз кард.
Аввалин тамрини футболбозони тоҷик дар Малайзия 1-уми сентябр баргузор шуд. Айни замон дар ҳайати мунтахаби кишвар 17 бозигар қарор дорад. Ҳайати комили мунтахаби Тоҷикистон 2-юми сентябр дар Куала-Лумпур ҷамъ мешавад.
Бояд гуфт, ки тими миллии Тоҷикистон барандаи феълии Ҷоми Мердека мебошад. Футболбозони тоҷик соли гузашта дар финали ин мусобиқа бар дастаи мунтахаби Малайзия бо ҳисоби 2:0 ғалаба карда буданд.
Мусобиқаи байнулмилалӣ барои Ҷоми Мердека-2024
Нимфинал
4-уми сентябр (чоршанбе)
13:30 Лубнон – Тоҷикистон
18:00 Малайзия – Филиппин
8-уми сентябр (якшанбе)
13:30 Бозӣ барои ҷойи сеюм
18:00 ФИНАЛ
Куала-Лумпур, Варзишгоҳи миллии Букит Ҷалил
Эзоҳ: замони оғози бозиҳо бо вақти Душанбест.
