CAFA-2023: Тоҷикистон ғолиб, Узбекистон дуюм ва Афғонистон сеюм шуданд

Дар даври ниҳоии мусобиқот шаби якшанбеи 27-уми август дастаи наврасони Тоҷикистон бозиро ба тими Эрон бо ҳисоби 0:1 бохт. Ин дидор дар Варзишгоҳи марказии Ҳисор доир гардид. Дар бозии дигари даври панҷум мунтахаби Узбекистон тими Афғонистонро бо ҳисоби 3:0 шикаст дод.

Ба ин тартиб, дастаи мунтахаби наврасони Тоҷикистон, ки дар се бозӣ ба дастаҳои Афғонистон (3:1), Қирғизистон (4:1) ва Узбекистон (2:0) пирӯз шуда, дар як дидор аз тими Эрон (0:1) мағлуб гашт, бо касби 9 имтиёз дар ҷадвали мусобиқот мақоми аввалро азони худ кард.

Мунтахаби Узбекистон низ 9 имтиёз гирифт, вале дар бозӣ миёни ҳарду Тоҷикистон ғолиб шуда буд, бинобар ин Ҷоми қаҳрамонӣ ва медалҳои тилло насиби футболбозони навраси тоҷик гардид.

Ба дастаи мунтахаби наврасони Узбекистон медалҳои нуқра супурда шуд. Тими Афғонистон, ки бо касби 6 имтиёз севум шуд, бо медалҳои биринҷӣ сарфароз гашт.

Аз рӯи натиҷагирии мусобиқот ҷоизаи «Fair Play» («Бозии соф») ба мунтахаби Тоҷикистон супурда шуд. Тими Эрон бо ҷоизаи вижа қадрдонӣ гардид.

Ҷоизаи «Беҳтарин нишонзан» ба бозигари мунтахаби Узбекистон Нурбек Сарсенбоев, ки се гол задааст, тақдим шуд. Бозигари аз ҳама судманди қаҳрамонии CAFA-2023 ҳамлагари мунтахаби Тоҷикистон Муҳаммад Назриев эътироф гашт.

Мусобиқоти қаҳрамонии CAFA-2023 байни дастаҳои наврасон (U-17), ки 20-уми август дар Варзишгоҳи марказии Ҳисор шуруъ шуд, рӯзи 27-уми август ба поён расид.

Дар ин мусобиқот дастаҳои мунтахаби наврасони панҷ кишвари минтақа – Афғонистон, Қирғизистон, Тоҷикистон, Узбекистон ва Эрон - ширкат карданд.

Дар доираи мусобиқоти қаҳрамонии CAFA-2023 (U-17) 10 бозӣ баргузор шуд. Мусобиқот аз рӯи системи даврӣ дар як марҳила сурат гирифт.

Мунтахаби наврасони Тоҷикистон дар ин мусобиқот бо раҳбарии сармураббӣ Далер Каёсов ҳунарнамоӣ кард. Зимнан, футболбозони навраси тоҷик моҳи октябри соли оянда дар мусобиқоти интихобии Ҷоми Осиё-2025 ширкат меварзанд.

Мавқеи дастаҳо дар ҷадвали мусобиқот