Федератсияи байнулмилалии ҷудо (IJF) дар сомонаи расмии худ феҳристи нави варзишгаронро дар радабандии инфиродии ҷаҳонӣ нашр кард, ки паҳлавони маъруфи тоҷик Темур Раҳимов мавқеи пешсафиашро дар вазни сангинтарин миёни мардон нигоҳ дошт.
Темур Раҳимов дар феҳристи ҷаҳонӣ миёни мардон дар вазни беш аз 100 кило бо 6024 имтиёз дар ҷойи аввал қарор дорад. Ин натиҷа дар байни варзишгарони тоҷик беҳтарин аст. Дар ин феҳрист дар вазни сангинтарин варзишгари гурҷӣ Гурам Тушишвили бо 4699 имтиёз мақоми дувумро азони худ кардааст.
Темур Раҳимови 25-сола дар таърихи ҷудои тоҷик нахустин барандаи медали тиллои Grand Slam дар шаҳри Бокуи Озарбойҷон гардид. Вай ҳамчунин соли гузашта дар мусобиқаи ҷаҳонии устодони ҷудо Masters дар шаҳри Йерусалими Исроил дар вазни беш аз 100 кило медали нуқра гирифт, ки ин аввалин медали варзишгарони тоҷик дар ин мусобиқоти бонуфуз мебошад.
"Ман орзу дорам, ки ба мисли Расул Боқиев дар қаҳрамонии ҷаҳон ва Бозиҳои олимпӣ медал ба даст биёрам”, - гуфт Темур Раҳимов ба Радиои Озодӣ.
Комроншоҳ Устопириён дар радабандии ҷаҳонӣ дар вазни то 90 кило бо 2875 имтиёз ҷойи 15-умро ишғол мекунад. Ин дар байни варзишгарони тоҷик натиҷаи дувум аст. Дар феҳристи ҷаҳонӣ дар вазни то 90 кило варзишгари узбекистонӣ Давлат Бобонов бо 6298 имтиёз мақоми аввалро соҳиб шудааст.
Эмомалӣ Нуралӣ дар радабандии ҷаҳонӣ дар вазни то 66 кило бо 1240 имтиёз дар ҷойи 35-ум ва дар байни варзишгарони тоҷик дар ҷойи севум аст. Дар ин вазн Денис Вйеру аз Молдова бо 7484 имтиёз дар радабандии ҷаҳонӣ мақоми аввалро касб кардааст.
Сомон Маҳмадбеков дар радабандии ҷаҳонӣ дар вазни то 73 кило бо 1241 имтиёз дар ҷойи 38-ум мебошад. Ин натиҷа дар байни варзишгарони тоҷик чаҳорум аст. Дар вазни то 73 кило Лаша Шавдатуашвилии гурҷӣ бо 6615 имтиёз дар ҷойи аввал мебошад.
Ҳамчунин Сомон Маҳмадбеков дар вазни то 81 кило бо 910 имтиёз дар ҷойи 49-ум қарор дорад. Ин натиҷа дар байни варзишгарони тоҷик шашум аст. Дар феҳристи ҷаҳонӣ дар ин вазн Тато Григалашвили аз Гурҷистон бо 9296 имтиёз мақоми аввалро азони худ кардааст.
Беҳрӯзи Хоҷазода дар феҳристи ҷаҳонӣ дар вазни то 73 кило бо 1027 имтиёз ҷойи 47-умро гирифтааст. Ӯ дар миёни варзишгарони тоҷик дар зинаи панҷум қарор дорад.
Шодмон Ризоев дар радабандии ҷаҳонӣ дар вазни то 81 кило бо 796 имтиёз дар ҷойи 54-ум ва дар байни варзишгарони тоҷик дар ҷойи ҳафтум аст.
Шаҳбоз Саидаброров дар радабандии ҷаҳонӣ дар вазни то 66 кило бо 744 имтиёз дар мақоми 60-ум қарор дорад. Ин натиҷаи ӯ дар байни варзишгарони тоҷик ҳаштум аст. Инчунин Шаҳбоз дар вазни то 60 кило бо 445 имтиёз дар ҷойи 77-ум мебошад. Ин натиҷа дар миёни варзишгарони тоҷик даҳум аст. Дар вазни то 60 кило Юнг Вей Янг аз Тайпейи Чин бо 7045 имтиёз дар феҳристи ҷаҳонӣ мақоми аввалро азони худ кардааст.
Муҳаммадраҳим Сарахонов дар феҳристи ҷаҳонӣ дар вазни то 73 кило бо 650 имтиёз дар ҷойгоҳи 69-ум қарор дорад. Натиҷаи ӯ дар байни варзишгарони тоҷик нӯҳум аст.
Гуфтугӯ