Қаҳрамони феълии Аврупо - Италия бар Албания бо ҳисоби 2:1 ғолиб омад. Нимҳимоятгари тими миллии Албания Недим Байрами аз иштибоҳи ҳимоятгар Федерико Димарко, ки дар наздикии ҷаримагоҳи худ тӯбро аз аут ба майдон ҳаво дод, истифода бурда, аллакай дар сонияи 22-юм ҳисобро кушод.
Ин голи аз ҳама тезтарин дар таърихи мусобиқоти қаҳрамонии Аврупо ба шумор меравад. Ин рекорди нав аст. Пеш аз ин тезтарин голро дар қаҳрамонии Аврупо ҳамлагари мунтахаби Русия Дмитрий Кириченко 20 сол муқаддам дар сонияи 67-ум ба дарвозаи тими миллии Юнон зада буд. Юнониҳо он замон дар қаҳрамонии Аврупо-2004 ғолиб шуда буданд.
Итолиёиҳо пас аз голи тезкори албаниҳо зуд ба худ омаданд: Алессандро Бастони дар дакикаи 11-ум ва Николо Барелла дар дакикаи 16-ум муваффақ шуданд. Натиҷаи ниҳоӣ - 2:1 ба суди қаҳрамони феълӣ.
Мунтахаби Венгрия аз дастаи Швейтсария бо хисоби 1:3 маглуб гашт. Ин аввалин бозии рӯзи шанбе буд. Дар оғози дидор ҳисобро ҳамлагари швейтсариҳо Квадво Дуа боз кард. Ҳамдастааш нимҳимоятгар Мишел Абишер дар охири нимаи аввал бартарии тими миллии худро дучанд намуд. Дар нимаи дуюм ҳамлагари тими мунтахаби Венгрия ё Маҷористон Барнабас Варга тавонист як гол занад, аммо дар замони изофа ба қисми дуюм Брел Эмболо ба дарвозаи мунтахаби Венгрия голи сеюмро зад.
Баъдан мунтахаби Хорватия аз тими миллии Испания бо ҳисоби боз ҳам калон - 0:3 шикаст хӯрд. Голҳои испаниҳоро Алваро Мората, Фабиан Руис ва Дани Карвахал ба самар расониданд. Ба Карвахал футболбози 16-солаи «Барселона» Ламин Ямал кӯмак кард. Синни ӯ низ рекордист. Вай дар таърихи мусобиқоти қаҳрамонии Аврупо ҷавонтарин бозигар аст, инчунин бо кӯмакаш гол зада шуд.
Хорватия метавонист ҳадди ақал як гол занад, аммо Бруно Петкович дар дақиқаи 80-ум аз пеналти ё ҷаримаи 11-метрӣ натавонист тӯбро ба ҳадаф расонад. Дарвозабони испаниҳо Унаи Симон тӯби задаи ӯро баргардонд. Петкович зуд тӯби бозгаштаро ба дарвоза ворид кард, аммо гол пас аз баррасии видеоии ин лаҳза бекор карда шуд.
Дар бозии ифтитоҳии мусобиқот, ки 14-уми июн дар варзишгоҳи «Алянс-Арена»-и шаҳри Мюнхен миёни ду дастаи гурӯҳи А – Олмон ва Шотландия - доир гардид, олмониҳо бо ҳисоби бузурги 5:1 пирӯз шуда буданд. Голҳоро Флориан Виртс, Ҷамол Мусиола, Кай Хавертс (аз пеналти), Никлас Фюллкруг ва Эмре Ҷан ба самар расониданд.
Ҳимоятгари тими Олмон Антонио Рюдигер дар охири бозӣ тӯбро ба дарвозаи дастааш зад. Шотландиҳо аз дақиқаи 44-ум як нафар кам буданд. Ҳимоятгар Райан Портеус, ки муқобили Илкае Гюндогане дағалона бозӣ кард, корти сурх гирифт.
Ҳамин тариқ, пас аз натиҷагирии даври аввали марҳилаи гурӯҳии мусобиқот дар ҷадвали гурӯҳи А мунтахаби Олмон бо се имтиёз пешсаф аст. Швейтсария ҳам се имтиёз гирифтааст, аммо бо назардошти таносуби тӯбҳо дар зинаи дуюм қарор дорад. Шотландия ва Венгрия, ки имтиёз ба даст наовардаанд, мутаносибан дар зинаҳои сеюму чорум ҷойгир шудаанд.
Дар гурӯҳи В дастаҳои мунтахаби Испания ва Италия бо сеимтиёзӣ мутаносибан чойҳои якуму дуюмро соҳиб гаштаанд. Албания (0 имтиёз) дар зинаи сеюм ва Хорватия (0 имтиёз) дар зинаи чорум қарор доранд.
Дар қаҳрамонии футболи Аврупо дар Олмон 24 тими миллӣ иштирок мекунад. Дастаҳо ба шаш гурӯҳи иборат аз чортимӣ тақсим шудаанд. Бозиҳо дар 10 варзишгоҳи 10 шаҳри Олмон доир мегарданд.
Бояд зикр намуд, қаҳрамони феълии Аврупо тими миллии Италия дар бозии ниҳоӣ 11-уми июли соли 2021 дар варзишгоҳи "Уэмбли"-и Лондон мунтахаби Англияро аз рӯи силсилаи пеналти ё зарбаҳои 11-метрӣ шикаст дода буд.
Қаҳрамонии Аврупо-2024:
Таркиби гурӯҳҳо:
Гурӯҳи A: Олмон, Шотландия, Венгрия, Швейтсария.
Гурӯҳи B: Испания, Хорватия, Италия, Албания.
Гурӯҳи C: Словения, Дания, Сербия, Англия.
Гурӯҳи D: Полша, Нидерланд, Австрия, Фаронса.
Гурӯҳи E: Украина, Белгия, Словакия, Руминия.
Гурӯҳи F: Гурҷистон, Туркия, Португалия, Чехия.
Даври аввал
14 июн, ҷумъа:
Гурӯҳи А, Олмон – Шотландия – 5:1
15 июн, шанбе:
Гурӯҳи A, Венгрия – Швейтсария – 1:3
Гурӯҳи B, Испания – Хорватия – 3:0
Гурӯҳи B, Италия – Албания – 2:1
16 июн, якшанбе:
Гурӯҳи D, 18:00, Полша - Нидерланд
Гурӯҳи C, 21:00, Словения – Дания
17 июн, душанбе
Гурӯҳи С, 00:00, Сербия - Англия
Гурӯҳи E, 18:00, Руминия - Украина
Гурӯҳи E, 21:00, Белгия - Словакия
18 июн, сешанбе:
Гурӯҳи D, 00:00, Австрия - Фаронса
Гурӯҳи F, 21:00, Туркия – Гурҷистон
19 июн, чоршанбе
Гурӯҳи F, 00:00, Португалия - Чехия
Эзоҳ: замони оғози бозиҳо бо вақти Душанбест.
Гуфтугӯ