Муҳаммадхуҷа Ёқубов, муштзани тоҷик, ба муҳорибаи 21-уми худ дар бокси ҳирфаӣ, ки моҳи феврал баргузор мешавад, омодагӣ мебинад. Аммо то ҳоло рақибаш маълум нашудааст.
Қаблан хабар дода шуда буд, ки дорандаи унвони WBC International дар вазни дуюми нимсабук Муҳаммадхуҷа Ёқубов мумкин аст бо қаҳрамони ҷаҳон аз рӯи фарзияи IBF Шавкатҷон Раҳимов вориди рақобат шавад.
Вале Ёқубов муҳорибаи эҳтимолӣ бо Раҳимовро рад карда, гуфт, “ману Шавкат зуд-зуд дар тамринҳо рақобат мекунем, ҳамдигарро бераҳмона мезанем, вале ӯ барои ман бародар аст ва мо ҳеҷ гоҳ бо ҳам ҷанг нахоҳем кард.»
Муҳаммадхуҷа Ёқубов дар муҳорибаи охирини худ дар мусобиқоти байналмилалии бокси ҳирфаӣ “RСС boxing Promotions”, ки 11-уми сентябри соли гузашта дар шаҳри Челябински Русия доир гардид, бар Карлос Даниэл Кордобаи аргентинӣ пирӯзӣ ба даст овард. Рақобат аз ҳашт раунд иборат буд.
Ёқубов доимо ҳуҷум мекард ва мехост қувваозмоиро пешакӣ ба анҷом расонад, вале Кордоба то тасмими доварон истодагарӣ кард. Ҳамаи доварон Муҳаммадхуҷа Ёқубовро ғолиб донистанд.
Зимнан, ин 19-умин пирӯзии Муҳаммадхуҷа Ёқубов дар бокси ҳирфаӣ ба шумор меравад. Ӯ дар даҳтоаш бо нокаут ғолиб шудааст. Ин муштзани 27-солаи тоҷик танҳо дар як рақобаташ 18-уми марти соли 2022 аз О'Шаки Фостери амрикоӣ мағлуб шудааст.
Муҳаммадхуҷа Ёқубов 31-уми марти соли 1995 дар шаҳри Исфараи Тоҷикистон таваллуд шудааст. Аввалин рақобати ӯ дар бокси ҳирфаӣ 12-уми декабри соли 2015 доир гардидааст. Қадаш 1 метру 65 сантиметр, вазнаш 58,6 кг мебошад.
Ӯ ба як қатор унвонҳои баланд - ғолиби мусобиқоти минтақавӣ ва ҷавонон аз рӯи WBC International (2018 – то ҳоло), WBA Continental (2018), IBF Baltic (2018), WBO Youth (2016 - 2017), WBC Asian (2016 - 2017) даст ёфтааст. Лақабаш «Шер» аст. Шаҳрвандии Тоҷикистону Русияро дорад. Ҳоло дар шаҳри Сургути Русия ба сар мебарад.
Дар комёбиҳои ӯ саҳми устоди аввалинаш Додобек Фатҳуллоев, мураббии варзидаи бокси тоҷик, бузург аст. Феълан бо раҳбарии мураббӣ Владимир Видов тамрин мекунад.
Гуфтугӯ