Дастаи «Хуҷанд»-и Тоҷикистон, ки дар бозии плей-оффи Ҷоми AFC-2023/24 аз бошгоҳи «Марв»-и Туркманистон бо ҳисоби 1:2 мағлуб шуд, аз ҳаққи ширкат дар марҳилаи гурӯҳии мусобиқот маҳрум гашт. Ин бозӣ рӯзи сешанбеи 22-юми август дар варзишгоҳи «20-солагии Истиқлолияти Тоҷикистон»-и шаҳри Хуҷанд доир гардид.
Дар нимаи аввали дидор мизбонон чандин имконияти хуби голзаниро аз даст доданд ва дастаҳо бидуни гол ба танаффус баромаданд.
Дар оғози нимаи дувуми дидор меҳмонон фаъолтар шуда, дар дақиқаи 54-ум ҳисобро кушоданд. Мурод Яхшиев тӯби ба ҷаримагоҳ ирсолкардаи ҳамдастаашро аз масофаи наздик ба дарвозаи «Хуҷанд» ворид кард. Аммо баъди 25 дақиқа Парвиз Боқиев бо зарбаи нишонрас аз масофаи наздик ҳисобро баробар намуд – 1:1.
Ҳамин тариқ, дар 90 дақиқаи замони асосии дидор ғолиб муайян нашуд. Бар асоси дастури мусобиқот 30 дақиқа (ду қисми 15-дақиқагӣ) таъйин гардид.
Дар қисми дуюми замони изофа, дар дақиқаи 112-ум, бозигари «Хуҷанд» Фирдавс Абдусалимов, ки корти дувуми зард гирифт, аз майдон хориҷ шуд.
Пас аз ду дақиқа Мурод Овезмуродов, ҳамлагари «Марв», бо зарбаи сар тӯбро аз дохили ҷаримагоҳ ба дарвозаи «Хуҷанд» зада, бозиро бо ҳисоби 2:1 ба нафъи меҳмонон анҷом дод.
Ба ин тартиб, «Хуҷанд» (сармураббиаш Фаррух Марофиев) аз ҳаққи ширкат дар марҳилаи гурӯҳии Ҷоми AFC-2023/24 маҳрум гашт. “Марв” бошад, бо роҳбарии сармураббӣ Виталий Алиакбаров муборизаро дар марҳилаи гурӯҳии мусобиқот идома медиҳад.
Дар марҳилаи гурӯҳии Ҷоми AFC-2023/24 дар минтақаи марказӣ бошгоҳҳои «Равшан» (Тоҷикистон), «Алтин Асир», «Марв» (ҳарду аз Туркманистон) ва «Абдиш-Ота» (Қирғизистон) бозӣ хоҳанд кард.
Ҷоми AFC-2023/24
Минтақаи марказӣ. Даври плей-офф
«Хуҷанд» (Тоҷикистон) – «Марв» (Туркманистон) – 1:2 (замони асосӣ – 1:1).
Голҳо: Мурод Яхшиев, 54 (0:1), Парвиз Боқиев, 79 (1:1), Мурод Овезмуродов, 114 (1:2).
Аз майдон хориҷ шуд: Фирдавс Абдусалимов («Хуҷанд»),112 - барои корти дувуми зард.
Сардовар: Яҳё Алӣ Муҳаммад Ҳасан Ал-Мулло (Имороти Муттаҳидаи Араб)
Нозири доварон: Маҳюб Содиқ (Фаластин).
Комиссари бозӣ: Муҳаммад Абдулло Назмӣ Манго (Урдун).
22 август. Хуҷанд. Варзишгоҳи «20-солагии Истиқлолияти Тоҷикистон». 4500 тамошобин.
Гуфтугӯ